Read Bakoko Lúkas 2 Bible Online

Lúkas 2 - Bakoko bible

Lúkas 2

¹Á eceg líkanʼyɛ lí Ogústo, kasig a ɓɛ́ɛ́ káísa ecɛ́ŋ, ɔ pámɛ́ mbéndá nɛ nsɔŋgí á ɓot á nyɔŋɓɛ́ɛ á ŋkɔŋ-á-sí ásɛ.

²Nyúŋ nsɔŋgí ɔ́sū á ɓɔ̄ŋɓɛ́ɛ eceg Kulínius a ɓɛ́ɛ́ gɔ́mna licɛ́ŋ á ŋkɔŋ á Sília.

³Mut sig a ŋgí kɛ li nyɔŋɓɛ á nsɔŋgí, á tísɔn yɛ́ɛ̄ libyáa.

⁴La Yósɛp ki ɔ ɓógó á Názalɛt tísɔn nyí Galiléa, ɔ ɓét á Bétlehéem tísɔn nyí Dávid á ékombo yé Yúdēa, ányúū nɛ a ɓɛ́ɛ́ mɔ́ɔ̄n á ndáá-m̀biya nyí Dávid.

⁵A kɛnɛ́ɛ́ wóŋ á lí nyɔŋɓɛ á nsɔŋgí la eván yɛ́ɛ́ Mālía nyɔ́ á ɓɛ́ɛ́ líbum.

⁶Eceg bi ɓɛ́ɛ́ wóŋ, ɔlɔ́ ví ábyāl ví Mālía vú kɔlan,

⁷la nyɛ́ ɔ byál mɔɔ́n-á-páam, mɔɔ́n wɛ́ɛ̄ ɔsú. Ɔ vúlké nyɛ miɓato, ɔ nāntɛ́ nyɛ á ésōā bílēm, ányúū nɛ́ póla ɛh ɓɛ́ɛ ɓé ányúū yaɓá á ndáá ɓaloo-nzen.

⁸Múŋ á nlemlem á ékombo, ɓatát míɓembá bí ɓɛ́ɛ́ múŋ bí ŋgí loɛ eceg á míndīī la díɓe á li tát lí bílēm byáɓá.

⁹Váŋ nɛ́ áŋgɛl nyí Nyɔ́ŋ-Ɛsáŋɛ́ ya pámlé ɓɔ; mipúú mí lipém lí Nyɔ́ŋ Ɛsáŋɛ́ mú díí ɓɔ, la ɓɔ́ bú nát la woŋ.

¹⁰Ndí áŋgɛl yu lága ɓɔ nɛ́: «Miníh kɔnɔ́g ɓé woŋ, ányúū nɛ, ma sɔ́ ɓɛ́nɛ li lɛgɛ li pɔ́l m̀ɓɛɛŋ, nyí ɛ ŋga kɛ́ li kɔnhanɛ lí lilóm lísɛ mivag micɛ́ŋ.

¹¹Ǹsuŋ a byáa nyí lɛn á tísɔn nyí Dávid, a lɛ Nyɔ́-a-Pɔ́hlɛ, Nyɔ́ŋ-Ɛsáŋɛ́.

¹²Ndembye ɛ ŋga kɛ́ ɓɛ́nɛ li yíhɛ náŋ yɔ nyí: miníg kɛ li kɔ́p lí ŋkɛ́gá-mɔ́ɔ̄n, m̀vúlkége, á náŋɛ á ésōā bílēm.»

¹³Á ékūyá-kúyá, livuŋ li áŋgɛl lú byáŋ elɔŋ la nyí ɔsú á lí lɔ́ŋghɛ́nɛ li Ɔlolómɛ̄ ŋgoso enyɛŋgɛ la li laga nɛ́:

¹⁴«Lipém lí ɓɛ́ la Ɔlolómɛ̄ á lóō lóō, nsaŋ á sí la ɓot á ŋga díŋɛ.»

¹⁵Ɛnɛ́ ángɛl yá yíg ɓɔ li timan á lóō, ɓatát bílēm bú laglán ɓɔ́ la ɓɔ́ nɛ́: «Bi kɛ́nɛ́g nɛ́-tɛ́ɛla á Bétlehéem, bi ɛ́n yé ɛ́ ŋga loo wóŋ, yé Nyɔ́ŋ-Ɛsáŋɛ́ a yíhɛ́ ɓɛ́hɛ.»

¹⁶La ɓɔ́ bú dīgɓán duwɛ, bú kɔ́p Mālía, Yósɛp la ŋkɛ́gá-mɔ́ɔ̄n á náŋɛ á ésōā bílēm.

¹⁷Ɛnɛ́ ɓá ɛ́n mɔɔ́n, bú laga yéé ɛ́sɛ ɓá máŋlɛ́ ɓɔ likɔlɓan la nyɛ́.

¹⁸Ɓot bísɛ bí ɓɛ́ɛ́ váŋ bú nyág la yé ɓatát bílēm bí ŋgí máŋlɛ́ ɓɔ́.

