Read Bakoko Lúkas 7 Bible Online

Lúkas 7 - Bakoko bible

Lúkas 7

¹Ɛnɛ́ Yésus a mánɛ lí kwɛlɛ lí límut, ɔ kɛ́ á tísɔn nyí Kafalnáum.

²Ŋ̀kanʼyɛ nlɔŋ á éɓōgo sónja wa a ɓɛ́ɛ́la m̀ɓɔŋle wɛɛ́ wa nyɔ́ á ŋgí kɔn, ɓɛ́ɓɛ la nyɛmb. A ŋgí diŋ nyɔ́ŋ ŋgandag.

³Ɛnɛ́ a ámblé pɔ́l nyí Yésus, ɔ óm ɓácɛ̄ŋ bí lílōmɛ bí Élōg-Yúda á lí sɔ́hye lí nyɛ́ nɛ́ a sɔ́ li suŋ lí m̀ɓɔŋle wɛɛ́.

⁴Eceg ɓá pám á ŋgwáāg Yésus, bú sɔ́hyé nyɛ ŋgandag, bí byɛ́la nyɛ́ nɛ́: «A kɔ́ɔ́ nɛ́ ɔ ɓɔ́ŋlé nyɛ́ náŋ,

⁵ányúū nɛ a dīŋ ékombo yáhá, Nyɛ́ nɛ́ a óŋ ɓɛ́hɛ ndáá-miɓomán.»

⁶Yésus ɔ kɛ́ elɔŋ la ɓɔ́. Ɛnɛ́ ɓá pám ɓɛ́ɓɛ la nlɛ́ɛ́, ŋ̀kanʼyɛ nlɔŋ á éɓōgo sónja ɔ óm míwāndá mɛ́ɛ́ lí laga lí Yésus nɛ́: «Ɛtáŋɛ, ɔh teeŋgɛ́gɛ́ ɓé nyúū yɔ́ɔ, átɔm nɛ́ mih kɔ́ɔ́ ɓé ma nɛ́ mi lɛ́glé wa á yóg yáma.

⁷Ányúū náŋ, mā-mɛ̄n ma ɔ́ŋɔ́ nɛ́ mih kɔ́ɔ́ ɓé ma li siŋgle ápah ɔ lɛ. Ndí pɔ́t ja eɓaŋgá yá, m̀ɓɔŋle wama ag tɔɔ mbólí;

⁸ányúū nɛ ma, mi lɛ á sí likanʼyɛ, ndí mág mu ɓɛ́la sónja á sí likanʼyɛ jáma. Eceg mi ŋga laga sónja ya nɛ́: ‹Kɛɛ́n!› Ɛg kɛ, kí má lágá nyíŋí etám nɛ: ‹Sɔ́!› Ɛg sɔ́. Mag laga ŋyɔ́ŋ wáma nɛ́: ‹Ɓɔ̄ŋ jé jam!› La wɔ́ wá ɓɔ̄ŋ jɔ.»

⁹Ɛnɛ́ Yésus a ámblé bíŋ biɓaŋgá, nyɔ́ŋ mut ɔ nyɛ́ɛlé nyɛ ŋgandag, ɔ yáan lí légɓe lí límut jé lá ōŋ nyɛ, aá la jɔ́ nɛ́: «Mag laga ɓɛ́nɛ nɛ́, tɔ á Íslāɛl yɔ-mɛ̄n, māh ɛ́n ɓé ma nyí nyaa ŋyéɓé.»

¹⁰Eceg ɓot-bí-ŋgómán ɓá timan á nlɛ́ɛ́, bú kɔ́p nɛ nyɔ́ŋ m̀ɓɔŋle a tɔɔ mbólí.

¹¹Ámbúh náŋ, Yésus ɔ kɛ́ á tísɔn ya bí ŋga yáŋa Náin. Ɓayége ɓɛ́ɛ́ la limut licɛ́ŋ bú byáŋ elɔŋ la nyɛ́.

¹²Ɛnɛ́ Yésus a pám ɓɛ́ɓɛ la mínīŋglé mí nyíŋ tísɔn, ɔ ɛ́n ɓot bíg kɛ́ li je lí m̀bim á pɔmbɛ mɔɔ́n ɔ́wāndá nyí ŋkúh-á-míndīgá. Ɓot ŋgandag bí nyíŋ tísɔn bú kɛ lí yíg lí nyúŋ ŋkúh-á-míndīgá á míje.

