Read Baibul, Mizo Thu Puan 1 Bible Online

Thu Puan 1 - Baibul, Mizo bible

Thu Puan 1

¹Isua Krista thu puan chhuah, Pathianin a bawihte hriattir atan a hnena a pek, thil lo awm lawk tur thu chu; tin, chu chu a vantirhkoh hmangin a bawih Johana a rawn hriattir a;

²chu Johana chuan Pathian thu leh Isua Krista hriattirna thu, a thil hmuh zawng zawngte thu chu a hriattir a.

³He hrilh lawkna bu thu chhiartu leh ngaithlaa a chhunga thu ziak pawmtute chu an eng a thawl e; a hun chu a hnai tawh si a.

⁴Johana chuan Asia rama kohhran pasarihte hnenah chuan: Awm meka leh awm tawha leh lo la awm tura hnen atang te, a lalthutphah hmaa Thlarau pasarih awmho hnen atang te,

⁵Isua Krista, thu hretu rinawm tak, mitthi zing ata piang hmasa bera leh leia lalte roreltute hnen atang te chuan, khawngaihna leh remna in hnenah awm rawh se. Min hmangaiha a thinsenin kan sualte lak ata min tlan chhuak a,

⁶khua leh tuiah leh a Pathian leh a Pa lama puithiama min siamtu hnenah, a ni, ama hnen ngeiah ropuina leh rorelna chu chatuanin awm rawh se. Amen.

⁷Ngai teh u, ani chu chhumte nen chuan a lo kal dawn e; mit tinrengin a hmu ang a, a chhuntute ngei pawh khan; khawvela hnam zawng zawngin amah an tah bawk ang. A ni, Amen.

⁸Kei Alpha leh Omega ka ni," Lalpa Pathian, awm meka leh awm tawha leh lo la awm tura, Engkimtitheia chuan a ti a ni.

⁹Kei Johana, in unaupa leh, Isuaa hrehawmna te, khua leh tui te, chhelnate tawmpuitu che u hi, Pathian thu avang leh Isua hriattirna thu avangin Patmos thliarkar an tihah chuan ka awm a,

¹⁰Lalpa niah chuan Thlarauin ka lo awm a,tin, ka hnung lamah tawtawrawt ri ang, aw ring takin,

¹¹I thil hmuh tur chu lehkhabuah ziak la, kohhranho pawl sarihte hnenah Ephesi khuaah te, Smurna khuaah te, Pergamos khuaah te, Thuatira khuaah te, Sardis khuaah te, Philadelphia khuaah te, Laodikei khuaah te chuan thawn rawh," a tih ka hria a.

¹²Tin, mi biakna aw chu hmuh tumin ka han lehhawi ta a. Tin, ka han lehhawi chuan rangkachak khawnvar dahna pasarih ka hmu a;

¹³khawnvar dahna zingah chuan mi tu emaw mihring fa ang, ke ler thlenga puan sin, a awma rangkachak kawnghrena inhreng ka hmu bawk a.

¹⁴Tin, a lu leh a sam chu beram hmul angin a var a, vur ang maiin; a mitte chu meialh ang a ni a;

¹⁵a kephahte chu dar tle mi ang a ni a, rawh tuina meia rawh thianghlim tawh ang maiin; a aw chu tui tam tak ri ang mai a ni.

¹⁶Tin, a kut dinglam chuan arsi pasarih a keng a; a ka atang chuan khandaih hriam tawn hriam tak a chhuak a; a hmel chu ni sat vang lai tak ang a ni.

¹⁷Tin, amah chu ka hmuh veleh thi ang derin a ke bulah ka tlu ta a. Tin, ani chuan a kut ding lam chu ka chungah nghatin ka hnenah, "Hlau suh ang che; kei Hmasabera leh Hnuhnungbera leh,

¹⁸Mi Nunga chu ka ni, ka lo thi a, nimahsela ngai teh, kumkhua atan ka nung leh ta a ni. Thihna leh Mitthi Khaw chabite chu ka nei bawk a.

¹⁹Chutichuan, i thil hmuh tawhte leh thil awm mekte leh tun hnua thil lo awm turte thu chu ziak rawh;ka kut ding lama arsi pasarih awm i hmuhte leh rangkachak khawnvar dahna pasarihte thuruk chu. Arsi pasarih chu kohhran pasarihte tirhkoh an ni a; khawvar pasarih chu kohhran pasarihte chu an ni a.

²⁰ka kut ding lama arsi pasarih awm i hmuhte leh rangkachak khawnvar dahna pasarihte thuruk chu. Arsi pasarih chu kohhran pasarihte tirhkoh an ni a; khawvar pasarih chu kohhran pasarihte chu an ni a.