Read Bakoko Lúkas 1 Bible Online

Lúkas 1 - Bakoko bible

Lúkas 1

¹Á nyɔ́ a adit Téofil, Kasig ɓot ŋgandag ɓá nyɔŋ mbóŋ li cii lí mam ma loo á mbóg yāhá,

²li oŋle la yé ɓá ɓá ɛ́n mɔ la miíh li ɓotle á míɓotlé ɓá máŋlɛ́ ɓɛ́hɛ, la ɓɔ́ bú yāán ɓalɛgɛ pɔ́l Ɔlolómɛ̄,

³ányúū náŋ nɛ́ ma nyɔ̄ŋ eceg nɛ́ mi yí míŋ mam mísɛ, li ɓotle á tín, la mág mu ɛ́n nsɛ́ŋ li ciile lí wa mɔ́ á nyaa ɛ tɛ́ɛ́,

⁴á li somo nɛ́ ɔ yí nɛ́ biyéglɛ́nɛ́ wa kūh bí lɛ́ mbálɛ.

⁵Eceg Elóde a ɓɛ́ɛ́ káísa á ŋkɔŋ á Yúdēa, mut wa bí ŋgí yáŋa nɛ́ Sakália a ɓɛ́ɛ́ ǹtíi-nsúlé, a ŋgí sɔ́le á elɔŋ ɓatíi-nsúlé yé Ábia, Ŋ̀gáá wɛ́ɛ̄ bí ŋgí yáŋa nɛ́ Elísabɛt a ŋgí sɔ́léné á lílōmɛ lí Álon.

⁶Ɓɔ́ bíɓáa bí ɓɛ́ɛ́ bí tɛ́ɛ́ sim ɔsú ví Ɔlolómɛ̄, bí ŋgí ógle mbéndá la bitɛ́ɛ́yéné bísɛ bí Nyɔ́ŋ-Ɛsáŋɛ́ á nyaa ɛ tɛ́ɛ́.

⁷Ndí, bíh mɓɛ́la ɓé mɔɔ́n ányúū nɛ Elísabɛt a ɓɛ́ɛ́ ékom la ki nɛ́ ɓɔ́ bíɓáa bí ɓɛ́ɛ́ mímāŋ-mí-ɓot.

⁸Ɛnɛ́ éceg li ɓɔŋle lí Ɔlolómɛ̄ yá kɔlan ányúū elɔŋ yé Sakália, la nyɛ́ ɔ kɛ á nsɔ́n.

⁹Li oŋle la miɓɔŋɔg mí ɓatíi-nsúlé, kwaa yu kúēlé Sakália nɛ́ nyɛ́ nɛ́ a ŋga níŋgi á ndugá-púán nyí Nyɔ́ŋ-Ɛsáŋɛ́ á li dígɛ lí ɔtú.

¹⁰Á ŋgɛ́ŋ a ŋgí dígɛ ɔtú, limut licɛ́ŋ lí ɓɛ́ɛ́ lí kɔ̄tánɛ á mikánɛ á ápūū.

¹¹Váŋ nɛ́ áŋgɛl nyí Nyɔ́ŋ-Ɛsáŋɛ́ ya pámlé nyɛ, ɛ ɓɛ́ɛ́ ɛ́ tɛ́ɛ á m̀ɓɛ́nlómɛ a etága-nsúlé yé bí ŋga díghɛ́nɛ ɔtú.

¹²Ɛnɛ́ Sakália a ɛ́n yɔ, ɔ sīhlan la nyɛ́ ɔ kɔ̄n woŋ.

¹³Ndí áŋgɛl yu yó nyɛ nɛ́: «Á Sakália, ɔh kɔnɔ́g ɓé woŋ, átɔm nɛ́ nzag yɔɔ ya yál. Jɔ́ nɛ́ ŋ̀gáá wɔɔ Elísabɛt ag kɛ wa lí byále lí mɔ́ɔ̄n-á-páam nyɔ́ ɔ ŋgɔ kɛ́ li lo lí jóō nɛ́ Yohánɛs.

¹⁴Ag kɛ wa lí kɔnhanɛ lí mívag micɛ́ŋ, ŋgandag ɓot ki ɛ́g kɛ li kɔn lí mívag la libyáa jɛ́ɛ́;

¹⁵ányúū nɛ ag kɛ li ɓɛ́ lí mut a lipém ɔsú ví Nyɔ́ŋ-Ɛsáŋɛ́. A ŋgá kɛ ɓé li nyú lí mílɔg tɔ biláam bí ŋguu, ag ɓɛ́ ŋyálāg la M̀búl Mpúán li ɓotle á líbum lí nyaŋɛ́.

