Read Baibul, Mizo Roreltute 21 Bible Online

Roreltute 21 - Baibul, Mizo bible

Roreltute 21

¹Tin, Israel mite chuan Mizpe khuaah, "Kan zinga mi tumahin kan fanute hi Benjamin-ho nupuiah i neihtir hauh suh ang u," tiin chhia an chham a.

²Tin, mipuiho chu Bethelah an kal a, Pahian hmaah tlai thlengin an thu a, an awte chhuahin an tap vak vak a.

³Anni chuan, "Aw LALPA, Israelte Pathian, eng tizia nge Israelte zinga hetiang thil hi a lo awm a, vawiinah hian Israelte hi hnam khata kim ta lo nge ni le?" an ti a.

⁴Tin, heti hi ani a, a tukah chuan mipuiho chu zing takah an tho a, chutah chuan maicham an siam a, halral thilhlante leh remna thilhlante an hlan a.

⁵Tin, Israel thlahte chuan, "Israel hnam zawng zawng zinga LALPA hnena pungkhawmho zinga han tel ve lo chu tute nge ni le?" an ti a. Mizpe khuaa LALPA hnena han kal ve lo apiangte chu, "Tihhlum ngei tur ani ang," tiin chhia an lo chham tawh tlat si a.

⁶Tin, Israela thlahte chu an unau Benjamin-ho chungchangah chuan an inchhiar ta a, "Vawiinah hian Israel-ho zinga hnam khat chu chhawk an ni ta si a.

⁷A awm chhunate tan chuan annupui tur engtin nge kan tih tak ang le? Kan fanute hi nupuiah neihtir hauh lo turin LALPA hming chhalin chhia kan chham ta si a," an ti a.

⁸Tin, anni chuan, "Israel-ho hnasm zinga mi tu hnam ber nge ni Mizpe khuaa LALPA hmaa han inlan ve lo hi le?" an ti a. Tin, ngai teh, pungkhawmho awmna hmunah chuan Jabes-gilead mite chu pakhat mah an kal ve lo a.

⁹Mipuiho an han inchhiar chuan, ngai teh, Jabes-gilead rama awmte chu pakhat mah an lo awm lah lo a.

¹⁰Tin, inkhawmhote chuan mi huaisen tha thiau singkhat leh sanghnih an tir a, "Kal ta u la, Jabes-gilead rama awmte chu hmeichhie leh an fanaute tete nen khandaihin va sat hlum vek rawh u.

¹¹In tih dan tur chu hetiang ani , mipa zawng zawng leh hmeichia, mipa mutpui tawh phawt chu tiboral vek ang che u," tiin thu an pe a.

¹²Tin, Jabes-gilead rama awmte zingah chuan nula zali, mipa la pawl ngai hauh loh an hmu a; tichuan an awmna Silo khuaah chuan an hruai a, chu chu Kanaan ram a ni.

¹³Tin, inkhawmho zawng zawngte chuan mi an tir a, Rimon lungpuia awm Benjamin-ho an va bia a, an hnenah inrem thu an puang a.

¹⁴Tin, chu veleh chuan Benjamin-ho chu an kir ta a; tin, Jabes-gilead rama hmeichheho an zuahte chu an pe a: chuti chung pawhin an la indaih ta lo a.

¹⁵Tin, Israel hnam zinga LALPA'n intihhranna alo siam tak avangin mipuiho chu Benjamin-ho chungchangah chuan an inchhir ta a.

¹⁶Chutichuan inkhawmho upate chuan, "A la damte nupui tur hi engtin nge kan tih ang le, Benjamin-hozinga an hmeichhiate chu tihboral an lo ni ta si a?" an ti a.

¹⁷Anni chuan, "Israel hnam hi tihmanga a awm lohna'n Benjamin-ho la awm chhungte hi nge thlah kan neihtir theih ang le?"

¹⁸Kan fanute hi nupuiah kan neihtir thei si lo a," an ti a; Israela thlahte chuan, "Tupawh Benhamin-ho nupuia neihtir apiang chu anchhe dawngin awm rawh se," tiin chhia an lo chham tawh si a.

¹⁹Tin, anni chuan, "Ngai teh u, Bethel hmar lam, Bethelh atanga Sekem kalna lamlian chhak lampanga Lebona chhim lama awm Silo khuaah kum tin, LALPA tan kut a awm thin kha," an ti a.

²⁰Tin, anni chuan Benjamina thlahteho hnenah chuan, "Va kal ta u la, grep hmunah va chang ru tawh u;

²¹tin, lo thlir u la, tichuan ngai teh u, Silo khuaa nulaho lamnaa lam tura an lo chhuah chuan, grep hmun ata chu lo chhuak u la, Silo nulaho chu mahni nupui atan man theuh u la, Benjamin-ho ramah kal vek ang che u.

²²Tin, heti hi ani ang a, an pate emaw, an nutate emaw sawisel tura kan hnena an lo kal leh, an hnenah, 'Min khawngaih rawh u khai: indonaah khan an nupui tur kan lo mansak theuh ta si lo va: nangni lahin in lo pe bawk si lo va: lo pe ni ula, thiam loh in hlawh dawn si a,' kan lo ti dawn nia," tiin thu an pe a.

²³Tin, Benjamina thlahte chuan chutiang chuan an ti a, lamho zinga mi anmahni zat theuh nupuiah an man a, an kal bopui ta a: tin, an ram lamah chuan an hawng a, khawpui chu an chei leh a, chutah chuan an awm ta a.

²⁴Tin, chu veleh chuta tang chuan Israel thlahte chu mahni chi chi leh mahni hnam hnamin an intel hrang a, chuta ta chu anmhani ram theuhvah chuan an haw leh ta a.Chung lai chuan Israelte zingah lal reng reng an awm lo va: mi tinn mahni tha tihzawng zawngin an ti mai a ni.

²⁵Chung lai chuan Israelte zingah lal reng reng an awm lo va: mi tinn mahni tha tihzawng zawngin an ti mai a ni.