Read Bakoko Matéus 24 Bible Online

Matéus 24 - Bakoko bible

Matéus 24

¹Kasig Yésus a ɓógyéé á ndáá-ēcɛ́ŋ-Ɔlolómɛ̄ nɛ́ ag kɛ, ɓayége ɓɛ́ɛ́ bú sīŋglé nyɛ ɓɛɓɛ á lí étɛ lí nyɛ mióŋ mí ndáá-ēcɛ́ŋ-Ɔlolómɛ̄.

²Yésus ɔ nyɔ̄ŋ mpɔ́t, aá la ɓɔ́ nɛ́: «Ɓaá, maná ɛ́n bí byoóm bísɛ é? La mbálɛ, mag laga ɓɛ́nɛ nɛ́, ŋgɔg tɔ ya ɛ ŋgá yégle ɓé ɛ káhɛ á lóō lí nyíŋí; nyí ndáá ɛsɛ̄ ɛg kɛ li kúúlɛ.»

³Kasig Yésus a ɓɛ́ɛ́ á tɔ́ɔ̄ á ɔ́kolá ví tín ɛ́ Olíva, ɓayége ɓɛ́ɛ́ bú ōŋ nyɛ̄ ápah a ɓɛ́ɛ́ á mɓagɓanɛ́, bú lāgá nyɛ̄ nɛ́: «Lagá ɓɛ́hɛ ǹjén náŋ a ŋga kɛ́ li ɓɔŋɓɛ, yɔɔ́yɔ́ɔ ndembye ɛ ŋga kɛ́ li yíhɛ nɛ́ misɔ́ mɔ́ɔ mí lɛ́ ɓɛ́ɓɛ, la nɛ́ misúg mí bíceg má kɔlan.»

⁴Yésus ɔ pélē ɓɔ̄ nɛ́: «Nyɔŋán lítāt! Mut ah yɛ́ɛ́kɛ́gɛ́ ɓé ɓɛ́nɛ,

⁵átɔm nɛ́, ɓot ŋgandag bíg kɛ li sɔ́ á jóō jáma; bí ɓɛ́ bíg laga nɛ́: ‹Ma nɛ́ mi lɛ Nyɔ́-a-Pɔ́hlɛ›. Bíg kɛ li jáŋɛ lí ɓot ŋgandag.

⁶Miníg kɛ li ámblé lí ɓot bíg pɔ́t mam mí wélan la bímunɛ byɛ́ɛ́; nyɔŋán lítāt, náŋ ah teeŋgɛ́gɛ́ ɓé ɓɛ́nɛ, ɛ́g somlɛ nɛ́ náŋ a ɓɔ́ŋɓɛ́ɛ, ndí náŋ ɓé nɛ a ŋga kɛ́ li ɓɛ́ lí lísūg lí bíceg.

⁷Átɔm nɛ́, jé lilóm líg kɛ li duhɛ lí jéŋé, yé ekombo ɛ́ dúhɛ̄ yéŋé. Á míkāh mí ŋkɔŋ-á-sí má, nzal ecɛ́ŋ ɛg kɛ li ɓɛ́, sí ɛg kɛ li póghan.

⁸Ndí, bíŋ bísɛ bíg ɓɛ́ ja míɓōtlé mí ésɔghe yé ábyāl.

⁹Jɔ́ nɛ́, bíg kɛ ɓɛ́nɛ li sɔghɛ, bí ól ɓɛ́nɛ, ɓot bí ŋgíla ŋyéɓé la Ɔlolómɛ̄ bísɛ bíg kɛ ɓɛ́nɛ li síŋgɛ ányúū joó jáma.

¹⁰Váŋ nɛ̄ ŋyéɓé á ɓot ŋgandag á ŋga kɛ́ li yɔŋɔ, bíg ɓotle li yɛ́ɛ́lan ɓɔ́ la ɓɔ́, la bisíŋgá bí níŋgí á póla yaɓá.

¹¹Ɓapɔ́tle-bí-Ɔ́lolómɛ̄ bí mínaa bíg kɛ li ɓɛ́ ŋgandag, la ɓɔ́ ɓá jáŋɛ́ ɓot ŋgandag.

