Read Bakoko Málkus 9 Bible Online

Málkus 9 - Bakoko bible

Málkus 9

¹La Yésus ɔ lága sīg-pɛ limut la ɓayége ɓɛ́ɛ́ nɛ́: «La mbálɛ, mag laga ɓɛ́nɛ nɛ́, jogo lí ɓot vá lí ŋgá kɛ ɓé lí wú jɔ́ ŋgí lí ɛ́n lí Líkanʼyɛ lí Ɔlolómɛ̄ líg suh la adit wɛ́ɛ́ ásɛ.»

²Ámbúh alɔ́ ásáama, Yésus ɔ nyɔ̄ŋ á elɔŋ yɛ́ɛ́ Pétlos, Yákop la Yohánɛs ɓɔ́-ntámɛ́ á mɓagɓanɛ́, ɔ ɓét la ɓɔ́ á ɔ́kolá vícɛ̄ŋ. Váŋ nɛ a véeŋ á miíh máɓá.

³Mbɔ́tí yɛ́ɛ́ yú páa, nyaa nyí ɛ lɛ nɛ́, mut tɔ wa á ŋkɔŋ-á-sí a ŋgí la ɓé yɔ́ li paɛ náŋ.

⁴Á ékūyá-kúyá, Elías la Móse bú pámlé ɓɔ́, bú ɓōtlé li kwɛl la Yésus.

⁵Pétlos ɔ lága hɔ́ Yésus nɛ́: «Lábi[4], ɛ́ lɛ́ nsɛ́ŋ nɛ́ bi tɔ́ɔ̄ yahá vá; bi óŋ biláá bíŋháa: yá ányúū yɔ́ɔ, yá ányúū Móse, yéŋé yá ki ányúū Elías.»

⁶Ah yíí ɓé pɛ yéé a lágá ányúū woŋ á ŋgandag.

⁷Mbaga yu sūh, yu bútyɛ́ ɓɔ́, váŋ nɛ́ cíŋ ya pámléné múŋ á nyíŋ mbaga, yu yó nɛ: «Nyɔ́ nɛ́ a lɛ édidíŋɛ yáma Mɔɔ́n, miní óglé nyɛ́!»

⁸Á ékūyá-kúyá, ɓáyēge bú légɓé á ŋgwáāg yaɓá, ɓáh ɛ́n ɓé pɛ tɔ mut amáh sig Yésus nyɛ́-ntámɛ́.

⁹Á mísuh máɓá mí ɔ́kolá, Yésus ɔ ɓéhyɛ́ ɓɔ nɛ́ bíh laglág ɓé tɔ mut yéé ɓá ɛ́n, nɛ́-tɛ́ɛ Mɔɔ́n Mut a pāhye átē a ɓá ɓá wū.

¹⁰Ɓayége bú náŋɛ̄ nyíŋ ndag, ndí bíg ɓatɓan yéé a ŋga somo ɓɔ́ li laga likɔlɓan la «lipahye átē a ɓá ɓá wū».

¹¹Váŋ nɛ́ ɓá ɓāt Yésus nɛ́: «Ányúū yéé ɓayí-mbéndá bí ŋga lága nɛ́ Elías a nyɛ́ɛ yágá li sɔ́ é?»

¹²Ɔ pélē ɓɔ́ nɛ́: «Kɔɔ la mbálɛ, Elías a nyɛ́ɛ yágá li sɔ́ á li tɛ́ɛ́yɛ lí mam mísɛ; ɓaá yá ciiɓɛ hɔ́ ɓé nɛ Mɔɔ́n Mut a nyɛ́ɛ yágá li sɔghe taŋ-taŋ la nɛ́ bí yāŋa ki nyɛ́ é?

¹³Jɔ́ nɛ́, mi ŋga lága ɓɛ́nɛ nɛ́: Elías a sɔ́, ɓɔ́ bú ɓɔŋlé nyɛ kaa nsom wáɓá, likɔlɓan la yé yá ciiɓɛ́ ányúū yɛ́ɛ̄.»

