Read Baibul, Mizo Thu Puan 14 Bible Online

Thu Puan 14 - Baibul, Mizo bible

Thu Puan 14

¹Tin, ka han en a, tin ngai teh, Beram No Zion Tlanga ding leh an chala a hming leh a Pa hming ziak, mi 1,44,000 a hnenah ka hmu a.

²Tin,van atanga englo ri,tui tam tak ri ang leh khawpui ri nasa tak ri ang ka hria a; tin, ka ri hriat chu tingtang kaituten an tingtang kaih ri ang a ni a;

³lalthutphah hmaah leh Thilnung pali leh upate hmaah chuan hla thar ni awm tak hi an sa a; tin, lei ata tlan tawh mi 1,44,000 te chauh lo kha chuan tuma'n chu hla chu an zir thei lo.

⁴Chung chu hmeichhe laka intibawlhhlawh lote chu an ni; nula thianghlim ang an ni si a. Chung chu Beram No a kalna apianga zuitute chu an ni. Chung chu Pathian tan leh Beram No tan rah hmasa ber ni turin mihring zing ata tlan an ni.

⁵An kaah dawt a chhuah reng miin an hre ngai lo; sawiselbo an ni si a.

⁶Tin, leia awmte hnenah leh hnam tinreng te, chi tinreng te, tawng tinreng te, mi tinreng te hnena tlangaupui tura chatuana Chanchin Tha nei vantirhkoh dang vanlaizawla thlawk ka hmu a;

⁷tin, ani chuan aw ring takin, "A rorel hun chu a lo thlen tak avangin Pathian chu hlau u la, chawimawi rawh u; van te, lei te, tuifinriat te, tuihna te siamtu chu chibai buk rawh u," a ti a.

⁸Tin, vantirhkoh dang a pahnihna chuan, "Babulon khaw ropui, a mi ngaih chin vanga thinurna uain hnam zawng zawng intirtu chu a tlawm ta, a tlawm ta," tiin a rawn zui a.

⁹Tin, vantirhkoh dang a pathumna chuan aw ring takin, "Tupawhin Sakawlh leh a lem chibai bukin an chalah emaw an kutah emaw chhinchhiahna an neih chuan,

¹⁰chu mite ngei chuan Pathian thinurna uain, a thinurna nova engmah pawlh loa siam chu an in ang a, vantirhkoh thianghlimte mithmuh leh Beram No mithmuhah chuan mei leh kata nghaisakin an awm bawk ang.

¹¹Tin, chung mite nghaisakna meikhu chu chatuanin a chho ang a; sakawlh leh a lem chibai buktute, a hming chhinchhiahna nei apiangte pawh chuan achhun azanin chawlh reng an nei lo ang," tiin anni chu a rawn zui a.

¹²Mi thianghlim, Pathian thupek awihtute leh Isua zuitu rinawmte tan hetah hian chhel a tulzia a lang.

¹³Tin, van atangin awin, "Heti hian ziak rawh:Tun hnuah chuan mitthi, Lalpaa thite chu an eng a thawl ang; Thlarauin, a ni, an thawhrimnate chu an chawlhsan tawh ang:an thiltihte chuan a rawn zui ve dawn si a, a ti e," a tih ka hria.

¹⁴Tin, ka han en a, tin, ngai teh, chhum var ka hmu a; tin, chhum chungah chuan mihring fapa ang tak hi rangkachak lallukhum khuma favah hriam tak kenga thu ka hmu bawk a.

¹⁵Tin, vantirhkoh dang, Pathian biak in atangin a lo chhuak a, chhum chunga thu hnenah chuan aw ring takin, "I favah kha phawrh la, at rawh; ah a hun tawh si a; lei buh khu a ngui tawh khu," a ti a.

¹⁶Tichuan, chhum chunga thu chuan a favah chu leiah a thlak a, lei buh chu an at ta a.

¹⁷Tin, vantirhkoh dang vana Pathian biak in atangin a lo chhuak leh a, ani pawh chuan favah hriam tak a keng bawk a.

¹⁸Tin, vantirhkoh dang, mei chunga thuneitu chu maicham atangin a lo chhuak leh a; tin, ani chuan aw ring takin, "I favah hriam tak kha phawrh la, leia grep hrui rah bawrte khu zuk at rawh; grep rahte khu a hmin tuah tawh khu," tiin favah hriam tak kengtu chu a au a.

¹⁹Tichuan, vantirhkoh chuan a favah chu leiah a thlak a, leia grep rah chu a at a, grep sawrna khur zau tak, Pathian thinurna grep sawrna khurah chuan a theh lut a.Tin, khaw pawn lama grep sawrna khurah chuan an rap sawr a, tichuan, grep sawrna khur atang chuan thisen a lo chhuak a, fing 1,600 chen, nghawng thlenga thuk a ni.

²⁰Tin, khaw pawn lama grep sawrna khurah chuan an rap sawr a, tichuan, grep sawrna khur atang chuan thisen a lo chhuak a, fing 1,600 chen, nghawng thlenga thuk a ni.