¹²Aɓé ág kɛ li kondye nyaa nyí ɛ́ lɛ nɛ́, ŋgandag ediŋ bí ɓɛ́ɛ́la ɛg kɛ li suh.

¹³Ndí, nyɔ́ a ŋga kɛ́ li ɔ́hánɛ nɛ́-tɛ́ɛ la á lísūg, nyɛ́ nɛ́ a ŋga kɛ́ li suŋɓɛ.

¹⁴Nyíŋ Pɔ́l M̀ɓɛɛŋ nyí Ekombo-lóō ɛg kɛ li lɛglɛ á ŋkɔŋ-á-sí ásɛ, á lí ɓɔŋ nɛ́ milóm mísɛ mí ámblé yɔ. Váŋ hɔ́ nɛ lisúg lí bíceg lí ŋga kɛ́ li sɔ́.»

¹⁵«Eceg miní ŋga kɛ́ hɔ́ lí ɛ́n lí mut Dániɛl m̀pɔ́tle-a-Ɔlolómɛ̄ a kwɛléé, nyɔ́ a yáŋlɛ́ nɛ Ǹcɛ́hɛ-ɓot a mam mí ŋgāŋá, a tɔ́ɔ̄ á voóm a lɛ mpúán, ǹsɔ́ŋgɔ míŋ mam a sɔ́ŋtánɛ!

¹⁶Jɔ́ nɛ́, ɓá bí ŋga kɛ́ li ɓɛ́ á ŋkɔŋ á Yúdēa, bí ɓét m̀bíí á ákolá ácɛ̄ŋ.

¹⁷Nyɔ́ a ŋga kɛ li ɓɛ́ á lóō lí ndáá ah suhúg ɓé lí nyɔŋ lí jam á nlɛ́ɛ́ wɛ́ɛ́.

¹⁸Nyɔ́ a ŋga kɛ́ li ɓɛ́ á ǹdíí, ah timkágán ɓé la mbúh lí nyɔŋ lí mbɔ́tí yɛ́ɛ̄.

¹⁹Eɓéé-nyúū la ɓondígá bí ŋga ɓɛ́ míbum la ɓá bí ŋga ɓɛ́ bíg nyáŋɛ múŋ á nyúŋ alɔ́.

²⁰Kánhánɛ á lí ɓɔŋ nɛ́ ntɔ́g wáná áh ɓɔ̄ŋɓɛ́gɛ́ ɓé á éceg ásíí tɔ á ɔ́lɔ̄ ví évɛɛɓan ví Élōg-Yúda.

²¹Nyúŋ alɔ́ ág kɛ li ɓɛ́ lí álɔ̄ á ésɔghe ecɛ́ŋ yé ɛ ɓáág ŋgí lí ɛ́ni li ɓotle á míɓōtlé mí ŋkɔŋ-á-sí nɛ́-tɛ́ɛ la nyí vɔ́ŋɔ́ɔ. M̀ɓá-mɓá, esɔghe etám ɛ́ ŋgá kɛ ɓé lí loo lí yéŋ.

²²Ki ɓɔ̄ŋ nɛ́ Ɔlolómɛ̄ ah tunɓɛgɛ ɓé nyúŋ alɔ́, kí mut tɔ wa a ŋgá kɛ ɓé lí niŋ; ndí ányúū ɓot a pɔ́hɔ nɛ́ a ŋga kɛ́ li tunɓɛ lí nyúŋ alɔ́.

²³Jɔ́ nɛ́, kíyáɓɛ́nɛ mut a lāgá ɓɛ́nɛ nɛ́: ‹Légɓé, Nyɔ́-a-Pɔ́hlɛ nyɔ́ a lɛ vá›, tɔ nɛ́: ‹Nyɛ́ nyɔ́ŋɔ́ váŋá›, miníh yéɓyág ɓé nyɛ.

²⁴Ákaa ɛ́sɛ, mipɔ̄hlɛ́gɛ mí ɓot-bí-mínaa la ɓapɔ́tle-bí-Ɔ́lolómɛ̄ bí mínaa, bíg kɛ li tɛ́lɛ á lí ɓɔŋ lí mínɛ̄ŋ la binanaŋga bí mam, á lí jáŋɛ lí ɓot, kí ɓɔ̄ŋ nɛ́ bí ŋga lā, kí bí ŋga jáŋɛ ki ɓá Ɔlolómɛ̄ a pɔ́hɔ.

