Read Bakoko Málkus 2 Bible Online

Málkus 2 - Bakoko bible

Málkus 2

¹Ámbúh puh álɔ̄, Yésus ɔ tímān á Kafalnáum, ɓot bú ámblé nɛ a lɛ váŋ.

²Edila límut lú kóman á nyaa nyí lɛ nɛ́, litɛ́lɓéné líh mɓɛ́ ɓé pɛ á ápūū, li pám nɛ́-tɛ́ɛla á ányu-á-mɓɛ́l; la Yésus ɔ ɓōtlé ɓɔ li lɛgɛ lí Pɔ́l Ɔlolómɛ̄.

³Váŋ nɛ́, ɓot bínáa ɓá sɔ́ bí ɓɛ́gɛ eɓóg-mut, á lí ɛ́n lí Yésus.

⁴Ndí ákaa bí ŋgí la ɓé nyɛ li pámla ápah a ɓɛ́ɛ́ ányúū ŋgandag limut, bú ɓét la nyɛ́ á lóō lí ǹduu, bú ɓāg voóm likɔlɓan ápah Yésus a ɓɛ́ɛ́. Bú súhɛ́nɛ́ yéŋ eɓóg-mut á lóō jɛ́ɛ́ lí sáŋkálɛ.

⁵Ɛnɛ́ Yésus a ɛ́n ŋyéɓé wáɓá, ɔ lága éɓōg mut nɛ́: «Á mɔɔ́n wama, ma láakɛ́ míɓē mɔ́ɔ.»

⁶Jogo lí ɓáyī-mbéndá ɓá bí ɓɛ́ɛ́ váŋ bú ɓōtlé lí pɔ́t la m̀mím nɛ:

⁷«Ɓaá ányúū yéé nyɔ́ mut a ŋga pɔ́t náŋ é? Ag vɔ́ɔ́le Ɔlolómɛ̄. Ɓaá nzáá a ŋga lá li laakɛ li míɓē amáh sig Ɔlolómɛ̄ nyɛ́-ntámɛ́ é?»

⁸Kasig Yésus a ŋgí yí míɔ̄ŋɔ máɓá, ɔ bíhī ɓɔ nɛ́: «Ányúū yéé mímīm máná mí ŋga pɔ́t náŋ é?

⁹Á póla mí mam míɓáa, yéé ɛ́ ŋga lēt lí laga lí éɓōg-mut: ‹Ma láakɛ́ míɓē mɔ́ɔ›, tɔ nɛ́: ‹tɛ́lɛ́, nyɔ̄ŋ sáŋkálɛ wɔɔ, ɔ wɛ́ɛ é?›

¹⁰Jɔ́ hɔ́ nɛ, yíán nɛ́ Mɔɔ́n Mut a byɛ́ɛ́ ŋguu nyí li laakɛ lí míɓē á ŋkɔŋ-á-sí» Yésus ɔ lága hɔ́ éɓōg-mut nɛ́:

¹¹«Tɛ́lɛ́, nyɔ̄ŋ sáŋkálɛ wɔɔ, soóg á yóg yɔ́ɔ.»

¹²Á ékūyá-kúyá, nyɔ́ŋ ɔ tɛ́lɛ, ɔ nyɔ̄ŋ sáŋkálɛ wɛɛ́ la nyɛ́ ɔ pám ɔ́sū ví ɓot bísɛ. Náŋ ɔ lóohán li nyágɛ lí ɓot bísɛ la ɓɔ́ bú ɓégɛ́ Ɔlolómɛ̄ la li laga nɛ́: «Bi ɓáág ŋgí li ɛ́n lí nyí nyaa jam!»

¹³Yésus ɔ kɛ sīg-pɛ á ŋgwáāg ebúle yé Galiléa. Limut lú oŋ nyɛ, la nyɛ́ ɔ ɓōtlé jɔ li yéglɛ.

¹⁴Á míloo mɛ́ɛ́, ɔ ɛ́n Lévi, mɔɔ́n Álfe a tɔ́ɔ̄ á voóm wɛ́ɛ̄ á nsɔ́n a ɓakomanɛ-ŋkuh-á-gɔ́mna. Ɔ lága nyɛ nɛ́: «Ōŋ ma.» La Lévi ɔ tɛ́lɛ, ɔ ōŋ nyɛ.

¹⁵Ámbúh náŋ, Lévi ɔ yáŋa Yésus á lidí á yóg yɛ́ɛ̄. Ŋgandag ɓákomanɛ-ŋkuh-á-gɔ́mna la ɓaɓɔŋ-miɓé bí ɓɛ́ɛ́ bí tɔ́ɔ̄ á téɓeli lidí, bíg dí elɔŋ la Yésus la ɓayége ɓɛ́ɛ́, kasig ɓot bí ŋgí oŋ nyɛ́ bí ɓɛ́ɛ́ ŋgandag.

¹⁶Ɛnɛ́ ɓayí-mbéndá bí Élōg-Falísái ɓá ɛ́n Yésus ag dí elɔŋ la ɓáŋ ɓot bísɛ, bú bíhī ɓáyēge ɓɛ́ɛ́ nɛ: «Ɓaá yéé! Ag dí elɔŋ la ɓakomanɛ-ŋkuh-á-gɔ́mna la ɓaɓɔŋ-miɓé é?»