¹⁶Ag kɛ li duutɛ lí ŋgandag ɓɔ́ɔ̄n bí Íslāɛl á ŋgwáāg Nyɔ́ŋ-Ɛsáŋɛ́ Lóō jáɓá.

¹⁷Ag kɛ li sɔ́ ákaa ǹlɛgɛ-pɔ́l Ɔlolómɛ̄, ag ɓɛ́la eyí la ŋguu nyí m̀pɔ́tle-a-Ɔlolómɛ̄ Elías, ányúū li sɔ́la lí ŋ̀ámblānɛ́ á póla ɓɔɔ́n la ɓasáŋɛ́ ɓáɓá, li tɛ́ɛ́yɛ lí ɓá bí ndɔ́g á nzen ɛ tɛ́ɛ́ sim; la li ɓoŋhan lí lílōm nɛ́ lí lɛ́glé Nyɔ́ŋ-Ɛsáŋɛ́.»

¹⁸La Sakália ɔ bíhī áŋgɛl nɛ́: «Ɓaá, mag ɓɔŋ láá ndí mi yí nɛ́ náŋ a lɛ mbálɛ é? Ányúū nɛ́ ma la ŋ̀gáá wama ɓaá un.»

¹⁹La áŋgɛl yu tímānɛ̄ nyɛ nɛ́: «Ma nɛ́ mi lɛ Gábliɛl, mi tɛ́ɛ ɔsú ví Ɔlolómɛ̄ á lí ɓɔŋle lí nyɛ. Ma ómɓɛ́ nɛ́ mi kwɛ́lɛ́ wa la nɛ́ mi lɛ́gɛ́ wa nyí pɔ́l m̀ɓɛɛŋ.

²⁰Ndí mwahɛ́ hɔ́, ákaa ɔh byɛ́ɛ́ ɓé ŋyéɓé á bíɓaŋgá byáma bí ŋga kɛ́ li yál kí yéŋ eceg yá kɔlan, ɔg kɛ li ku lí mbúg ɛ́h ɓɛ́ ɓé pɛ wa li la lí li pɔ́t, nɛ́-tɛ́ɛ yé ɛ́sɛ ma máŋlɛ́ wa yá ɓɔ̄ŋɓɛ.»

²¹Limut lísɛ lí ŋgí laaŋke Sakália, lú tɔghán mbíŋhan yɛ́ɛ̄ li pám á ndugá-púán.

²²Eceg a pám, a ŋgí la ɓé pɛ ɓɔ́ li pɔ́tɛ, la ɓɔ́ bú sɔ́ŋtánɛ́ nɛ, tóɓó-tóɓó jam ya pámlé nyɛ wóŋ á ndugá-púán. La nyɛ́ ɔ kū mbúg, ɔ ɓōtlé ja ɓɔ́ li kwɛlɛ la mɔ.

²³Ɛnɛ́ eceg yɛ́ɛ́ nsɔ́n yá súg, Sakália ɔ sóo á mbóg yɛ́ɛ̄.

²⁴Ámbúh puh eceg, ŋ̀gáá wɛ́ɛ̄ Elísabɛt ɔ nyɔ̄ŋ líbum la nyɛ́ ɔ sɔ́lɔ̄ sóŋ ɛ́táan. Ɔ lága la nyɛ́-mɛ̄n nɛ́:

²⁵«Ɛ́n sig yé Nyɔ́ŋ-Ɛsáŋɛ́ a ɓɔ̄ŋlé ma, vɔ́ŋɔ́ɔ a ɔ́ŋɔ́ ma, a ɓógtɛ́ ma yé ɛ́ ŋgí kɔnhanɛ ma mbɔɔla á miíh mí ɓot.»

²⁶Ámbúh sóŋ ɛ́sáama, Ɔlolómɛ̄ ɔ óm áŋgɛl Gábliɛl á tísɔn Názalɛt á ékombo yé Galiléa,

²⁷á mbóg ŋgɔn kɔ́njí ya, eván yé mut wa bí ŋga yáŋa nɛ́ Yósɛp, nyɔ́ a ŋgí sɔ́le á lílōmɛ lí káísa Dávid. Joó lí nyɔ́ŋ mɔɔ́n-á-ŋgɔn lí ɓɛ́ɛ́ nɛ́ Malía.