²⁵Nyɔŋán hɔ́ lítāt, ma yíhɛ́ ɓɛ́nɛ míŋ mam ɔ́sū ví eceg.»

²⁶«Kíyáɓɛ́nɛ ɓá lāgá ɓɛ́nɛ nɛ́: ‹Nyɛ́ nyɔ́ vá á éyāŋ›, miníh kɛnɛ́g ɓé wóŋ, tɔ nɛ́: ‹Nyɛ́ nyɔ́ vá á ɓávoóm bí líɛ̄g›, miníh yéɓyág ɓé.

²⁷La náŋ, ákaa eceg lóō lí ŋga mwɛ́ɛg ndí lá tí mípūū li ɓotle á mípāmléné mí vaŋgá tɛɛla á mínanténé, náŋ nɛ́ mísɔ̄ mí Mɔ́ɔ̄n Mut mí ŋga kɛ́ li ɓɛ́.

²⁸Ápah m̀bim á lɛ, váŋ nɛ́ byúŋgú bí ŋga kóman.

²⁹Ndí, á ékūyá-kúyá ámbúh nyúŋ alɔ́ á ésɔghe, vāŋgá víg kɛ li dím, sóŋ ɛh páa ɓé pɛ, atɛ́ ag ɓɛ́ ág ɓógye á lóō li ɓɛ́han á sí, ŋguu ɛ́ lɛ́ á lóō ɛ́g kɛ li póghan.

³⁰Váŋ nɛ́ bí ŋga kɛ́ li ɛ́n lí ndembye misɔ́ mí Mɔ́ɔ̄n Mut á lóō. La náŋ, milóm mí sí ɛsɛ̄ míg kɛ li lee, la mɔ́ mí ɛ́n Mɔɔ́n Mut ag sɔ́ átē á mbaga, ŋyálāg la ŋguu, la lipém.

³¹Eceg m̀ɓáláŋ á nséɓá á ŋga kɛ́ li ɔ́ŋ, ag kɛ li óm lí áŋgɛl yɛ́ɛ́ á míkāh mínáa mí ŋkɔŋ-á-sí, li ɓotle á jé lisúg li pám á jéŋé, ɛ́g kɛ li komanɛ lí ɛ́ɓɛ̄ɛ̄ a pɔ́hɔ.

³²Ámblán nyí ŋget ya nyɔ̄ŋɓɛ́ la tín ɛ fígiya. Eceg micáá mɛ́ɛ́ ma kute áwāā ndí má sām, nzɔŋgɔ́ káá yá pám, miníg lem ɓɛ́nɛ-mɛ̄n nɛ́ esee yá ɓóo.

³³Nlemlem la ɓɛ́nɛ ki, eceg miní ŋga kɛ́ li ɛ́n lí míŋ mam mísɛ míg ɓɔŋɓɛ, yíán nɛ́ Mɔ́ɔ̄n Mut a lɛ ɓɛ́ɓɛ, a nyɛ́g á míkooká máná.

³⁴La mbálɛ, mag laga ɓɛ́nɛ nɛ́, nyí nyɔŋɔn ɛg ɓɛ́ ŋgí lí loo kí míŋ mam mísɛ mú ɓɔ̄ŋɓɛ.

³⁵Sí la lóō bíg kɛ li loo, ndí biɓaŋgá byáma bí ŋgá kɛ ɓé lí loo á m̀ɓá la m̀ɓá.»

³⁶«Ndí, mut tɔ wa a ŋgá yí ɓé víŋ ɔlɔ́ tɔ nyíŋ ŋgɛ́ŋ, ɛ́ ɓɛ́ áŋgɛl yí lóō, ɛ́ ɓɛ́ Mɔɔ́n, mut tɔ wa amáh sig Etāa nyɛ́-ntámɛ́.

³⁷Ákaa ɛ́ lōlóó á éceg yé Nóa, náŋ ki nɛ́ ɛ́ ŋga kɛ́ li ɓɛ́ á mísɔ̄ mí Mɔ́ɔ̄n Mut.