¹⁴Eceg Yésus la ɓá ɓayége bíŋháa ɓá timán ápah ɓáŋá bí ɓɛ́ɛ́, bú ɛ́n limut licɛ́ŋ lú díí ɓɔ́, ɓayí-mbéndá bíg kála la ɓɔ́.

¹⁵Ɛnɛ́ ɓot ɓá ɛ́n Yésus, voóm asɛ̄ ɔ póghan, bí ŋgí loo yé epah la yéŋé á li somo nɛ́ bí tama nyɛ́.

¹⁶Yésus ɔ bíhī ɓáyēge ɓɛ́ɛ́ nɛ: «Yéé miní ŋga kála la ɓɔ́ é?»

¹⁷Mut wa átē a limut ɔ pélē nyɛ nɛ́: «Á Ŋ̀yéglɛ, ma sɔ́ la wa mɔɔ́n wama, a byɛ́ɛ́ m̀búl m̀ɓé nyú wá kuɛhɛ́ nyɛ mbúg.

¹⁸Tɔ véé wá byeé nyɛ, ág ɓɛ́h nyɛ á sí; livúh lá pám nyɛ á ányu, a ɓōtlé li dí lí mísoŋ, a ēh. Ma lága ɓáyēge ɓɔ́ɔ nɛ́ bí dúhū wɔ́, ndí ɓáh kuh ɓé ŋguu.»

¹⁹Yésus ɔ nyɔ̄ŋ mpɔ́t, aá la ɓɔ́ nɛ́: «Á nyɔŋɔn ŋgíla ŋyéɓé nyí! Tɛɛla ǹjén mi ŋga ɓɛ́ ɓɛ́ɓɛ la ɓɛ́nɛ é? Tɛɛla ǹjén mi ŋga kɛ́ ɓɛ́nɛ li ɔ́hánɛ é? Sɔ́án la ma nyɛ́ vá.»

²⁰La ɓɔ́ bú sɔ́la nyɛ́ mɔɔ́n. Ɛnɛ́ m̀búl m̀ɓé wá ɛ́n Yésus, wú pógɛ́ mɔɔ́n la ŋguu, ɔ ɓɛ́hán á sí, ɔ ɓōtlé lí bíŋgle á sí, livúh lú pám nyɛ á ányu.

²¹Yésus ɔ ɓāt ɛ́sāŋɛ́ á mɔɔ́n nɛ́: «Li ɓotle ǹjén náŋ a ŋga ɓɔŋ nyɛ́ é?» Ɛsáŋɛ́ ɔ pélē nɛ: «Li ɓotle nyɛ́ mɔɔ́n ntɔ́ga.

²²Biceg byá, nyúŋ m̀búl ág ɓɛ́h nyɛ́ á nzáan tɔ á míndīm nɛ́ a wú. Ndí wa, sóon kɔnlé ɓɛ́hɛ ŋgɔ́ɔ́, óŋgánɛ ɓɛ́hɛ kíyáɓɛ́nɛ ɔg la.»

²³Yésus ɔ pélē nyɛ nɛ́: «Ɔ byɛ́ nɛ́ kíyáɓɛ́nɛ ɔg la é? Yí nɛ́ mam mísɛ míg ɓɔŋɓɛ la mut a byɛ́ɛ̄ ŋyéɓé.»

²⁴Á ékūyá-kúyá, ɛsáŋɛ́ á mɔɔ́n ɔ tɛ́ɛ́ nlón nɛ: «Mag yéɓe! Sóon óŋgánɛ ma, tɔ la ŋgíla ŋyéɓé yáma!»

²⁵Ɛnɛ́ Yésus a ɛ́n límut lú kóman, ɔ kímɛ nyúŋ m̀búl m̀ɓé, aá la wɔ́ nɛ́: «Á m̀búl á mbúg la ndɔ́g, mag pɔ́t, ɔg pám á nyúū nyɔ́ mɔɔ́n; ɔh timkágán ɓé pɛ á átē wɛ́ɛ̄!»

