Read Bakoko Málkus 11 Bible Online

Málkus 11 - Bakoko bible

Málkus 11

¹Ɛnɛ́ Yésus la ɓayége ɓɛ́ɛ́ bí siŋgléé ɓɛ́ɓɛ la Yelúsalɛm, á ŋgwáāg mikɔŋ mí Betfagéa la Betánia, jé lí ɔ́kolá ví tín ɛ́ Olíva[7], ɔ óm ɓáyēge ɓɛ́ɛ́ bíɓáa,

²a byɛ́la ɓɔ́ nɛ́: «Kɛnán á ŋkɔŋ á lɛ́ ɔ́sū váná, Eceg miní ŋga kɛ́ li pám wóŋ, miníg kɛ li kɔ́p lí mɔɔ́n jákāas a tíŋɛ nyɔ́ tɔ mut āh mɓétég ɓé á lóō jɛ́ɛ́, Tiŋlán nyɛ́ miní sɔ́ la nyɛ́.

³Ndí kíyáɓɛ́nɛ mut a ɓāt ɓɛ́nɛ nɛ́: ‹Ányúū yéé miní ŋga tíŋi nyɛ́ é?› Peelán nyɛ́ nɛ́: ‹Nyɔ́ŋ-Ɛsáŋɛ́ a byɛ́ɛ́ kóó la nyɛ́›, ag kɛ ɓɛ́nɛ nyɛ́ li vóo lí li tíi.»

⁴La ɓayége bú kɛ, bú kɔ́p mɔɔ́n jákāas ápūū, a tíŋɛ ɓɛɓɛ la likooká lí ndáá nyí ɛ ɓɛ́ɛ́ ɓɛ́ɓɛ váŋ á ŋgwáāg nzen. Bú tīŋí nyɛ.

⁵Apuh á ɓot nyú á ɓɛ́ɛ́ váŋ wú bíhī ɓɔ nɛ́: «Ányúū yéé miní ŋga tíŋi nyɔ́ŋ mɔɔ́n jákāas é?»

⁶Ɓayége bú pélē ɓɔ ákaa Yésus a lagléé ɓɔ; váŋ nɛ́ ɓá mwahɛ́ ɓɔ nɛ bí kɛ́la nyɛ́.

⁷Bú sɔ́la Yésus nyɔ́ŋ mɔɔ́n jákāas, bú táa mbɔ́tí yáɓá á ŋkag wɛ́ɛ́, la nyɛ́ ɔ tɔ́ɔ̄ á lóō jɛ́ɛ́.

⁸Ɓot ŋgandag bú táa mbɔ́tí yáɓá á nzen, ɓáŋá ɓatám bú táa péná ɛ́ ɓɔ́ɔ̄n bí mícāā bí sɛ́mɛ́ɛ́ á pɛ́ɛ́.

⁹Ɓot bí ŋgí wɛɛ ɔ́sū ví Yésus la ɓá bí ŋgí oŋ nyɛ́ á mbúh bí ŋgí lón nɛ́: «Osána! Ndómbo ɛ ɓɛ́ la nyɔ́ a ŋga sɔ́ á jóō lí Nyɔ́ŋ-Ɛsáŋɛ́.

¹⁰Ndómbo ɛ ɓɛ́ la líkanʼyɛ lí Dávid Etāa wahá, likanʼyɛ lí ŋga sɔ́! Osána á loó-loó!»

¹¹Yésus ɔ níŋgí á Yélūsalɛm, ɔ kɛ́ á ndáá-ēcɛ́ŋ-Ɔlolómɛ̄. Ɛnɛ́ a légɓé mam mísɛ mí ɓɛ́ɛ́ nyɛ́ á ŋgwáāg, kasig náŋ a ɓɛ́ɛ́ ébúg-lóō ɔ nyɔ̄ŋ nzen li kɛ á Betánia elɔŋ la jóom jɛ́ɛ́ lí ɓáōmɓɛ la bíɓáa.

¹²Ɛnɛ́ kítí ya yɛ́, á míɓógo máɓá mí Betánia, nzal yu byée Yésus.

¹³La nyɛ́ ɔ ɛ́n tín ɛ fígiya[8] enɛŋɛ́ ɔ́sū nyí ɓɛ́ɛ́la awáá. Ɔ kɛ́ li légɓe kíyáɓɛ́nɛ ag la li kuh lí mitám tɔ máŋvéé muŋ. Ndí ɛnɛ́ a siŋgléé, ɔ kɔ́p ja áwāā la awáá, átɔm nɛ́ eceg yɛ́ɛ́ li úm ɛ́ ɓɛ́ɛ́ ŋgí lí kɔlan.

¹⁴Váŋ hɔ́ nɛ a lága nyíŋ tín ɛ fígiya nɛ́: «Á m̀ɓá la m̀ɓá, mut āh dí ɓé pɛ litám jɔ́ɔ.» Ɓayége ɓɛ́ɛ́ bú ámblé yé a pɔ́t.

¹⁵Ɛnɛ́ ɓá pám á Yélūsalɛm, Yésus ɔ níŋgí á ndáá-ēcɛ́ŋ-Ɔlolómɛ̄, ɔ ɓōtlé li duhu lí ɓot bí ŋgí nuŋu la ɓá bí ŋgí sóm. Ɔ ɓōtlé ki li ɓɛ́h lí téɓeli á sí yí ɓáveŋghanɛ-mɔní, la aɓɛlá á ɓánuŋu aɓeŋ.

¹⁶Ah mwáhɛ́ɛ ɓé tɔ mut nɛ́ a póghán la jam múŋ átē.

