Read Baibul, Mizo 1 Johana 4 Bible Online

1 Johana 4 - Baibul, Mizo bible

1 Johana 4

¹Duh takte u, thlarau nazawng ring suh u, amaherawhchu thlaraute chu Pathian laka mi an ni nge ni lo fiah rawh u; thu hriltu der tam tak khawvelah an lo chhuah tak avangin.

²He miah hian Pathian Thlarau chu in hria ang: thlarau engpawh Isua Krista tisaah a lo chang tih tan chu Pathian laka mi a ni;

³thlarau engpawh Isua tan lo chu Pathian laka mi a ni lo e; chu chu Krista dodaltu thlarau, lo kal tur in hriata kha a ni e; tunah pawh khawvelah a awm tawh reng a ni.

⁴Naute u, Pathian hnen ata in ni a, chung chu in ngam tawh e; nangmahnia awma chu khawvela awma ai chuan a ropui zawk avangin.

⁵Anni chu khawvela mi an ni a; chuvangin khawvela mi angin an tawng a, khawvelin an thu an ngaithla thin a ni.

⁶Keini Pathian laka mi kan ni a, Pathian hretu chuan kan thu a ngaithla thin a; Pathian laka mi lo chuan kan thu a ngaithla thin lo. Chungah chuan thlarau dik tak leh thlarau dik lo kan hria a ni.

⁷Duh takte u, i inhmangaih tawn theuh ang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a.

⁸Hmangaihna nei lo chuan Pathian a hre lo; Pathian chu hmangaihna a ni si a.

⁹He miah hian Pathian hmangaihna kan chungah a lo lang ta, amah avanga kan nun theihna turin Pathianin a Fapa neih chhun khawvela a rawn tirhah hian.

¹⁰He miah hian hmangaihna a awm, keimahni'n Pathian kan hmangaih ka ti a ni lo a, amahin min hmangaih a, kan sualte thupha chawina ni turin a Fapa a rawn tir ka ti a ni zawk e.

¹¹Duh takte u, Pathianin chuti kauva min hmangaih chuan keini pawh kan inhmangaih tawn theuh tur a ni.

¹²Tuma'n eng lai mahin Pathian an hmu ngai lo. Kan inhmangaih tawn chuan Pathian keimahniah a awm reng ang a, a hmangaihna pawh keimahniah a famkim bawk ang.

¹³Amaha kan awm reng leh amah chu keimahniah a awm reng tih he miah hian kan hria, a thlarau min pek tawh avang hian.

¹⁴Tin, Pain Fapa chu khawvel Chhandamtua awm turin a rawn tir tih kan hmu tawh a, kan hriattir a ni.

¹⁵Tupawh, "Isua Pathian Fapa a ni," tia tan apiang chu, amahah chuan Pathian a awm reng a, ani pawh chu Pathianah a awm reng bawk a ni.

¹⁶Pathianin keimahnia hmangaihna a neih chu kan hria a, kan ring bawk a ni. Pathian chu hmangaihna a ni; hmangaihnaa awm reng chu Pathianah a awm reng a, Pathian pawh amahah a awm reng a ni.

¹⁷He miah hian kan chungah hmangaihna a famkim tawh, rorel nia hlau loa kan awm theihah hianin; ama awm anga khawvelah hian kan awm avangin.

¹⁸Hmangaihnaah chuan hlauhna reng a awm lo: hmangaihna famkimin hlauhna a hnawt chhuak zawk thin a ni, hlauhnaah chuan hremna a awm si a; a hlautu chu hmangaihnaah a la famkim lo a ni.

¹⁹Amahin min hmangaih hmasak avangin kan hmangaih a ni.

²⁰Miin, "Pathian ka hmangaih e," tiin a unau haw si se la, amah chu dawthei a ni; a unau a hmuh tawh renga mah a hmangaih loh chuan Pathian a hmuh ngai loha chu engtin nge a hmangaih theih ang?Ama hnen ata he mi thupek hi kan nei, "Tupawhin Pathian a hmangaih chuan a unau pawh a hmangaih bawk tur a ni," tih hi.

²¹Ama hnen ata he mi thupek hi kan nei, "Tupawhin Pathian a hmangaih chuan a unau pawh a hmangaih bawk tur a ni," tih hi.