Read Bakoko Málkus 12 Bible Online

Málkus 12 - Bakoko bible

Málkus 12

¹Ámbúh náŋ, Yésus ɔ kánɛ ɓákanʼyɛ ɓatíi-nsúlé la ɓayí-mbéndá ví aŋgaáŋgan nɛ́: «Mut wa a sáláá ǹdíí á bínyɛŋgɛ́n bí wáany, ɔ céŋ wɔ kɔ́tá, ɔ ɓɔŋ m̀ɓáláŋ á m̀ɓálá até ányúū li pámɛ lí mílɔg, ɔ óŋ njóŋgi á li ee li wɔ. Ámbúh náŋ ɔ tí wɔ ɓaɛŋ, ɔ kɛ́ á duwɛ.

²Ɛnɛ́ eceg yá kɔlan, ɔ óm m̀ɓɔŋle wɛɛ́ wa á yóg ɓaɛŋ á lí ɓat lí ɓɔ ɛjɛ́ɛ́ joga.

³Ɓaɛŋ bú byeé nyɛ, bú úm nyɛ bikút, bú sóɛ̄ nyɛ mɔ nsɔ́.

⁴Ɔ tíman ɔ óm sīg-pɛ m̀ɓɔŋle ntám; nyɛ́g bú lɔ́g nyɛ á m̀mú, bú óŋó nyɛ.

⁵Ɔ kōndyé ɓɔ́ li óm lí m̀ɓɔŋle ntám sīgpɛ, nyɔ́ŋ, bú ól nyɛ. Yíŋí ŋgandag ɓáɓɔŋle ɓatám a ómóó, bí ŋgí úm ɓá bikút, ɓáŋá ɓatám bíg ól.

⁶M̀wɛɛ́n ǹdíí ɔ yéglán já edidíŋɛ yɛ́ɛ́ mɔɔ́n yɔ́-ntámɛ́. Á mísúgle ɔ óm yɔ la mí míɔ̄ŋɔ nɛ́: ‹Bíg kɛ nyɛ́ lí ditɛ.›

⁷Ndí ɓaɛŋ-kɔ́mbɔ bú laglán nɛ: ‹Ŋ̀yéglan-embámbá nyɔ́ sɔ́án! Bi ól nyɛ́, bi yéglán émbāmbá.›

⁸Váŋ nɛ́ ɓá byeé nyɛ, bú ól nyɛ bú léé m̀bim wɛ́ɛ́ énɛŋɛ́ la ǹdíí.

⁹Ɓaá yéé m̀wɛɛ́n ǹdíí a ŋga kɛ́ li ɓɔŋ é? Ag kɛ li sɔ́, a ól ɓáŋ ɓaɛŋ, a tí ǹdíí wɛ́ɛ́ ɓáɛŋ ɓatám.

¹⁰Manáh sɔ́ŋgɔ ɓé pɔ́n yé epah Lícii-Lipúán ɛ́ ŋga yó nɛ́: ‹Ŋgɔg nyí ɓaóŋ ndáá ɓá ɓen, yɔ nɛ́ ya tímān lí ɓɛgɛ lí ndáá é!

¹¹Miɓɔŋɔg mí Nyɔ́ŋ-Ɛsáŋɛ́ miŋ; sē líŋgɔ̄ŋɔ́ a miíh máhá é!›»

¹²Ɓakanʼyɛ ɓatíi-nsúlé la ɓayí-mbéndá bí ŋgí somo li byee lí Yésus ndí, bú kɔn límut woŋ. Átɔm nɛ́ bí sɔ́ŋtánɛ nɛ́ ányúū yaɓá nɛ a kánɛ víŋ ɔŋgaáŋgan. La ɓɔ́ bú yíg Yésus bú kɛ.

¹³Ɓakanʼyɛ ɓatíi-nsúlé, ɓayí-mbéndá la ɓacɛ́ŋ bí lílōmɛ bú óm puh ɓot yí Élōg-Falísái la ɓot bí nlɔŋ á Élóde nɛ́ bí ám Yésus á biɓaŋgá byɛ́ɛ́.

