Read Bakoko Matéus 14 Bible Online

Matéus 14 - Bakoko bible

Matéus 14

¹Múŋ á yéŋ eceg, Elóde ŋ̀kanʼyɛ a Galiléa, ɔ ámblé pɔ́l Yésus,

²la nyɛ́ ɔ lāgá ɓáɓɔŋle ɓɛ́ɛ́ nɛ́: «Yohánɛs Ǹtíi-nzoɓan nyɔ́ŋ! Nyɛ́ nɛ́ a pāhye! Ányúū náŋ nɛ́ a byɛ́ɛ̄ ŋguu li ɓɔŋ lí bínanaŋga bí mam.»

³Ɛ́ lolóó nɛ́, Elóde a byelháánɛ Yohánɛs, ɔ kághánɛ̄ nyɛ la nsáŋ-á-bícɛɛ, ɔ óm nyɛ á m̀ɓog ányúū Elódiáda, ŋ̀gáá mɔ́ɔ̄nyāŋ Filípo.

⁴Átɔm nɛ́ Yohánɛs á ŋgí laga Elóde nɛ́: «Ɔh byɛ́ɛ́ ɓé kúndɛ lí nyɔŋ lí ŋ̀gáá mɔ́ɔ̄nyɔ̄ŋ.»

⁵La mbálɛ nɛ́, Elóde a ŋgí somo li ólhánɛ lí Yohánɛs, ndí a ŋgí kɔn límut woŋ, ányúū nɛ ɓot bí ŋgí nyɔŋ Yohánɛs kaa m̀pɔ́tle-a-Ɔlolómɛ̄.

⁶Ndí, á ɔ́lɔ̄ ví ŋgand libyáa lí Élóde, ŋgɔn nyí Elódiáda yu yém á ɔ́sū ví Élóde la ɓacɛn ɓɛ́ɛ́, náŋ ɔ nyɛ́ɛlé nyɛ.

⁷Ányúū náŋ, ɔ kān-sɔŋ ɔ́sū ví ɓot bísɛ nɛ́ ag kɛ nyɛ́ lí tíi lí yé ɛ́sɛ a ŋga kɛ́ nyɛ́ lí ɓāt.

⁸Váŋ nɛ́ Elódiáda a sɔgláánɛ ŋgɔn yɛ́ɛ̄ nɛ ɛ lágá Élóde nɛ́: «Vá ápah mi tɛ́ɛ́, tí ma m̀mú á Yohánɛs Ǹtíi-nzoɓan á nlɛ́há-á-páan.»

⁹Elóde ɔ súnan. Ndí, kasig a manáá lí kan lí sɔŋ ɔ́sū ví ɓácɛn ɓɛ́ɛ́, ɔ kānʼyɛ́ nɛ náŋ a ɓɔ̄ŋɓɛ́;

¹⁰la nyɛ́ ɔ óm nɛ́ bí sɛ́m Yohánɛs m̀mú á ndáá-m̀ɓog.

¹¹Bú sɔ́ bí ɓɛ́gɛ wɔ́ á nlɛ́há-á-páan, bú lōɛ́ wɔ́ nyíŋ ŋgɔn mindígá la yɔg yu kɛ́ wɔ́ li tíi lí nyaŋɛ́.

¹²Ámbúh náŋ, Ɓayége bí Yohánɛs bú sɔ́ lí nyɔ̄ŋ lí m̀bim wɛ́ɛ́, bú jé wɔ; la ɓɔ́ bú kɛ̄ lí yíhɛ lí Yésus yé yá loo.

¹³Ɛnɛ́ Yésus a ámblé nyíŋ pɔ́l, ɔ nyɔ̄ŋ m̀ɓoŋgó, ɔ kɛ̄ á mɓagɓanɛ́ á voóm a liɛ́g. Eceg limut lá ámblé nāŋ, ɓot bú ɓógyéné á tísɔn yáɓá á lí oŋ lí nyɛ jé lí sí.

¹⁴Á mísuh mɛ́ɛ́ mí m̀ɓoŋgó, Yésus ɔ ɛ́n limut licɛ́ŋ, ɔ kɔ̄nlé jɔ ŋgɔ́ɔ́, la nyɛ́ ɔ tɔ́ɔyɛ́ ɓákɔɔ́kɔ̄n ɓáɓá mbólí.

¹⁵Ɛnɛ́ ŋgōgó ya vín, ɓayége bí Yésus bú sīŋglé nyɛ́ ɓɛɓɛ, bú lāgá nyɛ nɛ́: «Nyɔ́ voóm a lɛ ɔ́tīgá, eceg ki yá kɛ, soɛ́ jé limut, lí kɛ á míkɔŋ á lí sóm lí lídī.»

¹⁶Ndí Yésus ɔ pélē ɓɔ̄ nɛ́: «Nsɛ́ŋ a sē ɓé ɓɔ li kɛ wóŋ, ɓɛ́nɛ-mɛ̄n tíán ɓɔ́ lídī.»

¹⁷La ɓɔ́ bú lāgá nyɛ nɛ́: «Bi byɛ́ɛ́ ja bíkɔgá bítáan la kɔh ɛ́ɓáa vá.»

¹⁸Yésus aá la ɓɔ́ nɛ́: «Sɔ́án lā ma byɔ́ vá.»

