Read Bakoko Lúkas 9 Bible Online

Lúkas 9 - Bakoko bible

Lúkas 9

¹Yésus ɔ kómánɛ̄ jóom jɛ́ɛ́ lí ɓaómɓɛ la bíɓáa, ɔ tíi ɓɔ ŋguu la likanʼyɛ nɛ́ bí dúhū mímbūl míɓē mísɛ, nɛ́ bí tálá ki akɔn.

²Ɔ óm ɓɔ li camanɛ lí pɔ́l Likanʼyɛ lí Ɔlolómɛ̄, la li tɔɔyɛ lí ɓot mbólí.

³Ɔ lága ɓɔ́ nɛ́: «Miníh nyɔŋɔ́g ɓé tɔ jam ányúū duwɛ, ɛ́ ɓɛ́ njéŋ, tɔ mpég, tɔ lidí, tɔ mɔní, tɔ mut ah nyɔŋɔ́g ɓé mbɔ́tí ɛ́ɓáa.

⁴Tɔ yɔɔ́yɔ́ɔ ndáá miní ŋga kɛ́ li níŋgi, tɔɓán átē. Váŋ nɛ́ miní ŋga kɛ́ li ɓógye lí kɛ ɔ́sū.

⁵Kí ɓot ɓáh lɛ́gle ɓé ɓɛ́nɛ ápah miní ŋga pám, á míɓógo máná mí nyíŋ tísɔn, kután líbūlú lí míkoo máná: náŋ nɛ́ a ŋga ɓɛ́ mbóŋ ɛ ŋga kááhɛ ɓɔ́.»

⁶La ɓaómɓɛ bú kɛ, Bí ŋgí wɛɛ á míkɔŋ nyú ámbúh nyúŋú, bíg lɛgɛ Pɔ́l m̀ɓɛɛŋ la li tɔɔyɛ lí ɓot mbólí ɓavoóm bísɛ.

⁷Ɛnɛ́ Élóde ŋ̀kanʼyɛ a Galiléa a ámblé yé ɛ́sɛ ŋgí loo, ɔ nyág, átɔm nɛ́ ɓot ɓá bí ŋgí laga nɛ́, Yohánɛs Ǹtíi-nzoɓan nɛ́ a pāhye;

⁸ɓáŋá ɓɔ́ɔ́ Elías nɛ́ a sɔ́ sīg-pɛ, ɓatám ɓɔ́ɔ́ m̀pɔ́tle-a-Ɔlolómɛ̄ wa nyɔ́ a eceg ɛ́ kwaŋ nɛ́ a pāhye.

⁹Elóde ɔ laga nɛ: «Yohánɛs Ǹtíi-nzoɓan, mā-mɛ̄n nɛ́ ma sɛ́mhánɛ́ nyɛ́ m̀mú. Ndí nyɔ́ hɔ́, nyɛ́ a lɛ nzáá é? Mi ŋga ámble bíg laga mí mam mísɛ likɔlɓan la nyɛ́!» La nyɛ́ ɔ sōmó lí ɛ́n lí Yésus.

¹⁰Á mítiman mí ɓáōmɓɛ, bú máŋlɛ́ Yésus yé ɛ́sɛ ɓá ɓɔŋ. La nyɛ́ ɔ kɛ́la ɓɔ́, bú nɛ́ŋɛ̄ la ɓot, ɓɛɓɛ la tísɔn nyí ɛ ŋga yáŋlɛ nɛ́ Betsaída.

¹¹Ɛnɛ́ ɓot ɓá yí naŋ, bú oŋ nyɛ. Yésus ɔ kālé ɓɔ; ɔ máŋlɛ́ ɓɔ pɔ́l Likanʼyɛ lí Ɔlolómɛ̄, ɔ tálá ɓá bí ŋgí kɔn.

¹²Á ébúg-lóō, Jóom jɛ́ɛ́ la Bíɓáa bú sīŋglé nyɛ ɓɛɓɛ, bú laga nyɛ nɛ́: «soɛ́ ɓá ɓot, bí kɛ á míkɔŋ la á mítān mí mí lɛ́ ɓɛ́ɓɛ la vá, nɛ́ bí sōmó línanténé la lidí, átɔm nɛ́ bi lɛ énɛŋɛ́ vá la mitán.»

