Read Bakoko Lúkas 5 Bible Online

Lúkas 5 - Bakoko bible

Lúkas 5

¹Ɔlɔ́ vá, Yésus a ɓɛ́ɛ́ á tɛ́ɛ á ŋgwáāg ebúle yé Genesálɛt; limut lú díí nyɛ á lí ámble lí pɔ́l Ɔlolómɛ̄.

²Váŋ nɛ́ a ɛ́n míɓoŋgó míɓáa mí cágɛ á ŋgwáāg ebúle, ápah ɓot bí mísombó bí ŋgí so bipéha byáɓá.

³La Yésus ɔ ɓét á m̀ɓoŋgó wá, nyú á ɓɛ́ɛ́ nyú á Símɔn. Ɔ lága nyɔŋ nɛ́ a síndí wɔ́ puh li kɛ á nyaŋɛ́. Yésus ɔ tɔ́ɔ̄ á m̀ɓoŋgó, ɔ ɓōtlé li yéglɛ lí limut.

⁴Ɛnɛ́ a manɛ li pɔ́t, ɔ laga Símɔn nɛ́: «sīŋglé á nyaŋɛ́ ápah njiɓa ɛ lɛ, wa la ɓot ɓɔ́ɔ miní léé bipéha byáná.»

⁵Símɔn ɔ yó nyɛ nɛ́: «Etāa, ɓaá sál pɔ́n díɓe lísɛ ɛ́h ɓɛ́ ɓé ɓɛ́hɛ li ól lí tɔ jam. Ndí ákaa wa nɛ́ ɔ ŋgɔ laga náŋ, mag léé bípéha.»

⁶La ɓɔ́ bú léé bípéha, bú ól kɔh ŋgandag á nyaa nyí lɛ nɛ́ bipéha byáɓá bú ɓōtlé lí wáhe.

⁷Váŋ nɛ́ ɓá pɛ́ɛ́ míwāndá máɓá mí ɓɛ́ɛ́ á nyúŋú m̀ɓoŋgó nɛ́ mí sɔ́ mí óŋgānɛ́ ɓɔ́. Ɛnɛ́ ɓá sɔ́, bú byáŋ elɔŋ la ɓɔ́, bú yáhɛ míŋ miɓoŋgó míɓáa la kɔh á nyaa nyí lɛ nɛ́ mú ɓōtlé lí yín.

⁸Ɛnɛ́ Símɔn Pétlos a ɛ́n naŋ, ɔ ɓɛ́hán á míkoo mí Yésus, ɔ sɔ́hyé nyɛ́ nɛ́: «Ɛtáŋɛ, kɛnɛ́g, nɛŋɛ́ la ma, átɔm nɛ́ mí lɛ m̀ɓɔŋ-miɓé.»

⁹Woŋ á byeléé Símɔn la ɓá bísɛ bí ɓɛ́ɛ́ elɔŋ la nyɛ́, ányúū ɔbul ví kɔh bí ólóó.

¹⁰Nlemlem á jam wú byēé Yákop la Yohánɛs, ɓɔɔ́n bí Zebedéo ɓá bí ɓɛ́ɛ́ elɔŋ la Símɔn. Yésus aá la Símɔn nɛ́: «Ɔh kɔnɔ́g ɓé woŋ, li ɓotle la lɛn ɔg ɓɛ́ ja nlɔ́ɔ́ ɓot.»

¹¹La ɓɔ́ bú cág míɓoŋgó á sí, bú cóó byoóm bísɛ, bú ōŋ nyɛ.

¹²Ɔlɔ́ vá, Yésus a ɓɛ́ɛ́ á tísɔn ya, ɔ ɓómán la mut wa, nyɔ́ a ɓɛ́ɛ́ nyɛ́ asɛ̄ la mivɛlɛ. Ɛnɛ́ nyɔ́ŋ mut a ɛ́n nyɛ, ɔ kúēlé nyɛ́ a sí míkoo, asú a sí, ɔ sɔ́hyé Yésus nɛ́: «Ɛtáŋɛ kíyáɓɛ́nɛ ɔg diŋ, púɛ́ ma.»

¹³La Yésus ɔ sámbá wɔ, ɔ síiɓán nyɛ, ɔ yó nɛ́: «Mag diŋ náŋ, púú.» Á ékūyá-kúyá mivɛlɛ mú ɓógó nyɔ́ŋ mut á nyúū.

