Read Bakoko Yohánɛs 10 Bible Online

Yohánɛs 10 - Bakoko bible

Yohánɛs 10

¹Yésus ɔ nyɔ̄ŋ mpɔ́t a byɛ́ nɛ́: «La mbálɛ-mbálɛ, ma laga ɓɛ́nɛ nɛ́, tɔ nzáá a ŋgá níŋgléne ɓé á ányu-á-mɓɛ́l á kɔ́tá nyí mítōmbɛ́, ndí á ándlán voóm ntám á lí níŋgi, nyɔ́ŋ mut a lɛ mut a wií, ɔ ɓɛ́ ki ntɔnɓa.

²Ndí mut a ŋga níŋgléne á ányu-á-mɓɛ́l, nyɛ́ nɛ́ a lɛ ǹtát líɓembá lí mítōmbɛ́.

³Ǹtát líkooká ag lege ǹtát líɓembá ányu-á-mɓɛ́l; mítōmbɛ́ mɛ́ɛ́ míg ámble cíŋ yɛ́ɛ̄, ag yáŋa wá sig á jóō jɛ́ɛ́, la nyɛ́ a pámɛ mɔ́ á ápūū.

⁴Eceg a pámɛ mɔ́ mísɛ á ápūū, ag tɛ́lɛ mɔ́ ɔ́sū, la mɔ́ má ōŋ nyɛ́, ányúū nɛ míg lem cíŋ yɛ́ɛ̄.

⁵M̀ɓá-mɓá, mí ŋgá oŋ ɓé ǹcɛn-a-mut, li loo náŋ, míg nāŋga nyɛ́ m̀bíí ányúū nɛ́ mí ŋgá lem ɓé cíŋ yí ɓácɛn-bí-ɓot.»

⁶Yésus ɔ kánɛ ɓɔ víŋ ɔŋgaáŋgan, ndí bíh sɔ́ŋtánɛɛ ɓé yé a ŋgí laga ɓɔ́.

⁷Ɔ nyɔ̄ŋ sīg-pɛ mpɔ́t aá la ɓɔ́ nɛ: «La mbálɛ-mbálɛ, ma laga ɓɛ́nɛ nɛ́, ma nɛ́ mi lɛ likooká lí kɔ́tá mitómbɛ́.

⁸Ɓáŋ bísɛ bí sɔ́ɔ́ ɔ́sū vama bí lɛ ɓot bí wíī la mitɔnɓa, ányúū náŋ nɛ́ mítōmbɛ́ máh ógle ɓé ɓɔ.

⁹Ma nɛ́ mí lɛ ányu-á-mɓɛ́l; tɔ nzáá a ŋga lóole la ma á li níŋgi, ag kɛ li suŋɓɛ; ag ɓɛ́ ag níŋgi ag pám, ag kuh jam lí lidí.

¹⁰Mut-a-wií ag sɔ́ ja nɛ́ a yíi, a ól, a cɛ́hɛ́ɛ. Ndí má, ma sɔ́ á lí ɓɔŋ nɛ́ ɓot bí ɓɛ́la eniŋ, bí ɓɛ́la yɔ́ ŋyoganɛ́.»

¹¹Yésus ɔ kóndyé sīg-pɛ nɛ́: «Ma nɛ́ mí lɛ taŋ ǹtát líɓembá. Taŋ ǹtát líɓembá ɛ́g tíi eniŋ yɛ́ɛ́ ányúū mitómbɛ́ mɛ́ɛ́.

¹²Ǹtát nyɔ́ bí ŋga sála, a sē ɓé taŋ ǹtát líɓembá, ányúū nɛ mitómbɛ́ mí sē ɓé ɛ́mɛ̄ɛ̄. Kí a ɛ́n nzɛ ɛg sɔ́, ag cóó mítōmbɛ́, a nāŋgá m̀bíí. La nzɛ ɛ ɓōtlé lí oŋ lí mitómbɛ́, má cámān.

¹³Ǹtát nyɔ́ bí ŋga sála, ag ɓɔŋ náŋ ányúū nɛ ah byɛ́ɛ́ ɓé ékɔ̄ɔ̄ yé mítōmbɛ́.

¹⁴Ma nɛ́ mí lɛ́ taŋ ǹtát líɓembá, mag yí mitómbɛ́ máma, mitómbɛ́ máma ki míg yí ma;

¹⁵nlemlem kaa Etāa a ŋga yí ma, náŋ nɛ́ mág mi ŋga yí Etāa, mag tíi eniŋ yáma ányúū mitómbɛ́.

¹⁶Mi byɛ́ɛ́ mitómbɛ́ mítām mí mí sē ɓé a nyí kɔ́tá, mɔ́g ma nyɛ́ɛ mɔ́ li sɔ́la, míg kɛ li ámble lí cíŋ yáma. La náŋ, liɓembá líg kɛ li ɓɛ́ lí já, ǹtát ki a ɓɛ́ wa.

¹⁷Etāa ag diŋ ma ányúū nɛ mag tíi eniŋ yáma, nɛ́ ndí mi nyɔ́ŋ yɔ́ ámbúh eceg.

¹⁸Mut tɔ wa a ŋgá nyɔŋle ɓé ma yɔ́, ndí mag tíi yɔ́ la mā-mɛ̄n. Mi byɛ́ɛ́ ŋguu li tíi lí éniŋ yáma, la ŋguu li timan lí li nyɔŋ lí yɔ, nyíŋ ndagle nɛ́ Etāa a tí ma.»

¹⁹Bíŋ biɓaŋgá bú kóndyé sīg-pɛ m̀ɓáglanɛ́ á póla ɓɔɔ́n bí Élōg-Yúda.

