Read Bakoko Lúkas 16 Bible Online

Lúkas 16 - Bakoko bible

Lúkas 16

¹Ámbúh náŋ, Yésus ɔ lága ɓáyēge ɓɛ́ɛ́ nɛ: «M̀byaŋ-á-mut wá a ɓɛ́ɛ́la ǹlégɓe-miɓɛɛŋ mɛ́ɛ́, nyɔ́ a kuhúú sɔ́mɔn ɔ́sū vɛ́ɛ́ nɛ́ ag lɔɔ nyɛ́ miɓɛɛŋ mɛ́ɛ́.

²Ɛsáŋɛ́-a-mitán ɔ óm li yáŋa lí nyɛ, ɔ bíhī nyɛ nɛ́: ‹Yéé mi ŋga ámble likɔlɓan la wa é? Lagá ma ákaa wa wɛ́ɛ la miɓɛɛŋ máma, ányúū nɛ, li ɓotle lí nyí vɔ́ŋɔ́ɔ, ɔh kɔ́ɔ́ ɓé pɛ nɛ́ ɔ ɓɛ́ ǹlégɓe-miɓɛɛŋ máma.›

³Ǹlégɓe-miɓɛɛŋ ɔ yó la nyɛ́-mɛ̄n nɛ́: ‹Mag kɛ láá li ɓɔŋ, ákaa ɛsáŋɛ́ wama a ɓógtɛ ma á nsɔ́n é? Mi byɛ́ɛ́ ma ŋguu nsɔ́n á sí, mag kɔn ki ɔsɔ́n lí yaga.

⁴Mag yí yé mi ŋga kɛ́ li ɓɔŋ á li somo nɛ́ kí ɓá ɓógtɛ́ ma á nsɔ́n, mi ɓɛ́la ɓot bí ŋga lɛ́gle ma á yóg yáɓá.›

⁵Váŋ nɛ́ a óm lí yáŋa lí ɓot bísɛ ɛsáŋɛ́ wɛ́ɛ́ a ŋgí ɓāt bipíl, wa ámbúh nyɔ́ŋɔ́, aá la nyɔ́ á ɔsú nɛ: Ɛsáŋɛ́ wama ag ɓat wa yéé é?

⁶Nyɔ́ŋ ɔ pélē nyɛ nɛ́: ‹Eɓógo póndi miwúú.› Ǹlégɓe-miɓɛɛŋ a byɛ́la nyɛ́ nɛ́: Kálati yɔɔ epíl nyí, kwááɓɛ́ɛ, tɔɔ́ á sí, ɔ cíi muúmítáan.

⁷Ɔ yáŋa nyɔ́ŋɔ́ ntám a byɛ́la nyɛ́ nɛ́: ‹Wág, bíg ɓat wa yéé é?› Nyɔ́ŋ ɔ pélē nyɛ nɛ́: Eɓógo mípēg mí kón. Ǹlégɓe-miɓɛɛŋ aá la nyɛ́ nɛ́: ‹Kálati yɔɔ epíl nyí, cií muúmwaam.›

⁸Ndí, ɛsáŋɛ́-a-mitán ɔ tímān li séme lí nyɔ́ ǹlégɓe-miɓɛɛŋ a misóómbá, ányúū akwáá wɛ́ɛ́ a étɛ. Jɔ́ nɛ́, ɓɔɔ́n bí nyí sí bí lɛ́ akwáá á ŋgwáāg miwándá máɓá li loo lí ɓɔ́ɔ̄n bí mípūū.»

⁹«Ma hɔ́, mag laga ɓɛ́nɛ nɛ́: tɛ́gán míwāndá la ŋkuh á mínaa miní byɛ́ɛ̄ a li somo nɛ́ eceg á ŋgá man, míŋ miwándá mí lɛ́glé ɓɛ́nɛ á ndáá yí éniŋ éɓem.

