Read Baibul, Mizo 1 Johana 2 Bible Online

1 Johana 2 - Baibul, Mizo bible

1 Johana 2

¹Ka naute u, thil in tihsual lohna'n he'ng thu hi in hnenah ka ziak a nih hi. Tin, tupawhin thil a tihsual chuan Pa hnena mi sawipuitu, Isua Krista mi fel chu kan nei e;

²ani chu kan sualte thupha chawina a ni; keimahni sual chauh ni loin, khawvel zawng zawng sual thupha chawina pawh a ni.

³Tin, a thupekte pawm kan nih chuanin chu miah chuan amah kan hria tih kan inhria e.

⁴A thupekte pawm si loin, "Amah ka hria," titu chu mi dawthei a ni, thutak amahah a awm lo.

⁵Tupawh a thu pawm erawh chu amahah chuan Pathian a hmangaihna a famkim tak zet tawh a ni. Amahah kan awm tih he miah hian kan inhria a ni.

⁶Amahah ka awm reng thin," titu chu ama awm ang bawk khan a awm ve tur a ni.

⁷Duh takte u, thupek thar zawng in hnenah ka han ziak lo a; thupek hlui, atir ata in neih kha ka ziak zawk a ni. Chu thupek hlui chu in thu hriat tawh hnu kha a ni.

⁸Nimahsela, thupek thar ziak ka ni bawk ang chu, (chu chu amahah leh nangmahniah a lang a ni), thim chu a bo mek avang leh eng taktak chu tunah a lo en tak avang hian.

⁹Mahni unau haw si a, "Engah ka awm," titu chu tun thleng pawhin thimah a la awm reng a ni.

¹⁰Mahni unau hmangaihtu chu engah chuan a awm reng a, amahah chuan tlukna reng a awm lo.

¹¹Mahni unau hawtu erawh chu thimah a awm a, thimah a vak bawk a ni; thimin a mit a tihdel tawh avangin a kalna pawh a hre thin lo.

¹²Naute u, ama hming avanga in sualte ngaihdam a nih tak avangin in hnenah ka ziak a nih hi.

¹³Pate u, amah, atir ata awm renga chu in hriat avangin in hnenah ka ziak a nih hi. Rawltharte u, mi sual chu in ngam tak avangin inhnenah ka ziak a nih hi.Naute u, Pa chu in hriat avangin in hnenah ka ziak a nih kha.

¹⁴Pate u, amah, atir ata awm renga chu in hriat avangin in hnenah ka ziak a nih kha. Rawltharte u, in chak a, Pathian thu nangmahniah a awm reng a, mi sual chu in ngam tak avangin in hnenah ka ziak a nih kha.

¹⁵Khawvel hi hmangaih su u la, khawvela thil awmte pawh hi hmangaih hek suh u. Mi tupawhin khawvel hi a hmangaih chuan Pa a hmangaihna amahah a awm lo.

¹⁶Khawvela thil awm zawng zawng, tisa chakna te, mit chakna te, dam chhung ropuina lem te hi Paa chhuak a ni lo a, khawvela chhuak a ni zawk si a.

¹⁷Khawvel hi a chaknate chawpin a boral mek a ni, Pathian duhzawng titu erawh chu kumkhuain a awm reng ang.

¹⁸Naute u, hun hnuhnung ber chu a ni ta e, Krista dodaltu a lo kal ang tih in hriat ang khan, tunah pawh Krista dodaltu tam tak an lo chhuak ta; chuvang chuan hun hnuhnung ber a ni ta tih kan hria e.

¹⁹Anni chu kan zing atangin an chhuak a, nimahsela keimahni mi tak an ni lo e; keimahni mi tak ni se la kan hnenah an awm ve zel tur a ni si a; nimahsela an zain keimahni mi tak an ni lo vek tih a lan fiah theihna'n min chhuahsan ta a ni.

²⁰Mi Thianghlim hnen ata hriak thihna in dawng a, chu chu in zain in hria e.

²¹Thutak chu in hriat loh avangin ka ziak a ni lo, in hriat avang leh Thutakah dawt engmah a chhuah ngai loh avangin ka ziak zawk a ni.

²²Isua chu Krista a ni tih awih lotu aliama dawthei tu nge awm? Krista dodaltu chu Pa leh Fapa awih lotu hi a ni.

²³Tupawh Fapa awih lo chuan Pa pawh a pawm chuang lo; Fapa awihtu erawh chuan Pa pawh a pawm a ni.

²⁴Nangni zawngin atir ata in hriata kha nangmahniah awmtir reng rawh u. Chu mi atir ata in hriata chu nangmahnia a awm reng chuan nangni pawh Fapaah leh Paah chuan in awm reng ang.

²⁵Tin, hei hi a ni amah ngeiin thil min tiama kha - chatuana nunna hi.

²⁶Chung nangmahni hruai bo tumtute thu chu in hnenah ka ziak a ni.

²⁷Nangni zawng ama hnen ata hriak thihna in hmuh kha nangmahniah a awm reng a, tuma zirtir in ngai lo e; ama hriak thihna chuan thil zawng zawng thu a zirtir zawk che u avang leh dik tak a ni a, dawt pawh a nih loh avangin, chu mi chuan a zirtir che u ang khan amahah awm reng rawh u.

²⁸Chutichuan, naute u, amahah awm reng rawh u; tichuan amah chu lo inlar mah se la, a lo kalin a hmaah zak loin huai takin kan awm thei ang.Amah chu mi fel a ni tih in hriat chuan mi tupawh felna ti chu ama hrin a ni tih in hria e.

²⁹Amah chu mi fel a ni tih in hriat chuan mi tupawh felna ti chu ama hrin a ni tih in hria e.