Read Bakoko Matéus 2 Bible Online

Matéus 2 - Bakoko bible

Matéus 2

¹Yésus a byááyéé á Bétlehéem, ŋkɔŋ á Yúdēa eceg Elóde a ɓɛ́ɛ́ káísa. Váŋ nɛ́ ɓáyī-átɛ̄ bí sɔ́léé á mítūmnyam bú pám á Yélūsalɛm,

²la ɓɔ́ bú ɓāt nɛ: «Ɓaá, á véé káísa Elōg-Yúda ya sɔ́lé lí byáa ɛ lɛ é? Ɓaá ɛ́n ɔ́tɛ̄ vɛ́ɛ́ á mítūmnyam. Náŋ nɛ́ a yíglé ɓɛ́hɛ nɛ́ bi sɔ́ nyɛ́ lí ɓégɛ.»

³Ɛnɛ́ káísa Elóde a ámblé nyíŋ pɔ́l, ɔ pámblan, nlemlem la ɓot bí Yélūsalɛm bísɛ.

⁴Váŋ nɛ́ a kómánɛ̄ ɓatíi-nsúlé ɓácɛ̄ŋ la ɓayí-mbéndá bísɛ bí lílōm lí Élōg-Yúda á lí ɓat lí ɓɔ á véé Nyɔ́-a-Pɔ́hlɛ a ŋga kɛ̄ li byááye.

⁵Bú pélē nyɛ nɛ́: «Á Bétlehéem, ŋkɔŋ á Yúdēa, átɔm nɛ́ náŋ nɛ́ m̀pɔ́tle-a-Ɔlolómɛ̄ a cíi:

⁶Wa, á Bétlehéem, ŋkɔŋ á Yúdēa, La mbálɛ, wa ɓé nɛ wa lóohán lí ɓɛ́ lí ŋkɔŋ ntɔ́ga á yaa mikɔŋ mí tísɔn yí Yúda, átɔm nɛ́ á yóg yɔ́ɔ nɛ́ ŋ̀kanʼyɛ a ŋga kɛ́ li pámléne, nyɔ́ a ŋga kɛ́ li wɛɛla lí Íslāɛl lilóm jáma.»

⁷Váŋ nɛ́ Élóde a yáŋá ɓáyī-átɛ̄ á nsɔlɓɛ́ á lí yí lí éceg víŋ ɔtɛ́ vá pámɛ.

⁸La nyɛ́ ɔ óm ɓɔ̄ á Bétlehéem a byɛ́la ɓɔ́ nɛ́: «Kɛnán miní ɓákɛ́ likɔlɓan la nyɔ́ŋ mɔɔ́n. Eceg miní ŋga kɔ́p nyɛ́, yíhánɛ ma, á li ɓɔŋ nɛ́ mág mi sɔ́ mi ɓégɛ́ nyɛ́.»

⁹Ɛnɛ́ ɓá ámblé bíɓaŋgá bí káísa Elóde, bú nyɔ̄ŋ nzen mikɛ. Váŋ nɛ́ ɓá ɛ́n nlemlem á ɔ́tɛ̄ bí ɛ́nɛ́ɛ́ á mítūmnyam víg dúgu ɓɔ́ ɔ́sū, ɛnɛ́ vá pám ápah mɔɔ́n a ɓɛ́ɛ́, vú tɛ́lɛ̄ á lōó.

¹⁰Ɛnɛ́ ɓá ɛ́n víŋ ɔtɛ́ vú tɛ́lɛ̄ á nyɔ́ŋ voóm, bú kɔɔ́n mivag ŋgandag.

¹¹Bú níŋgí á ndáá, bú ɛ́n mɔ́ɔ̄n la nyaŋɛ́ Mālía; váŋ nɛ́ ɓá úm míɓɔ̄ŋ á sí á lí ɓégɛ lí nyɛ. Ámbúh náŋ, bú kúhú mbɛgɛ yaɓá bú tí nyɛ góol, ɔtú la libíndɛ lí míla ákaa mikaale.

¹²Váŋ nɛ́ Ɔlolómɛ̄ a yíhɛ́ ɓɔ á élɛɛ́lɛm nɛ́ bíh timkágán ɓé pɛ á yóg káísa Elóde. La ɓɔ́ bú nyɔ̄ŋ nzen etám á lí timan á ékombo yáɓá.

