Read Baibul, Mizo Thu Puan 5 Bible Online

Thu Puan 5 - Baibul, Mizo bible

Thu Puan 5

¹Tin, lalthutphaha thua kut ding lamah chuan lehkhabu, chhung lam leh pawn lama ziak, chhinchiahna pasariha chhinchhiah tlat ka hmu a.

²Tin, vantirhkoh chak tak, aw ring taka, "Tunge lehkhabu hi hawnga a chhinchhiahnate hi phelh tlak awm?" tia, tlangauin ka hmu bawk a.

³Chutichuan, vanah te, leiah te, lei hnuaiah te pawh lehkhabu chu hawng thei tumah an awm lo a, a chhung lam en thei pawh an awm hek lo.

⁴Tin, lehkhabu hawng leh a chhung lam pawh en tlak tumah an awm loh avangin ka tap ta zawih zawih a.

⁵Tin, upa zinga pakhat chuan ka hnenah, "Tap suh; ngai teh, Sakeibaknei, Juda hnama mi, Davida Bulpui khan lehkhabu chu hawng tur leh a chhinchhiahna pasarih phelh turin a hneh ta," a ti a.

⁶Tin, lalthutphah leh Thil nung palite laiah upate lai bawkah chuan Beram No talh tawh hnu ang, ki pasarih leh mit pasarih nei ding ka hmu a, chung mitpasarihte chu Pathian Thlarau pasarih, lei chung zawng zawnga tirh chhuahte chu an ni.

⁷Tin, ani chu a lo kal a, lehkhabu lalthutphaha thua kut ding lam ata chu a la ta a.

⁸Tin, lehkhabu chu a lak veleh Thilnung pali leh upa sawmhnih leh palite chu, tingtang leh rangkachak berhbu rimtuia khat keng theuhin Beram No hmaah chuan an bawkkhup ta hlawm a; chung rimtuite chu mi thianghlimte tawngtaina a ni.

⁹Tin, "Nang, lehkhabu chu laa, a chhinchhiahnate phelh tlak i ni e; talhin i awm tawh a, chi tina mi te, tawng tina mi te, mi tina mi te, hnam tina mi te, Pathian tan i thisenin i lei a,

¹⁰Kan Pathian tan khua leh tuiah leh puithiamahte i siam ta si a; tin, leiah chuan ro an rel a," tiin hla thar an sa a.

¹¹Tin, ka han en a; tin, lalthutphah leh Thilnungte leh upate velah chuan vantirhkoh tam tak aw ka hria a; an tam lam chu a singa sing hmun sing tam tak leh, a sanga sang hmun sang tam tak an ni;

¹²chungte chuan aw ring takin, "Beram No talh tawha hi thiltihtheihna te, hausakna te, finna te, chakna te, chawimawina te, ropuina te, malsawmna te hmu tlak a ni e," an ti a.

¹³Tin, van leh lei chung leh lei hnuai leh tuifinriat chunga thil siam tinreng awmte leh, chungho chhunga awm zawng zawngten, "Lalthutphaha thua leh Beram No hnenah chuan, malsawmna te, chawimawina te, ropuina te, rorelna te, chatuanin awm rawh se," an tih ka hre bawk a.Tin, Thilnung palite chuan, "Amen," an ti a. Upate pawh chuan bawkkhupin chibai an buk ta a.

¹⁴Tin, Thilnung palite chuan, "Amen," an ti a. Upate pawh chuan bawkkhupin chibai an buk ta a.