²⁸La áŋgɛl yu níŋgi á ndáá yɛ́ɛ̄ yu yó nyɛ́ nɛ́: «Ma táma wa á Mālía, sophɛ́ɛ la mivag, wa nyɔ́ wa kūh líkaale lí Ɔlolómɛ̄, Nyɔ́ŋ-Ɛsáŋɛ́ a lɛ lá wa.»

²⁹Bíŋ biɓaŋgá bú teeŋgɛ́ Mālía; la nyɛ́ ɔ sómo lí yí yéé míŋ mitamlan mí ŋga mínɛ.

³⁰La áŋgɛl yu yó nyɛ nɛ́: «ɔh kɔnɔ́g ɓé woŋ á Mālía ányúū nɛ́ wa kūh líkaale lí Ɔlolómɛ̄.

³¹Légɓé sig, ɔg kɛ li nyɔŋ lí líbum, ɔ byál mɔɔ́n-á-páam, nyɔ́ ɔ ŋgɔ kɛ́ li lo lí jóō nɛ Yésus.

³²Ag kɛ lí ɓɛ́ lí mɔɔ́n á lipém; bíg kɛ nyɛ́ li yáŋa nɛ́: Mɔɔ́n Nyɔlɛ. Ɛtáŋɛ Ɔlolómɛ̄ ag kɛ nyɛ́ li tíi lí étɔɓé-líkanʼyɛ yé Dávid ɛsáŋɛ́;

³³á éɓem la eɓem ag kɛ li kanʼyɛ lí m̀biya á Yákob, likanʼyɛ jɛ́ɛ́ lí ŋgá ɓɛ́la ɓé lísūg.»

³⁴La Malía ɔ bíhī áŋgɛl nɛ́: «Ɛg kɛ láá li ɓɔŋɓɛ la ma, átɔm nɛ́ mi ŋgá yí ɓé ma páam!»

³⁵La áŋgɛl yu pélē nyɛ nɛ́: «M̀búl Mpúán ág kɛ wa li suhle, la ŋguu Nyɔlɛ ɛ bútyɛ́ wa ákaa yíɓe, Ányúū náŋ nɛ́, nyɔ́ a ŋga kɛ́ li byáa ag ɓɛ́ mpúán, la li yáŋlɛ nɛ́: Mɔɔ́n Ɔlolómɛ̄.

³⁶Légɓé sig nɛ́ Elísabɛt, yɛɛ wɔɔ a m̀biya, á átē a aun wɛ́ɛ́, nyɛ́g a lɛ líbum lí mɔ́ɔ̄n-á-páam; nyɛ́ mut bí yáŋléé ékom, a lɛ líbum lí sóŋ ɛ́sáama.

³⁷Ányúū nɛ jam tɔ já li ŋgá ɛgɛ ɓé Ɔlolómɛ̄.»

³⁸Malía ɔ lága hɔ́ nɛ: «mi lɛ m̀ɓɔŋle a Nyɔ́ŋ-Ɛsáŋɛ́, ɛ́ ɓɔ̄ŋɓɛ́ la ma ákaa wa yó!» La áŋgɛl yu kɛ, yu yíg nyɛ.

³⁹Múŋ á nyúŋ alɔ́, Malía ɔ dīgɓán li ɓét á tísɔn ya nyí lɛ á ákolá á Yudéa.

⁴⁰Ɔ níŋgí á ndáá Sakália la nyɛ́ ɔ táma Elísabɛt.

⁴¹Ɛnɛ́ Elísabɛt a ámblé mítamlan mɛ́ɛ́, ékūyá-kúyá, mɔɔ́n ɔ póghán nyɛ á líbum. Ámbúh náŋ, Elísabɛt ɔ yál la M̀búl Mpúán,

⁴²la nyɛ́ ɔ pɔ́t la ŋguu nɛ́: «Wa lómblɛ́ á yaa ɓondígá, epumá líbum jɔ́ɔ ki yá lómblɛ!

⁴³Nzáá mi lɛ á li ɓɔŋ nɛ́ nyaŋɛ́ a Ɛtáŋɛ wáma á sɔ́ nɛ́-tɛ́ɛla vá é?

⁴⁴Átɔm nɛ́, ɛnɛ́ ma ámblé mítamlan mɔ́ɔ, mɔɔ́n ɔ póghán ma la mivag á líbum.

⁴⁵Misɔ́tá la nyɔ́ a ŋyéɓé, ányúū nɛ, mam mísɛ ɓá lagá nyɛ, mí má sɔ́léné la Nyɔ́ŋ-Ɛsáŋɛ́ míg kɛ li yál!»

