Read Bakoko Matéus 11 Bible Online

Matéus 11 - Bakoko bible

Matéus 11

¹Eceg Yésus a manhɛ́ɛ li tíi lí jóom jɛ́ɛ́ lí ɓáyēge la bíɓáa nyíŋ ndag, ɔ ɓógo váŋ, ɔ kɛ̄ lí yéglɛ la li lɛgɛ lí Pɔ́l M̀ɓɛɛŋ á tísɔn yáɓá.

²Yohánɛs Ǹtíi-nzoɓan, múŋ á ndáá-m̀ɓog yɛɛ́, ɔ ámblé mam Nyɔ́-a-Pɔ́hlɛ a ŋga ɓɔ̄ŋ. La nyɛ́ ɔ óm ɓáyēge ɓɛ́ɛ́ nɛ bí ɓat nyɛ́ nɛ́:

³«Wa nɛ́ ɔ lɛ nyɔ́ a nyɛ́ɛ lí sɔ́, tɔ nɛ́ ɓaá nyɛ́ɛ lí laaŋke lí nyɔ́ ntám é?»

⁴Yésus ɔ pélē ɓɔ̄ nɛ́: «Kɛnán miní lagá Yohánɛs yé miní ŋga ámble la yé miní ŋga ɛ́n;

⁵vɔ́ŋɔ́ɔ, ɓot-bí-ndím bíg ɛ́n, biɓóg-bí-ɓōt bíg wɛɛ m̀ɓɛɛŋ, ɓá bí mívɛlɛ bíg tɔɔ mbólí, ɓá bí ndɔ́g bíg ámble, ɓá ɓá wū bíg pahye; Pɔ́l M̀ɓɛɛŋ ya lɛ̄glɛ́ ɓáyɛ̄ɛ̄yɛ́ɛ.

⁶Jɔ́ nɛ́, misɔ́tá la nyɔ́ a ŋgá kɛ ɓé lí ku á míceglan ányúū joó jáma!»

⁷Eceg ɓayége bí Yohánɛs bí ŋgí timan, Yésus ɔ ɓōtlé lí kwɛlɛ lí límut likɔlɓan la Yohánɛs. La nyɛ́ ɔ bíhī ɓɔ̄ nɛ́: «Yéé miní kɛ̄nɛ́ɛ́ lí légɓe á éyāŋ é? Likáá jé ŋgɔá ɛ ŋga pógɛ é?

⁸Ɓaá yéé yágá miní ɓɛ́ɛ́ lí légɓe é? Mut nyɔ́ á jáhɛ́ mbɔ́tí élāām é? Ɛ́ lɛ́ mbálɛ nɛ́ ɓot bí ŋga jál mbɔ́tí élāām, bíg tɔɓene ja á mílɛ̄ɛ̄ mí káísa.

⁹Jɔ́ hɔ́ nɛ, yéé miní ɓɛ́ɛ́ lí légɓe é? M̀pɔ́tle-a-Ɔlolómɛ̄ é? La mbálɛ a lɛ m̀pɔ́tle-a-Ɔlolómɛ̄, ndí mag yíhɛ ɓɛ́nɛ nɛ́, ag loo yágá ki m̀pɔ́tle-a-Ɔlolómɛ̄.

¹⁰Ányúū yɛ́ɛ̄ nɛ yá ciiɓɛ́ nɛ́: ‹Légɓé sig, mag óm ǹlɛgɛ-njɛn wama ɔ́sū vɔ́ɔ á lí ɓoŋhan lí wā nzen.›

¹¹La mbálɛ, mag laga ɓɛ́nɛ nɛ́, á ɓot bísɛ ɓá pámléné á líbum lí míndīgá, tɔ wa á póla yaɓá ah pám ɓé á ɔ́vega ví Yohánɛs Ǹtíi-nzoɓan. Ndí yíán nɛ́, á Ékombo-lóō, mut a lóohán li ɓɛ́ lí ntɔ́ga wóŋ ag loo Yohánɛs.

¹²Li ɓotle á éceg yé Yohánɛs Ǹtíi-nzoɓan nɛ́-tɛ́ɛ la vɔ́ŋɔ́ɔ, Ekombo-lóō yá dííɓɛ́ la elóh; bilóh bí ɓot nɛ́ bí ŋga kɛ́tɛ yɔ́.

¹³La mbálɛ, ɓapɔ́tle-bí-Ɔ́lolómɛ̄ bísɛ, nlemlem la kálati mbéndá ɓá máŋa jā á jóō lí Ɔ́lolómɛ̄ nɛ́-tɛ́ɛ la á éceg yé Yohánɛs.

¹⁴Kíyáɓɛ́nɛ miníg somo li sɔ́ŋtánɛ m̀ɓɛɛŋ, nyɛ́ nɛ́ a lɛ nyɔ́ Elías bí ŋga láaŋke, nyɛ́ nɛ́ a sɔ́ sīg-pɛ.

¹⁵Nyɔ́ a byɛ́ɛ̄ miɔ́ɔ́ a ámblé!

