Read Bakoko Matéus 22 Bible Online

Matéus 22 - Bakoko bible

Matéus 22

¹Yésus ɔ kánɛ̄ sīg-pɛ limut ɔŋgaáŋgan nɛ́:

²«Ekombo-lóō ɛ́ lɛ́ kaa káísa nyí ya ɓōŋhán ŋgand aúg nyí mɔ́ɔ̄n wɛ́ɛ̄ á páam.

³Ɔ óm ɓáɓɔŋle ɓɛ́ɛ́ lí yáŋa lí ɓáyāŋlɛ á ŋgand. Ndí, ɓáh tɔ́ɔ́ ɓé lí sɔ́.

⁴Ɔ óm sīg-pɛ ɓaɓɔŋle ɓɛ́ɛ́ ɓátām nɛ bí kɛ bí lāgá ɓáŋ ɓayáŋlɛ nɛ́: ‹Vɔ́ŋɔ́ɔ ma ɓōŋhán lídī, ma ól nyága yáma la miɓɔg máma mí bílēm, mam mísɛ mí lɛ́ m̀ɓoŋhágan, sɔ́ɔ́gkágán á ŋgand aúg.›

⁵Ndí ɓɔ́, ɛ́h ɓɛ́ ɓé ɓɔ́ li nyɔŋ lí éceg la náŋ, bú kɛ, nyɔ́ á ǹdíí wɛ́ɛ́, nyɔ́ŋɔ́ á ɛ́yɛɛ́ nyuŋgá.

⁶Ɓáŋá ɓáyāŋlɛ bú byeé ɓáɓɔŋle, bú téeŋgɛ́ ɓɔ, bú ól ɓɔ.

⁷Káísa ɔ ála, ɔ óm ɓot ɓɛ́ɛ́ bí wélan nɛ bí ól ɓáŋ ɓot bí míólan, bí dígɛ́ ki tísɔn yaɓá.

⁸Káísa ɔ lāgá ɓáɓɔŋle ɓɛ́ɛ́ nɛ: ‹Ma ɓōŋhán lídī lí ŋgand aúg, ndí ɓayáŋlɛ bíh kɔ́ɔ́ ɓé nɛ́ bí dí jɔ́.

⁹Kɛnán á míkāndán mí nzen, miní lagá ɓot bísɛ miní ŋga kɛ̄ li kɔ́p nɛ́ bí sɔ́ á líndēmá.›

¹⁰Ɓáŋ ɓaɓɔŋle bú kɛ á nzen ɛ́sɛ, bú kómánɛ̄ ɓot bísɛ bí ŋgí kɔ́p, bilɔ́ŋgɔ la ɓaɓé. Ndáá ŋgand aúg yu yál la limut nɛ́ káŋ.

¹¹Ɛnɛ́ káísa a níŋgi lí légɓe lí ɓáyāŋlɛ, ɔ ɛ́n mut nyɔ́ āh jál ɓé mbɔ́tí nyí ŋgand aúg.

¹²Ɔ lāgá nyɛ̄ nɛ́: ‹Á líwāndá, wa ɓɔ̄ŋ láá ndí wu níŋgí mú ɛ́h ɓɛ́ ɓé mbɔ́tí ŋgand aúg é?› Nyɔ́ŋ mut ɔ kū mbúg.

¹³Váŋ nɛ́ káísa a lāgá ɓáɓɔŋle ɓɛ́ɛ́ nɛ: ‹Kágán nyɛ́ mɔ la mikoo miní léé nyɛ́ á lívito á ápūū ápah liwú la edí-mísoŋ bí ŋga kɛ́ li ɓɛ́.›

¹⁴Ákaa ɛ́sɛ, ŋgandag ya yáŋlɛ ndí puh nɛ́ ya pɔ̄hlɛ.»

¹⁵Váŋ nɛ̄ Élōg-Falísái yá kɛ lí mɔg, á lí somo nɛ́ bí pɔ́thánɛ Yésus ndí á kú á ɔ́ām.

