Read Baibul, Mizo 1 Petera 3 Bible Online

1 Petera 3 - Baibul, Mizo bible

1 Petera 3

¹Chutiang bawkin nangni nupuite u, mahni pasalte thu thuin awm rawh u; chutichuan an zinga tupawhin thu chu awih lo mah se la, thu loin an nupuite chetziaa hnehin an awm thei ang,

²tih dek chunga in chetze thianghlim enin.

³In incheina chu pawn lam incheina - sam phiar te, rangkachak thi awrh te, silhfena inthuam te chu - ni loin,

⁴thinlunga mihring thuruk chu, rilru thuhnuairawlh leh nunnem, silhfen chhe thei loa inthuam ni zawk rawh se, chu chu Pathian mithmuhin a hlu em em a ni.

⁵Chutiangin hmasanga hmeichhe thianghlim Pathian ringtute pawh kha mahni pasalte thu thua awmin an inchei si thin a;

⁶Sari'n Abrahama chu "Lalpa" tiin a thu a awih ang khan. Engmah hlau loa thil tha in tih tlat chuan Sari fate in ni ang.

⁷Chutiang bawkin nangni pasalte u, in nupuite nen in khawsak danah bel keh awlzawk an nih hrethiam u la, khawngaih thilpek nunna chanpuitu che u an nih hriain chawimawi rawh u, tichuan in tawngtainate dal a ni dawn lo nia.

⁸A tawp berah chuan in zain rilru hmunkhatin awm u la, inlainat tawn u la, unau angin inhmangaih u la, khawngaihna nei u la, thuhnuairawlhin awm rawh u:

⁹sual, sualin thungrul suh u la, hauna haunain thungrul hek suh u la, malsawm hlauh zawk rawh u. He mi avangin koh in ni si, malsawmna chang tur hian.

¹⁰Nunna hmangaih duh leh ni thate hmuh duh chuan sual lakah a lei veng tha se la, a hmui pawh ngamthlemna thu sawi lo turin veng tha rawh se.

¹¹Sual hawisanin thil tha ti rawh se; remna zawngin um zel rawh se.

¹²Lalpa mit chu mi felte chungah a fu a, a beng pawh an tawngtaina lamah a chhi si thin a, amaherawhchu, Lalpa hmel chu thil tisualtute chungah a awm thin," tih a ni si a.

¹³Thil tha lama thahnem in ngaih chuan in pawi khawihtu tur tu nge awm ang?

¹⁴Nimahsela, felna avanga lo tuar ta ang in nih chuan in eng a thawl ang. An hlauhawmna chu hlau suh u la, mangang hek suh u;

¹⁵amaherawhchu in thinlungah Krista chu Lalah ruat rawh u; nangmahnia awm in beisei chhan zawt apiang che u chhang turin inpeih sa fo ang che u, nimahsela thuhnuairawlh tak leh tih dek chungin;

¹⁶chhia leh tha hriatna thiang tak nei u la, chutichuan an sawichhiatna che u kawngah chuan Kristaa in awm dan tha tak sawihnawmtute chu tihmualphoin an awm thei ang.

¹⁷Thil sual tih vanga tuar ai chuan Pathian remtihzawng a nih chuan thil tha tih vanga tuar hi a tha zawk si a.

¹⁸Pathian hnena min hruai theihna'n Krista chuan sualte avangin vawi khat a tuar bawk si a, mi fel chuan mi fel lo aiin a tuar a, tisaah chuan tihthihin a awm a, thlarauvah erawh chuan tihnunin a awm ta a;

¹⁹chu chuan tan ina thlarau awmte hnenah chuan thu a zuk tlangaupui a,

²⁰chu chuan hmana Nova dam laia lawng siam chhung zawnga Pathian dawhtheihnain a nghah lai khan an awih lo a; chu lawngah chuan mi tlem te (chu chu mi pariat tihna a ni) tuia chhandamin an awm ta:

²¹chu mi anpui (baptisma) chuan Isua Krista thawhlehna avangin tunah a chhandam che u a ni, (tisa bawlhhlawh tihfai mai ni loin, chhia leh tha hriatna thianga Pathian lamna hi a ni zawk e);Isua Krista chu vanah kalin Pathian ding lamah a awm a; vantirhkohho te, thuneihna te, thiltihtheihna te ama thu thua awmtirin an awm a.

²²Isua Krista chu vanah kalin Pathian ding lamah a awm a; vantirhkohho te, thuneihna te, thiltihtheihna te ama thu thua awmtirin an awm a.