Read Bakoko Matéus 5 Bible Online

Matéus 5 - Bakoko bible

Matéus 5

¹Eceg Yésus a ɛ́n ɔ́bul ví límut vú yálan, ɔ ɓét á lóō lí ɔ́kolá. Ɛnɛ́ a tɔ́ɔ̄, ɓayége ɓɛ́ɛ́ bú sīŋglé nyɛ á ŋgwáāg.

²La nyɛ́ ɔ nyɔ̄ŋ mpɔ́t, aá la ɓɔ́ nɛ́:

³«Misɔ́tá la ɓayɛ́ɛ́yɛ́ɛ bí m̀mím: Ekombo-lóō ɛ́ lɛ́ ɛ́yāɓā.

⁴Misɔ́tá la ɓawú-m̀mím, bíg kɛ li koto lí sí.

⁵Misɔ́tá la ɓá bí ŋga lée, bíg kɛ ɓɔ́ lí mɔ́mɛ.

⁶Misɔ́tá la ɓá bí lɛ́ nzal la evéhé yé étɛ̄l-sim: bíg kɛ li yál.

⁷Misɔ́tá la ɓakɔnan-ŋgɔ́ɔ́, bíg kɛ ɓɔ́ lí kɔnle lí ŋgɔ́ɔ́.

⁸Misɔ́tá la ɓá bí ŋga púú mímīm, bíg kɛ li ɛ́n lí Ɔ́lolómɛ̄.

⁹Misɔ́tá la ɓatíi nsaŋ, bíg kɛ li yáŋlɛ lí ɓɔ́ɔ̄n bí Ɔ́lolómɛ̄.

¹⁰Misɔ́tá la ɓot ɓáŋá ɓátām ɓá váŋgɛ́ lá ndeeŋgɛ ányúū liɓɛ́ɛg jáɓá lí sim, Ekombo-lóō ɛ́ lɛ́ ɛ́yāɓā.

¹¹Misɔ́tá la ɓɛ́nɛ eceg bí ŋga óŋo ɓɛ́nɛ, eceg bí ŋga váŋgɛ ɓɛ́nɛ la ndeeŋgɛ, la eceg bí ŋga túú ɓɛ́nɛ joó líɓē ányúū yáma.

¹²Kɔnán mivag, miní sōphɛ́ɛ, átɔm nɛ́ nsála wáná á lɛ́ ǹcɛ́ŋ á lóō. Ákaa ɛ́sɛ, náŋ nɛ́ bí váŋghɛ́ɛ ɓapɔ́tle-bí-Ɔ́lolómɛ̄ bí kwakwáŋɛ la ndeeŋgɛ.»

¹³«Ɓɛ́nɛ nɛ́ miní lɛ́ ŋku nyú á sí. Kíyáɓɛ́nɛ ŋku wá jáŋɛ́ ésɔh yɛ́ɛ́, la yéé bí ŋga tímanɛ yɔ́ é? Áh byɛ́ɛ́ ɓé pɛ eɓáha tɔ yá; bíg léé wɔ́ á ápūū, ɓot bí cógté wɔ́.

¹⁴Ɓɛ́nɛ nɛ́ miní lɛ́ mípūū mí ŋkɔŋ-á-sí. Tísɔn nyí ɛ kahɛ́ á lóō lí ɔ́kolá ɛ ŋgá sɔlɔ ɓé.

¹⁵Bí ŋgá koo ɓé étūlkáŋ, á lí bútyɛ lí yɔ mɔɔ́n ésɛɛ; ndí bíg cɛɛ yɔ́ á lóō, á lí ɓɔŋ nɛ́ ɛ́ paayé ɓá bísɛ bí lɛ́ á ndáá.

¹⁶Nlemlem á jam la ɓɛ́nɛ, mipúú máná mí páa á miíh mí ɓot, á lí ɓɔŋ nɛ́ eceg bí ŋga ɛ́n mísɔ̄n máná mílāām, bí ɓégɛ́ Ɛsɔ́ŋɛ́ wāná nyɔ́ a lɛ á lóō.»