¹⁹Malía a ŋgí náŋɛ míŋ mam mísɛ á m̀mím wɛ́ɛ́ la li somo lí lí sɔ́ŋtánɛ lí mɔ.

²⁰Ámbúh náŋ ɓatát bílēm bú tímān bíg lɔ́ŋgɛ ŋgoso lipém, la li ɓégɛ lí Ɔlolómɛ̄, likɔlɓan la yé ɛ́sɛ ɓá ámble, ndí bú ɛ́n ki, tɛɛ́tɛ́ɛ ákaa bí lagléé ɓɔ́.

²¹Ɛnɛ́ ɔlɔ́ vá yáhɛ mwaam ví mɔɔ́n a ŋga nyɛ́ɛ li kwɛɛɓɛ vá kɔlan, bú lō nyɛ joó nɛ Yésus, joó áŋgɛl ɛ tíéé sɔ́kágánɛ́ nyaŋɛ́ ag nyɔŋ libum jɛ́ɛ́.

²²Ɛnɛ́ ɔlɔ́ ví lí loɛ lí esaa[1] vá kɔlan, li oŋle la mbéndá nyí Móse, Yósɛp la Malía bú kɛ́la mɔɔ́n á Yélūsalɛm á li étɛ lí nyɛ Nyɔ́ŋ-Ɛsáŋɛ́,

²³ákaa yé yá ciiɓɛ́ á mbéndá nyí Nyɔ́ŋ-Ɛsáŋɛ́ nɛ: «Mɔɔ́n-á-páam ɔsú sig, bíg kɛ nyɛ́ li tíi lí Nyɔ́ŋ-Ɛsáŋɛ́.»

²⁴Yósɛp la Malía ki, bí ŋgí nyɛɛ li tíi ákaa nsúlé, adú áɓáa tɔ nɛ́ ɓɔɔ́n bí áɓeŋ bíɓáa, li oŋle la mbéndá nyí Nyɔ́ŋ-Ɛsáŋɛ́.

²⁵Múŋ á yéŋ eceg, mut wa a ɓɛ́ɛ́ á Yélūsalɛm, nyɔ́ bí ŋgí yáŋa nɛ́ Síméon; a ɓɛ́ɛ́ á tɛ́ɛ sim á miíh mí Ɔlolómɛ̄, ndí ɔ ɓɛ́la ki ŋguu ŋyéɓé. A ŋgí laaŋke M̀mɔ́mɛ Íslāɛl, M̀búl Mpúán ɔ ɓɛ́ la nyɛ́.

²⁶M̀búl Mpúán á yíhɛ́ɛ́ nyɛ́ nɛ́, a ŋgá kɛ ɓé li wú nyɛ́ ŋgí li ɛ́n lí Nyɔ́-a-Pɔ́hlɛ la Nyɔ́ŋ-Ɛsáŋɛ́.

²⁷La M̀búl ɔ kɛ́la nyɛ á ndáá-ēcɛ́ŋ-Ɔlolómɛ̄. Á nlemlem á eceg, ɓasáŋɛ́ bí Yésus bú sɔ́la nyɛ́, á li yáhɛ lí yé yá ciiɓɛ́ á mbéndá ányúū yɛ́ɛ̄.

²⁸La Síméon ɔ lɛ́glé mɔ́ɔ̄n á mɔ mɛ́ɛ́, ɔ tí Ɔlolómɛ̄ mítamlan la li pɔ́t nɛ́:

²⁹«Ɛtáŋɛ, likɔlɓan la eɓaŋgá yɔ́ɔ m̀ɓɔŋle wɔɔ ag la li kɛ vɔ́ŋɔ́ɔ la nsaŋ;

³⁰ányúū nɛ miíh máma má ɛ́n lísuŋga jɔ́ɔ,

³¹jé wa ɓōŋhán ányúū milóm mísɛ,

³²mipúú mí ŋga páaye ɓá bí sē ɓé ɓɔ́ɔ̄n bí Élōg-Yúda, la lipém lí Íslāɛl lilóm jɔ́ɔ.»

³³Ɛsáŋɛ́ la nyaŋɛ́ a mɔɔ́n bú nyág la yé ɛ́sɛ ɓot bí ŋgí laga likɔlɓan la mɔɔ́n wāɓá.

³⁴Síméon ɔ lómbó ɓɔ aá la nyaŋɛ́ Mālía nɛ́: «Nyɔ́ mɔɔ́n á sɔ́ ja á li ɓɛ́h la li tɛ́ɛ́yɛ lí ŋgandag ɓot á Íslāɛl la li ɓɛ́ lí ndembye nyí ɓot bí ŋga pún.

³⁵La náŋ, miɔ́ŋɔ mí mímīm mí ɓot míg kɛ li pám á ápūū; ndí wā-mɛ̄n Mālía, m̀byɛndɛ a esɔghe ag kɛ wa li túú li m̀mím.»

