Read Bakoko Lúkas 10 Bible Online

Lúkas 10 - Bakoko bible

Lúkas 10

¹Ámbúh náŋ, Nyɔ́ŋ-Ɛsáŋɛ́ ɔ pɔ́hɔ̄ muúnzambúwá mí ɓayége la bíɓáa ɓatám, la nyɛ́ ɔ dúgɛ́ ɓɔ bíɓáa bíɓáa ɔ́sū vɛ́ɛ́ á tísɔn sig, la á ɓávoóm bísɛ a ŋgí nyɛ́ɛ li kɛ nyɛ́-mɛ̄n.

²A byɛ́la ɓɔ́ nɛ́: «Mpumu a lɛ́ ŋgandag, ndí ɓaɓɔŋle bí sē ɓé ndoŋgó. Miní sɔ́hyé hɔ́ ɛ́sāŋɛ́ a mpumu nɛ́ a óm ɓapumu á ǹdíí wɛ́ɛ́.

³Kɛnán! Mag óm ɓɛ́nɛ ákaa ɓɔɔ́n bí mítōmbɛ́ á póla nzɛ.

⁴Miníh nyɔŋɔ́g ɓé pɔ́sa mɔní, tɔ mpég á duwɛ, tɔ bitámbí; miníh tamlág ɓé ki tɔ mut á nzen.

⁵Tɔ á Wɔɔ́wɔ́ɔ nlɛ́ɛ́ miní ŋga kɛ́ li níŋgi, laglán yágá nɛ́: ‹Nsaŋ a ɓɛ́ la ɓɛ́nɛ.›

⁶Kíyáɓɛ́nɛ mut a nsaŋ a lɛ múŋ á nyíŋ ndáá, nsaŋ wáná ag ɓɛ́ la nyɛ́; kí ah ɓɛ́ ɓé ki, ag timan la ɓɛ́nɛ-mɛ̄n.

⁷Tɔɓán múŋ á nyúŋ nlɛ́ɛ́, miníg dí, miníg nyú yé ɛ́sɛ bí ŋga tíi ɓɛ́nɛ, ányúū nɛ m̀ɓɔŋle a kɔ́ɔ la nsála. Miníh ɓógyág ɓé á nyúŋ nlɛ́ɛ́ á li tɔɔ á nyúŋú ntám.

⁸Á tɔ yɔɔ́yɔ́ɔ tísɔn miní ŋga kɛ́ li níŋgi ndí ɓá lɛ́glé ɓɛ́nɛ, díán yé ɛ́sɛ bí ŋga káale ɓɛ́nɛ.

⁹Táálán ɓakɔɔ́kɔ̄n bí nyíŋ tísɔn, miní lagá ɓot ɓɛ́ɛ́ bísɛ nɛ́: Likanʼyɛ lí Ɔlolómɛ̄ la sīŋglé tɛɛla á mbóg yaná.

¹⁰Ndí á tɔ yɔɔ́yɔ́ɔ tísɔn miní ŋga kɛ́ li níŋgi ndí ɓáh lɛ́glé ɓé ɓɛ́nɛ, kɛnán á ɓávoóm ɓɛ́ɛ́ bí ŋkɔtanɛ́, miní yó ɓot nɛ́:

¹¹Biíg kut ki la libúlú lí tísɔn yaná jé lá átɓé ɓɛ́hɛ á míkoo, biíg sah jɔ́ nɛ́ lí yéglé la ɓɛ́nɛ. Ndí tɔ náŋ, yíán nɛ́: likanʼyɛ lí Ɔlolómɛ̄ la nyɛ́g.»

¹²«Mag laga ɓɛ́nɛ nɛ́, á ɔlɔ́ ví ŋkál, ɓot bí nyíŋ tísɔn bíg kɛ li kuh lí ékɔ́ghɛ ecɛ́ŋ li loo lí ɓot bí Sódom.

¹³Eɓéé-nyúū la wa á tísɔn nyí Kolásin! Eɓéé-nyúū la wa á tísɔn nyí Betsaída! Ányúū nɛ, ki ɓɔŋ nɛ́ bí binanaŋga bí mam, bí byá ɓɔ̄ŋɓɛ́ á yóg yaná bí ɓɔ̄ŋɓɛgɛ ja á tísɔn nyí Tíil la nyí Sídon, kí ɓátɔɓene ɓáɓá bú vēŋé bílɛ̄m ɓɛɛvéé; kí bú jálɓán mípēg la li tɔɔ átē a lisuu á lí étɛ nɛ́ bí lɛ átē a esɔghe ecɛ́ŋ.

¹⁴La mbálɛ, ányúū náŋ nɛ́ á ɔlɔ́ ví bíkāāhɛ́nɛ́, ekɔ́ghɛ yáná ɛg kɛ li ɓɛ́ lí écɛ̄ŋ li loo lí yé ɓot bí Tíil la ɓá bí Sídon.