¹³Ndí Yésus ɔ tímānɛ̄ ɓɔ nɛ́: «Tíán ɓɔ́ lídī ɓɛ́nɛ-mɛ̄n.» Ɓɔ́g bú lāgá nɛ: «Bi byɛ́ɛ́ ja bíkɔgá bítáan la kɔh ɛ́ɓáa… Amáh nɛ́ ɓaá kɛ ɓɛ́hɛ-mɛ̄n á lí sóm lí lídī ányúū jé limut lísɛ.»

¹⁴Ɓot bí ɓɛ́ɛ́ váŋ jam-kaa akóó á páam átáan. Ɔ lāgá ɓáyēge ɓɛ́ɛ́ nɛ: «Tɔɔyánɛ̄ ɓɔ́ bíti bí muúmítáan muúmítáan mí ɓot.»

¹⁵Bú ɓɔ̄ŋ naŋ, bú tɔ́ɔyɛ́ ɓot bísɛ.

¹⁶Yésus ɔ nyɔ̄ŋ bíŋ bikɔgá bítáan la yíŋ kɔh ɛ́ɓáa, la nyɛ́ ɔ ɓétɛ́ miíh á lóō, ɔ tí Ɔ́lolómɛ̄ mítamlan, ɔ búg byɔ, la nyɛ́ ɔ tí byɔ ɓayége ɓɛ́ɛ́ nɛ́ bí káahánɛ̄ byɔ́ límut.

¹⁷Ɓot bísɛ bú dí, bú yál, bú timan la mibuga mí bítun mí má yáhɛ́ jóom lí bísɛɛ la bíɓáa.

¹⁸Ɔlɔ́ vá, Kasig Yésus a ŋgí kánɛ á mɓagɓanɛ́, ɓayége ɓɛ́ɛ́ bí ɓɛ́ɛ́ elɔŋ la nyɛ́. Váŋ nɛ́ a bíhī ɓɔ́ nɛ́: «Ɓot bíg yó nɛ́ mi lɛ nzáá é?»

¹⁹Bú pélē nyɛ́ nɛ́: «Ɓá bíg laga nɛ́ ɔ lɛ Yohánɛs Ǹtíi-nzoɓan, ɓáŋá ɓɔ́ɔ́ Elías, ányúū ɓáŋá ɓatám, m̀pɔ́tle-a-Ɔlolómɛ̄ wa a kwakwáŋɛ nyɔ́ á pāhye.»

²⁰Ɔ bíhī ɓɔ́ nɛ́: «Ɓɛ́nɛ hɔ́, miníg laga nɛ́ mi lɛ nzáá é?» Pétlos ɔ nyɔŋ mpɔ́t, ɔ pélē nyɛ nɛ́: «Ɔ lɛ Nyɔ́-a-Pɔ́hlɛ la Ɔlolómɛ̄.»

²¹Yésus ɔ ɓéhyɛ́ ɓɔ́, ɔ tíi ɓɔ ndag nɛ́ bí laglág ɓé tɔ mut náŋ.

²²Ɔ lēgléné ɓɔ nɛ́: «Ɛ́g somlɛ nɛ́ Mɔɔ́n Mut a táká ŋgandag, nɛ́ ɓacɛ́ŋ bí lílōmɛ, ɓakanʼyɛ ɓatíi-nsúlé la ɓayí-mbéndá bí táŋɓán nyɛ́; bí ólhánɛ nyɛ́, ndí a páhyé á ɔlɔ́ vá yáhɛ áŋháa.»

²³Ámbúh náŋ, Yésus ɔ laga ɓɔ́ bísɛ nɛ́: «Nyɔ́ la nyɔ́ a ŋga sómo ma lí oŋ, a vólánɛ̄ nyɛ́-mɛ̄n, ndí a ɓɛ́gɛ̄ ja mbásá yɛ́ɛ̄ ɔlɔ́ sig, a óŋ ma.

²⁴Ákaa ɛ́sɛ, tɔ nzáá a ŋga sómo li suŋ lí éniŋ yɛ́ɛ́, ag kɛ yɔ́ lí jáŋɛ. Ndí nyɔ́ a ŋga jáŋɛ eniŋ yɛ́ɛ́ ányúū yama, a kɛ yɔ́ lí tombanɛ.