⁴⁶La Malía ɔ yó nɛ: «M̀búl wáma ásɛ ág ségɛ Nyɔ́ŋ-Ɛsáŋɛ́,

⁴⁷m̀mím wáma ki á yáhɛ la mivag la Ɔlolómɛ̄ Ǹsuŋ wama

⁴⁸ányúū nɛ, a súhɛ miíh li légɓe lí ma yɛmɛ́ yɛ́ɛ́ m̀ɓɔŋle. Ɔɔ, li ɓotle la vɔ́ŋɔ́ɔ, nyɔŋɔn yɔ́ ɛ́sɛ ɛg kɛ ma li yáŋa nɛ́ ŋgí-mísɔ̄tá,

⁴⁹átɔm nɛ́ Nyɔ́-a-Ŋguu-Mísɛ a ɓɔ̄ŋlé ma bínanaŋga bí mam: Joó jɛ́ɛ́ li lɛ́ lipúán.

⁵⁰Ekɔnan-ŋgɔ́ɔ́ yɛ́ɛ́ ɛ́ káhɛ á lóō lí nyɔŋɔn ndí nyɔŋɔn á ɓá bísɛ bí ŋga ógle nyɛ́.

⁵¹La ŋguu ɛsɛ̄ nyí enam yɛ́ɛ́ ɔ ɓɔ̄ŋ bínanaŋga; ɔ cámánɛ́ ɓot bi kúmba

⁵²ɔ súhɛ ɓot ɓacɛ́ŋ á bítɔɓé-bí-líkanʼyɛ byáɓá la nyɛ́ ɔ ɓétɛ́ ɓá bí ésuhɛ-nyuú.

⁵³Ɔ yáhɛ́ ɓot bí nzal la miɓɛɛŋ, ɓá bí ábyaŋ ɔ sóɛ̄ ɓɔ mɔ nsɔ́.

⁵⁴Ɔ óŋgánɛ́ Íslāɛl m̀ɓɔŋle wɛɛ́ á éɔ̄ŋɔ yé ékɔnan-ŋgɔ́ɔ́ yɛ́ɛ́,

⁵⁵li oŋle la yé a kakáánɛ ɓatáŋɛ ɓáhá ányúū m̀ɓɛɛŋ á Áblaháam la ndog yɛ́ɛ̄ nɛ́-tɛ́ɛla á éɓem.»

⁵⁶Malía ɔ tɔ́ɔ̄ la Elísabɛt jam ákaa sóŋ ɛ́ŋháa sɔ́kágánɛ́ ag soo.

⁵⁷Ɛnɛ́ eceg ábyāl yé Elísabɛt yá kɔlan, ɔ byál mɔɔ́n-á-páam.

⁵⁸Ɓot ɓɛ́ɛ́ bí éɓōga, la ɓá bí m̀biya bú ámblé nɛ Nyɔ́ŋ-Ɛsáŋɛ́ a étɛ nyɛ ndembye ecɛ́ŋ nyí ekɔnan-ŋgɔ́ɔ́ yɛ́ɛ́, la ɓɔ́ bú kɔn mívag micɛ́ŋ la nyɛ́.

⁵⁹Ɔlɔ́ vá yáhɛ́ mwaam, bú sɔ́, ákaa mɔɔ́n a ŋgí nyɛɛ li kwɛɛɓɛ lí víŋ ɔlɔ́. La ɓɔ́ bú somó nyɛ li yáŋa nɛ́ Sakália ákaa ɛsáŋɛ́.

⁶⁰Váŋ nɛ́ nyaŋɛ́ a yó nɛ́: «Kɛ́m, ag yáŋlɛ nɛ́ Yohánɛs.»

⁶¹La ɓɔ́ bú tímānɛ̄ nyɛ nɛ́: «Ndí mut tɔ wa á m̀biya wɔ́ɔ ah byɛ́ɛ́ ɓé jéŋ joó!»

⁶²Váŋ nɛ́ ɓá ɓāt ɛsáŋɛ́ á mɔɔ́n la mɔ, nɛ́-láá a ŋga sómo nɛ́ bí yáŋá mɔɔ́n wɛ́ɛ̄.

⁶³Sakália ɔ ɓāt nɛ́ bí tí nyɛ́ épah éɓām, la nyɛ́ ɔ cíi nɛ: «Joó jɛ́ɛ́ nɛ́ Yohánɛs»; ɓot bísɛ bú nyág.

⁶⁴Á ékūyá-kúyá anyu wɛ́ɛ́ wú léglan, ɔlémb vɛ́ɛ́ ki vú vúúlan la nyɛ́ ɔ ɓōtlé li pɔ́t, ɔ ɓégɛ Ɔlolómɛ̄.