²⁶M̀búl m̀ɓé wú pám ág tɛ́ɛ milón, wú kóndɛ́ mɔɔ́n; ɔ óŋg m̀bim, nyaa nyí lɛ nɛ́ ɓot bísɛ bú lága nɛ: «A wú.»

²⁷Váŋ nɛ́ Yésus a byée nyɛ á wɔ, ɔ tɛ́ɛ́yɛ́ nyɛ́, mɔɔ́n ɔ tɛ́lɛ.

²⁸Eceg Yésus a tímān á ndáá, ɓayége ɓɛ́ɛ́ bú bíhī nyɛ eceg ɓá yéglé ɓɔ́-ntámɛ́ nɛ: «Ndí ɓɛ́hɛ, ányúū yéé ɓāh la ɓé li duhu lí nyúŋ m̀búl m̀ɓé é?»

²⁹La nyɛ́ ɔ pélē ɓɔ nɛ́: «Nyíŋ nyaa m̀búl m̀ɓé, amáh sig míkánɛ mɔ́-ntámɛ́ nɛ mí ŋga lá wɔ́ li pámɛ.»

³⁰Ɛnɛ́ ɓá ɓógo váŋ, bú yáɓe Galiléa. Yésus a ŋgí somo ɓé nɛ ɓot bí yí náŋ;

³¹ányúū nɛ́ a ŋgí yéglɛ ɓayége ɓɛ́ɛ́ nɛ: «Mɔɔ́n Mut ag kɛ li nuŋlɛ á mɔ mí ɓot; bíg kɛ nyɛ li ól, ndí eceg a ŋga kɛ li wú, ag kɛ li pahye á ɔlɔ́ vá yáhɛ áŋháa.»

³²Ndí ɓayége ɓɛ́ɛ́ bíh sɔ́ŋtánɛɛ ɓé bíŋ biɓaŋgá, la ki nɛ́ bí ŋgí kɔn woŋ li bihi lí nyɛ.

³³Yésus la ɓayége ɓɛ́ɛ́ bú kɛ á Kafalnáum. Ɛnɛ́ bí níŋgléé á ndáá, Yésus ɔ ɓāt ɓɔ nɛ́: «Yéé miní ŋga kála á nzen é?»

³⁴Ndí ɓɔ́ bú ɓen nyɛ li pele, átɔm nɛ́ múŋ á nzen, bí ŋgí kála á lí yí lí nzáá a lɛ ǹcɛ́ŋ á póla yaɓá.

³⁵Váŋ nɛ́ Yésus a tɔɓéé á sí, ɔ yáŋá jéŋ Jóom jɛ́ɛ́ lí ɓáōmɓɛ la bíɓáa, aá la ɓɔ́ nɛ́: «kíyáɓɛ́nɛ mut ag somo li ɓɛ́ lí nyɔ́ ɔsú, a ɓɛ́ nyɔ́ a súgle la ŋ̀ɛɛle a ɓáŋá bísɛ.»

³⁶La nyɛ́ ɔ dúutɛ́ mɔɔ́n ntɔ́ga, ɔ tɛ́ɛ́yɛ́ nyɛ á m̀mím wáɓá; ɛnɛ́ a óóɓé nyɛ, ɔ lága ɓɔ nɛ́:

³⁷«Tɔ nzáá a lɛ́glé mɔɔ́n ákaa nyɔ́ á jóō jáma, ɛnɛ mā-mɛn nɛ́ a lɛ́gle; tɔ nzáá ki a lɛ́glé ma, ah ma ɓé nɛ a lɛ́gle, ndí a lɛ́glé ja nyɔ́ a óm ma.»

³⁸Yohánɛs ɔ nyɔ̄ŋ mpɔ́t, ɔ laga Yésus nɛ́: «Á Ŋ̀yéglɛ, ɓa ɛ́n mut ag duhu mimbúl míɓē á jóō jɔ́ɔ, ndí ɓɛ́hɛ bu sómo nyɛ́ li suŋɛ náŋ, ányúū nɛ a sē ɓé á elɔŋ yáhá.»