¹⁷«Miníh ɔ́ŋlág ɓé nɛ ma sɔ́ lí sáá lí mbéndá nyí Móse tɔ yé ɛ́sɛ ɓapɔ́tle-bí-Ɔ́lolómɛ̄ ɓá yéglɛ. Māh sɔ́ ɓé ma yɔ́ lí sáá, ndí ma sɔ́ ja yɔ́ lí yáhɛ.

¹⁸La mbálɛ, mag laga ɓɛ́nɛ nɛ́, sɔ́kágánɛ́ sí la lóō bíg loo, tɔ píhí likétée tɔ ya ndí tɔ litɔt tɔ já bí ŋgá kɛ ɓé lí ɓógo á mbéndá, nɛ́-tɛ́ɛ míŋ mam mísɛ má yál.

¹⁹Jɔ́ nɛ́, nyɔ́ la nyɔ́ a ŋga kɛ́ li búú lí ɔtítígi ví lítiŋ lí mbéndá váhvá, tɔ li yéglɛ lí ɓot nɛ́ bí búú vɔ́ nlemlem, ag kɛ li ɓɛ́ lí mut a lóohan lí ɓɛ́ lí ntɔ́ga á Ékombo-lóō. Ndí nyɔ́ la nyɔ́ a ŋga ōŋle mbéndá, la li yéglɛ lí yɔ, nyɛ́ nɛ́ a ŋga kɛ́ li ɓɛ́ lí mut ǹcɛ́ŋ á Ékombo-lóō.

²⁰Jɔ́ nɛ́ mi ŋga laga ɓɛ́nɛ nɛ́, kíyáɓɛ́nɛ etɛ́l-sim yáná yáh loo ɓé yé ɓáyī-mbéndá la yé ɓot bí Élōg-Falísái, m̀ɓá, miní ŋgá kɛ ɓé li níŋgi á Ékombo-lóō.»

²¹«Maná ámblé nɛ, yá laglɛ́ ɓatáŋɛ nɛ́: Ɔh ólkágán ɓé; nyɔ́ la nyɔ́ a ŋga kɛ́ li ól lí mut, bíg kɛ la nyɛ́ á bíkááhɛ́nɛ́.

²²Ndí ma, mag laga ɓɛ́nɛ nɛ́: tɔ nzáá a ŋga álye mɔɔ́nyāŋ, bíg kɛ la nyɛ́ á bíkááhɛ́nɛ́. Nyɔ́ la nyɔ́ a ŋga kɛ́ li óŋo lí mɔ́ɔ̄nyāŋ nɛ́: ‹Ejóŋ-mut›! Bíg kɛla nyɛ́ á ŋkál á ɔ́ku-vicɛ́ŋ-ví-bíkāāhɛ́nɛ́. Nyɔ́ ki a ŋga óŋo nyɛ́ nɛ́: ‹Mut-a-nzeg›, a kɔ́ɔ́ nɛ́ bí léé nyɛ́ á éɓēl yé nzáan.

²³Eceg ɔ ŋgɔ kɛ́la likaale jɔ́ɔ á ɔ́sū ví étága-nsúlé, li pám váŋ ndí ɔ ɔ́ŋɔ nɛ mɔɔ́nyɔ̄ŋ a byɛlɛ́nɛ́ wa évinká,

²⁴yíg líkaale jɔ́ɔ váŋ ɔ́sū ví étága-nsúlé, ɔ kɛ́ yágá ɔ sáŋglán la mɔɔ́nyɔ̄ŋ, sɔ́kágánɛ́ ɔg timan li kɛla lí líkaale jɔ́ɔ ɔ́sū ví Ɔ́lolómɛ̄.

