Read Baibul, Mizo Jakoba 5 Bible Online

Jakoba 5 - Baibul, Mizo bible

Jakoba 5

¹Mi hausate u, ngai teh u khai! In chunga hrehawm lo thleng dawn mek avang chuan tap u la, chiau vak vak rawh u.

²In rote a chhe ta a, in puante sulrulin a ei zo ta.

³In rangkachak leh in tangkate a tuiek zo ta a; a tuiek chu in thiam lohzia hriattirna a ni ang a, in tisa chu mei kan angin a ei ang. Ni hnuhnungah chuan ro in khawl khawm a nih hi.

⁴Ngai teh u, in loa buh ata inhlawhfate hlawh, tihdera in pek loh kha; a au a, a attute mangang au thawm pawh chu Mipuite Lalpa bengah a lo lut ta a.

⁵Khawvelah hian nuamsa takin in awm a, in inkhawhral mai mai a; inthah niin in thinlung in titlai a.

⁶Mi fel chu thiam loh in chantir a,in that ta a; ani chuan a dodal lo a che u.

⁷Chutichuan, unaute u, Lalpa lo kal hma loh zawng chhel takin awm rawh u. Ngai teh u, lo neitu chuan ruah tui tla hmasa leh hnuhnung chu a hmuh hma loh chuan chhel takin lei rah hlu tak chu a nghak thin.

⁸Nangni pawh chhel takin awm rawh u; in thinlung tinghet rawh u; Lalpa lo kalna chu a hnai tawh si a.

⁹Unaute u, thiam loh changa in awm lohna'n, inphun suh u; ngai teh u, Roreltu chu kawngka bulah a ding reng a ni.

¹⁰Unaute u, Lalpa hming thusawitu zawlneite chu, tuar dan leh chhel dan kawngah chuan entawn atan hmang rawh u.

¹¹Ngai teh u, tuartute chu engthawl kan ti a; Joba chhelzia chu in hria a, Lalpa'n a tawpa a tihzia pawh kha in hmu bawk a, Lalpa chu khawngaihnain a khahzia leh zah a ngaih theihzia pawh kha.

¹²Nimahsela, ka unaute u, engpawh ti mah u la chhia chham suh u; van chhalin emaw, lei chhalin emaw, thil dang reng reng chhalin emaw chhia chham suh u; "Ni" in tih chu "Ni" ni se la, "Ni lo" in tih chu "Ni lo" ni rawh se; chutilochuan thiam loh changin in awm ang.

¹³In zingah thil tha lo tuar an awm em? Tawngtai rawh se. Hlim an awm em? Fakna hla sa rawh se.

¹⁴In zingah damlo an awm em? Kohhran upa kohtir se la, anin Lalpa hminga hriak hnawihin a chungah tawngtai rawh se;

¹⁵tin, rinnaa tawngtaina chuan damlo chu a chhandam ang a, Lalpa chuan ani chu a kai tho ang; tin, thil a lo tihsual tawh chuan ngaihdamsak a ni ang.

¹⁶Chutichuan, tihdama in awm theihna'n in sualte thupha chawi tawn u la, intawngtaisak tawn thin rawh u. Mi fel tawngtaina chuan thil nasa tak a ti thin.

¹⁷Elija chu keimahni nungchang ang pu mihring bawk a ni a, ani chuan ruah sur lohna'n thahnemngai takin a tawngtai a; tin, kum thum leh thla ruk chhung zawng lei chungah ruah a sur ta lo a.

¹⁸Tin, a tawngtai leh a, vanin ruah a surtir a, leiin a rahte a rawn chhuahtir ta a.

¹⁹Ka unaute u, in zinga mi tupawh thutak atang chuan bo se la, tin, tuin emaw hawi kirtir se la,mi sual a kawng bona ata hawi kirtirtu chuan thihna ata a thlarau a chhandam ang a, sual tam tak a khuhsak bawk ang tih inhre rawh se.

²⁰mi sual a kawng bona ata hawi kirtirtu chuan thihna ata a thlarau a chhandam ang a, sual tam tak a khuhsak bawk ang tih inhre rawh se.