Read Baibul, Mizo 1 Johana 5 Bible Online

1 Johana 5 - Baibul, Mizo bible

1 Johana 5

¹Tupawh Isua hi Krista a ni tih ring chu Pathian hrin a ni; tupawh a hringtu hmangaih chuan a hrina pawh a hmangaih thin.

²He miah hian Pathian fate kan hmangaih tih kan hria, Pathian kan hmangaih a, a thupekte kan zawm hian.

³Pathian kan hmangaihna chu hei hi a ni, a thupekte kan zawm hi; a thupekte chu a khirh si lo a.

⁴Pathian hrin tawh phawt chuan khawvel a ngam zel si a; hei hi a ni, khawvel hneha ngamna chu, kan rinna hi.

⁵Isua hi Pathian Fapa a ni tih ringtu chauh lo chuan tuin nge khawvel ngam thin le?

⁶He mi hi a ni, tui leh thisena lo kala chu, Isua Krista hi; tui chauhvah ni loin, tuiah leh thisenah a ni zawk e.

⁷Hriattirtu chu Thlarau hi a ni, Thlarau chu thutak a nih avangin.

⁸Hriattirtu chu pathum an awm, Thlarau leh tui leh thisente chu; chung pathum chu an inthurual a ni.

⁹Mihring hriattirna mah kan pawm chuan Pathian hriattirna chu a ropui zawk si a; Pathian hriattirna chu hei hi a ni, "Ka Fapa chanchin ka hriattir tawh," tih hi a ni si a.

¹⁰Pathian Fapa ringtu chuan mahniah hriatna a nei a ni, Pathian ring lo tu chuan amah chu dawtheiah a siam a ni, Pathianin a Fapa chanchin a hriattir a rin loh avangin.

¹¹Hriattirna chu hei hi a ni, Pathianin chatuana nunna min pe a, chu mi nunna chu a Fapaah a awm a ni.

¹²Fapa chu neitu chuan nunna chu a nei; Pathian Fapa nei lotu chuan nunna chu a nei lo.

¹³Chatuana nunna in nei tih in inhriat theihna'n nangni Pathian Fapa hming ringtute hnenah he'ng thu hi ka ziak a ni.

¹⁴Hei hi ama chunga kan huaina chu a ni, engpawh a duhzawng anga kan dil chuan ani'n min ngaihthlaksak thin hi;

¹⁵tichuan engpawh kan dil apiang min ngaihthlaksak tih kan hriat chuan a hnena kan thil dila chu kan hmu tawh tih kan hria a ni.

¹⁶Tupawhin a unau thihna khawp ni lo sual tiin hmu se la, a dilsak ang a, tichuan Pathianin a diltu hnenah chuan thihna khawp ni lo sual titute tan chuan nunna a pe ang. Thihna khawp sual a awm a; chutiang lamah chuan a dilsak tur ka ti a ni lo e.

¹⁷Fel lohna zawng zawng hi sual a ni; thihna khawp ni lo sual pawh a awm bawk a ni.

¹⁸Tupawh Pathian hrin chuan thil a tisual lo tih kan hria e; Pathian Hrina khan amah chu a hum reng a, mi sual chuan tawh pawh a tawk thei lo reng a ni.

¹⁹Tin, Pathian laka mi kan nih leh khawvel pumhlum hi mi sual thu thuin a awm tih kan hria e.

²⁰Tin, Pathian Fapa chu a lo kal a, Mi Diktak chu hre thei turin hriat theihna min pe tih kan hre bawk a; tin, keini, a Fapa Isua Kristaa kan awm hian, Mi Diktakah chuan kan awm a ni. Ani chu Pathian dik tak a ni a, chatuana nunna pawh a ni.Naute u, milem lakah inthiarfihlim rawh u.

²¹Naute u, milem lakah inthiarfihlim rawh u.