²⁵Wɔɔ́wɔ́ɔ nsɛ́ŋ mut a byɛ́ɛ̄ li tombanɛ lí ŋkɔŋ-á-sí ásɛ, kíyáɓɛ́nɛ a jáŋɛ́ éniŋ yɛ́ɛ́, tɔ li ɓɔ́lan lí miɓɛɛŋ mɛ́ɛ́ mísɛ é?

²⁶Ányúū nɛ́ nyɔ́ la nyɔ́ a kɔ̄n ɔsɔ́n ányúū yáma la biɓaŋgá byáma, Mɔɔ́n Mut nyɛ́g ag kɛ li kɔn lí ɔ́sɔ̄n ányúū yɛ́ɛ̄ eceg a ŋga kɛ́ li sɔ́ átē á lipém jɛ́ɛ́, jé lí Ɛ́sāŋɛ́ la jé lí áŋgɛl epúán.

²⁷La mbálɛ, mag laga ɓɛ́nɛ nɛ́, jogo lí ɓot vá lí ŋgá kɛ ɓé lí wú jɔ́ ŋgí lí ɛ́n lí Líkanʼyɛ lí Ɔlolómɛ̄.»

²⁸Jam ákaa alɔ́ mwaam ámbúh nyúŋ ŋkwɛl, Yésus ɔ kɛ́ elɔŋ la Pétlos, Yohánɛs la Yákop, bú ɓét á ɔ́kolá vícɛ̄ŋ á míkánɛ.

²⁹Eceg Yésus a ŋgí kánɛ, asú wɛ́ɛ́ wú vēŋ la mbɔ́tí yɛ́ɛ̄ yu púú nɛ pɛ́ŋ ákaa mipúú mí vaŋgá.

³⁰Váŋ nɛ́ a ɓōtlé li kwɛl la ɓot bíɓáa; ɓáŋ ɓot bí ɓɛ́ɛ́ jā Móse la Elías,

³¹ɓá bí pámlénéé átē á la lipém lí Ɔlolómɛ̄. Bí ŋgí kwɛlene nyɛmb Yésus nyí ɛ ŋgí nyɛɛ li yál á Yélūsalɛm.

³²Pétlos la elɔŋ yɛ́ɛ́ bí ŋgí wú ɔ́lɔ̄. Ɛnɛ́ ɓá vɛɛɓe, bú ɛ́n Yésus átē á lipém jɛ́ɛ́, á tɛ́ɛ́ la ɓot bíɓáa.

³³Eceg Móse la Elías bí ŋgí somo li ɓáglan la Yésus, Pétlos ɔ yó nyɛ́ nɛ́: «Etāa, ɛ́ lɛ́ nsɛ́ŋ nɛ́ bi tɔ́ɔ̄ yahá vá. Bí óŋ biláá bíŋháa: yá ányúū yɔ́ɔ, etám ányúū Móse, yéŋé ki ányúū Elías.» Ndí Pétlos a ŋgí yí ɓé jam a ŋgí pɔ́t.

³⁴Kasig a ɓɛ́ɛ́ a ŋgí pɔ́tɔg náŋ, mbaga yu sūh, yu bútyɛ́ ɓɔ; la ɓayége bú kɔn woŋ eceg mbaga ɛ ŋgí díí ɓɔ́.

³⁵Váŋ nɛ́ cíŋ ya pámléné muŋ á nyíŋ mbaga, yu yó nɛ: «Nyɔ́ nɛ́ a lɛ̄ Mɔ́ɔ̄n wama, nyɔ́ ma pɔ́hɔ, miní óglé nyɛ́!»

³⁶Eceg nyíŋ cíŋ ɛ ŋgí pɔ́t, Yésus a ɓɛ́ɛ́ ja ɔ yéglé nyɛ́-ntámɛ́. Ɓayége bú tɔɔ nɛ pií, múŋ á nyúŋ alɔ́, ɓáh máŋlɛ ɓé mut tɔ wa yéé ɓá ɛ́n.

