Read Bakoko Matéus 17 Bible Online

Matéus 17 - Bakoko bible

Matéus 17

¹Ámbúh alɔ́ ásáama, Yésus ɔ nyɔ̄ŋ á élɔŋ yɛ́ɛ́ Pétlos, Yákop la mɔɔ́nyāŋ Yohánɛs ɔ kɛ́lā ɓɔ́ á líɛ̄g, la nyɛ́ ɔ ɓét la ɓɔ́ á ɔ́kolá vícɛ̄ŋ.

²Váŋ nɛ̄ a vēŋ á miíh máɓá, asú wɛ́ɛ́ wú páa kaa vaŋgá, mbɔ́tí yɛ́ɛ́ yú púú nɛ pɛ́ŋ kaa mipúú.

³Á ékūyá-kúyá, Móse la Elías bú pámlé ɓɔ, bú ɓōtlé lí kwɛl la Yésus.

⁴Pétlos ɔ nyɔ̄ŋ hɔ́ mpɔ́t, ɔ lāgá Yésus nɛ́: «Ɛtáŋɛ, ɛ́ lɛ́ nsɛ́ŋ nɛ́ bi tɔ́ɔ̄ yahá vá. Kíyáɓɛ́nɛ wa dīŋ, mag óŋ biláá bíŋháa vá; yá ányúū yɔ́ɔ, yá ányúū Móse, yéŋé yá ki ányúū Elías.»

⁵Kasig a ɓɛ́ɛ́ a ŋgí pɔ́tɔg, mbaga ɛ ŋga páa yu bútyɛ́ ɓɔ, la cíŋ yu pámlé muŋ, yu lága nɛ: «Nyɔ́ nɛ́ a lɛ édidíŋɛ yáma Mɔɔ́n, nyɔ́ ma dīŋ lí pɔhɔ. Miní óglé nyɛ́!»

⁶Ɛnɛ́ ɓáyēge bí Yésus ɓá ámblé bíŋ biɓaŋgá, bú nát la woŋ, bú ku, mbɔm á sí.

⁷Váŋ nɛ́ Yésus a sīŋgle, ɔ síiɓán ɓɔ, aá la ɓɔ́ nɛ́: «Tɛ́lɓán, miníh kɔnɔ́g ɓé woŋ!»

⁸Ɛnɛ́ ɓá ɓétɛ́ miíh, bú ɛ́n ja Yésus nyɛ́-ntámɛ́.

⁹Á mísuh máɓá mí ɔ́kolá, Yésus ɔ ɓéhyɛ́ ɓɔ nɛ́: «Miníh laglág ɓé tɔ mut jam maná ɛ́n, nɛ́-tɛ́ɛ Mɔɔ́n Mut a pāhye átē a ɓá ɓā wú.»

¹⁰Váŋ nɛ̄ ɓáyēge ɓá ɓāt Yésus nɛ́: «Ányúū yéé ɓayí-mbéndá bí ŋga lága nɛ́ Elías a nyɛ́ɛ yágá lí sɔ́ é?»

¹¹Ɔ pélē ɓɔ́ nɛ́: «Kɔɔ la mbálɛ, Elías a nyɛ́ɛ yágá lí sɔ́, á lí tɛ́ɛ́yɛ lí mam mísɛ.

¹²Ndí, mag lága ɓɛ́nɛ nɛ́, Elías a sɔ́ɔ́ yágá ki, tɔ la náŋ ɓot bíh lémee ɓé nyɛ, bú ɓɔŋlé nyɛ kaa nsom wáɓá. Náŋ ki nɛ́ bí ŋga kɛ́ li teeŋgɛ lí Mɔɔ́n Mut nyɛ́-mɛ̄n.»

¹³Váŋ nɛ́ ɓayége ɓá sɔ́ŋtánɛ́ nɛ a ŋgí kwɛlɛ ja ɓɔ́ ányúū Yohánɛs Ǹtíi-nzoɓan.

¹⁴Ɛnɛ́ Yésus la ɓayége ɓɛ́ɛ́ ɓá pám ɓɛɓɛ la limut, mut wa ɔ sīŋglé nyɛ á ŋgwáāg, ɔ úm miɓɔ́ŋ ɔ́sū vɛ́ɛ́, aá la nyɛ́ nɛ́:

¹⁵«Ɛtáŋɛ, kɔnlé mɔ́ɔ̄n wama ŋgɔ́ɔ́, ag taka ŋgandag, ag kɔn ɔtí. Biceg byá, ag ɓɛ́han á nzáan tɔ á míndīm.

¹⁶Ma kɛ́la nyɛ́ á yóg ɓayége ɓɔ́ɔ, ndí, ɓáh la ɓé nyɛ li tɔɔyɛ lí mbólí.»

