Read Baibul, Mizo 2 Petera 1 Bible Online

2 Petera 1 - Baibul, Mizo bible

2 Petera 1

¹Simon Petera, Isua Krista bawih leh tirhkoh chuan Isua Krista kan Pathian leh chhandamtu felna avanga rinna hlu tak kan chan ang chang vete hnenah:

²Pathian leh kan Lalpa Isua hriatnaah chuan in chungah khawngaihna leh remna tihpunin awm rawh se.

³Ama ropuina leh thatna zara min kotu, a chanchin hriat avangin a Pathian thiltihtheihnain nunna leh Pathian ngaihsakna lam kawngah chuan thil zawng zawng min pe si a.

⁴Chung zarah chuan a thutiam hlu tak leh ropui nasa takte chu min pe a ni; chutichuan chakna avanga khawvela chhiatna lo awm hi tlan chhuahsan tawhin, chung thutiam hlu tak leh ropui nasa takte avang chuan Pathian nungchang in tawmpui ve thei ang.

⁵A ni, chu mi avang tak chuan taihmak reng reng chhuahin, in rinnaah chuan thatna telh u la, in thatnaah chuan hriatna telh u la,

⁶in hriatnaah chuan insumna telh u la, in insumnaah chuan chhelna telh u la, in chhelnaah chuan Pathian ngaihsakna telh u la,

⁷In Pathian ngaihsaknaah chuan unaute hmangaihna telh u la, in unaute hmangaihnaah chuan hmangaihna telh rawh u.

⁸Chung chu in ta a nih a, a pun zel si chuan kan Lalpa Isua Krista hriatna kawngah hian thatchhe lo leh rah lo loin a siam thin che u a ni.

⁹Tupawh chung thil nei lo chu mitdel a ni a, hnai tea mi chauh a hmu thei a, a hman lai sualte tlenfaisakna chu a theihnghilh ta si a.

¹⁰Chuvangin, unaute u, a kohna leh a thlanna che u chu tinghet turin taihmak chhuah lehzual rawh u; chung chu in tih zawngin engtikah mah in tlu lo ang;

¹¹chutichuan Isua Krista kan Lalpa leh Chhandamtu chatuan rama luh theihna chu an pe ngei dawn si che u a.

¹²Chuvangin, chung thil chu hriain thutak in hnena awmah chuan in nghet na a, chung thil chu hriattir che u ka inpeih fo ang.

¹³Tin, he bawktea ka awm chhung zawng hian nangmahni hriatpuiin chawh harh fo che u tha ka ti a ni;

¹⁴kan Lalpa Isua Kristan mi hriattir ang khan ka bawkte dah bo hun chu a thleng thuai ang tih ka hre si a.

¹⁵A ni, ka kal chhuah hnuin chung thil chu in hriat reng fo theihna'n ka bei ang.

¹⁶Kan Lalpa Isua Krista thiltihtheihzia leh a lo kal lehna thu chu ka hriattir lai che u khan, thawnthu fing taka ngaihtuah chhuah maite zawm kan ni lo a, a ropuina hmutute kan ni zawk a sin.

¹⁷Ani chuan Pa Pathian hnen ata chawimawina leh ropuina a hmu a, chu mi lai chuan ropuina nasa tak atang chuan hetiang aw hi a hnenah a lo thleng a: "Hei hi ka Fapa duh tak, ka lawm em ema chu a ni," tiin.

¹⁸Tin, tlang thianghlimah chuan a hnena kan awm lai khan chu aw chu van atangin a lo chhuak keimahni ngeiin kan hria a ni.

¹⁹Tin, hril lawkna thu nghet lehzual chu kan nei a ni, khua a lo var a, varparh arsi chu in thinlunga a lo chhuah hma loh zawng chu chu khawnvar hmun thima eng an ngaihsak anga in ngaihsak chuan in titha ang.

²⁰Pathian Lehkhaa thu hril lawk reng reng hi mahniin hrilhfiah tur a ni lo tih hre hmasa phawt u la.Thu hrilh lawk reng reng hi mihring thua chhuak a ni ngai si lo a, miten Thlarau Thianghlim tirhin Pathian hnen ata an sawi zawk thin a ni.

²¹Thu hrilh lawk reng reng hi mihring thua chhuak a ni ngai si lo a, miten Thlarau Thianghlim tirhin Pathian hnen ata an sawi zawk thin a ni.