³⁶M̀máŋ á míndīgá wá ki á ɓɛ́ɛ́ múŋ nɛ́ Ána, a ɓɛ́ɛ́la muúmwaam mí mímbú lá mínáa, m̀pɔ́tle-a-Ɔlolómɛ̄, ŋgɔn nyí Fánuɛl á m̀biya á Ázɛ̄ɛl; ámbúh mimbú nzambúwá mí áūg, nlóm ɔ wú, ɔ yéglé ŋkúh. A ŋgí ɓógo ɓé á ndáá-ēcɛ́ŋ-Ɔlolómɛ̄, ag ɓɔŋle Ɔlolómɛ̄ díɓe la nzámuh átē á etɔɔ-nzal la mikánɛ.

³⁷

³⁸Ɛnɛ́ a sóŋhán váŋ á nlemlem á eceg, nyɛ́g ɔ ɓōtlé li ɓégɛ lí Ɔlolómɛ̄, la li máŋlɛ li ɓot bísɛ mam mí ŋga légɓe Yésus, ɓá ɓot bí ŋgí laaŋke nɛ́ Yelúsalɛm ɛ tɛ́lɛ́ kundɛ.

³⁹Eceg Yósɛp la Malía ɓá manɛ́ li yáhɛ lí yéé ɛ́sɛ yá ciiɓɛ́ á mbéndá nyí Nyɔ́ŋ-Ɛsáŋɛ́, bú tímān á Galiléa á tísɔn yáɓá á Názalɛt.

⁴⁰Á yéé ɛ́ ŋga légɓe mɔɔ́n, a ŋgí toŋgo la li ólo, ŋyálāg la peg, ediŋ yé Ɔlolómɛ̄ ɛ́ ɓɛ́ɛ́ la nyɛ́.

⁴¹Ɓabyál Yésus bí ŋgí kɛ á Yélūsalɛm m̀bú sig, li loɛ lí ŋgand Páska nyí Elōg-Yúda.

⁴²Ɛnɛ́ Yésus a pám jóom lí mímbú la míɓáa, Malía la Yósɛp bú ɓét elɔŋ la nyɛ́ á li loɛ li ŋgand Páska, li oŋle la miɓɔŋɔg máɓá.

⁴³Ɛnɛ́ ŋgand ya mān, á ŋgɛ́ŋ misoa, mɔɔ́n wāɓá Yésus ɔ yéglé á Yélūsalɛm, ɛ́h ɓɛ́ ɓé ɓɔ́ li yí.

⁴⁴Bí ŋgí ɔ́ŋɔ́ɔ nɛ́ a lɛ la ɓot bí elɔŋ yáɓá duwɛ; bú wɛ́ɛ̄ ɔlɔ́ víwūt sɔ́kágánɛ́ bíg ɓotle nyɛ́ li somo á póla ndog yaɓá la bileman.

⁴⁵Kasig bíh ɛ́nɛ́ɛ ɓé nyɛ, bú tímān nyɛ li somo nɛ́-tɛ́ɛla á Yélūsalɛm.

⁴⁶Ámbúh alɔ́ áŋháa, bú kɔ́p nyɛ́ á ndáá-ēcɛ́ŋ-Ɔlolómɛ̄ a tɔ́ɔ̄ á m̀mím á eti yé ɓayéglɛ mbéndá Ɔlolómɛ̄, ag ámble ɓɔ́, ag bihi ki ɓɔ́.

⁴⁷Ɓot bísɛ bí ŋgí ámble nyɛ́ ag pɔ́t, bú nyág la nlohanɛ́ wɛɛ́ a eyí ndí la mbele yɛ́ɛ́ ki.

⁴⁸Ɛnɛ́ Mālía la Yósɛp bí ɛ́nɛ́ɛ́ nyɛ́, bú nyág. Váŋ nɛ́ nyaŋɛ́ Mālía a ɓāt nyɛ́ nɛ́: «Wɛɛ́ʼɛ̄ á mɔ́ɔ̄n wama ndí láá wa ɓɔ̄ŋ ɓɛ́hɛ náŋ é? Légɓé sig ákaa ma la ɛsɔ́ŋɛ́ ɓaá taká ŋgandag á li somo lí wa.»

⁴⁹La Yésus ɔ pélē ɓɔ nɛ́: «ányúū yéé miní ŋga sómo ma é? Ɓaá miní ŋgá yí ɓé nɛ́ ma nyɛ́ɛ li ɓɛ́ á ndáá Etāa é?»

⁵⁰Ndí ɓɔ́ ɓáh sɔ́ŋtánɛ ɓé yéé a sómo ɓɔ li laga.

⁵¹La nyɛ́ ɔ sūh elɔŋ la ɓɔ́ li timan á Názalɛt. Yésus ɔ ɓɛ́la esuhɛ-nyuú á ŋgwáāg yaɓá. Nyaŋɛ́ á ŋgí naŋɛ míŋ mam mísɛ á m̀mím wɛ́ɛ́.

⁵²Yésus a ŋgí náŋ la peg, la ntɛ́l, á sí ediŋ Ɔlolómɛ̄ la yé ɓot-bí-bínam.