¹⁷La Yésus ɔ nyɔ̄ŋ mpɔ́t, ɔ lāgá nɛ: «Á nyɔ́ŋɔn ŋgíla ŋyéɓé la miɔ́ŋɔ miɓé nyí! Tɛɛla ǹjén mi ŋga ɓɛ́ élɔŋ la ɓɛ́nɛ é? Tɛɛla ǹjén mi ŋga kɛ́ ɓɛ́nɛ li ɔ́hánɛ é? Sɔ́án la ma nyɛ́ vá.»

¹⁸Váŋ nɛ̄ Yésus a nyáálé nyúŋ m̀búl m̀ɓé. Á ékūyá-kúyá wú pám mɔɔ́n á nyúū la nyɛ́ ɔ tɔ́ɔ̄ mbólí.

¹⁹Ɛnɛ́ ɓá yéglé ɓɔ́-ntámɛ́, ɓayége ɓɛ́ɛ́ bú sīŋglé nyɛ ɓɛɓɛ, bú bíhī nyɛ nɛ́: «Ndí ɓɛ́hɛ, ányúū yéé ɓāh la ɓé ɓɛ́hɛ wɔ́ lí duhu é?»

²⁰Yésus ɔ pélē ɓɔ̄ nɛ́: «Ányúū liyɛ́ɛ́ jáná lí ŋyéɓé. La mbálɛ mag laga ɓɛ́nɛ nɛ́, ɔlɔ́ miní ŋga li ɓɛ́la lí ŋyéɓé kaa diíh lí siŋgí, miníg la li laga lí ví ɔkolá nɛ: ‹ɓógó vá, tɛ́lɛ́ váŋá›, víg ógle ɓɛ́nɛ. Tɔ jam lí ŋgá kɛ ɓé ɓɛ́nɛ li ɛgɛ lí lí ɓɔŋ.

²¹La náŋ, nyíŋ nyaa m̀búl m̀ɓé, amáh sig míkánɛ la etɔɔ-nzal nɛ́ bí ŋga la wɔ́ lí duhu.»

²²Eceg Yésus la ɓayége ɓɛ́ɛ́ bí ɓɛ́ɛ́ bí kɔ̄tánɛ á Galiléa. Ɔ lāgá ɓɔ nɛ́: «Mɔɔ́n Mut ag kɛ li nuŋlɛ á mɔ mí ɓot.

²³Bíg kɛ nyɛ́ lí ól, ndí ag kɛ li pahye á ɔ́lɔ̄ vá yáhɛ áŋháa.» Náŋ ɔ lóohánɛ́ ɓɔ li teeŋgɛ.

²⁴Eceg Yésus la ɓayége ɓɛ́ɛ́ bí sɔ́ɔ́ á Kafalnáum, ɓot bí ŋgí ɓat táas nyí ndáá-ēcɛ́ŋ-Ɔlolómɛ̄ bú sīŋglé Pétlos á ŋgwáāg, bú ɓāt nyɛ nɛ́: «Ɓaá, ŋ̀yéglɛ waná a ŋgá sála ɓé táas nyí ndáá-ēcɛ́ŋ-Ɔlolómɛ̄ é?»

²⁵Pétlos ɔ pélē ɓɔ nɛ́: «Ɔɔ, ag sála.» Ɛnɛ́ Pétlos a tímān á ndáá, Yésus nɛ́ a dúgú lí nyɔŋ lí mpɔ́t, ɔ ɓāt nyɛ nɛ́: «Á Símɔn, lagá ma ɛ́yɔ́ɔ eɔ́ŋɔ, nzáá a nyɛ́ɛ lí sála lí táas, tɔ nyúŋú ŋkuh ntám káísa yí ŋkɔŋ-á-sí ɛ́ ŋga ɓāt é? Ɓɔɔ́n ɓáɓá tɔ nɛ́ ɓácɛn bí ɓot é?»

²⁶Pétlos ɔ pélē nyɛ nɛ́: «Ɓacɛn-bí-ɓot.» La Yésus ɔ lāgá nyɛ nɛ́: «La náŋ, mbyááhɛ ɛ́ ŋgá sála hɔ́ ɓé táas!

²⁷Jɔ́ nɛ́, á lí pún nɛ́ náŋ ah teeŋgɛ́gɛ́ ɓé ɓáɓat-táas, kɛɛ́n á ébúle, lɛŋgɛ́ nlɔ́ɔ́ á ɔ́sōō. Kɔh ɔsú ɔ ŋgɔ ól, legé anyu wɛ́ɛ́, ɔg kɔ́p épah ɛ́ kápa múŋ; nyɔ̄ŋ yɔ́, ɔ tí yɔ́ ɓáŋ ɓot ányúū yáma la ányúū yɔ́ɔ.»