³⁷Á ɔlɔ́ ví ŋga óŋ víŋ, eceg Yésus la ɓayége ɓɛ́ɛ́ ɓá suh ɔ́kolá, m̀ɓáláŋ á límut wú sɔ́ lí ɓoman la nyɛ́.

³⁸Váŋ nɛ́ mut wa a tɛ́ɛ́ nlón átē á limut nɛ́: «Á Ŋ̀yéglɛ, ma sɔ́hyé wa, légɓé mɔɔ́n wama ányúū nɛ a lɛ́ ma pɔmbɛ.

³⁹Á bíceg, m̀búl m̀ɓé ág yaanɛ nyɛ́ ejeseŋge; a ɓōtlé lí lón ŋgele ya. Ág kóndɛ nyɛ́ la li pámhánɛ lí nyɛ livúh á ányu, ag mwahɛ já nyɛ́ la ndutu ecɛ́ŋ, wá tɔmbɛ́ nyɛ́ nɛ́ yɔkɔy.

⁴⁰Ma sɔ́hyé ɓayége ɓɔ́ɔ nɛ́ bí dúhū wɔ́, ndí ɓáh la ɓé.»

⁴¹La Yésus ɔ nyɔ̄ŋ mpɔ́t, ɔ lága nɛ: «Á nyɔŋɔn ŋgíla ŋyéɓé la miɔ́ŋɔ miɓé nyí! Tɛɛla ǹjén mi ŋga ɓɛ́ ɓɛ́ɓɛ la ɓɛ́nɛ ndí la li ɔ́hánɛ lí ɓɛ́nɛ é? Sɔ́ la mɔɔ́n wɔɔ vá.»

⁴²Mɔɔ́n nyɛ́ la li pám ɔ́sū ví Yésus, m̀búl m̀ɓé wú léé nyɛ á sí, wú pógɛ́ nyɛ nɛ́-tɛ́ɛ ɔ kónd. La Yésus ɔ kímɛ́ nyúŋ m̀búl m̀ɓé, mɔɔ́n ɔ tɔ́ɔ̄ mbólí la nyɛ́ ɔ tímānɛ nyɛ ɛsáŋɛ́.

⁴³Ɓot bísɛ bí ɓɛ́ɛ́ váŋ bú nyág la Ŋguu ecɛ́ŋ Ɔlolómɛ̄. Kasig yéé ɓot bísɛ bí ɓɛ́ɛ́ bí ŋgí mɛmɛ Yésus ányúū mam mísɛ a ŋgí ɓɔŋ, ɔ laga ɓayége ɓɛ́ɛ́ nɛ:

⁴⁴«Miní ámblé jam mi ŋga somo ɓɛ́nɛ li laga m̀ɓɛɛŋ: Mɔɔ́n Mut ag kɛ li nuŋlɛ á mɔ mí ɓot.»

⁴⁵Ndí ɓɔ́ bí ŋgí ámblé ɓé bíŋ biɓaŋgá; ŋgɔpɔ yɛ́ɛ̄ yu sɔ́lɔ̄ ɓɔ, á lí ɓɔŋ nɛ́ bíh sɔ́ŋtánɛ́gɛ́ ɓé yé a ŋgí máŋlɛ ɓɔ́; ɓɔ́g bú kɔn woŋ li bihi lí nyɛ likɔlɓan lá jéŋ litɔt.

⁴⁶Mbihi ya yu sɔ́ ɓayége á míɔ̄ŋɔ á li yí lí nzáá á póla yaɓá a lɛ mut ǹcɛ́ŋ.

⁴⁷Kasig Yésus a sɔ́ŋtánɛɛ mbihi bí ŋgí ɓatɓan, ɔ nyɔ́ŋ mɔɔ́n ntɔ́ga, ɔ tɛ́ɛ́yɛ́ nyɛ á ŋgwáāg yɛ́ɛ̄,

⁴⁸a byɛ́la ɓɔ́ nɛ́: «Tɔ nzáá a lɛ́glé nyɔ́ mɔɔ́n á jóō jáma, a lɛ́glé ma; tɔ nzáá ki a ŋga lɛ́gle ma, a lɛ́glé nyɔ́ a óm ma. Átɔm nɛ́ nyɔ́ a lóohán lí ɓɛ́ lí ntɔ́ga á póla yaná ɓɛ́nɛ bísɛ, nyɛ́ nɛ́ a lɛ mut ǹcɛ́ŋ.»