¹⁴Váŋ nɛ́ ɓá sɔ́ li laga lí Yésus nɛ́: «Á Ŋ̀yéglɛ biíg yí nɛ́ ɔ lɛ mbálɛ, ɔ ŋgɔ́ mwáhɛ ɓé ki nɛ́ tɔ mut a dúmbɛ́ɛ wa. Ɔ ŋgɔ́ légɓe ɓé eɓɛ́lé yé ɓot ndí ɔg étɛ ɓɔ́ nzen nyí Ɔlolómɛ̄ átē á mbálɛ. Ɓaá ɛ́ lɛ́ kundɛ tɔ nɛ́ kɛ́m li sála lí táas á yóg káísa ecɛ́ŋ é? Ɓaá ɓa nyɛ́ɛ yɔ li sála tɔ nɛ́ kɛ́m é?»

¹⁵Ákaa Yésus a ŋgí yí nɛ́ bí lɛ́ ɔ́taɓa, a byɛ́la ɓɔ́ nɛ́: «Ányúū yéé miní ŋga ám ma é? Sɔ́án la ma épah ɛ́ kápa mi légɓé yɔ́.»

¹⁶La ɓɔ bú sɔ́la nyɛ yá. Yésus ɔ ɓāt ɓɔ nɛ́: «Asú la joó lí nzáá bí lɛ́ múŋ é?» La ɓɔ́ bú pélē nyɛ nɛ́: «Bí káísa ecɛ́ŋ».

¹⁷Yésus a byɛ́la ɓɔ nɛ́: «Miní tímánɛ Káísa ecɛ́ŋ yé ɛ lɛ yé Káísa ecɛ́ŋ, miní tímānɛ ki Ɔlolómɛ̄ yé ɛ lɛ yé Ɔlolómɛ̄.» Ndí ɓáŋ ɓot bísɛ bú nyág ŋgandag la mbele yɛ́ɛ̄.

¹⁸Ámbúh náŋ, ɓot bí Sadúkái ɓá bí ŋgí laga nɛ́ lipahye lí sē ɓé, bú sɔ́ á ŋgwáāg Yésus, la ɓɔ́ bú ɓāt nyɛ nɛ́:

¹⁹«Á Ŋ̀yéglɛ, Móse a cíi ányúū yāhá nɛ: ‹kíyáɓɛ́nɛ mut wa a byɛ́ɛ́ mɔɔ́nyāŋ a páam ndí a wú, a yíg ŋkúh ŋgíla mɔɔ́n, mɔɔ́nyāŋ ag koto ŋkúh wɛ́ɛ́ á lí ɓɔŋ nɛ́ a kól nyɛ́ mbota.›

²⁰Linyaŋ lí páam nzambúwá jéŋ, nyɔ́ ɔsú ɔ lɔ́m míndīgá, ɔ wú ɛ́h ɓɛ́ ɓé lí yíg lí mɔɔ́n.

²¹Nyɔ́ a yáhɛ́ bíɓáa ɔ kótō nyúŋ ŋkúh, ɔ wú ɛ́h ɓɛ́ ɓé lí yíg lí mɔɔ́n, nlemlem la nyɔ́ a yáhɛ́ bíŋháa.

²²Jéŋ linyaŋ nzambúwá lísɛ líh yígíi ɓé mbota. Ámbúh yaɓá ɓɔ́ bísɛ, mindígá nyɛ́g ɔ wú.

²³Á eceg lípahye lí ɓá ɓá wú, kí jéŋ linyaŋ lā tɛ́lɛ, ɓaá, nzáá á póla yaɓá a ŋga kɛ́ li ɓɛ́ lí nlóm á nyɔ́ŋ mindígá é? Átɔm nɛ́ ɓɔ́ nzambúwá ɓá tɔɔ́ la nyɛ́ ákaa ŋ̀gáá.»