¹⁴Ndí Yésus ɔ ɓéhyɛ́ nyɛ nɛ́: «Ɔh laglág ɓé tɔ mut yé ya loo, ndí, kɛ̄n étɛ̄ nyuú yɔ́ɔ ǹtíi-nsúlé, ámbúh náŋ ɔ tí likaale ányúū mbólí nyuú wa kūh, likɔlɓan la bitɛ́ɛ́yéné bí Móse. Náŋ ag kɛ ɓɔ́ li ɓɛ́ lí ndembye.»

¹⁵Joó li Yésus lú cámān ɓavoóm bísɛ, limut ŋgandag ki lú koman á li ámblé lí nyɛ, la li kuh lí mbólí nyuú.

¹⁶La Yésus ɔ yíg ɓɔ, ɔ kɛ́ á míkánɛ enɛŋɛ́ á líɛ̄g ápah mut tɔ wa a sē ɓé.

¹⁷Ɔlɔ́ vá, Yésus a ɓɛ́ɛ́ a ŋgí yéglɛ á líŋgīndá. Yéŋ eti ɛ́ ɓɛ́ɛ́la ɓot bí Élōg-Falísái la ɓayéglɛ mbéndá, ɓá bí sɔ́lénéé á míkɔŋ mísɛ mí Galiléa, mí Yúdēa la mí mí Yélūsalɛm. Ŋguu Nyɔ́ŋ-Ɛsáŋɛ́ ɛ ɓɛ́ɛ́ la nyɛ́ á li manɛ lí ɓákɔɔ́kɔ̄n.

¹⁸Váŋ nɛ́ ɓot ɓá sɔ́, bí ɓɛ́gɛ eɓóg-mut á sáŋkálɛ; bí ŋgí somo nyɛ́ lí níŋgɛ nɛ́ bí tɛ́ɛ́yɛ́ nyɛ́ ɔ́sū ví Yésus.

¹⁹Ndí, bíh yíi ɓé ákaa ɓá nyɛɛ́ lí ɓɔŋ átɔm nɛ́ limut lí ɓɛ́ɛ́ ŋgandag, la ɓɔ́ bú ɛ́n hɔ́ nɛ bí ɓét la nyɛ́ á lóō lí ǹduu, bú ɓáāg voóm, bú súhɛ́nɛ́ nyɛ váŋ la sáŋkálɛ wɛɛ́ á m̀mím á limut, ɔ́sū ví Yésus.

²⁰Ɛnɛ́ Yésus a ɛ́n ŋyéɓé wáɓá, ɔ lága ŋ̀kɔɔ́kɔn nɛ́: «Ma láakɛ́ wa míɓē mɔ́ɔ.»

²¹Ɓayí-mbéndá la Falísái bú ɓōtlé lí pɔ́t la m̀mím nɛ́: «Nzáá mut nyɔ́ á ŋga óŋo Ɔlolómɛ̄ é? Ɓaá, nzáá a ŋga lá li laakɛ lí míɓē amáh sig Ɔlolómɛ̄ nyɛ́-ntámɛ́!»

²²Kasig Yésus a ŋgí yí míɔ̄ŋɔ máɓá, ɔ bíhī ɓɔ nɛ́: «Ányúū yéé miní byɛ́ɛ́ nyíŋ nyaa míɔ̄ŋɔ á mímīm máná é?

²³Á póla mí mam míɓáa, yéé ɛ́ ŋga lēt lí laga: Ma láakɛ́ míɓē mɔ́ɔ, tɔ nɛ́: tɛ́lɛ́ ɔ wɛ́ɛ é?

²⁴Jɔ́ hɔ́ nɛ́, yíán nɛ́ Mɔɔ́n Mut a byɛ́ɛ́ ŋguu nyí li laakɛ lí míɓē á ŋkɔŋ-á-sí» Yésus ɔ lága éɓōg-mut nɛ́: «Tɛ́lɛ́, nyɔ̄ŋ sáŋkálɛ wɔɔ, soóg á yóg yɔ́ɔ.»

²⁵Á ékūyá-kúyá, ɔ tɛ́lɛ́ ɔ́sū váɓá ɔ nyɔ̄ŋ sáŋkálɛ wɛɛ́, ɔ tímān á yóg yɛ́ɛ̄ ag ɓégɛ Ɔlolómɛ̄.