¹³Váŋ nɛ́ ŋgɔ́ɔ́ ya byée Nyɔ́ŋ-Ɛsáŋɛ́ eceg a ɛ́n nyúŋ ŋkúh-á-míndīgá, la nyɛ́ ɔ laga wɔ nɛ́: «Ɔh lelég ɓé pɛ.»

¹⁴Yésus ɔ sīŋgle, ɔ síiɓán ŋkúú; ɓot bí ɓɛ́ɛ́ bí ɓɛ́gɛ wɔ́ bú tɛ́lɛ, la nyɛ́ ɔ lága nɛ: «Á ɔ́wāndá, mag pɔ́t, ɔg vɛɛɓe!»

¹⁵Váŋ nɛ́ víŋ ɔwándá ví wúēē vá tɔɔ, ví ɓōtlé lí pɔ́t. Yésus ɔ nyɔ́ŋ nyɛ, ɔ tímānɛ̄ nyɛ nyaŋɛ́.

¹⁶Ɓot bísɛ bí ɓɛ́ɛ́ váŋ bú kɔn woŋ, bú ɓōtlé lí ɓégɛ lí Ɔlolómɛ̄ la li laga nɛ́: «m̀pɔ́tle-a-Ɔlolómɛ̄ ǹcɛ́ŋ wa a pámlé á yóg yāhá, Ɔlolómɛ̄ ki a lɛ́ŋlé lílōm jɛ́ɛ́.»

¹⁷Nyíŋ pɔ́l Yésus yu cáman á Yúdēa yɔ ɛsɛ̄ la á míŋí míkɔŋ mí ŋgwáāg mísɛ.

¹⁸Ɓayége bí Yohánɛs bú kɛ́la pɔ́l míŋ mam mísɛ á yóg ŋ̀yéglɛ waɓá. La nyɛ́ ɔ kwɛ̄l la ɓayége ɓɛ́ɛ́ bíɓáa,

¹⁹ɔ óm ɓɔ li ɛ́n lí Nyɔ́ŋ-Ɛsáŋɛ́ la li ɓat lí nyɛ́ nɛ́: «Wa nɛ́ ɔ lɛ Nyɔ́ a ŋga sɔ́ tɔ nɛ́ ɓá nyɛɛ́ lí laaŋke lí nyɔ́ ntám é?»

²⁰Ɛnɛ́ ɓá pám ɓɛ́ɓɛ la Yésus, bú lága nyɛ nɛ́: «Yohánɛs Ǹtíi-nzoɓan a óm ɓɛ́hɛ nɛ́ bí ɓāt wa nɛ́: ‹Ɓaá, wa nɛ́ ɔ lɛ Nyɔ́ a ŋga sɔ́›, tɔ nɛ́ ɓá nyɛɛ́ lí laaŋke lí nyɔ́ ntám é?»

²¹Á nlemlem á eceg, Yésus ɔ mánɛ ɓot ŋgandag ákɔn. Ɔ mánɛ biɓóg-bí-ɓōt, ɔ pámɛ́ ɓáŋá mímbūl míɓē á nyúū, la nyɛ́ ɔ ɓɔŋ nɛ́ ŋgandag ɓot-bí-ndím bú ɛ́n.

²²Váŋ nɛ́ a pélē ɓot-bí-ŋgómán bí Yohánɛs nɛ́: «Kɛnán, miní lagá nyɛ́ yé maná ɛ́n la yé maná ámble: vɔ́ŋɔ́ɔ, ɓot-bí-ndím bíg ɛ́n, biɓóg-bí-ɓōt bíg wɛɛ, ɓá bí mívɛlɛ bíg tɔɔ mbólí, ɓá bí ndɔ́g bíg ámble, ɓá ɓá wū bíg pahye; bíg lɛgɛ ɓáyɛ̄ɛ̄yɛ́ɛ Pɔ́l M̀ɓɛɛŋ.

²³Jɔ́ nɛ́, misɔ́tá la nyɔ́ a ŋgá kɛ ɓé lí ɓɛ́han á míceglan ányúū joó jáma!»

²⁴Ɛnɛ́ ɓot-bí-ŋgómán bí Yohánɛs ɓá timan, Yésus ɔ ɓōtlé li kwɛlɛ lí ɓot likɔlɓan la nyɔ́ŋ. La nyɛ́ ɔ bíhī ɓɔ nɛ́: «Yéé miní kɛ̄nɛ́ɛ́ lí légɓe á éyāŋ é? Likáá jé ŋgɔá ɛ ŋga pógɛ é?

