Read Bakoko Matéus 28 Bible Online

Matéus 28 - Bakoko bible

Matéus 28

¹Ámbúh ɔlɔ́ ví évɛɛɓan ví Élōg-Yúda, Malía Magdála la nyɔ́ŋɔ́ Mālía bú kɛ̄ la miyɛ́ mí kítí mí ɔlɔ́ ví ɔ́sū ví nzamɛ́ á lí légɓe lí sɔŋ.

²Váŋ nɛ́ sí ya póghán la ŋguu. Áŋgɛl nyí Nyɔ́ŋ-Ɛsáŋɛ́ yu sɔ́lé á lóō, yú tínɛ́ ŋgɔg á miníŋglé mí sɔŋ la yɔ yu tɔ́ɔ̄ yɔ á lóō.

³Nyíŋ áŋgɛl ɛ ŋgí paa kaa njanjat, mbɔ́tí yɛ́ɛ̄ ki ɛg púú pɛ́ŋ ákaa mitámŋga.

⁴Ɓatát sɔŋ bú nát la woŋ nyaa nyí lɛ nɛ́ bú yéglé kaa mimbim.

⁵Ndí áŋgɛl yu nyɔ̄ŋ mpɔ́t, yu lāgá ɓondígá nɛ: «Miníh kɔnɔ́g ɓé woŋ. Mag yí nɛ́ miníg somo Yésus nyɔ́ a tōmlɛ́ á mbásá.

⁶A sē ɓé vá, átɔm nɛ́ a pāhye ákaa a lagléé. Sɔ́án miní légɓé ápah a mɓɛ́ á náŋɛ.

⁷Ámbúh náŋ, vóánɛ li kɛ miní lāgá ɓáyēge ɓɛ́ɛ́ nɛ: ‹A pāhye á póla ɓá ɓā wú, léɓyán, ag dúgu ɔ́sū, ag laaŋke ɓɛ́nɛ á Galiléa, wóŋ nɛ́ miní ŋga kɛ́ nyɛ́ lí ɛ́nle.› Náŋ nɛ́ mi mɓɛ́la nɛ́ mi lágá ɓɛ́nɛ.»

⁸Ɓondígá bú vóó li ɓógo á sɔŋ á sí ŋgandag woŋ la mivag. Bú nāŋgá m̀bíí li kɛ lí lí lɛgɛ lí ɓáyēge bí Yésus nyíŋ pɔ́l.

⁹Váŋ nɛ̄ Yésus a sɔ́ lí ɓoman la ɓɔ́, aá la ɓɔ́ nɛ́: «Ma táma ɓɛ́nɛ.» La ɓondígá bú sīŋglé nyɛ ɓɛɓɛ, bú úlɓán á li byee lí nyɛ mikoo, bú úúyɛ́ mísū á sí á li ɓégɛ lí nyɛ.

¹⁰La Yésus ɔ lāgá ɓɔ nɛ́: «Miníh kɔnɔ́g ɓé woŋ. Kɛnán miní lɛ̄gɛ́ élōgétāŋ nɛ́ bí kɛ̄ á Galiléa, wóŋ nɛ́ bí ŋga kɛ́ ma lí ɛ́nle.»

¹¹Eceg bí ŋgí kɛ, ɓatát sɔŋ ɓɔ́g bú kɛ á tísɔn á li máŋlɛ lí ɓákanʼyɛ ɓatíi-nsúlé yé ɛ́sɛ yá loo.

¹²Ɛnɛ́ ɓákanʼyɛ ɓatíi-nsúlé ɓá kómān elɔŋ la ɓacɛ́ŋ bí lílōmɛ, bú tɔ́ɔ̄ á líɓomán, bú tí ɓatát sɔŋ puh mbáŋ mɔní,

¹³la nyí ndag nɛ́: «Miní lāgá voóm asɛ̄ nɛ́: ‹Ɓayége ɓɛ́ɛ́ ɓá sɔ́ díɓe la díɓe, bú yíí m̀bim wɛ́ɛ́ eceg bi ɓɛ́ɛ́ bi náŋɛ á ɔ́lɔ̄.›

¹⁴Ndí kíyáɓɛ́nɛ nyíŋ pɔ́l ya pám á míɔ̄ɔ̄ mí gɔ́mna licɛ́ŋ, ɓɛ́hɛ-mɛ̄n nɛ́ bi ŋga mɔ́mɛ nyɛ́. Biíg ɓɔŋ ki nyaa yɔ́ ɛ́sɛ nɛ́, tɔ jam líh teeŋgɛ́gɛ́ ɓé ɓɛ́nɛ.»

¹⁵Ɓatát sɔŋ bú nyɔ̄ŋ mɔní, la ɓɔ́ bú kɛ̄, bú ɓɔ̄ŋ mam ákaa ɓá máŋlɛ́ ɓɔ. Nyíŋ pɔ́l yu cámān á Élōg-Yúda yɔ́ ɛ́sɛ nɛ́-tɛ́ɛla lɛn.

¹⁶Jéŋ jóom lí ɓáōmɓɛ la wa lú kɛ̄ á Galiléa, lú pám á lóō lí ɔ́kolá ápah Yésus a éé ɓɔ́.

¹⁷Eceg ɓá ɛ́n nyɛ, bú úlɓán á li ɓégɛ lí nyɛ, ndí, ɓatám á élɔŋ yáɓá bí ɓɛ́ɛ́la pendan.

¹⁸Yésus ɔ sīŋglé ɓɔ á ŋgwáāg, ɔ lāgá ɓɔ̄ nɛ́: «Ŋguu ɛsɛ̄ ya tíéɓɛ́ ma á sí la á lóō.

¹⁹Kɛnán á mílōm mísɛ, miní yáanɛ́ ɓot ɓayége ɓáma. Tíán ɓɔ́ nzóɓan á jóō lí Ɛ́sāŋɛ́, la Mɔɔ́n, la M̀búl Mpúán.

²⁰Miní yéglɛ́ ɓɔ́ li naŋɛ lí mam mísɛ ma yéglɛ́ ɓɛ́nɛ. Á yé ŋga légɓe ma, mi lɛ élɔŋ la ɓɛ́nɛ ɔlɔ́ sig, nɛ́-tɛ́ɛla á lísūg lí biceg.»