¹⁶Bú óm ɓáyēge ɓáɓá elɔŋ la ɓot bí nlɔŋ á Élóde á yóg Yésus, á lí laga lí nyɛ̄ nɛ́: «Á Ŋ̀yéglɛ biíg yí nɛ́ ɔ lɛ mbálɛ la ki nɛ́, ɔg yéglɛ nzen Ɔlolómɛ̄ la mbálɛ yɔ ɛsɛ̄, ɛ́h ɓɛ́ ɓé wā lí kɔn lí mut tɔ wa woŋ, ányúū nɛ ɔh byɛ́ɛ́ ɓé éceg la bitɛ́l byáɓá.

¹⁷Tí ɓɛ́hɛ eɔ́ŋɔ yɔ́ɔ, ɓaá, ɛ́ lɛ́ kúndɛ tɔ nɛ́ kɛ́m li sála lí káísa ecɛ́ŋ[3] táas é?»

¹⁸Ndí, kasig Yésus a ŋgí yí miɔ́ŋɔ miɓé máɓá, ɔ lágā ɓɔ nɛ́: «Á ɓot bí ɔtaɓa ɓá, ányúū yéé miní ŋga ám ma é?

¹⁹Éthánɛ ma kápa bí ŋga sáálene táas.» Bú étɛ́ nyɛ epah ɛ́ kápa.

²⁰Ɔ bíhī ɓɔ́ nɛ́: «Asú la joó lí nzáá bí lɛ́ múŋ é?»

²¹Bú pélē nyɛ̄ nɛ́: «Káísa ecɛ́ŋ.» Ɔ lāgá ɓɔ́ nɛ́: «Miní tímānɛ hɔ́ káísa ecɛ́ŋ yé ɛ́ lɛ́ yé káísa ecɛ́ŋ, miní tímānɛ ki Ɔlolómɛ̄ yé ɛ́ lɛ́ yé Ɔ́lolómɛ̄.»

²²Ɛnɛ́ ɓá ámblé nyíŋ mbele, ɓɔ́ bísɛ bú nyág bú yíg nyɛ, bú kɛ.

²³Á nlemlem á ɔ́lɔ̄, ɓot bí Sádúkái bú sīŋglé Yésus ɓɛɓɛ. Kasig bí ŋgí laga nɛ́ lipahye lí sē ɓé. Bú bíhī Yésus nɛ́:

²⁴«Á Ŋ̀yéglɛ, Móse a lāgá nɛ, kíyáɓɛ́nɛ mut a wú ɛ́h ɓɛ́ ɓé nyɛ li yíg lí mɔ́ɔ̄n, mɔɔ́nyāŋ ag koto ŋkúh wɛ́ɛ́ a kól nyɛ́ mbóta.

²⁵Jɔ́ nɛ́, linyaŋ lí páam nzambúwá lí ɓɛ́ɛ́ á yóg yāhá, nyɔ́ ɔsú a lɔ́mɔ́ɔ́ míndīgá ɔ wú; ákaa áh yígíi ɓé mbóta, ɔ yíglé mɔ́ɔ̄nyāŋ ŋ̀gáá wɛ́ɛ̄.

²⁶Nlemlem á jam wú loolé la nyɔ́ a yáhɛ bíɓáa, la nyɔ́ á yáhɛ bíŋháa, náŋ la náŋ nɛ́-tɛ́ɛ la á nyɔ́ a yáhɛ́ nzambúwá.

²⁷Ámbúh nyɛmb yaɓá ɓɔ́ bísɛ, mindígá nyɛ́g ɔ wú.

²⁸Á éceg lípahye, nzáá á póla yaɓá ɓɔ́ bísɛ a ŋga kɛ́ li ɓɛ́ lí nlóm á nyɔ́ŋ mindígá é? Átɔm nɛ́ ɓɔ́ bísɛ ɓá nīŋ la nyɛ́ kaa ŋ̀gáá wāɓá!»

²⁹Yésus ɔ pélē ɓɔ̄ nɛ́: «Maná yɔ́p ányúū nɛ miní ŋgá yí ɓé bíciilé tɔ ŋguu Ɔlolómɛ̄.