¹³Ámbúh mikɛ mí ɓáyī-átɛ̄, áŋgɛl nyí Nyɔ́ŋ-Ɛsáŋɛ́ yu pámlé Yósɛp á élɛɛ́lɛm yu lāgá nyɛ nɛ́: «Tɛ́lɛ́, nyɔ̄ŋ mɔ́ɔ̄n la nyaŋɛ́ túú pɛ́ɛ́ la ɓɔ́ ɔ kɛ́ á Égípto, tɔɔ́ wóŋ nɛ́-tɛ́ɛ la á éceg mi ŋga kɛ̄ wa lí yíhɛ, átɔm nɛ́ káísa Elóde ag kɛ li somo nɛ́ a ólhánɛ nyɔ́ŋ mɔɔ́n.»

¹⁴Váŋ nɛ́ Yósɛp a tɛ́lɛ̄ la díɓe, ɔ nyɔ̄ŋ mɔ́ɔ̄n la nyaŋɛ́ ɔ túú pɛ́ɛ́ la ɓɔ́, ɔ kɛ́ á Égípto.

¹⁵A tɔɓéé wóŋ nɛ́-tɛ́ɛ Elóde ɔ wú, á li ɓɔŋ nɛ́ yé Nyɔ́ŋ-Ɛsáŋɛ́ a lāgá li kele la m̀pɔ́tle-a-Ɔlolómɛ̄ ɛ́ yáal. A yóó nɛ́: «Á Égípto nɛ́ ma yáŋlé mɔ́ɔ̄n wáma.»

¹⁶Ɛnɛ́ káísa Elóde a tímān lí yí nɛ́ ɓayí-átɛ̄ bí yɛ́ɛ́hɛ́ nyɛ́, ɔ álá ŋgándag. Váŋ nɛ́ a kānʼyɛ́ nɛ́, á Bétlehéem la á míkɔŋ mí ŋgwáāg mísɛ bí ól bitúmb-bí-ɓɔ́ɔ̄n bísɛ tɛɛla ɓá bí byɛ́ɛ̄ mímbú míɓáa. Nyíŋ nyɔŋɔn ɓɔɔ́n ɛ ŋgí kɔlɓan la yé ɓáyī-átɛ̄ bí lagléé nyɛ́.

¹⁷La náŋ, yé ɛ́sɛ Yelémia m̀pɔ́tle-a-Ɔlolómɛ̄ a pɔ́tɔ́ɔ́ yá yál, kasig a lagléé nɛ́:

¹⁸«Cíŋ ɛg ámblɛ́ɛ á tísɔn nyí Láma, liwú la njɛ́lɛ́, Lácɛl nɛ́ a ŋga lée ɓɔɔ́n ɓɛ́ɛ́, a ŋgá tɔ́ɔ̄ ɓé nɛ bí mɔ́mɛ́ nyɛ́, ányúū nɛ ɓá wú.»

¹⁹Ámbúh nyɛmb nyí káísa Elóde, áŋgɛl ya nyí Nyɔ́ŋ-Ɛsáŋɛ́ yu pámlé Yósɛp á élɛɛ́lɛm á Égípto,

²⁰yu lága nyɛ nɛ́: «Tɛ́lɛ́! Nyɔ̄ŋ mɔɔ́n la nyaŋɛ́, timán á ékombo yé Íslāɛl átɔm nɛ́ ɓot bí ŋgí somle mɔɔ́n nyɛmb ɓá wú.»

²¹Yósɛp ɔ tɛ́lɛ, ɔ nyɔ̄ŋ mɔ́ɔ̄n la nyaŋɛ́ ɔ tímān á Íslāɛl.

²²Ndí ɛnɛ́ a ámblé nɛ́ Alkéláus a nyɔ̄ŋ étɛ̄l yé ɛ́sāŋɛ́ Élóde á Yúdēa, ɔ kɔ̄n woŋ li timan wóŋ. Kasig Nyɔ́ŋ-Ɛsáŋɛ́ a yíhɛ́ɛ sīg-pɛ nyɛ́ náŋ á élɛɛ́lɛm, ɔ kɛ́ á Galiléa,

²³la nyɛ́ ɔ tɔ́ɔ̄ á tísɔn nyí Názalɛt á lí ɓɔŋ nɛ́ yé ɛ́sɛ ɓapɔ́tle-bí-Ɔ́lolómɛ̄ bí lagléé ɛ́ yál nɛ́: «Ag kɛ li yáŋlɛ nɛ́: mɔɔ́n Názalɛt.»