²⁵Ɓaá, yéé yágá miní ɓɛ́ɛ́ lí légɓe é? Mut nyɔ́ á jáhɛ́ ɓálāām bí mbɔ́tí é? Ɛ́ sē ɓé mbálɛ nɛ́ ɓot bí ŋga jál mbɔ́tí ɛ́ díyɛ, bí ŋga nīŋ átē a abyaŋ, bíg tɔɓene ja á mílɛ̄ɛ̄ mí káísa.

²⁶Jɔ́ hɔ́ nɛ, yéé miní ɓɛ́ɛ́ lí légɓe é? M̀pɔ́tle-a-Ɔlolómɛ̄ é? La mbálɛ a lɛ m̀pɔ́tle-a-Ɔlolómɛ̄, ndí mag yíhɛ ɓɛ́nɛ nɛ́, ag loo yágá ki m̀pɔ́tle-a-Ɔlolómɛ̄.

²⁷Ányúū yɛ́ɛ̄ nɛ yá ciiɓɛ́ nɛ́: ‹Légɓé sig, mag óm ǹlɛgɛ-njɛn wama ɔ́sū vɔ́ɔ á lí ɓoŋhan lí wa nzen.›

²⁸Mag laga ɓɛ́nɛ nɛ́, á ɓot bísɛ ɓá pámléné á líbum lí míndīgá, tɔ wa a lɛ mut ǹcɛ́ŋ ákaa Yohánɛs a sē ɓé. Ndí yíán nɛ́, á Ékombo Ɔlolómɛ̄, mut a lóohán lí ɓɛ́ lí ntɔ́ga wóŋ ag loo Yohánɛs.»

²⁹Ɓot bísɛ bí ɓɛ́ɛ́ bí ŋgí ámble Yohánɛs, nɛ́-tɛ́ɛla ɓakomanɛ-ŋkuh-á-gɔ́mna, bú sɔ́ŋtánɛ́ nɛ Ɔlolómɛ̄ a lɛ mbálɛ. Váŋ nɛ́ mut sig a yéɓé lí kuh lí nzoɓan nyí Yohánɛs.

³⁰Ndí kasig Elōg-Falísái la ɓayí-mbéndá ɓá pún lí kuh li nzoɓan Yohánɛs, náŋ ɛnɛ ɓá pún bítɛ̄ɛ̄yéné bí Ɔlolómɛ̄ a súgɛ ányúū yaɓá.

³¹La Yésus ɔ ɓāt nɛ: «Ɓaá, la nzáá mi ŋga kēt ɓot bí nyí nyɔŋɔn é? Bíg punan la nzáá é?

³²Bíg lɛ́ já ákaa ɓɔɔ́n ɓá bí tɔtɔ́án á ápūū ndí bíg yáŋa ɓáŋá, bíg laga ɓɔ́ nɛ́: Ɓaá ɔ́ŋlé ɓɛ́nɛ ŋgɔmbí, ndí manáh yém ɓé; Ɓaá lɔ́ŋgɛ́ yaá nyɛmb, ndí manáh lee ɓé.

³³Jɔ́ nɛ́, Yohánɛs Ǹtíi-nzoɓan a sɔ́, āh dí ɓé ékɔgá, āh nyú ɓé mílɔg, la ɓɛ́nɛ munú yó nɛ́: ‹M̀mú áh tɛ́ɛ́ ɓé nyɛ!›

³⁴Ɛnɛ́ Mɔɔ́n Mut a sɔ́, ag dí, ag nyú, tɔ náŋ ki miníg yó nɛ́: ‹Léɓyán yé yoóm lidí la milɔg, liwándá lí ɓakomanɛ-ŋkuh-á-gɔ́mna la ɓaɓɔŋ-miɓé.›

³⁵Ndí ɓɔɔ́n bí Peg bísɛ bú tímān lí sɔ́ŋtánɛ nɛ́ Peg ɛ lɛ́ jam li tɛ́ɛ́ sim.»

³⁶Mut a Falísái wa ɔ yáŋá Yésus á li dí elɔŋ la nyɛ́. Yésus ɔ níŋgí á nlɛ́ɛ́ wɛ́ɛ́ la nyɛ́ ɔ tɔ́ɔ̄ á téɓeli.

