Read Baibul, Mizo 1 Samuela 19 Bible Online

1 Samuela 19 - Baibul, Mizo bible

1 Samuela 19

¹Chutichuan Suala chuan a fapa Jonathana leh a chhiahhlawh zawng zawng chu Davida that turin a ti a.

²Nimahsela Saula fapa Jonathana chuan Davida chu a ngaina hle mai a. Tichuan Jonathana chuan Davida chu, "Ka pa Saula hian thah a tum chia; chuvangin naktuk zingah chuan fimkhur la, hmun biruah biru reng rawh khai:

³tin, ka kal chhuak ang a, i awmna phulah ka pa kiangah ka va ding ang a, i chungchang thu-ah ka pa ka bia ang a; tin, eng emaw ka hriat chuan ka hrilh ang che," a tia .

⁴Tin, Jonathana chuan a pa Saula hmaah chuan Davida chu a fak a, a hnenah, "Lal chuan a chhiahhlawh chungah, Davida chungah hian thil sual ti lul suh se: i chungah engmah a tisual si lo a, a thiltihte chu i tana tha tak a ni zawk si a:

⁵thih dawn loin Philistia mi kha a bei a, tin, LALPA'n Israel-ho zawng awng chhandamna roup tak a thawh chhuahsak a: chu chu nang pawhin i hmu a, i lawm hle kha: chuvangin thisen pawi khawih lo chungah chuan engah tehlul nge thil i tihsual ang a, a vang engmah awm loin Davida chu i thah ang?" a ti a.

⁶Chutichuan Saula chuan Jonathana thusawi chu a pawm a. Saula chuan chhechamin, "LALPA nunna chhalin ka sawi e, ani chu tihhlum tur ani tawp lo ang," a ti a.

⁷Tin, Jonathana chuan Davida chu a ko a, Jonathana chuan chung thil zawng zawng chu a hrilh a. Tin, Jonathana chuan Davida chu Saula hnenah chuan a hruai a, tun hma lam ang bawk khan a hnenah a awm leh ta a.

⁸Tin, indona a lo awm leh a: tichuan Davida chu a thawk chhuak a, Philistia mite chu a va bei a, a va that chiam a, a hmaah chuan an tlanchhia a.

⁹Tin, Saula chu a ina fei kenga thut laiin LALPA tirh ramhuai a chungah a lo thleng a; tin, Davida chuan tingtang a tum a.

¹⁰Tin, Saula chuan a fei chuan Davida chu banga khawh beh tlat a tum a; nimahsela Saula kiang ata chu a put chhuak var a, fei chu bangah chuan a khawh bur ta ngur mai a; tin, Davida chu a tlan chhuak a, chu mi zan chuan a him ta a.

¹¹Tin, Saula chuan Davida in lamah zinga lo chang a, that turin mi a tir a: tin, Davida nupui Mikali chuan, "Zaninah hian i nun i humhim loh zawngin naktukah an that dawn che a ni," tiin ahrilh a.

¹²Chutichuan Mikali chuan Davida chu tukverhah a athlak thla a; tichuan a tlan bo a, a him ta a.

¹³Tin, Mikali chuan milem a la a, khumah chuan a muttir a, tin, alu lamah chuan kel hmul lukham a dah a, puanin a khuh a.

¹⁴Tin, Davida hruai tura Saula'n mi a rawn tirh chuan, "A dam lo," a lo ti a.

¹⁵Tin, Saula chuan Davida va en turin mi a tir a, "A khum chawpin rawn zawn chho ula, ka lo that ang e," a ti a.

¹⁶Tin, a mi tirhte chu an va luh chuan ngai teh, khumah chuan milem chu a lu lama kel hmul lukham khamin a lo awm a.

¹⁷Tin, Saula chuan Mikali hnenah, "Engati nge hetianga mi bum a, ahimna tura ka hmelma i chhiahtir ni?" a ti a. Tin, Mikali chuan Saula chu a chhang a. "Ka kaltir loh chuan mi thah at um alawm maw le," a ti a.

¹⁸Tichuan Davida chu a tlan bo a, a him ta a, Rama khuaah Samuela hnen a va thleng a, a chunga Saula thiltih zawng zawng chu a hrilh a. Tin, amah leh Samuela chu an kal a, Naioth-ah an awm a.

¹⁹Tin, Saula chu, "Ngai teh, Davida chu Rama khuaah Naioth-ah a awm," tiin an hrilh a.

²⁰Tichuan Davida hruai turin Saula chuan mi a ti ra: tin, zawlnei pawlho thu sawi dual dual lai leh Samuela chu an chunga hotu awm an va hmuh chuan, Saula mi tirhte chungah chuan Pthian thlarau a thleng a, anni pawh chuan thu an sawi ve ta dual dual a.

²¹Tin, chu chu Saula an han hrilh chuan, mi dang a tir leh a, anni pawh chuan thu an va sawi ve leh ta dual dual mai a.

²²Chutichuan amah pawh chu Rmaa khuaah chuan a kal ve ta a tin, Seku hmuna tuichhunchhuah zau tak chu a va thleng a, "Samuela leh Davida hi khawiah nge an awm?" a ti a, a zawt a. Tin, tu emaw hian, "Ngai teh, Rama khuaa Naioth-ah an awm," a ti a.

²³Chutichuan rama khua aNaioth-ah a kal a; tin, Pathian thlarau a chungah chuan a lo thleng ve ta a, a kal zel a, Rmaa khuaa Naioth a thlen thlengin thu a sawi bual bual zel a.Tin, ani pawhin a silhfente a hlip ve a, Samuela hmaah chuan thu a sawi ve ta bual bual a, chumi nileng leh chu mi zankhua chuan ruakin a mu a. Chuvang chuan, "Saula pawh chu zawlnei zingah a tel ve ta elo maw ni?" tih hi an ching hlen ta.

²⁴Tin, ani pawhin a silhfente a hlip ve a, Samuela hmaah chuan thu a sawi ve ta bual bual a, chumi nileng leh chu mi zankhua chuan ruakin a mu a. Chuvang chuan, "Saula pawh chu zawlnei zingah a tel ve ta elo maw ni?" tih hi an ching hlen ta.