⁶⁵Náŋ ɔ ɓɔ̄ŋ nɛ ɓot bí míŋgwáāg bísɛ bú kɔ̄n woŋ; ɓá bísɛ ki bí ŋgí tɔɓene á ákolá á Yúdēa bí ŋgí laglan míŋ mam.

⁶⁶Ɓot bísɛ bí ámbléé míŋ mam bú náŋɛ mɔ̄ á mímīm máɓá; bí ŋgí ɓatɓan nɛ́: «Nyɔ́ mɔɔ́n ag kɛ láá li ɓɛ́ é?» Kɔɔ la mbálɛ, wɔ á Nyɔ́ŋ-Ɛsáŋɛ́ á ɓɛ́ɛ́ lá nyɛ́.

⁶⁷Sakália, ɛsáŋɛ́ á mɔɔ́n, ŋyálāg la M̀búl Mpúán, ɔ ɓōtlé li pɔ́t ákaa m̀pɔ́tle-a-Ɔlolómɛ̄, ɔ yó nɛ́:

⁶⁸«Eɓégɛ ɛ́ ɓɛ́ la Nyɔ́ŋ-Ɛsáŋɛ́ Lōó lí Íslāɛl, ányúū nɛ a lɛ́ŋlé lilóm jɛ́ɛ́, ɔ tɛ́ɛ́yɛ́ jɔ kundɛ.

⁶⁹A pámhɛ́nɛ́ ɓɛ́hɛ ǹsuŋ ǹcɛ́ŋ á ndáá-m̀biya á Dávid m̀ɓɔŋle wɛɛ́.

⁷⁰Náŋ nɛ́ a dúgú li lɛgɛ á mínyu mí ɓápɔ́tle ɓɛ́ɛ́ ɓápūán bí eceg kwaŋ.

⁷¹Lisuŋga lí ŋga ɓógtɛ ɓɛ́hɛ á mɔ mí ɓálem ɓáhá la ɓáŋ bísɛ bí ŋga síŋgɛ ɓɛ́hɛ.

⁷²Ɔlolómɛ̄ a étɛ ɓatáŋɛ ɓáhá ekɔnan-ŋgɔ́ɔ́ yɛ́ɛ́, ɔ ɔ́ŋɔ́ ki Esaa-líat yɛ́ɛ́ épūān,

⁷³la mikakanɛ mí éwīyɛ́ a tí Áblaháam etāa wahá, ag kɛ ɓɛ́hɛ mɔ́ li yáhɛ́nɛ.

⁷⁴Ámbúh li ɓógtɛ li ɓɛ́hɛ á mɔ mí ɓálem, biíg ɓɔŋle nyɛ́, ɛ́h ɓɛ́ ɓé woŋ tɔ wá,

⁷⁵á até á mipúú, la li tɛ́lɛ lí sim, ɔ́sū vɛ́ɛ́ nɛ́-tɛ́ɛla á álɔ̄ wáhá wá tiile.

⁷⁶Wa nyí puh mɔɔ́n, ɔg kɛ li yáŋlɛ nɛ́ m̀pɔ́tle-a-Ɔlolómɛ̄ Nyɔlɛ, átɔm nɛ́ ɔg kɛ li dúgu ɔsú ví Nyɔ́ŋ-Ɛsáŋɛ́ á li ɓoŋhan lí nzen yɛ́ɛ̄,

⁷⁷á li tíi lí lílōm jɛ́ɛ́ bíyíhɛ́nɛ́ bí lísuŋga lí ŋga sɔ́le la elaakɛ-miɓé.

⁷⁸Ɔlolómɛ̄ wahá a yáhɛ lá ekɔnan-ŋgɔ́ɔ́: li kele la yɔ́, mipúú mí ŋga sɔ́le á lóō mbunán la m̀mú-á-lóɛ, má paayé ɓɛ́hɛ.

⁷⁹Míg paaye ɓá bísɛ bí lɛ́ átē á livito, la ɓá bí lɛ́ á m̀ɓel-á-sɔŋ á lí tɛ́ɛ́yɛ lí míkoo máhá á nzen nsaŋ.»

⁸⁰A yé ŋga légɓe mɔɔ́n, á ŋgí náŋ, m̀búl wɛ́ɛ́ ki ág ólo; la nyɛ́ ɔ tɔ́ɔ̄ á éyāŋ nɛ́-tɛ́ɛ eceg yɛ́ɛ́ lí étɛ lí nyúū ɔ́sū ví lílōm lí Íslāɛl yú kɔlan.