¹⁰Tɔ nzáá a ɛ́ní mbálɛ á jam litɔ́ga, ag ɓɛ́ ki mbálɛ á jam licɛ́ŋ. Tɔ nzáá ki a lɛ́ mínaa á jam litɔ́ga, ag ɓɛ́ ki minaa á jam licɛ́ŋ.

¹¹Kíyáɓɛ́ hɔ́ nɛ manáh ɓɛ́ ɓé mbálɛ á ŋkuh á mínaa, nzáá a ŋga kɛ́ ɓɛ́nɛ li yígle lí tāŋ mam é?

¹²Kíyáɓɛ́ hɔ́ nɛ manáh ɓɛ́ ɓé mbálɛ á míɓɛɛŋ mí mut ntám, ɛmáná ɓɛ́nɛ-mɛ̄n, nzáá a ŋga kɛ́ ɓɛ́nɛ mɔ́ li tíi é?»

¹³«M̀ɓɔŋle tɔ wa a sē hɔ́ ɓé nɛ a la li ɓɔŋle lí ɓasáŋɛ́ bíɓáa: tɔ yá ɓɔŋ láá, ag síŋgɛ nyɔ́ wa ndí a díŋɛ́ nyɔ́ŋɔ́, tɔ nɛ́ ag kɛ li átɓe la wa, ndí a yɔ́l nyɔ́ŋɔ́. Miní sē hɔ́ ɓé nɛ maná la li ɓɔŋle lí Ɔlolómɛ̄ ndí la ŋkuh ki.»

¹⁴Elōg-Falísái yé ɛ́ ŋga díiŋ ŋkuh, ɛnɛ́ yá ámble bíŋ biɓaŋgá bí Yésus, bú ɓōtlé nyɛ li ɔl.

¹⁵La nyɛ́ ɔ lága ɓɔ nɛ́: «Ɓɛ́nɛ, miní étɛ nɛ́ miní tɛ́ɛ́ sim á miíh mí ɓot-bí-bínam, ndí Ɔlolómɛ̄ ag yí mímīm máná: yé ɛ́sɛ ki ɛ byɛ́ɛ̄ ádit ɔ́sū ví ɓot ɛ́ lɛ́ nyɛgá á miíh mí Ɔ́lolómɛ̄.

¹⁶Mbéndá la ɓapɔ́tle-bí-Ɔ́lolómɛ̄ bíg súgle á eceg yé Yohánɛs Ǹtíi-nzoɓan; li ɓotle la váŋ, Pɔ́l M̀ɓɛɛŋ nyí Ekombo Ɔ́lolómɛ̄ ya lɛ̄glɛ, mut sig ag lɔ́gɓan la ŋguu nɛ́ a níŋgí átē.

¹⁷Sí la lóō bíg kɛ li loo lí m̀ɓɔmblanɛ́, ndí litɔ́n lí éɓaŋgá mbéndá tɔ já lí ŋgá kɛ ɓé lí sɛg.

¹⁸Tɔ yɔɔ́yɔ́ɔ páam ɛ ŋga dúhu ŋ̀gáá wɛ́ɛ̄ ndí yá lɔ́m míndīgá ntám, ya ɓɔ̄ŋ áɓē á ndeŋg. Náŋ a lɛ nlemlem la nyí páam ɛ ŋga lɔ́m míndīgá nyɔ́ nlóm a dúhu.»

¹⁹«Mut wa nyɔ́ŋ a ɓɛ́ɛ́ m̀byaŋ, a ŋgí jál ɓaláám bí mbɔ́tí yí ŋga véé díyɛ, ɔlɔ́ sig a ŋgí loɛ ŋgand ecɛ́ŋ.

²⁰Ŋ̀yɛ́ɛ́yɛ́ɛ a mut bí ŋga yáŋa Lásalo a mɓɛ́ á náŋɛ á ányu-á-mɓɛ́l wɛ́ɛ́, nyɛ́ asɛ̄ póó la póó.

