Read Bakoko Matéus 1 Bible Online

Matéus 1 - Bakoko bible

Matéus 1

¹Kálati ɛ ŋga táa ndándó nyí Yésus Kilístus, mɔɔ́n Dávid, mɔɔ́n Áblaháam nyí.

²Áblaháam nɛ́ a byáláá Ísaak, Ísaak ɔ byál Yákob, Yákob ɔ byál Yúda la elōgnyāŋ,

³Yúda ɔ byál mímbyáh Fálɛs la Zála; nyaŋɛ́ wāɓá a ɓɛ́ɛ́ nɛ́ Tamáal, Fálɛs ɔ byál Éslom, Éslom ɔ byál Álam,

⁴Álam ɔ byál Aminádab, Aminádab ɔ byál Naásɔn, Naásɔn ɔ byál Sálmon,

⁵Sálmon ɔ byál Bóoz; nyaŋɛ́ á Bóoz a ɓɛ́ɛ́ nɛ́ Láhab, Bóoz ɔ byál Yóbɛd; nyaŋɛ́ a Yóbɛd a ɓɛ́ɛ́ nɛ́ Lūt, Yóbɛd ɔ byál Yése,

⁶Yése ɔ byál Káísa Dávid. Dávid ɔ byál Salómo, nyaŋɛ́ a Salómo a ɓɛ́ɛ́ ja ŋ̀gáá á Úli,

⁷Salómo ɔ byál Lobóam, Lobóam ɔ byál Ábia, Ábia ɔ byál Ása,

⁸Ása ɔ byál Yósáfat, Yosáfat ɔ byál Yólam, Yólam ɔ byál Ósias,

⁹Ósias ɔ byál Yóātam, Yoátam ɔ byál Ákaz, Ákaz ɔ byál Ezékias,

¹⁰Ezékias ɔ byál Manáse, Manáse ɔ byál Ámon, Ámon ɔ byál Yósias,

¹¹Yósias ɔ byál Yekónias la elōgnyāŋ; Múŋ á yéŋ eceg nɛ́ bí ómóó ɓot bí Íslāɛl bísɛ á ǹsɛm á Bábílon.

¹²Ámbúh mikɛ máɓá á ǹsɛm á Bábílon, Yekónias ɔ byál Salátiɛl, Salátiɛl ɔ byál Zolobábɛl,

¹³Zolobábɛl ɔ byál Abiúud, Abiúud ɔ byál Eliákim, Eliákim ɔ byál Ázɔl,

¹⁴Ázɔl ɔ byál Sádɔk, Sádɔk ɔ byál Ákim, Ákim ɔ byál Eliūd,

¹⁵Eliūd ɔ byál Eleazáal, Eleazáal ɔ byál Mátan, Mátan ɔ byál Yákob,

¹⁶Yákob ɔ byál Yósɛp, nlóm á Mālía, Malía nɛ́ a byáláá Yésus nyɔ́ bí ŋga yáŋa nɛ́ Nyɔ́-a-Pɔ́hlɛ.

¹⁷Nsɔŋgí ásɛ a lɛ́ hɔ́ jā jóom lí nyɔŋɔn la ɛ́náa li ɓotle á Áblaháam nɛ́-tɛ́ɛ la á Dávid, jóom la ɛ́náa ki li ɓotle á Dávid nɛ́-tɛ́ɛ la á míkɛ máɓá á ǹsɛm á Bábílon; jóom lí nyɔ́ŋɔn la ɛ́náa sīg-pɛ li ɓotle á ǹsɛm á Bábílon nɛ́-tɛ́ɛ la á líbyáa lí Nyɔ́-a-Pɔ́hlɛ.

¹⁸Libyáa lí Yésus Kilístus lí sɔ́ɔ́ jā nɛ́; nyaŋɛ́ Mālía, a kuhúú évān nɛ Yósɛp. Ndí, sɔ́kágánɛ́ bí ŋgí tɔɔ ndáá ya, Malía ɔ nyɔ̄ŋ líbum la ŋguu nyí M̀búl Mpúán.

¹⁹Nlóm wɛ́ɛ̄ Yósɛp a ɓɛ́ɛ́ mut a tɛ́ɛ́ sim, la náŋ, a ŋgí somo ɓé nyɛ li yɛ́lɛ ɔ́sū ví ɓot bísɛ, la nyɛ́ ɔ nyɔ̄ŋ bísúghɛ́nɛ́ nɛ ag ɓáglan la nyɛ́ á nsɔlɓɛ́.

²⁰Ɛnɛ́ a manáá lí veg lí nyíŋ peg, áŋgɛl nyí Nyɔ́ŋ-Ɛsáŋɛ́ yu pámlé nyɛ á élɛɛ́lɛm, yu yó nyɛ nɛ́: «Á Yósɛp, mɔɔ́n Dávid, ɔh kɔnɔ́g ɓé woŋ li nyɔŋ lí ŋ̀gáá wɔ́ɔ Malía á yóg yɔ́ɔ; átɔm nɛ́ a nyɔ̄ŋ já líbum la ŋguu nyí M̀búl Mpúán.

²¹Ag kɛ li byál lí mɔ́ɔ̄n-á-páam, nyɔ́ ɔ ŋgɔ kɛ̄ li lo lí jóō nɛ́ Yésus, ányúū nɛ nyɛ́ nɛ́ a ŋga kɛ́ li suŋ lí lílōm jɛ́ɛ́ á míɓē.»

²²Míŋ mam mísɛ má ɓɔŋɓɛ á li somo nɛ́ yé ɛ́sɛ Nyɔ́ŋ-Ɛsáŋɛ́ a pɔ́t, li kele la ányu á m̀pɔ́tle-a-Ɔlolómɛ̄ ɛ́ yáal.

²³«Ŋgɔn kɔ́njí ɛg kɛ li nyɔŋ lí líbum, ɛ byál mɔɔ́n-á-páam nyɔ́ bí ŋga kɛ́ li lo lí jóō nɛ́ Emánuɛl, náŋ ag mínɛ nɛ́: Ɔlolómɛ̄ a lɛ lá ɓɛ́hɛ.»

²⁴Ɛnɛ́ Yósɛp a vɛ́ɛɓe, ɔ ɓɔ̄ŋ yé áŋgɛl nyí Nyɔ́ŋ-Ɛsáŋɛ́ ya máŋlɛ́ nyɛ; ɔ nyɔ̄ŋ ŋ̀gáá wɛ́ɛ̄ á yóg yɛ́ɛ̄.

²⁵Ndí āh nānte ɓé lā nyɛ́ nɛ́ tɛ́ɛ nyɔ́ŋ ɔ byál mɔ́ɔ̄n wɛ́ɛ̄ á páam, nyɔ́ Yósɛp a lóō jóō nɛ́ Yésus.