¹⁵Wág ki á Kafalnáum, ɔg ɔ́ŋɔ́ɔ nɛ́ ɔg kɛ li ɓét tɛɛla á lóō é? Ɔg yɛ́ɛ, ɔg kɛ li suh nɛ́-tɛ́ɛla á ŋkɔŋ á ɓá ɓá wū.

¹⁶Tɔ nzáá a ŋga ógle ɓɛ́nɛ, ma nɛ́ a ógle. Nyɔ́ ki a ŋga pún ɓɛ́nɛ a pún já ma; tɔ nzáá a ŋga pún ma, a pún nyɔ́ a óm ma.»

¹⁷Míŋ muúnzambúwá mí ɓayége la bíɓáa mú tímān átē a mivag, la ɓɔ́ bú lága nɛ: «Ɛtáŋɛ, tɛɛla mimbúl míɓē mí ŋga ógle ɓɛ́hɛ á jóō jɔ́ɔ.»

¹⁸Yésus ɔ pélē ɓɔ nɛ́: «Mií ŋga ɛ́n Sátan ag ɓógo á lóō li ɓɛ́han á sí ákaa mbambat.

¹⁹Jɔ́ hɔ́ nɛ, ma tí ɓɛ́nɛ ŋguu nyí li cógte lí nyɔ la aee, la ŋguu ǹlem yɔ ɛsɛ̄; jam tɔ já lí ŋgá kɛ ɓé ɓɛ́nɛ li teeŋgɛ.

²⁰Tɔ la náŋ asɛ̄, miníh sophɛ́gɛ́ ɓé ányúū nɛ mimbúl míɓē míg ógle ɓɛ́nɛ, ndí vagán ja nɛ́ moó máná ma ciiɓɛ́ á ékombo-lóō.»

²¹Á nlemlem á eceg, M̀búl Mpúán ɔ yáhɛ́ Yésus la mivag, la nyɛ́ ɔ yó nɛ: «Mag tíi wa mítamlan Etāa, Ɛtáŋɛ nyɔ́ á sí la lóō, ányúū jam wa sɔ́ɔ ɓot-bí-peg la ɓá bí éyī, ndí wu yɛ́ɛ́lé jɔ ɓot bí lɛ ákaa ɓɔɔ́n ɓátɔ̄ga. Ɔɔ, Etāa, nzɛ́ wa sómo nɛ ɛ́ ɓɛ́ náŋ.

²²Mɔ́ mísɛ má tíéɓɛ́ ma la Etāa, ndí tɔ mut a ŋga yí ɓé nzáá a lɛ̄ Mɔ́ɔ̄n, amáh sig Etāa; tɔ li yí lí nzáá a lɛ Etāa, amáh sig Mɔɔ́n la tɔ nzáá Mɔ́ɔ̄n a díiŋ lí yɛ́ɛ́lene náŋ.»

²³Váŋ nɛ́ Yésus a yáan lí légɓe lí ɓáyēge ɓɛ́ɛ́, a byɛ́la ɓɔ́-ntámɛ́ nɛ́: «Misɔ́tá la miíh mí ma ɛ́n yé miní ŋga ɛ́n!

²⁴Jɔ́ hɔ́ nɛ́, mag laga ɓɛ́nɛ nɛ́: ŋgandag ɓápɔ́tle-bí-Ɔ́lolómɛ̄ la ŋgandag káísa yá somó lí ɛ́n lí yé miní ŋga ɛ́n ndí ɓáh ɛ́n ɓé; li ámble lí yé miní ŋga ámble ndí ɓáh ámble ɓé.»

²⁵Ŋ̀yí-mbéndá wa ɔ tɛ́lɛ, la nyɛ́ ɔ ɓāt Yésus á lí ceglɛ lí nyɛ nɛ́: «Á Ŋ̀yéglɛ, yéé ma nyɛ́ɛ li ɓɔŋ ndí mí kūh eniŋ éɓem é?»

²⁶Yésus ɔ bíhī nyɛ nɛ́: «Yéé yá ciiɓɛ́ á kálati mbéndá é? Yéé wa sɔ́ŋgɔ átē é?»

²⁷Nyɔ́ŋ ɔ pélē nyɛ nɛ́: «Dīŋ Nyɔ́ŋ-Ɛsáŋɛ́ Lōó jɔ́ɔ la m̀mím wɔɔ ásɛ, la liɓɛ́ɛg jɔ́ɔ lísɛ, la ŋguu yɔɔ ɛsɛ̄ la miɔ́ŋɔ mɔ́ɔ mísɛ; ɔ dīŋ ki mɔɔ́nɛ́sɔ̄ŋ ákaa wā-mɛ̄n.»

²⁸Yésus a byɛ́la nyɛ́ nɛ́: «Wa pélē m̀ɓɛɛŋ. Ɓɔ̄ŋ náŋ, ɔg kɛ li kuh lí éniŋ.»

²⁹Ndí, kasig nyɔ́ ŋ̀yí-mbéndá a ŋgí somo li étɛ nɛ́ mbihi yɛ́ɛ̄ ɛ tɛ́ɛ sim, ɔ ɓāt Yésus nɛ́: «Nzáá a lɛ̄ mɔ́ɔ̄nɛ́tāŋ é?»

