Read Baibul, Mizo Thu Puan 2 Bible Online

Thu Puan 2 - Baibul, Mizo bible

Thu Puan 2

¹Ephesi khuaa kohhranho tirhkoh hnenah chuan heti hian ziak rawh: 'A kut ding lama arsi pasarih kenga, rangkachak khawvar dahna pasarih zinga vei veia khan he'ng thu hi a sawi a ni;

²I thiltihte, i thawh rimzia leh i chhelzia te, mi sualte i ngaihtheih lohzia te ka hria. Tirhkoh ni si loa tirhkoh intite chu i fiah bawk a, dawthei an ni tih i lo hre tawh a;

³chhelna i nei bawk a, ka hming avangin i tuar tawh a, i chau si lo a.

⁴Nimahsela, demna che ka nei a ni, i hmangaihna hmasa ber kha i ban tak avangin.

⁵Chutichuan, i tluksan tak chu hre reng la, simin, atira i thiltihte kha ti leh rawh, chutilochuan i hnenah ka lo kal ang a, i sim loh zawngin i khawnvar dahna kha a hmun ata ka sawn ang.

⁶Nimahsela, hei hi i thatna chu a ni, Nikola ho thiltihte i huat hi; chu chu kei pawhin ka haw ve a ni.

⁷Thlarauin kohhranho hnena thu a sawi hi beng nei chuan hre rawh se. A hnehtu apiang Pathian Paradis-a Nunna Thinga mi ka eitir ang, a ti e,' tiin.

⁸Tin, Smurna khuaa kohhranho tirhkoh hnenah chuan heti hian ziak rawh: 'Hmasabera leh Hnuhnungbera,thia lo nung leh taa khan he'ng thu hi a sawi a ni:

⁹I hrehawmzia te, i pachhiatzia te (nimahsela i hausa si a), Juda tak ni lo a, Setana inkhawmna in ho ni zawk si a, Juda intihoten an sawichhiat dan che ka hria.

¹⁰I tuar turte hi hlau suh:ngai teh, fiaha in awm theihna'n diabola chuan in zinga mi thenkhat tan inah a khung dawn che u a ni; tin, ni sawm hrehawm in tuar ang. Thih thlengin rinawmin lo awm rawh, tichuan nunna lallukhum ka pe ang che.

¹¹Thlarauin kohhranho hnena thu a sawi hi beng nei chuan hre rawh se. A hnehtu apiang thih hnihna chuan engmah a tih lo ang, a ti e' tiin.

¹²Tin, Pergamos khuaa kohhranho tirhkoh hnenah chuan heti hian ziak rawh: 'Khandaih hriam tawn hriam tak neia khan he'ng thu hi a sawi a ni:

¹³I awmna, Setana thutphah awmna kha ka hria:tin, ka hming i vawng tlat a, ka thu hretu Antipa, Setana awmnaa in zinga an thah, ka mi rinawm tak awm lai meuh pawh khan mi rinna hi i phatsan lo bawk a.

¹⁴Nimahsela, tlemin demna che ka nei, khata Balaama zirtirna thu pawm tute emaw in awmpui avang khan; ani chuan milem biakna sa an eina tur leh an inngaihna turin Balaka chu Israela thlahteho hmaah tlukna dah a zirtir kha.

¹⁵Nang pawhin Nikola ho zirtirna thu chutiang bawka pawm tute emaw i awmpui bawk a ni.

¹⁶Chutichuan, sim rawh; chutilochuan i hnenah ka lo kal thuai ang a, ka khandaih chuanin anmahni ka rawn do ang.

¹⁷Thlarauin kohhranho hnena thu a sawi hi beng nei chuan hre rawh se. A hnehtu apiang hnen ngeiah chuan manna thuhruk zinga mi ka pe ang a, lung var pawh ka pe ang, chu mi lunga hming thar ziak nen; chu hming chu a changtu chauh lo chuan tuma'n an hre lo, a ti e' tiin.

¹⁸Tin, Thuatira khuaa kohhranho tirhkoh hnenah chuan heti hian ziak rawh: 'Pathian Fapa, mit meialh ang neia, a kephahte dar tle mi anga khan he'ng thu hi a sawi a ni:

¹⁹I thiltihzia te, i hmangaihzia te, i rinzia te, i rawngbawlzia te,i chhelzia te ka hria, i thiltih hnuhnung berte chu atira mi ai khan a nasa zawk tih ka hre bawk.

²⁰Nimahsela, demna che ka nei, hmeichhia Jezebeli, Zawlneinu intii kha i ngaihtheih avangin; ani chuanka bawihte chu inngaih leh milem biakna thil ei zirtirin a hruai bo bawk thin a ni.

²¹Tin, simna turin a hnenah hun bi ka tuk a, nimahsela mi ngaih a chin chu a sim duh lo.

²²Ngai teh, amah chu khumah ka paih dawn a ni; a uiretute pawh chu, a thiltih chinte chu an simsan loh zawngin hrehawm nasa takah ka paih bawk dawn.

²³A fate chu hriin ka tihlum bawk ang a; tichuan kei rilru leh thinlung entu ka ni tih kohhranho zawng zawng chuan an hria ang; tin, in thiltih ang zelin ka pe theuh ang che u.

²⁴Nimahsela, nangni, Thuatira khuaa mi dang awm, chu zirtirna thu pawm lo a, Setana thil thuk an tihte hre lo apiang hnenah chuan phur rit dang reng ka bel lo ang che u, ka ti a ni.

²⁵In neih sa erawh kha chu ka lo kal hma loh chuan vawng tlat rawh u.

²⁶Tichuan, a hnehtu apiang leh a tawp thlenga ka thiltihte pawmtu apiang, keiin ka Pa laka ka hmuh ang bawk hian, chu mite chu hnam tin chungah thu ka neihtir ang;

²⁷tin, anni chuan belvawtu belte keh sawm depa a awm angin thir tiangin an ro an relsak ang.

²⁸Tin, varparh arsi chu anmahni ka pe ang.Thlarauin kohhranho hnena thu a sawi hi beng nei chuan hre rawh se, a ti e,' tiin.

²⁹Thlarauin kohhranho hnena thu a sawi hi beng nei chuan hre rawh se, a ti e,' tiin.