²⁴Yésus ɔ pélē ɓɔ́ nɛ: «Ɛ́ sē ɓé mbálɛ nɛ́ ŋgilí yí yaná nyí biciilé la nyí ŋguu Ɔlolómɛ̄ nɛ ɛ ŋga óm ɓɛ́nɛ á ɔ́vuha é?»

²⁵La mbálɛ eceg mut a ŋga pāhye átē a ɓá ɓá wū, a ŋgá lɔ́mɓan ɓé pɛ, ndí ag ɓɛ́ ja ákaa áŋgɛl ɛ́ lɛ́ á lóō.

²⁶Likɔlɓan la lipahye átē a ɓá ɓá wū, ɓaá, maná sɔ́ŋgɔ ɓé kálati Móse ápah a ŋga laga pɔ́l nyí ekaŋga ɛ́ ŋga lóŋ ɛ́h ɓɛ́ ɓé lí sííɓe é? Ákaa láá Ɔlolómɛ̄ a kwɛ́lɛ̄ nyɛ nɛ́: «Ma nɛ́ mi lɛ Ɔlolómɛ̄, Loó lí Áblaháam, Loó lí Ísaak, la Loó lí Yákob.

²⁷Ɔlolómɛ̄ a sē ɓé Lōó li ɓot ɓá wú, ndí jé lí ɓá bí lɛ́ á éniŋ. Yíán hɔ́ nɛ maná yɔ́p.»

²⁸Ɛnɛ́ ŋ̀yí-mbéndá wa a ámblé ɓɔ́ bíg kála, ɔ sīŋgle, ɔ ɛ́n nɛ Yésus a pélē ɓáŋ ɓot bí Élōg-Sadúkái m̀ɓɛɛŋ. Váŋ nɛ́ a sīŋglé Yésus ɓɛɓɛ ɔ ɓāt nyɛ nɛ́: «Jɔɔ́jɔ́ɔ litiŋ lí mbéndá lí ŋga lōo míŋí mísɛ é?»

²⁹Yésus ɔ pélē nyɛ nɛ́: «Litiŋ lí ɔ́sū lí mbéndá jé nɛ́: Ámblé a Íslāɛl! Ɛtáŋɛ Lōó jáhá a lɛ pɔmbɛ Nyɔ́ŋ-Ɛsáŋɛ́.

³⁰Ɔg kɛ li diŋ lí Nyɔ́ŋ-Ɛsáŋɛ́ Lōó jɔ́ɔ la m̀mím wɔ́ɔ ásɛ, la liɓɛ́ɛg jɔ́ɔ lísɛ la miɔ́ŋɔ mɔ́ɔ mísɛ la ŋguu yɔɔ ɛsɛ̄.

³¹Litiŋ lí mbéndá lá yáhɛ́ míɓáa jé nɛ́: Ɔg kɛ li diŋ lí mɔ́ɔ̄nɛ́sɔ̄ŋ ákaa wā-mɛ̄n. Litiŋ lí mbéndá tɔ já lí ŋga lōo míŋ ɛ sē ɓé.»

³²Váŋ nɛ́ nyɔ́ŋ ŋ̀yí-mbéndá a lága Yésus nɛ́: «Náŋ a lɛ m̀ɓɛɛŋ ŋgandag á Ŋ̀yéglɛ, wa pɔ́t mbálɛ. Ɔlolómɛ̄ a lɛ pɔmbɛ, ntám á sē ɓé pɛ;

³³li diŋ lí nyɛ la m̀mím wɔ́ɔ ásɛ, la eyí yɔ́ɔ ɛ́sɛ la ŋguu yɔɔ ɛsɛ̄, la li diŋ lí mɔ́ɔ̄nɛ́sɔ̄ŋ ákaa wā-mɛ̄n. Náŋ ag loo yaa misúlé mí bí ŋga dígɛ la mí bí ŋgá dígɛ ɓé.»