³⁸Náŋ ag ɓɛ́ nlemlem ákaa nyú alɔ́ wá dúgu, sɔ́kágánɛ́ líbūmbé líg ɓɛ́han. Ɓot bí ŋgí dí, bíg nyú, bíg lɔ́mɓan, bíg óm ŋgɔn yáɓá á míūg, tɛɛla á ɔ́lɔ̄ ví Nóa a níŋgléé á ŋkúú.

³⁹Ɓot bí ŋgí ketanɛ ɓé tɔ jam tɔ já tɛɛla á éceg libúmbé lí púhéé ɓɔ́, epupɛ yú kɛ́la ɓot bísɛ. Nlemlem á jam nɛ́ á ŋga kɛ́ li loo á mísɔ̄ mí Mɔɔ́n Mut.

⁴⁰Jɔ́ nɛ́, ɓot bíɓáa bíg kɛ li ɓɛ́ lí élɔŋ á ǹdíí, wa a nyɔ́ŋɓɛ́ɛ, nyɔ́ŋɔ́ a yéglé.

⁴¹Ɓondígá bíɓáa bí ɓɛ́ bíg kɔg mbahɛ á ŋgɔg, wa a nyɔ́ŋɓɛ́ɛ, nyɔ́ŋɔ́ a yéglé.

⁴²Ɓɛ́án hɔ́ pɛ́ɛ, átɔm nɛ́ miní ŋgá yí ɓé ɔ́lɔ̄ Ɛ́sɔ̄ŋɛ́ waná a ŋga kɛ́ li sɔ́.

⁴³Miníg yí m̀ɓɛɛŋ nɛ́, kí ɓɔŋ nɛ́ ɛ́sāŋɛ́-a-mitán ag yí ŋgɛ́ŋ nyí díɓe mut a wií a ŋga sɔ́, kí ag tɔɔ pɛɛ nɛ́ nyɔ́ŋ ah ɓólóg ɓé nyɛ́ nlɛ́ɛ́.

⁴⁴Jɔ́ nɛ́, ɓɛ́nɛ ki, tɔɓán pɛ́ɛ, átɔm nɛ́ miní ŋgá yí ɓé ŋgɛ́ŋ Mɔ́ɔ̄n Mut a ŋga kɛ́ li sɔ́le.»

⁴⁵Yésus ɔ kōndyé nɛ: «M̀ɓɔŋle a ewíyɛ́, nyɔ́ a byɛɛ́ éyī, a lɛ̄ nyɔ́ ɛ́sāŋɛ́-a-mitán á ŋgá tíi likanʼyɛ lí ɓaɓɔŋle bí ndáá yɛ́ɛ̄, nɛ́ a kááhánɛ̄ ɓɔ́ lídī á eceg ɛ́ ŋga sōmlɛ!

⁴⁶Misɔ́tá la nyɔ́ŋ m̀ɓɔŋle, nyɔ́ ɛsáŋɛ́-a-mitán á mísɔ̄ mɛ́ɛ́ a ŋga kɔ́p ag ɓɔŋ nyúŋ nsɔ́n.

⁴⁷La mbálɛ, mag laga ɓɛ́nɛ nɛ́, ag kɛ nyɛ́ lí tɛ́ɛ́yɛ kaa ŋ̀kanʼyɛ a abyaŋ wɛ́ɛ́ ásɛ nɛ́ ɓām.

⁴⁸Ndí, kíyáɓɛ́nɛ nyɔ́ŋ m̀ɓɔŋle a ɓɛ́ m̀ɓé, ndí a pɔ́t la m̀mím wɛ́ɛ́ nɛ: ‹Ɛsáŋɛ́-a-mitán ag bíŋhan li sɔ́›,

⁴⁹la nyɛ́ a ɓōtlé li ɓom lí míwāndá mɛ́ɛ́ mí nsɔ́n, ag dí, ag nyú la ɓot bí péa,

⁵⁰ɛsáŋɛ́-a-mitán a nyɔ́ŋ m̀ɓɔŋle ag kɛ li sɔ́ á m̀bya a ŋgá laaŋke ɓé nyɛ, la á ŋgɛ́ŋ a ŋgá yí ɓé;

⁵¹ag kɛ nyɛ́ lí duhu, la li vá lí nyɛ á élɔŋ ɛ́ ɓot bí ɔ́taɓa; ápah liwú la edí-mísoŋ bí ŋga kɛ́ li ɓɛ́.»