Read Baibul, Mizo Thu Puan 11 Bible Online

Thu Puan 11 - Baibul, Mizo bible

Thu Puan 11

¹Tin, luang, tiang ang hi mi a pe a, tichuan tuin emaw, "Tho la, Pathian biak in, maicham nen a chhunga betute nen teh rawh.

²Biak in pawn lama hung chhung kawtlai erawh chu teh tel suh, chu chu Jentailte hnena pek a ni tawh si a; anni chuan Khaw Thianghlim chu thla sawmli leh thla hnih an rapbet ang:

³Tin, ka thu hretu pahnihte hnenah chuan thu ka pe ang a, tichuan saiip puan sinin ni 1,260 chhung zawng thu an hril ang," a ti a.

⁴Chung chu oliv thing pahnih leh khawnvar dahna pahnih khawvel Lal hmaa dingte chu an ni.

⁵Tin, anni chu tupawhin tihnat an tum chuan anka atangin mei a lo chhuak a, an hmelmate chu a kangral thin. Tin, tupawhin anni chu tihnat tum ang se la, chutiang bawka tihhlumin an awm tur a ni.

⁶Chungte chuan an thu hrilh chhung zawng ruah sur lo tura van tihpin theihna an nei; an duh hun apianga thisena chantir turin tuite chungah thu a nei a, khawvel hi hremna tinrenga hrem turin thu an nei bawk a.

⁷Tin, an hriattirna thu chu an hrilh zawh huna leilawt atanga sakawlh lo chhuak chho tur chuan anmahni a do ang a, a hneh ang a, a tihlum ang.

⁸Tin, an ruang chu khaw ropui kawtthlerah chuan a awm reng ang a; chu khaw ropui chu thlarau lam thu-ah chuan Sodom leh Aigupta an ti a ni, chutah bawk chuan an Lalpa chu khenbehin a awm kha.

⁹Tin, mite zinga mi te, chite zinga mi te, tawngte zinga mi te, hnamte zinga miten ni thum leh a chanve an ruangte chu an en ang a, an ruangte chu thlana phum an phal lo ang.

¹⁰Tin, an thih avangin leia awmte chu an lawm ang a, hlimna an siam ang a, lawmnate an inthawn bawk ang; zawlnei pahnihte chuan leia awmte chu an tihhrehawm thin avangin.

¹¹Tin, ni thum leh a chanve hnuah chuan Pathian hnen ata nunna thaw chu an chhungah a lo lut a, an kein an ding ta a; tichuan a hmutute chuan an hlau ta em em a.

¹²Tin, an hnenah, "Hetah hian lo chho rawh u," tia van atanga aw ring tak an hria a. Tichuan, chhum zingah chuan vanah an chho ta a; an hmelmate chuan an hmu reng a.

¹³Tin, chu mi lai tak chuan lir nasa takin a lo nghing a, khua chu hmun sawma thena hmun khat a chim ta a, lirnghingah chuan mi 7,000 an thi a; tin, a bakte chuan an hlau a, van Pathian chu an chawimawi ta a.

¹⁴Chungpikna pahnihna chu a reh tawh a, ngai teh, Chungpikna pathumna chu a lo awm lawk dawn e.

¹⁵Tin, vantirhkoh pasarihna chuan a han ham a, tichuan, "Khawvel ram chu kan Lalpa leh a Krista ram a lo ni ta, ani chuan chatuanin ro a rel ang," tiin, vanah chuan aw ring takte a lo chhuak ta nghal a.

¹⁶Tichuan, Pathian hmaa an lalthutphaha upa sawmhnih leh pali thute chu an bawkkhup a,

¹⁷Aw Lalpa Pathian, Engkimtithei, awm mek leh awm tawh, i thiltihtheihna ropui tak chu laa ro i rel avangin lawmthu kan hrilh a che.

¹⁸Hnamte chu an thinur a, tin, i thinur chu a lo thleng ve thung a, mitthi ro relsak hun leh i bawih zawlneite hnenah te an lawmman pek hun leh lei tichhetute tihchhiat ve thung hun chu a lo thleng bawk a," tiin Pathian chibai an buk a.Tin, vana Pathian biak in chu an hawng a, tichuan a biak inah chuan a thuthlunna bawm chu a lo lang ta a; tin, kawlphe te, aw te, khawpui ri te, lirnghing te, rial nasa tak te a lo awm ta nghal a.

¹⁹Tin, vana Pathian biak in chu an hawng a, tichuan a biak inah chuan a thuthlunna bawm chu a lo lang ta a; tin, kawlphe te, aw te, khawpui ri te, lirnghing te, rial nasa tak te a lo awm ta nghal a.