¹⁹Ɔ kānʼyɛ́ limut nɛ́ lí tɔ́ɔ̄ á lóō lí bíkāā. Ámbúh náŋ, ɔ nyɔ̄ŋ bíŋ bikɔgá bítáan la yíŋ kɔh ɛ́ɓáa. Ɛnɛ́ a ɓétɛ́ miíh á lóō, ɔ tí Ɔ́lolómɛ̄ mítamlan, ɔ búg bíkɔgá ɔ tí byɔ́ ɓayége ɓɛ́ɛ́ nɛ bí kaa byɔ́ la limut.

²⁰Ɓot bísɛ bú dí, bú yál. Bú tímān la bitun byá bug. Bitun bí yégléé bí yáhɛ́ɛ jóom lí bísɛɛ la bíɓáa.

²¹Ɓot bí díéé bí ɓɛ́ɛ́ jam-kaa akóó á páam átáan ɔ ɓógtɛ́ ɓondígá la ɓɔɔ́n.

²²Á ékūyá-kúyá, Yésus ɔ nyághánɛ́ ɓayége ɓɛ́ɛ́ lí ɓét á m̀ɓoŋgó, ɔ dúgɛ́ ɓɔ nɛ́ bí ɓēhé á nyúŋú mií á ébúle. Nyɛ́ ɔ yéglé ag soɛ limut.

²³Ámbúh mikɛ mí jéŋ limut, ɔ kɛ̄ lí kánɛ á lóō lí ɔkolá á mɓagɓanɛ́. Tɛɛla á ébúg-lóō, a ɓɛ́ɛ́ váŋ nyɛ́-ntámɛ́.

²⁴Kasig m̀ɓoŋgó á nɛŋɓéé la m̀byáŋ ɔ́sōō, minɔŋgɔ́ mí ŋgí lɔ́g wɔ́ ŋgɔá ki ɛg émb wɔ́.

²⁵La miyɛ́ mí kítí, Yésus ɔ sɔ́ á ŋgwáāg yāɓá ag wɛɛ á lóō lí míndīm.

²⁶Ɛnɛ́ ɓáyēge ɓɛ́ɛ́ ɓá ɛ́n nyɛ ag wɛɛ á lóō lí míndīm, bú pámblan, bú lāgá nɛ́: «Ŋkúgu nyú!» Á ŋkɔnwoŋɛ́ wāɓá, bú ɓōtlé lí tɛ́ɛ lí mílōn.

²⁷Á ékūyá-kúyá, Yésus aá la ɓɔ́ nɛ́: «Miníh kótóg ɓé, má nyɔ́ŋ!»

²⁸Váŋ nɛ̄ Pétlos a lāgá nyɛ nɛ́: «Ɛtáŋɛ, kɔɔ la mbálɛ, kíyáɓɛ́nɛ wā-mɛ̄n nyɔ́ŋ, kanʼyɛ́ ma nɛ́ mi wɛ́ɛ á lóō lí míndīm, mi sīŋglé wa ɓɛ́ɓɛ.»

²⁹Yésus ɔ lāgá nyɛ nɛ́: «Sɔ́!» Váŋ nɛ̄ Pétlos a sūh á m̀ɓoŋgó ɔ ɓōtlé lí wɛɛ á lóō lí míndīm, ág siŋgle nyɛ́ ɓɛ́ɓɛ.

³⁰Ndí ɛnɛ́ Pétlos a ógtán ŋgɔá, ɔ kɔ̄n woŋ, ɔ káhá lí tíɓe la nyɛ́ ɔ lón nɛ: «Á Ɛ́tāŋɛ sūŋ ma.»

³¹Á ékūyá-kúyá, Yésus ɔ lɛ́g wɔ́ ɔ byēé nyɛ ag lāgá nyɛ nɛ́: «Á mut a ŋyéɓé ntɔ́ga nyɔ́, ányúū yéé ɔ ŋgɔ péndan é?»

³²Ɛnɛ́ ɓɔ́ bíɓáa ɓá ɓét á m̀ɓoŋgó, ŋgɔá yu vɔ́lɓe.

³³Ɓot bí ɓɛ́ɛ́ átē á m̀ɓoŋgó bú úm míɓɔ̄ŋ á ɔ́sū ví Yésus, bú lāgá nɛ: «Kɔɔ la mbálɛ, ɔ lɛ̄ Mɔ́ɔ̄n Ɔlolómɛ̄!»

³⁴Ɛnɛ́ Yésus la ɓayége ɓɛ́ɛ́ ɓá yáɓe, bú pám á ŋkɔŋ á Genesálɛt.

³⁵Ɓot bí nyúŋ ŋkɔŋ bú lēm nyɛ, bú cámānɛ́ pɔ́l misɔ́ mɛ́ɛ́ á ŋkɔŋ ásɛ, la ɓot bú sɔ́la nyɛ́ ɓakɔɔ́kɔ̄n bísɛ.

³⁶Váŋ nɛ̄ ɓá sɔ́hyé nyɛ nɛ́ a mwáhɛ́ ɓakɔɔ́kɔ̄n bí síiɓán tɔ lisúg jɛ́ɛ́ lí mbɔ́tí. Ɓot bísɛ bí síiɓáán jɔ́ bú tɔ́ɔ̄ mbólí.