³⁰Átɔm nɛ́ á lípahye, páam la ɓondígá bí ŋgá kɛ ɓé lí lɔ́mɓan, ndí ɓot bíg kɛ ja lí niŋ kaa áŋgɛl ɛ́ lɛ́ á lóō.

³¹Ányúū lipahye lí ɓá ɓá wū, ɓaá maná sɔ́ŋgɔ ɓé éɓaŋgá yé Ɔ́lolómɛ̄ ɛ́ ŋga lága nɛ́:

³²‹Ma nɛ́ mi lɛ Ɔ́lolómɛ̄, Loó lí Áblaháam, Loó lí Ísaak, la Loó lí Yákob é?› A sē ɓé Lōó lí ɓot ɓá wú, ndí Loó lí ɓá bí lɛ́ á éniŋ»

³³Ɛnɛ́ limut lá ámblé nāŋ, lú nyág la liyéglɛ́gɛ jɛ́ɛ́.

³⁴Ɛnɛ́ Élōg-Falísái yá ámblé nɛ́ a lēg ɓot bí Sádúkái minyu, bú kóman.

³⁵Á lí ám lí Yésus, ŋ̀yí-mbéndá wa átē á elɔŋ ɔ bíhī nyɛ nɛ́:

³⁶«Á Ŋ̀yéglɛ, jɔɔ́jɔ́ɔ litiŋ lí mbéndá lí ŋga lōo míŋí mísɛ é?»

³⁷Yésus ɔ pélē nyɛ̄ nɛ́: «Ɔg kɛ li diŋ lí Nyɔ́ŋ-Ɛsáŋɛ́ Loó jɔ́ɔ la m̀mím wɔ́ɔ ásɛ, la liɓɛ́ɛg jɔ́ɔ lísɛ, la miɔ́ŋɔ mɔ́ɔ mísɛ.

³⁸Litiŋ li ɔ́sū lí mbéndá jéŋ, tɔ já lí ŋga lōo jɔ́ lí sē ɓé.

³⁹Litiŋ lí mbéndá lá yáhɛ́ míɓáa jé jɔ́g lí lɛ́ nsɛ́ŋ kaa jéŋé jé nɛ́: dīŋ mɔɔ́nɛ́sɔ̄ŋ kaa wā-mɛ̄n.

⁴⁰Mbéndá ɛ́sɛ la micila mí ɓapɔ́tle-bí-Ɔ́lolómɛ̄ bí lɛ́ átē a mí mitiŋ mí mbéndá míɓáa.»

⁴¹Kasig ɓot bí Élōg-Falísái bí ɓɛ́ɛ́ bí kómánɛ, Yésus ɔ ɓāt ɓɔ́ nyí mbihi nɛ́:

⁴²«Yéé miní ŋga ɔ́ŋɔ likɔlɓan la Nyɔ́-a-Pɔ́hlɛ é? A lɛ mbóta nzáá é?» Bú pélē nyɛ̄ nɛ́: «Mbota nyí Dávid.»

⁴³Yésus ɔ lāgá ɓɔ̄ nɛ́: «Nɛ́-láá hɔ́ Dávid ŋyálāg la M̀búl Mpúán a ŋga yáŋá nyɛ́ nɛ́ Nyɔ́ŋ-Ɛsáŋɛ́ eceg a ŋga lága nɛ́:

⁴⁴‹Nyɔ́ŋ-Ɛsáŋɛ́ a lágā Ɛtáŋɛ wama nɛ́: Tɔɔ́ á m̀ɓɛ́nlómɛ wama, nɛ́-tɛ́ɛ ma vá ɓálem ɓɔ́ɔ á sí míkoo mɔ́ɔ›.

⁴⁵Kíyáɓɛ́nɛ Dávid ag yáŋa nyɛ́ nɛ́ Ɛtáŋɛ, nɛ́ láá hɔ́ a ŋga lā li ɓɛ́ lí mbóta yɛ́ɛ̄ é?»

⁴⁶Mut tɔ wa ah la ɓé nyɛ li pele lí tɔ jam. Li ɓotle la víŋ ɔlɔ́, mut tɔ wa ah bihi ɓé pɛ nyɛ́ jam tɔ já.