¹⁷Ɛnɛ́ Yésus a ámblé ntɔghanɛ́ wāɓá, ɔ lága ɓɔ nɛ́: «Ah ɓot bí lɛ mbólí ɓé nɛ bí byɛ́ɛ̄ kóó la ǹtála ndí ɓakɔɔ́kɔ̄n. Māh sɔ́ ɓé ma li yáŋa lí ɓá bí tɛ́ɛ́ sim, ndí ɓaɓɔŋ-miɓé.»

¹⁸Ɔlɔ́ vá, ákaa ɓayége bí Yohánɛs Ǹtíi-nzoɓan la ɓot bí Élōg-Falísái bí ɓɛ́ɛ́ á étɔɔ-nzal, ɓot bú sɔ́ li bihi lí Yésus nɛ́: «Ányúū yéé ɓáyēge bí Yohánɛs la ɓá bí Élōg-Falísái bí ŋga tɔ́ɔ̄ nzal, ndí ɓayége ɓɔ́ɔ bí ŋgá tɔɔ ɓé nzal é?»

¹⁹Yésus ɔ pélē ɓɔ nɛ́: «Miníg ɔ́ŋɔ nɛ́ ɓayáŋlɛ á ŋgand aúg bíg la li yéɓe nɛ́ bí tɔɔ nzal kí sɔ́mbɔ́ ɛ lɛ elɔŋ la ɓɔ é? Kɛ́m, kíyáɓɛ́nɛ sɔ́mbɔ́ ɛ ŋgí lɛ elɔŋ la ɓɔ́, bí ŋgá la ɓé li yéɓe nɛ́ bí tɔɔ nzal.

²⁰Ndí eceg ɛ́g kɛ li sɔ́ yé bí ŋga nyɔ̄ŋle ɓɔ́ sɔ́mbɔ́, múŋ á nyúŋ alɔ́ hɔ́, bíg kɛ li tɔɔ lí nzal.

²¹Tɔ mut a ŋgá la ɓé li lɔndɔ lí písīs ŋkánág á líɓato á ǹdunɛ á mbɔ́tí; la náŋ eɓambo yé ŋkánág á líɓato ɛ́g wala ǹdunɛ a mbɔ́tí, la ewáhá yá kóndyé li ée.

²²Mut tɔ wa a ŋgá ɔlɔ ɓé míkānág mí mílɔg á míndunɛ mí bílōgá; kí mílɔg míg ɓól bílōgá, ɓá ɓɔ́lán mílɔg la bilógá byɔ́ bísɛ. Jɔ́ hɔ́ nɛ́, mikánág mí mílɔg míg kɛ ja á míkānág mí bílōgá.»

²³Náŋ a ɓɛ́ɛ́ ɔlɔ́ ví évɛɛɓan ví Élōg-Yúda, Yésus la ɓayége ɓɛ́ɛ́ bí ŋgí loole á míndīī mí bléya[1]. Múŋ á nzen, ɓayége ɓɛ́ɛ́ bú ɓōtlé li búg lí mítū mí bléya.

²⁴Ɓot bí Falísái bú lága Yésus nɛ́: «Légɓé sig yéé ɓayége ɓɔ́ɔ bí ŋga ɓɔ̄ŋ á ɔlɔ́ ví évɛɛɓan ví Élōg-Yúda! Náŋ a lɛ écila.»

²⁵Yésus ɔ tímānɛ ɓɔ nɛ́: «Ɓaá miní ɓáág ŋgí li sɔ́ŋgɔ lí yéé Dávid a ɓɔŋɔ́ɔ́ eceg a ɓɛ́ɛ́ á mitíg, kí nzal yu byée nyɛ la elɔŋ yɛ́ɛ́ duwɛ é?

²⁶Ákaa láá a níŋgléé á ndáá-ēcɛ́ŋ-Ɔlolómɛ̄, eceg Abiátal a ɓɛ́ɛ́ ŋ̀kanʼyɛ ǹcɛ́ŋ a ɓatíi-nsúlé, ɔ dí bíkɔgá bí nsúlé, bí tɔ mut ah ɓɛ́ɛ́la ɓé kundɛ li dí, amáh sig ɓátíi-nsúlé; ɔ káahánɛ́ ki byɔ́ ɓot bí elɔŋ yɛ́ɛ́ é?»

²⁷Váŋ nɛ́ Yésus a lága ɓɔ nɛ́: «Ɔlɔ́ ví évɛɛɓan ví Élōg-Yúda vá tɛ́ɛ́ɓɛ́ ányúū mut, ndí mut ɓé nɛ a vēgɓɛ́ ányúū ɔlɔ́ ví évɛɛɓan ví Élōg-Yúda.

²⁸Yíán hɔ́ nɛ Mɔɔ́n Mut nɛ́ a lɛ titih ŋ̀kanʼyɛ a ɔlɔ́ ví évɛɛɓan ví Élōg-Yúda.»