³⁴Ɛnɛ́ Yésus a ɛ́n nɛ́ a pélē nyɛ a nyaa ɛ tɛ́ɛ́, a byɛ́la nyɛ nɛ́: «Ɔ sē ɓé énɛŋɛ́ la Ekombo Ɔ́lolómɛ̄.» Mut tɔ wa ah láa ɓé pɛ nyɛ́ li bihi lí tɔ jam.

³⁵Kasig Yésus a ŋgí yéglɛ á ndáá-ēcɛ́ŋ-Ɔlolómɛ̄, ɔ nyɔ̄ŋ mpɔ́t a byɛ́ nɛ: «Nɛ láá ɓayí-mbéndá bí ŋga lá li pɔ́t nɛ́ Nyɔ́-a-Pɔ́hlɛ a lɛ mɔɔ́n Dávid é?

³⁶M̀búl Mpúán nyɛ́-mɛ̄n a yíglé Dávid li laga nɛ́: Nyɔ́ŋ-Ɛsáŋɛ́ a laga Ɛtáŋɛ wama nɛ́: Tɔɔ́ á m̀ɓɛ́nlómɛ wama nɛ tɛ́ɛ ma vá ɓálem ɓɔ́ɔ á sí yɔ́ɔ míkoo.

³⁷Jɔ́ hɔ́ nɛ́ Dávid nyɛ́-mɛ̄n a ŋga yáŋa nyɛ nɛ́ Nyɔ́ŋ-Ɛsáŋɛ́; nɛ́-láá a lɛ hɔ́ nyɛ́ mɔɔ́n é?» Limut licɛ́ŋ lí ŋgí ámblé nyɛ la mivag.

³⁸Eceg Yésus a ŋgí yéglɛ, a ŋgí laga nɛ́: «Nyɔŋán lítāt lá ɓayí-mbéndá bí ŋga díiŋ li wɛɛwɛɛ la mitaandá mí mbɔ́tí, la ŋgandag mítamlan á ɓávoóm bí límut,

³⁹li tɔɔ a bitɔ bí ɔ́sū a ndáá-míɓomán, la bitɔ bí ɔ́sū á ndáá-míndēmá.

⁴⁰Ɓɔ́ ɓot bí ŋga nyɔ̄ŋ miɓɛɛŋ mí míkūh mí ɓóndīgá la li laaɓɛ lí míkánɛ, bíg kɛ li kuh lí ékɔ́ghɛ yé ŋguu li loo lí ɓot bísɛ.»

⁴¹Kasig Yésus a ɓɛ́ɛ́ á tɔ́ɔ̄ ɔ́sū ví ésɛɛ ɛ́ míkaale, ag légɓe ákaa ɓot bí ŋgí lɛŋgɛ ŋkuh múŋ, ɔ ɛ́n mímbyaŋ mí ɓot ŋgandag míg vá mbáŋ-mbáŋ ŋkuh átē,

⁴²ŋgɔ́ɔ́ ŋkúh á míndīgá ya yɔg yu sɔ́, yu lɛ̄ŋgɛ́ ɓɔ́ɔ̄n bí kápa bíɓáa múŋ á ŋkúú á míkaale.

⁴³Váŋ nɛ́ Yésus a yáŋa ɓayége ɓɛ́ɛ́ a byɛ́la ɓɔ́ nɛ́: «La mbálɛ mag laga ɓɛ́nɛ nɛ́, nyí ŋgɔ́ɔ́ ŋkúh á míndīgá ya tí li loo li ɓáŋá ɓot bísɛ;

⁴⁴átɔm nɛ́ ɓáŋá bísɛ ɓá tí ákaa likaale yé ɛ́h byɛ́ɛ́ ɓé ɓɔ nsɛ́ŋ, ndí nyɛ́, la ŋgɔ́ɔ́ yɛ́ɛ̄ ɛsɛ̄, a tí yé ɛ́sɛ a mɓɛ́la ányúū li niŋ.»