³⁹Váŋ nɛ́ Yésus a lága nyɛ nɛ́: «Miníh suŋhɛ́gɛ́ ɓé nyɛ, átɔm nɛ́ mut tɔ wa a ŋga ɓɔ̄ŋ binanaŋga bí mam á jóō jáma, ndí ámbúh eceg a pɔ́t áɓē likɔlɓan la ma a sē ɓé.

⁴⁰Nyɔ́ a ŋgá tɛ́ŋgánɛ ɓé ɓɛ́hɛ a lɛ lá ɓɛ́hɛ.

⁴¹La mbálɛ mag laga ɓɛ́nɛ nɛ́, nyɔ́ la nyɔ́ a ŋga tíi ɓɛ́nɛ tómbeli mindím ányúū nɛ miní lɛ elɔŋ la Nyɔ́-a-Pɔ́hlɛ, la mbálɛ, mag laga ɓɛ́nɛ nɛ́ nyɔ́ŋ mut a ŋgá kɛ ɓé li jáŋɛ lí nsála wɛ́ɛ́.»

⁴²Li kɛla lí ŋkwɛl ɔ́sū, Yésus aá la ɓɔ́ nɛ́: «Tɔ nzáá a ŋga kɛ́ li ɓɛ́ lí njɔm miɓé nyí ntɔ́ga wāhwa vá, á ɓá bí byɛ́ɛ́ ŋyéɓé la ma, ɛ́ lɛ́ nsɛ́ŋ nɛ́ bí tiŋ nyɛ́ lísūŋ lí ŋgɔg á cíŋ, bí léé nyɛ́ á túwɛ.

⁴³Kíyáɓɛ́nɛ wɔ wɔ́ɔ á lɛ́ njɔm aɓé wɔ́ɔ, sɛ́m wɔ́; átɔm nɛ́, ɛ́ lɛ́ wá nsɛ́ŋ nɛ ɔ níŋgí á éniŋ éɓem la wɔ wá, li loo nɛ́ ɔg kɛ la mɔ mɔ́ɔ míɓáa á éɓēl ɛ́ nzáan nyí ɛ ŋgá dím ɓé [

⁴⁴][5]

⁴⁵kíyáɓɛ́nɛ akoo wɔ́ɔ á lɛ́ njɔm aɓé wɔ́ɔ, sɛ́m wɔ́; átɔm nɛ́, ɛ́ lɛ wá nsɛ́ŋ nɛ ɔ níŋgí á éniŋ éɓem la akoo wá, li loo nɛ́ bíg léé wa á éɓēl ɛ́ nzáan la mikoo mɔ́ míɓáa. [

⁴⁶][6]

⁴⁷Nlemlem á jam, kíyáɓɛ́nɛ diíh jɔ́ɔ lí lɛ́ njɔm aɓé wɔ́ɔ, túú jɔ́; ɛ́ lɛ́ wá nsɛ́ŋ nɛ ɔ níŋgí la diíh já á líkanʼyɛ lí Ɔ́lolómɛ̄, li loo nɛ́ bíg léé wa á éɓēl yé nzáan la miíh mɔ́ɔ míɓáa,

⁴⁸ápah bitúmb bí ŋgá wú ɓé la ápah nzáan ɛ ŋgá dím ɓé.

⁴⁹Jɔ́ nɛ́, nzáan ɛg kɛ li nyɔ́ lí mut sig á nyúū ákaa ŋku li oŋle la miɓɔŋɔg mɛ́ɛ́.

⁵⁰Ŋku á lɛ́ jam lí m̀ɓɛɛŋ; ndí kí wá jáŋɛ́ ésɔh yɛ́ɛ́, la yéé miní ŋga tímanɛ yɔ́ é? Ɓɛ́án la ŋku á mínyuú máná, miní niŋ ki átē á nsaŋ ɓɛ́nɛ la ɓɛ́nɛ.»