Read Baibul, Mizo Thu Puan 22 Bible Online

Thu Puan 22 - Baibul, Mizo bible

Thu Puan 22

¹Tin, ani chuan a kawtlai lai taka nunna tui lui, krustal lung anga tle, Pathian leh Beram No lalthutphaha lo chhuak mi entir a.

²Tin, lui kam tuakah chuan Nunna Thing, chi hrang sawm leh pahniha rah, thla kipa rah a awm a; chu thing hnahte chu hnam tin tihdamna tur a ni.

³Tin, anchhia reng reng a awm leh tawh lo ang a, Pathian leh Beram No lalthutphah chu a awm tawh zawk ang; tichuan a bawihte chuan a rawng an bawl ang a,

⁴a hmel an hmu ang a, a hming chu an chalah a chuang bawk ang.

⁵Tin, zan a awm leh tawh lo ang a; khawnvar eng leh ni eng an ngai lo ang a; Lalpa Pathian chuan anmahni a en dawn si a; tichuan chatuanin ro an rel ang.

⁶Tin, ani chuan ka hnenah, "Heng thu hi a rinawmin a dik a ni; tichuan, Lalpa, zawlneite thlarau Pathian chuan, thil lo thleng lawk turte chu a bawihte hnena entir turin, a vantirhkoh a tir a ni.

⁷Tin, ngai teh, ka lo kal thuai dawn e. He lehkhabu hrilh lawkna thu pawm apiang an eng a thawl e," a ti a.

⁸Tin, kei Johana, he'ng thil zawng zawng hmutu leh hretu chu ka ni. Tin, ka hriata ka hmuh chuan, he'ng thil mi entirtu vantirhkoh ke bulah Pathian chibai buka buk turin ka bawkkhup a.

⁹Tin, ani chuan ka hnenah, "Heti chuan ti suh khai; kei chu nangmah leh i unau zawlneite leh, he lehkhabu thu pawmtute bawihpui ka ni alawm. Pathian chibai buk zawk rawh," a ti a.

¹⁰Tin, ani chuan ka hnenah, He lehkhabu hrilh lawkna thute hi zep suh; a hun chu a lo thleng dawn tawh si a.

¹¹Mi fel lo chu tifel lohin awm reng rawh se; mi bawlhhlawh chu tihbawlhhlawhin awm reng rawh se; mi fel chu tihfelin awm reng rawh se; mi thianghlim chu tihthianghlimin awm reng rawh se.

¹²Ngai teh, ka lo kal thuai dawn e; mi tin an thiltih ang zela pek turin ka lawmman ka hnenah a awm a.

¹³Kei Alpha leh Omega, a Hmasaber leh a Hnuhnungber, a Bul leh a Tawp ka ni.

¹⁴Nunna Thing chungah chuan thu an neih theihna tur leh, kawngkaah chuan khuaa an luh theihna tura insu faite chu an eng a thawl e.

¹⁵Pawnah chuan ui te, dawithiam te, inngaih ching te, tualthat te, milem bia te, dawt ngaina leh dawt hmang apiangte chu an awm a.

¹⁶Kei Isua hian kohhranho pawlte tan he'ng thu hi inhnena hriattir turin, ka vantirhkoh chu ka rawntir a ni. Davida bulpui leh a thlah, arsi eng tak, varparh chu ka ni, a ti a.

¹⁷Thlarau leh mo chuan, "Lo kal rawh," an ti a. A hria apiangin, "Lo kal rawh," ti rawh se. Tuihal apiang lo kal rawh se; a duh apiangin nunna tui hi athlawnin la rawh se.

¹⁸He lehkhabu hrilh lawkna thu hria apiang ka hriattir e. Tupawhin he'ng thu hi a belhchhah chuan, he lehkhabua hremna ziakte hi Pathianin a chungah a belhchhah ve ang.

¹⁹Tin, tupawhin he hrilh lawkna lehkhabu thua mi thu a lak bo chuan, he lehkhabua ziak Nunna Thing leh Khaw Thianghlima a chan chu Pathianin a la bo ve ang.

²⁰Heng thu hriattirtu hian, "A ni, ka lo kal thuai dawn e," a ti a. Amen, Lo kal ta che, Lalpa Isu.Lalpa Isua khawngaihna chu mi thianghlimte hnenah awm rawh se. Amen.

²¹Lalpa Isua khawngaihna chu mi thianghlimte hnenah awm rawh se. Amen.