²¹Kóó ɓɛ́ɛ́ nyɛ nɛ́ a dí tɔ mibuga mí lídī mí ŋga sɔ́léne á téɓeli m̀byaŋ-á-mut, ndí á mveŋghanɛ́, mbú nɛ ɛ́ ŋgí sɔ́ nyɛ́ li nyáŋa lí póó yɛ́ɛ́.

²²Ámbúh náŋ ŋ̀yɛ́ɛ́yɛ́ɛ ɔ wú, la áŋgɛl yú ɓɛ́gɛ̄ nyɛ li kɛla á ŋgwáāg Áblaháam; m̀byaŋ-á-mut wɔ́g wú wú la wɔ́ wú jéɓɛ.

²³Wóŋ á ŋkɔŋ á ɓádūgu, ɔ ɓōtlé li taka. Ɛnɛ́ a ɓétɛ miíh, ɔ ɛ́n Áblaháam enɛŋɛ́ wóŋóó la Lásalo á ŋgwáāg yɛ́ɛ́.

²⁴Váŋ nɛ́ a tɛ́ɛ́ nlón a byɛ́ nɛ́: ‹Etāa Áblaháam, kɔnlé ma ŋgɔ́ɔ́, ɔ óm Lásalo a cág ɔnu-ví-wɔ á míndīm a vɔ́lɛ́ ma ɔlémb, átɔm nɛ́ mag taka ŋgandag mú á nyí nzáan.›

²⁵La Áblaháam ɔ yó nyɛ́ nɛ́: ‹Á mɔɔ́n wama, ɔ́ŋɔ́ɔ sig nɛ́ wa kūh ɛmɔ́ɔ misɔ́tá á éniŋ yɔ́ɔ, kí Lásalo a lɛ á sí eɓéé-nyúū; vɔ́ŋɔ́ɔ vá, nyɛ́g bíg ɓɔ́ɔ́ nyɛ́, wág ɔg táká.

²⁶Li loo ki náŋ, m̀ɓáláŋ á eɓél-écɛ̄hɛ wá ɓágá ɓɛ́hɛ la ɓɛ́nɛ nyaa nyí lɛ nɛ́, mut tɔ wa mú á épah yáhá nyɔ́ a ŋga sómo li yaɓe wóŋ á épah yáná ah laág ɓé; nlemlem ákaa mut wóŋ á épah yáná a ŋgá la ɓé li yaɓe mú á épah yáhá.›

²⁷M̀byaŋ-á-mut wú lagá nyɛ nɛ́: ‹Mag sɔ́hye wa etāa, sóon óm Lásalo á ndáá nyí etāa,

²⁸ányúū nɛ mi byɛ́ɛ́ elōgyāŋ ɛ́ páam ɛ́táan. A ɓéhyɛ́ ɓɔ́ á li ɓɔŋ nɛ́ ɓɔ́g bíh sɔ́ɔ́g ɓé vá á nyɔ́ voóm á esɔghe.›

²⁹Áblaháam ɔ pélē nyɛ nɛ́: ‹Bí byɛ́ɛ́ Móse la ɓapɔ́tle-bí-Ɔ́lolómɛ̄, bí óglé ɓɔ́.›

³⁰Ndí nyɛ́ ɔ tímānɛ̄ nɛ: ‹Kɛ́m etāa Áblaháam, náŋ ah kɔ́ɔ́ ɓé, ndí kíyáɓɛ́nɛ mut a ɓógyé mú á ŋkɔŋ á ɓádūgu, a kwɛ́lɛ́ ɓɔ́, bíg kɛ li veŋhan.›

³¹Áblaháam aá la nyɛ́ nɛ́: ‹kíyáɓɛ́nɛ ɓáh ógle ɓé Móse tɔ ɓapɔ́tle-bí-Ɔ́lolómɛ̄, tɔ mut a páhyé já á póla á ɓá ɓá wū, bí ŋga kɛ ɓé lí yéɓe.›»