²⁶Ɓot bísɛ bí ɓɛ́ɛ́ váŋ bú nyág la ɓɔ́ bú ɓōtlé li ɓégɛ li Ɔlolómɛ̄; a sí ŋgandag woŋ, bú laga nɛ́: «lɛn nɛ́ ɓaá ɛ́n bínanaŋga bí mam.»

²⁷Ámbúh náŋ, á mípām mí Yésus, ɔ ɛ́n ŋ̀komanɛ-ŋkuh-á-gɔ́mna nyɔ́ bí ŋgá yáŋa nɛ́ Lévi, á tɔ́ɔ̄ á voóm wɛ́ɛ a nsɔ́n. A byɛ́la nyɛ́ nɛ́: «ōŋ ma.»

²⁸La Lévi ɔ yíg mam mɛ́ɛ́ mísɛ, ɔ tɛ́lɛ, ɔ ōŋ nyɛ́.

²⁹Ámbúh náŋ, Lévi ɔ yáŋa Yésus á líndēmá á yóg yɛ́ɛ̄; múŋ á jéŋ lindémá, ɓot bí ɓɛ́ɛ́ bí tɔ́ɔ̄ la ɓɔ́ á téɓeli bí ɓɛ́ɛ́ ja: nlɔŋ á ɓákomanɛ-ŋkuh-á-gɔ́mna la ɓáŋá ɓot ɓatám.

³⁰Elōg-Falísái la ɛɓáɓá ɓáyī-mbéndá bú ɓōtlé li dumlan, la li laga lí ɓayége bí Yésus nɛ́: «Ányúū yéé miní ŋga dí, miníg nyú ki elɔŋ la ɓakomanɛ-ŋkuh-á-gɔ́mna la ɓaɓɔŋ-miɓé é?»

³¹Yésus ɔ nyɔ̄ŋ mpɔ́t aá la ɓɔ́ nɛ́: «Ah ɓot bí lɛ mbólí ɓé nɛ bí byɛ́ɛ̄ kóó ǹtála ndí ɓakɔɔ́kɔ̄n.

³²Māh sɔ́ ɓé ma li yáŋa lí ɓá bí tɛ́ɛ́ sim, ndí ɓaɓɔŋ-miɓé á li ɓɔŋ nɛ́ bí vēŋé bílɛ̄m.»

³³Elōg-Falísái la ɓayí-mbéndá bú laga Yésus nɛ́: «ɓayége bí Yohánɛs la ɓáhá bíg yɔg li tɔɔ lí nzal la li kánɛ, ndí ɓayége ɓɔ́ɔ bíg dí, bíg nyú.»

³⁴Ndí Yésus ɔ tímānɛ̄ ɓɔ́ nɛ́: «Miníg ɔ́ŋɔ nɛ́ miní lɛ́ nɛ́ maná tɔɔyɛ ɓayáŋlɛ á ŋgand aúg nzal, kí sɔ́mbɔ́ ɛ́ tɔ́ɔ̄ elɔŋ la ɓɔ́ é?

³⁵Ndí eceg ɛg kɛ li sɔ́ yé bí ŋga nyɔ̄ŋle ɓɔ́ sɔ́mbɔ́, muŋ á nyúŋ alɔ́ hɔ́, bíg kɛ li tɔɔ lí nzal.»

³⁶Yésus ɔ kánɛ sīg-pɛ ɓɔ́ ví ɔŋgaáŋgan nɛ́: «Mut tɔ wa a ŋgá ɓógtɛ ɓé písīs liɓato á ŋkánág á mbɔ́tí, á li lɔndɔ lí yɔ á nyí ǹdunɛ; kí á ɓɔŋ náŋ, ŋkánág á mbɔ́tí ág lɔɓe, ndí písīs liɓato nyí ŋkánág á mbɔ́tí ki ɛ́h la ɓé li byelɓan á nyí ǹdunɛ.

³⁷Mut tɔ wa a ŋgá ɔlɔ ɓé míkānág mí mílɔg á míndunɛ mí bílōgá, ányúū nɛ mikánág mí mílɔg míg ɓól bíŋ bilógá, milɔg má kómɓán á sí, bibyelé kí byá ɓɔ́lan.

³⁸Jɔ́ hɔ́ nɛ, mikánág mí mílɔg míg kɛ ja á míkānág mí bílōgá.

³⁹Tɔ nzáá a nyú nlom á wáany, a ŋgá ɓɛ́la ɓé pɛ kóó li nyú lí ŋkánág, ányúū nɛ ag laga nɛ́: Nlom á wáany nɛ́ a lɛ́ nláám.»