Read Baibul, Mizo 2 Petera 2 Bible Online

2 Petera 2 - Baibul, Mizo bible

2 Petera 2

¹Nimahsela, mite zingah chuan zawlnei derte pawh an lo chhuah kha, chutiangin in zingah pawh zirtirtu derte an la awm ang, anni chuan anmahni leitu Lalpa meuh chu phatsanin, mi tichhe thei rin hrannate arukin an rawn luhpui ang a, mahni chungah chawplehchilha boralna an thlentir ang.

²Tin, mi tam takin an hurna lam thiltihte chu an ching ve ang a, anmahni avangin kawng dik tak chu sawichhiat a ni ang.

³Tin, sum awh avangin dawt thuin sumdawnna'n an hmang ang che u; nimahsela hmana an chunga thu rel tawh chu a la ding reng a, anmahni tiboraltu tura pawh a muhil lo e.

⁴Vantirhkohten thil an tihsual lai khan Pathianin a zuah lo a, hremhmunah a paih a, rorelsaka khek turin khuarkhurum thimah a khung zawk si a;

⁵tin, amah ngaihsak lote awmna khawvelah khan tui tiletin hman lai khawvel chu a zuah lo a, nimahsela Nova, felna thu hriltu chu, mi dang pasarih nen a chhandam ta a;

⁶tin, Sodom leh Gomorra khuate chu amah ngaihsak lo, la awm turte entirnaah a hmang a, vuta chantirin, tiboralin thiam loh a chantir ta a;

⁷tin, Lota, mi fel, mi sualte awm dan hur tak avanga lungngai em ema chu a chhandam ta a;

⁸(chu mi fel chu an zinga a awmin, a mitin a hmu a, a bengin a hria a, dan lo anga an thiltihte chuan a rilru fel chu ni tin a intina em em si thin a);

⁹Lalpa chuan amah ngaihsaktute chu thlemna ata chhan chhuah dan leh fel lote chu rorel ni atan chuan hrem chunga khek dan a hria;

¹⁰chakna bawlhhlawh kawng tisa anga awm leh rorelsakna hmusittute lek phei chu rorel ni atan hrem chunga khek dan a hre lehzual a ni. Athuai leh tihmawh an ni a, ropuinate an sawichhiat pawhin an khur ngai lo;

¹¹vantirhkoh, chakna leh thiltihtheihna nei zawkte mahin Lalpa hmaah chuan an chung thu relsakin an sawichhiat si loh kha.

¹²Nimahsela, he'ng nungcha ngaihtuahna nei lo, mana tihboral tura sa chauhva piangte ang hian, thil an hriat lohte chu sawichhiain, anmahni chhiatnain an chhe ngei ang,

¹³thil tihsual mana thil sual tuarin. Chhuna ruaitheh buai nuam ti mi an ni a. In hnena ruai an thehin, anmahni inbumna ruaitheh an nih avangin bawlhhlawh kaite leh tihkhawlohnate an ni a;

¹⁴mit uirea khat, sual ban thei lote an nei a; mi nghet lote an thlem thlu a; awh hmang thinlung an pu a; anchhe dawng fate an ni a;

¹⁵Bosara fapa Balaama, thil tihsual hlawh ngainatu kawng chu an zawh tawh avangin kawng dik chu an kalsan a, an vak bo ta a;

¹⁶nimahsela ani chu a bawhchhiatna avangin zilhhauin a awm ta a; sabengtung tawng thei lo chu mihring tawngin a lo tawng a, zawlnei atna chu a khap a ni.

¹⁷Chung chu tuikhur tui awm lo leh chhum thlipui chhem len an ni; chungte tan chuan thim chhah mup chu ruat a ni tawh.

¹⁸Thu lawilo pawr tak taka sawiin suala awmte zing ata tlan chhuak mekte chu tisa chaknaah hurnain an thlem thlu si thin.

¹⁹Anmahni chu chhiatna bawih ni chung rengin mite chu bawih chhuah thu an tiam thin a; mi ngamtu apiangin chu mi ngei chuan bawihah a siam thin a ni.

²⁰Lalpa leh Chhandamtu Isua Krista an hriat avangin khawvel bawlhhlawhnate an tlan chhuahsan hnuin chu mi vekah chuan an tan leh a, ngamin an awm leh si chuan an awmze hnuhnung chu atir ai chuan a lo chhe ta zawk a ni ang.

²¹Kawng fel chu hriat hnua thupek thianghlim an hnena kawltir chu hawisan ai chuan kawng fel chu hre lo se la an tan a tha zawk tur a ni si a."Ui ama luak lamah a kir leh a, vawkpui inbualfai tawh pawh chirhdiakah inbual turin a kir leh a," tih thufing tawi dik tak ang thu chu an chungah a lo awm ta a ni.

²²Ui ama luak lamah a kir leh a, vawkpui inbualfai tawh pawh chirhdiakah inbual turin a kir leh a," tih thufing tawi dik tak ang thu chu an chungah a lo awm ta a ni.