¹⁶Ɓaá, la nzáá mi ŋga kēt nyí nyɔŋɔn é? Ɛ lɛ́ ja ákaa ɓɔɔ́n bí tɔtɔ́án á ápūū ndí bíg yáŋá ɓáŋá á lí laga lí ɓɔ̄ nɛ́:

¹⁷‹Ɓaá ɔ́ŋlé ɓɛ́nɛ ŋgɔmbí, ndí manáh yém ɓé! Ɓaá lɔ́ŋgɛ́ yaá ɛ́ nyɛmb, ndí manáh ség ɓé la liwú!›

¹⁸Jɔ́ nɛ́, Yohánɛs a sɔ́, āh dí ɓé, āh nyú ɓé, la yɔ́ yú laglɛ́ nɛ: ‹A byɛ́ɛ m̀búl m̀ɓé!›

¹⁹Ɛnɛ́ Mɔɔ́n Mut a sɔ́, ag dí, ag nyú, tɔ náŋ ki, la yɔ́ yú laglɛ́ nɛ́: ‹Léɓyán yé yoóm lídī la milɔg, liwándá lí ɓákomanɛ-ŋkuh-á-gɔ́mna la ɓaɓɔŋ-miɓé!› Ndí yú tímān lí yílɛ nɛ́ Peg ɛ lɛ́ jam lí tɛ́ɛ́ sim lí oŋle la misɔ́n mɛ́ɛ́.»

²⁰Yésus ɔ ɓōtlé hɔ́ lí tɔghan likɔlɓan la tísɔn, ápah a ɓɔ̄ŋlé joga licɛ́ŋ jɛ́ɛ́ lí bínanaŋga bí mam; kasig ɓáŋ ɓot ɓáh veŋe ɓé bílɛ̄m, ɔ lāgá nɛ:

²¹«Eɓéé-nyúū la wa á tísɔn nyí Kolásin! Eɓéé-nyúū la wa á tísɔn nyí Betsaída! Ányúū nɛ, kí ɓɔŋ nɛ́ bí binanaŋga bí mam, bí byá ɓɔ̄ŋɓɛ́ á yóg yāná bí ɓɔ̄ŋɓɛgɛ ja á tísɔn nyí Tíil la nyí Sídon, kí ɓɛɛvéé ɓatɔɓene ɓáɓá bú jálɓán mípēg la li tɔɔ átē a lisuu á lí étɛ nɛ́ bí lɛ́ átē a esɔghe ecɛ́ŋ; ki bú vēŋé bílɛ̄m.

²²La mbálɛ mag laga ɓɛ́nɛ nɛ́ á ɔ́lɔ̄ ví bíkááhɛ́nɛ́, ekɔ́ghɛ yáná ɛ́g kɛ li ɓɛ́ lí écɛ̄ŋ li loo lí yé ɓot bí Tíil la ɓá bí Sídon.

²³Wa ki, á Kafalnáum, ɔg ɔ́ŋɔ nɛ́ ɔg kɛ li ɓét tɛɛla á lóō é? Ɔg naaɓan, ɔg kɛ li suh nɛ́-tɛ́ɛ la á ŋkɔŋ á ɓá ɓá wū! Átɔm nɛ́ ki ɓɔŋ nɛ́ bínanaŋga bí mam byá loolé á yóg yɔ́ɔ bí lóolege á Sódom, kí nyíŋ tísɔn ɛ ŋgí tɛ́ɛ tɛɛla lɛn.

²⁴La mbálɛ mag laga ɓɛ́nɛ nɛ́, á ɔ́lɔ̄ ví bíkááhɛ́nɛ́, ɓot ɓɔ́ɔ bíg kɛ li kuh lí ékɔ́ghɛ ecɛ́ŋ li loo lí yé ɓot bí Sódom.»

²⁵Váŋ á yéŋ eceg, Yésus ɔ nyɔ̄ŋ mpɔ́t a byɛ́ nɛ́: «Mag tíi wa mítamlan Etāa, Ɛtáŋɛ nyɔ́ á sí la lóō, ányúū yé wa sɔ́ɔ̄ ɓot-bí-peg la ɓá bí éyī, ndí wu yɛ́ɛ́lé yɔ ɓot bí lɛ́ kaa ɓɔɔ́n ɓátɔ̄ga.

²⁶Ɔɔ, Etāa, náŋ nɛ́ wa sómo nɛ ɛ́ ɓɛ́.

²⁷Mɔ́mísɛ má tíéɓɛ́ mā la Etāa, ndí mut tɔ wa a ŋgá yí ɓé nzáá a lɛ̄ Mɔ́ɔ̄n, amáh sig Étāa; tɔ li yí lí nzáá a lɛ Étāa, amáh sig Mɔ́ɔ̄n la tɔ nzáá Mɔ́ɔ̄n a díŋɛ́ lí yɛ́ɛ́le náŋ.»

²⁸«Sɔ́án la ma, ɓɛ́nɛ ɓáŋ bísɛ maná tɔmb lí ɓɛgɛ lí mbɛ́gɛ ɛ ŋga díit, mág, mag kɛ ɓɛ́nɛ li tíi lí évɛɛɓan.

²⁹Ɓɛglán mbɛ́gɛ yama, miní níŋgí á ésukúlu yáma, átɔm nɛ́ mi lɛ̄ pií la esuhɛ-nyuú; la náŋ, miníg kɛ li kuh lí évɛɛɓan.

³⁰La mbálɛ, ɔcéŋ vama ví ŋgá dit ɓé lí ɓɛgɛ, mbɛgɛ yama ɛg saa.»