³⁰Yésus ɔ pélē nyɛ nɛ́: «Mut wa a ŋgí sɔ́le á Yélūsalɛm li kɛ á Yelíko, ɔ ɓɛ́hán á mɔ mí mítɔnɓa, bú kɛ́tɛ́ nyɛ yé ɛ́sɛ a ɓɛ́ɛ́la, bú ɓōóm nyɛ ɓɛɓɛ la nyɛmb, bú yíg cóó nyɛ́.

³¹Múŋ á bíŋ bísɛ, ǹtíi-nsúlé wa ɔ sóŋhán lí loole múŋ á nyíŋ nzen, ɔ ɛ́n nyɔ́ŋ mut la nyɛ́ ɔ ɓámlé nyɛ.

³²Mɔɔ́n Élōg-Lévi[4] wa nyɛ́g ɔ pám á nyɔ́ŋ voóm; ɔ ɛ́n nyɔ́ŋ mut la nyɛ́g ɔ ɓámlé nyɛ.

³³Ndí ǹcɛn á mut, mɔɔ́n Samália wa nyɔ́ a ŋgí kɛ á dúwɛ, ɔ pám ɓɛ́ɓɛ la nyɔ́ŋ mut. Ɛnɛ́ a ɛ́n nyɛ, ŋgɔ́ɔ́ yu byée nyɛ ŋgandag.

³⁴La nyɛ́ ɔ sīŋglé nyɛ ɓɛɓɛ, ɔ kóm bíláam la miwúú á bíkwɛɛ byɛ́ɛ́, ɔ kág byɔ. Ámbúh náŋ, ɔ káhyɛ́ nyɛ á lóō lí vɔ́si yɛ́ɛ̄, la nyɛ́ ɔ kɛ́la nyɔ́ŋ á ndáá ɓaloo-nzen, ɔ nyɔ̄ŋ eceg yɛ́ɛ́.

³⁵Ɔlɔ́ ví ŋgí oŋ, nyɔ́ŋ ǹcɛn á mut a Samália ɔ ɓógtɛ́ bípah bí kápa bíɓáa, ɔ tí byɔ mut a ndáá ɓaloo-nzen la nyɛ́ ɔ lága nyɛ nɛ́: Nyɔ̄ŋ eceg ɛ́ nyɔ́ mut, tɔ yéé ki ɔ ŋgɔ kɛ li ɓát, mā-mɛn mag kɛ wa yɔ́ lí tíi eceg mí ɓɛ́ mag timan.»

³⁶La Yésus ɔ ɓāt nɛ: «Á éɔ̄ŋɔ yɔ́ɔ, nzáá á póla ɓá ɓot bíŋháa a lɛ̄ mɔ́ɔ̄nɛ́tāŋ á nyɔ́ mut a ɓɛ́hán á mɔ mí mítɔnɓa é?»

³⁷Ŋ̀yí-mbéndá ɔ pélē nɛ: «Nyɔ́ mut a ɓɔ̄ŋlé nyɛ m̀ɓɛɛŋ.» Yésus ɔ lāgá hɔ́ nyɛ nɛ́: «Kɛ́nɛ́g, wág ɔ ɓɔ̄ŋ nlemlem á jam.»

³⁸Mú ápah Yésus la ɓayége ɓɛ́ɛ́ bí ŋgí wɛɛ á nzen, ɔ níŋgí á ŋkɔŋ wá, mindígá wa nɛ́ Maatá, ɔ kālé nyɛ á yóg yɛ́ɛ̄.

³⁹A ɓɛ́ɛ́la mɔɔ́nyāŋ-a-ŋgɔn nɛ́ Malía, nyɔ́ a sɔ́ɔ́ ɔ tɔ́ɔ̄ á sí míkoo mí Nyɔ́ŋ-Ɛsáŋɛ́, ɔ ɓōtlé li ámble lí eɓaŋgá yɛ́ɛ́.

⁴⁰Maatá ɔ pāgtán la nsɔ́n á nlám. Váŋ nɛ́ a sɔ́ la njɛ́lɛ́ nɛ: «Ɛtáŋɛ, náŋ a ŋgá teeŋgɛ ɓé wa nɛ́ mɔɔ́lyāŋ-a-ŋgɔn a mwáhɛ́nɛ́ mā-ntámɛ́ nsɔ́n á nlám é? Lagá hɔ́ nyɛ nɛ́ a óŋgánɛ ma.»

⁴¹Nyɔ́ŋ-Ɛsáŋɛ́ ɔ pélē nyɛ nɛ́: «A Maatá, a Maatá, ɔg tɔghan, ɔg lɔ́gɓan ki ányúū mam ŋgandag,

⁴²Ndí jam já nɛ li lɛ́ nsɛ́ŋ. Malía nɛ́ a pɔ́hɔ̄ joga liláám, jé tɔ mut a ŋgá kɛ ɓé nyɛ li nyɔŋle.»