²⁵Kwááɓɛ́ɛ li ámblan la mut miní byɛ́ɛ̄ mípɔ̄t kí ɔ ŋgí lɛ élɔŋ la nyɛ́ á nzen, á lí pún nɛ́ ah kɛnɛ́g ɓé la wa á ɔ́sū ví ŋ̀kááhɛ, ŋ̀kááhɛ a óm wa á sónja, la yɔ́ ɛ́ lɛ̄ŋgɛ́ wa á ndáá-m̀ɓog;

²⁶la mbálɛ mag laga wa nɛ́, ɔ ŋgɔ́ kɛ ɓé lí pámɓan wa ŋgí lí sála lí épīl yɔ́ ɛ́sɛ nɛ́ ɓam.»

²⁷«Maná ámblé nɛ yá laglɛ́ nɛ: Ɔh kɛnɛ́g ɓé á ndeŋg.

²⁸Ndí ma, mag laga ɓɛ́nɛ nɛ́: tɔ nzáá a ŋga légɓe mindígá la kóó, a ɓɔ̄ŋ áɓē á ndeŋg la nyɛ́ á m̀mím wɛ́ɛ́.

²⁹Kíyáɓɛ́nɛ diíh jɔ́ɔ lí m̀ɓɛ́nlómɛ lí lɛ́ njɔm aɓé wɔ́ɔ, túh jɔ́, ɔ léé jɔ́ énɛŋɛ́ lā wa, átɔm nɛ́ ɛ́ lɛ́ wā nsɛ́ŋ nɛ ɔ ɓɔ́lán éjo yɔ́ɔ ɛ́ nyúū yá li loo nɛ́ bíg léé wa la nyuú yɔ́ɔ ɛsɛ̄ á éɓēl yé nzáan.

³⁰Kíyáɓɛ́nɛ wɔ wɔ́ɔ á m̀ɓɛ́nlómɛ á lɛ́ njɔm aɓé wɔ́ɔ, sɛ́m wɔ́ ɔ léé wɔ́ énɛŋɛ́ lā wa; átɔm nɛ́, ɛ́ lɛ́ wa nsɛ́ŋ nɛ ɔ ɓɔ́lán éjo yɔ́ɔ ɛ́ nyúū yá li loo nɛ́ bíg léé nyúū yɔ́ɔ ɛsɛ̄ á éɓēl yé nzáan.»

³¹«Á yéŋé épah ki, yá laglɛ́ nɛ: ‹Kíyáɓɛ́nɛ páam ya dúhú ŋ̀gáá wɛ́ɛ̄, a tí nyɛ́ kálati ɛ kundɛ.›

³²Ndí ma, mag laga ɓɛ́nɛ nɛ́: Amáh nɛ́ páam ya byée ŋ̀gáá wɛ́ɛ̄ á ndeŋg, tɔ nzáá a ŋga dúhu ŋ̀gáá wɛ́ɛ̄, ag óm nyɛ á ndeŋg. kíyáɓɛ́nɛ ki a lɔ́m míndīgá ɓá duhu, a ɓɔ̄ŋ áɓē á ndeŋg.»

³³«Maná ámblé sīg-pɛ nɛ́ yá laglɛ́ ɓátáŋɛ nɛ́: Ɔh kanág ɓé sɔŋ, ndí yáhɛ ja míkakanɛ mɔ́ɔ á ɔ́sū ví Nyɔ́ŋ-Ɛsáŋɛ́.

³⁴Ndí ma, mag laga ɓɛ́nɛ nɛ́ m̀ɓá-mɓá miníh kanág ɓé sɔŋ la lóō, átɔm nɛ́, etɔɓé-líkanʼyɛ yé Ɔ́lolómɛ̄ yéŋ,

³⁵tɔ la sí, átɔm nɛ́, etɛ́ɛ́yéné yɛ́ɛ́ míkoo yéŋ; tɔ la Yelúsalɛm, átɔm nɛ́, Tísɔn nyí Káísa ecɛ́ŋ nyíŋ.