³⁷Váŋ nɛ́ míndīgá wa a nyíŋ tísɔn a níŋgléé; a ɓɛ́ɛ́ m̀ɓɔŋ-miɓé. Ɛnɛ́ a ámblé nɛ Yésus a lɛ́ lí dí a mbóg nyɔ́ mut a Elōg-Falísái, ɔ sɔ́la epúpúɛ ɛ́ taŋ ndɔ́ŋgí libíndɛ,

³⁸ɔ tɛ́lɛ́ á mbúh Yésus, ag ség la liwú. Ɔ ɓɛ́hán nyɛ á míkoo, la nyɛ́ ɔ sɔ̄pɛ́ mɔ la bíya byɛ́ɛ́. Ámbúh náŋ, ɔ tɔ̄h mɔ la voŋ vɛ́ɛ́, ɔ sɔ́h mɔ, la nyɛ́ ɔ kúúlé mɔ libíndɛ.

³⁹Ɛnɛ́ nyɔ́ mut a Elōg-Falísái a ɛ́n náŋ, ɔ yó la nyɛ́-mɛ̄n nɛ́: «Ki ɓɔŋ nɛ́ nyɔ́ mut a ɓɛ́ɛg kɔɔ la mbálɛ m̀pɔ́tle-a-Ɔlolómɛ̄, kí ag yí nzáá a lɛ nyɔ́ mindígá a ŋga síiɓan nyɛ́, la yéé a lɛ: m̀ɓɔŋ-miɓé.»

⁴⁰Váŋ nɛ́ Yésus a nyɔ́ŋ mpɔ́t a byɛ́la nyɛ́ nɛ́: «A Símɔn, mi byɛ́ɛ́ jam mi ŋga laga wa.» Nyɔ́ŋ aá la nyɛ́ nɛ́: «Pɔ́t á Ŋ̀yéglɛ.»

⁴¹Yésus ɔ lága nyɛ nɛ́: «Mut wa nyɔ́ŋ, a ŋgí ɓat ɓot bíɓáa epíl; nyɔ́ ɔsú biɓógo bítáan bí kápa, nyɔ́ a yáhɛ́ bíɓáa muúmítáan mí kápa.

⁴²Kasig bí ŋgí la ɓé nyɛ li sála, ɔ mwāhléné ɓɔ yéŋ epíl. Wɔɔ́wɔ́ɔ mut á póla ɓɔ́ bíɓáa a ŋga kɛ́ nyɛ́ lí diŋ ŋgandag é?»

⁴³Símɔn ɔ pélē nyɛ́ nɛ́: «Mag ɔ́ŋɔ nɛ́ nyɔ́ mut a mwāhléné épīl ecɛ́ŋ.» Yésus aá la nyɛ́ nɛ́: «Wa dúutɛ́ m̀ɓɛɛŋ.»

⁴⁴Váŋ nɛ́ Yésus a yáan á épah míndīgá, a byɛ́la Símɔn nɛ́: «Wa ɛ́n nyɔ́ mindígá é? Ɛnɛ́ ma níŋgí á yóg yɔ́ɔ, wāh kóm ɓé ma míndīm á míkoo, ndí nyɛ́ a sɔ̄pɛ́ mā míkoo la bíya byɛ́ɛ́, ɔ tɔ̄h kí mɔ́ la voŋ vɛ́ɛ́.

⁴⁵Wāh sɔ́h ɓé ma voóm tɔ wa, ndí nyɛ́, káán ɔ níŋgi lɛn, a lɛ já ma li sɔ́h lí míkoo jɔ́ la jɔ́.

⁴⁶Wāh kóm ɓé ma ŋ̀gɔ́gɔ á nziŋ m̀ɓɛɛŋ á m̀mú, ndí nyɛ́ a kóm ma libíndɛ á míkoo.

⁴⁷Kíyáɓɛ́nɛ, ma lágá hɔ́ wa nɛ́, miɓé mɛ́ɛ́, tɔ má ɓɛ́ láá ŋgandag má kuh elaakɛ; ányúū nɛ a étɛ́ ŋgandag ediŋ. Ndí tɔ nzáá ɓá laakɛ́ puh, ag étɛ puh ediŋ.»

⁴⁸Ámbúh náŋ, Yésus a byɛ́la mindígá nɛ́: «Miɓé mɔ́ɔ má kuh elaakɛ.»

⁴⁹Ɓayáŋlɛ á lídī bú ɓōtlé li ɓatɓan nɛ́: «Nyɔ́ mut a lɛ nzáá a ŋga kɛ́ nɛ́-tɛ́ɛ la á lí laakɛ lí míɓē é?»

⁵⁰Yésus ɔ yó la mindígá nɛ́: «Ŋyéɓé wɔɔ wá tɔ́hɔ́ wa. Kɛnɛ́g la nsaŋ.»