¹⁷Ámbúh náŋ, ɔ ɓōtlé li yéglɛ lí ɓot, a byɛ́la ɓɔ́ nɛ́: «Ɓaá yáh ciiɓɛ ɓé nɛ: Ndáá yáma ɛg kɛ li yáŋlɛ nɛ́ ndáá mikánɛ ányúū milóm mísɛ é? Ndí ɓɛ́nɛ, maná yaanɛ́ yɔ lisɔlɓéné lí mítɔnɓa.»

¹⁸Ɛnɛ́ ɓakanʼyɛ ɓatíi-nsúlé la ɓayí-mbéndá ɓá ámblé yé ya loo, bú ɓōtlé lí veg lí peg ákaa láá ɓá nyɛɛ́ lí ólhánɛ lí Yésus; átɔm nɛ́ bí ŋgí kɔn nyɛ́ woŋ, kasig limut lí ŋgí mɛmɛ nyɛ́ likɔlɓan la yé ɛ́sɛ a ŋgí yéglɛ.

¹⁹Á ébúg-lóō, Yésus la ɓayége ɓɛ́ɛ́ bú ɓógo á nyíŋ tísɔn.

²⁰Eceg bí ŋgí loo la kítí, bú ɛ́n nɛ nyíŋ tín ɛ fígiya ya wú, yu óm nɛ́ kɛ́lɛ́t tɛɛla á míkaŋ.

²¹La Pétlos ɔ ɔ́ŋɔ́ yé Yésus a pɔ́tɔ́ɔ́, ɔ lága nɛ: «Á Ŋ̀yéglɛ, légɓé sig, nyí tín fígiya wa lɔ̄g ya wú.»

²²Váŋ nɛ́ Yésus a lága ɓɔ́ nɛ́: «Ɓɛ́án la ŋyéɓé la Ɔlolómɛ̄.

²³La mbálɛ, mag laga ɓɛ́nɛ nɛ́, kíyáɓɛ́nɛ mut a laga ví ɔkolá nɛ: ‹muglán vá, kɛɛ́n ɓɛ́hán á túwɛ›, kíyáɓɛ́nɛ a ŋgá pendan ɓé á m̀mím, ndí ag yéɓe, yé ɛ́sɛ a lága ɛ́g ɓɔŋɓɛ, la yɔ́ yá yál.

²⁴Jɔ́ nɛ́ mi ŋga lága ɓɛ́nɛ nɛ́: Mam mísɛ miní ŋga kɛ́ li ɓat kí miníg kánɛ, miní ɓɛ́la ŋyéɓé nɛ maná kuh mɔ, mɔ́g mí kɛ ɓɛ́nɛ li tíéɓɛ.

²⁵La náŋ, eceg miní tɛ́ɛ́ miníg kánɛ, kíyáɓɛ́nɛ miníg álye mut, laakánɛ̄ nyɛ́ á lí ɓɔŋ nɛ́ Ɛsɔ́ŋɛ́ waná nyɔ́ a lɛ á lóō nyɛ́g a láákɛ́ ɓɛ́nɛ avuha wáná.» [

²⁷Yésus la ɓayége ɓɛ́ɛ́ bú tímān sīg-pɛ á Yélūsalɛm. Ɛnɛ́ a níŋgí á ndáá-ēcɛ́ŋ-Ɔlolómɛ̄, ɔ ɓōtlé li wɛɛ voóm asɛ̄. Váŋ nɛ́ ɓákanʼyɛ ɓatíi-nsúlé, ɓayí-mbéndá la ɓacɛ́ŋ bí lílōmɛ ɓá sīŋglé nyɛ ɓɛɓɛ.

²⁸La ɓɔ́ bú ɓāt nyɛ nɛ́: «La jɔɔ́jɔ́ɔ likundɛ ɔ ŋgɔ ɓɔ̄ŋ míŋ mam. Nzáá a tí wa kundɛ li ɓɔŋ lí mɔ́ é?»

²⁹Yésus ɔ pélē ɓɔ́ nɛ́: «Mag ɓat ɓɛ́nɛ mbihi yāhya; kí maná pélē ma, mág ma laga ɓɛ́nɛ la jɔɔ́jɔ́ɔ likundɛ mi ŋga ɓɔŋ míŋ mam mísɛ.

³⁰Laglán ma: Ɓaá nzoɓan nyí Yohánɛs ɛg sɔ́le la Ɔlolómɛ̄ tɔ nɛ́ la ɓot-bí-bínam é? Peelán ma!»

³¹La ɓɔ́ bú dūtɛ́ míɔ̄ŋɔ, bú mɔg nɛ: «kíyáɓɛ́nɛ ɓa lágá nɛ Ɔlolómɛ̄, ag ɓat ɓɛ́hɛ nɛ́: Ányúū yéé hɔ́ manáh yéɓe ɓé la nyɛ é?

³²Kɛ́m, bí sē ɓé ki nɛ́ ɓa cégē li laga nɛ́: Ɓot-bí-bínam.» Bí ŋgí laga náŋ ányúū nɛ́ bí ŋgí kɔn limut woŋ; kasig ɓot bísɛ bí ɓɛ́ɛ́la á m̀mú nɛ́ Yohánɛs a ɓɛ́ɛ́ taŋ m̀pɔ́tle-a-Ɔlolómɛ̄.

³³Váŋ nɛ́ ɓá pélē Yésus nɛ́: «Bi ŋgá yí ɓé ɓɛ́hɛ.» Yésus nyɛ́g ɔ tímānɛ̄ ɓɔ nɛ́: «Tɔ mág, mi ŋgá laga ɓé ma ɓɛ́nɛ la jɔɔ́jɔ́ɔ likundɛ mi ŋga ɓɔ̄ŋ míŋ mam.»