³⁶Ɔh kanág ɓé tɔ sɔŋ la m̀mú wɔ́ɔ, átɔm nɛ́ ɔ ŋgɔ́ la ɓé lí yaanɛ lí nzíŋ ɛ́ voŋ yɔ́ɔ tɔ yá epúpúɛ tɔ evívínɛ.

³⁷Eceg miní ŋga pɔ́t, sɛ́mán ja nɛ́ ‹Ɔɔ› tɔ nɛ́ ‹Kɛ́m›; yé ɛ́sɛ ɛ́ ŋga sɔ́ ámbúh ɛ́g sɔ́le ja lā Ǹsɔhɔ.»

³⁸«Maná ámblé nɛ yá laglɛ́ nɛ: Diíh ányúū diíh, lisoŋ ányúū lisoŋ.

³⁹Ndí ma, mag laga ɓɛ́nɛ nɛ́ miníh letlégé ɓé éɓéɓéyɛ mut m̀mím. Á mveŋghanɛ́, kí mut a lɔ́g wā líɓāā á límāŋ lí m̀ɓɛ́nlómɛ, lɛ́g ki nyɛ́ jéŋé.

⁴⁰Kí mut a sōmó wā lí kɛla á ɔ́sū ví ŋ̀kááhɛ á lí kɛ́tɛ lí wa sɔ́ti yɔɔ, mwahlé ki nyɛ́ lógi jɔ́ɔ.

⁴¹Kí mut a kágyɛ́ wa nɛ́ ɔ wɛ́ɛ ɔkóó ví míkoo mí dúwɛ, wɛɛ́ náŋ akóó á míkoo áɓáa elɔŋ la nyɛ́.

⁴²Kí mut a ɓāt wā jam, tí nyɛ́ jɔ́; ɔh yímíg ɓé ki nyɔ́ a ŋga sɔ́ á éɓálɛ́.»

⁴³«Maná ámblé nɛ yá laglɛ́ nɛ̄: ɔg kɛ li diŋ lí mɔ́ɔ̄nɛ́sɔ̄ŋ, ɔ síŋgɛ́ ǹlem wɔɔ.

⁴⁴Ndí ma, mag laga ɓɛ́nɛ nɛ́: Diŋán ɓálem ɓáná, miní kánɛ́ ányúū ɓá bí ŋga váŋgɛ ɓɛ́nɛ la ndeeŋgɛ;

⁴⁵á lí ɓɔŋ nɛ́, la mbálɛ miní ɓɛ́ ɓɔɔ́n bí Ɛ́sɔ̄ŋɛ́ wāná nyɔ́ a lɛ á lóō. Ányúū nɛ́ ag pámɛ vaŋgá vɛ́ɛ́ ányúū biɓéɓéyɛ la bilɔ́ŋgɔ bí ɓot; ag nɔ́hɛ mbeŋ ányúū ɓot bí tɛ́ɛ́ sim la ɓá bí kɔ́tɛ́.

⁴⁶Kí maná dīŋ ja ɓot bí ŋga dīŋ ɓɛ́nɛ, wɔɔ́wɔ́ɔ nsála miní ŋga láaŋke é? Ɓakomanɛ-ŋkuh-á-gɔ́mna ɓɔ́g bíg ɓɔŋ nlemlem á jam!

⁴⁷Kíyáɓɛ́nɛ miníg tama ki ja élōgnyɔ̄ŋ yáná, yéé tóɓó-tóɓó miní ŋga ɓɔ̄ŋ é? Ɓaá Ɓot bíh byɛ́ɛ́ ɓé ŋyéɓé la Ɔlolómɛ̄ ɓɔ́g bí ŋgá ɓɔŋ ɓé ja nlemlem á jam é?

⁴⁸Ɓɛ́nɛ hɔ́, ɓɛ́án ŋgíla ɔnɛ́g ákaa Ɛsɔ́ŋɛ́ wāná a lɛ á lóō a lɛ ŋgíla ɔnɛ́g.»