⁴⁹Ɛnɛ́ Yohánɛs a nyɔ́ŋ mpɔ́t, ɔ laga Yésus nɛ́: «Á ŋ̀yéglɛ, ɓa ɛ́n mut nyɔ́ a ŋga dúhu mimbúl míɓē á jóō jɔ́ɔ, la ɓɛ́hɛ bu sómo nyɛ́ li suŋɛ náŋ, ányúū nɛ a sē ɓé elɔŋ la ɓɛ́hɛ.»

⁵⁰Ndí Yésus ɔ tímānɛ̄ nyɛ nɛ́: «Miníh suŋhɛ́gɛ́ ɓé nyɛ, átɔm nɛ́ nyɔ́ a ŋgá tɛ́ŋgánɛ ɓé ɓɛ́nɛ a lɛ lā ɓɛ́nɛ.»

⁵¹Kasig eceg li nyɔŋɓɛ lí Yésus a lóō ɛ́ ɓɛ́ɛ́ ɓɛ́ɓɛ, ɔ nyɔ́ŋ mísɛ́mɛg lí kɛ á Yélūsalɛm.

⁵²Ɔ dúgɛ́ ɓálɛgɛ minjɛn ɓɛ́ɛ́ ɔ́sū. La ɓɔ́ bú nyɔŋ nzen, bú níŋgí á ŋkɔŋ wa á Samália, á lí ɓoŋhan lí mísɔ̄ mɛ́ɛ́.

⁵³Ndí ɓot bí nyúŋ ŋkɔŋ bú pún nyɛ li kale, átɔm nɛ́ a ŋgí kɛ á Yélūsalɛm.

⁵⁴Ɛnɛ́ Yákop la Yohánɛs, ɓayége ɓɛ́ɛ́ ɓá ɛ́n naŋ, bú yó nyɛ nɛ́: «Ɛtáŋɛ, ɔ sē ɓé nɛ ɔ yéɓé nɛ bi ɓāt nɛ́ nzáan ɛ ɓógó á lóō, ɛ súh ɛ dígɛ́ ɓɔ́ é?»

⁵⁵Ndí Yésus ɔ yáan, ɔ nyáálé ɓɔ.

⁵⁶La ɓɔ́ bú loo li kɛ á ŋkɔŋ ntám.

⁵⁷Múŋ ápah bí ɓɛ́ɛ́ á nzen, mut wa a byɛ́la Yésus nɛ́: «Mag oŋ wa tɔ véé ɔ ŋgɔ kɛ̄.»

⁵⁸Yésus ɔ tímānɛ̄ nyɛ nɛ́: «Mbaŋga ɛ́ byɛ́ɛ bivóg, anɔn á byɛ́ɛ́ mumbú, ndí Mɔɔ́n Mut nyɛ́, ah byɛ́ɛ́ ɓé línanténé.»

⁵⁹A byɛ́la nyɔ́ŋɔ́ ntám nɛ: «Ōŋ ma.» La nyɔ́ŋ mut ɔ tímānɛ̄ nɛ: «sóon mwahɛ́ yágá ma mi kɛ́ mi jé etāa.»

⁶⁰Ndí Yésus aá la nyɛ́ nɛ́: «Mwahɛ́ mimbim mí jé mimbim máɓá, ndí wa, kɛɛ́n lɛ̄gɛ́ pɔ́l Likanʼyɛ lí Ɔ́lolómɛ̄.»

⁶¹Mut ntám sīg-pɛ ɔ lága nyɛ́ nɛ́: «Mág mag oŋ wa Ɛtáŋɛ, ndí sóon mwahɛ́ yágá ma mi kɛ́ mi nāŋgánɛ ndog yama.»

⁶²La Yésus ɔ lága nyɛ́ nɛ́: «Nyɔ́ la nyɔ́ a ŋga sál la eɓag, ndí a légɓé mbúh, ah kɔ́ɔ́ ɓé la Ekombo Ɔ́lolómɛ̄.»