Read Baibul, Mizo Thu Puan 3 Bible Online

Thu Puan 3 - Baibul, Mizo bible

Thu Puan 3

¹Tin, Sardis khuaa kohhranho tirhkoh hnenah chuan heti hian ziak rawh: 'Pathian Thlarau pasarih leh arsi pasarih neia khan he'ng thu hi a sawi a ni: I thiltihziate ka hria, thi reng si a, nung hming i put hi.

²Inveng la, i thil la neih thi lek lekte chu tinung leh rawh; i thiltihte reng ka Pathian mit tlung zoin ka hmu si lo.

³Chutichuan, i thu dawn leh ngaihthlakte kha hre reng la, pawm la, sim rawh. I inven loh zawngin rukru angin ka lo kal ang a, eng hunah nge ka rawn phawk dawn che i hre dawn si lo.

⁴Nimahsela, Sardis khuaah khan an puante tibawlhhlawh lo hming tlem te i nei a ni; anni chu puan var sinin, ka hnenah an leng ve thin ang; chutiang ti tlak an ni si a.

⁵A hnehtu apiang chutiangin puan varte sintir an ni ang; tin, Nunna Bu ata an hming chu ka thai bo tawp lo ang a, ka Pa hmaah leh a vantirhkohte hmaah chuan an hming ka tan zawk ang.

⁶Thlarauin kohhranho hnena thu a sawi hi beng nei chuan hre rawh se, a ti e,' tiin.

⁷Tin, Philadelphia khuaa kohhranho tirhkoh hnenah chuan heti hian ziak rawh: 'Mi thianghlima, mi dik taka, Davida chabi neia, tuma khar loh tura hawnga tuma hawn loh tura khara khan he'ng thu hi a sawi a ni:

⁸I thiltihte ka hria, chakna tlemte chauh i nei a, chutichung pawhin ka thu i pawm a, ka hming pawh i phat lo a, tuma khar theih loh i hmaah kawngka ka hawng e.

⁹Ngai teh, Setana inkhawmna in ho zinga mi, Juda tak ni lo a, dawt sawia Juda intite zinga mi chu ka tir dawn a ni; ngai teh, i ke bulah chibai ka rawn buktir ang a, ka hmangaih che tih ka hriattir bawk ang.

¹⁰Ka chhelna thu i pawm avang khan leia awmte fiah tura khawvel zawng zawng chunga fiahna hun lo thleng tur lakah chuan kei pawhin ka humhim ang che.

¹¹Ka lo kal thuai dawn e; tuma'n i lallukhum chu an laksak lohna'n che i thil neih sa kha vawng tlat rawh.

¹²A hnehtu apiang chu ka Pathian biak inah chuan banah ka siam ang a, chuta tang chuan an chhuak tawh lo ang; tin, anmahniah chuan ka Pathian hming nen, ka Pathian khua, Jerusalem Thar, ka Pathian hnena mi van atanga lo chhuk tur hming nen, ka hming thar nen ka ziak ang.

¹³Thlarauin kohhranho pawlte hnena thu a sawi hi beng nei chuan hre rawh se, a ti e,' tiin.

¹⁴Tin, Laodikei khuaa kohhranho tirhkoh hnenah chuan heti hian ziak rawh: 'Amena, thu hretu rinawm leh dik taka, Pathian thil siam bula khan he'ng thu hi a sawi a ni;

¹⁵I thiltihziate ka hria, i vawh hek loh a, i lum hek loh hi; i vawh emaw i lum emaw ka duh a ni.

¹⁶Chutichuan, lum si lo a, vawt si lo a, i lum chang changa vangin ka ka ata ka chhak chhuak dawn a che.

¹⁷Ka hausa a, sum ka ngah a, engmah ka tlachham lo e, i tih avang leh nang mi rethei, khawngaihthlak, pachhia, mitdel, saruak chu i ni tih i inhriat loh avangin;

¹⁸i lo hausak theihna'n rangkachak meia tihthianghlim te, puan i sin theihna'n leh i saruak zahmawh chu a lan lohna'n puan var te, i hmuh theihna'n i mita hnawihah mit na hlo te ka hnena mi lei turin ka rawn a che.

¹⁹Ka hmangaih apiangte chu ka zilhhauin ka thunun thin; chutichuan thahnem ngai la, sim rawh.

²⁰Ngai teh, kawngkhar bula dingin ka kik hi; tupawhin ka aw hriaa kawng a hawn chuan a hnenah ka lut ang a, a hnenah zanriah ka ei ang a, ani pawhin ka hnenah a ei bawk ang.

²¹A hnehtu apiang ka lalthutphahah ka hnenah ka thuttir ang, kei pawhin ka hneh a, ka Pa hnenah a lalthutphaha ka thu ang khan.Thlarauin kohhranho pawlte hnena thu a sawi hi beng nei chuan hre rawh se, a ti e,' tiin," a ti a.

²²Thlarauin kohhranho pawlte hnena thu a sawi hi beng nei chuan hre rawh se, a ti e,' tiin," a ti a.