²⁰Ŋgandag ɓot á póla yaɓá ɛ́ ŋgí laga nɛ́: «A byɛ́ɛ́ m̀búl m̀ɓé, m̀mú áh tɛ́ɛ́ ɓé nyɛ, ányúū yéé miní ŋga ámble nyɛ́ é?»

²¹Ndí ɓáŋá ɓatám bí ŋgí laga nɛ́: «Ah biɓaŋgá bí mut a byɛ́ɛ̄ m̀búl m̀ɓé ɓé bíŋ; ɓaá, m̀búl m̀ɓé ág la li ɓɔŋ nɛ́ mut-a-ndím a ɛ́nán é?»

²²Náŋ a ɓɛ́ɛ́ á eceg ásíí, eceg bí ŋgí lōɛ́ ŋgand nyí ndómbo ndáá-ēcɛ́ŋ-Ɔlolómɛ̄ á Yélūsalɛm.

²³Múŋ á yáli ɛ́ ndáá-ēcɛ́ŋ-Ɔlolómɛ̄, Yésus a ŋgí ɓét ag súh á líɓɛpɛ́ lí ŋga yáŋlɛ nɛ́ liɓɛpɛ́ lí Salómo.

²⁴Váŋ nɛ́ ɓákanʼyɛ bí Élōg-Yúda ɓá díí nyɛ, la ɓɔ́ bú bíhī nyɛ nɛ́: «Ányúū yéé tɛɛla nyí vɔ́ŋɔ́ɔ ɔ ŋgɔ́ nándlene ɓé ɓɛ́hɛ mam é? Lagá ɓɛ́hɛ á ntélélé kíyáɓɛ́nɛ wa nɛ́ ɔ lɛ Nyɔ́-a-Pɔ́hlɛ!»

²⁵Yésus ɔ pélē ɓɔ nɛ́: «Ma lagá ɓɛ́nɛ náŋ, ndí miní ŋgá yéɓe ɓé. Misɔ́n mi ŋga ɓɔ̄ŋ á jóō lí Etāa míg tíi mbóŋ yáma.

²⁶Ndí tɔ la náŋ miní ŋgá yéɓe ɓé la ma, ányúū nɛ Miní sē ɓé mítōmbɛ́ mí líɓembá jáma.

²⁷Mitómbɛ́ mí líɓembá jáma míg ámble cíŋ yáma, mag yí mɔ́, mɔ́g míg oŋ ma.

²⁸Jɔ́ nɛ́, mag tíi mɔ́ éniŋ éɓem; m̀ɓá-mɓá mí ŋgá kɛ ɓé li jáŋ, mut tɔ wa ki a ŋgá kɛ́ ɓé mɔ li la lí lí ɓógtɛ á mɔ máma.

²⁹Etāa nyɔ́ a tí ma mɔ́, a káhɛ á lóō lí mam mísɛ. Mut tɔ wa a byɛ́ɛ́ ɓé ŋguu li kɛ́tɛ lí jam a wɔ á Etāa.

³⁰Ma la Etāa bi lɛ mut wa.»

³¹Ɓɔɔ́n bí Élōg-Yúda, bú kɔt sīg-pɛ ŋgɔg á lí ól Yésus.

³²Ndí, nyɛ́ ɔ lága ɓɔ́ nɛ́: «Ma étɛ́ ɓɛ́nɛ misɔ́n mílāām má sɔ́lé la Etāa; ányúū wɔɔ́wɔ́ɔ hɔ́ miní ŋga sómo ma lí ól la ŋgɔg é?»

³³Bú pélē nyɛ nɛ́: «Ah ányúū nsɔ́n nláám ɓé nɛ bi ŋga sómo wa lí ól la ŋgɔg, ndí ányúū nɛ ɔg vɔ́ɔ́le Ɔlolómɛ̄, kasig wā mut-a-binam ɔ ŋgɔ nyɔ̄ŋ etɛ́l yé Ɔlolómɛ̄.»

³⁴Yésus ɔ pélē ɓɔ nɛ́: «Ɔlolómɛ̄ a pɔ́t nɛ́: ‹Ma Ɔlolómɛ̄ mag laga nɛ́: miní lɛ́ míloó!› Ɓaá, yáh ciiɓɛ́ ɓé náŋ á kálati yaná mbéndá é?

³⁵Ɓáŋ ɓot Ɔlolómɛ̄ a ŋga yáŋa miloó á kálati mbéndá bi lɛ́ ɓot eɓaŋgá yɛ́ɛ́ ɛ́ ŋga légɓe tóɓó-tóɓó. La náŋ mut tɔ wa a ŋgá la ɓé lí veŋe lí yé Lícii-Lipúán lí ŋga lága.

³⁶Mā mut Etāa a pɔ́hɔ, ɔ óm á ŋkɔŋ-á-sí, ma nɛ́ miní ŋga laga nɛ́: ‹Ɔg vɔ́ɔ́le Ɔlolómɛ̄› ányúū nɛ́ ma lága nɛ́: ‹Mi lɛ Mɔɔ́n Ɔlolómɛ̄› é?

³⁷Miníh yéɓyág ɓé la ma, kíyáɓɛ́nɛ mi ŋgá ɓɔŋ ɓé ma misɔ́n mí Etāa!

³⁸Ndí, kíyáɓɛ́nɛ mɔ́ nɛ́ mi ŋga ɓɔ̄ŋ, tɔ manáh yéɓe ɓé la ma, yéɓyán ányúū míŋ misɔ́n, á li ɓɔŋ nɛ́ miní yí, miní sɔ́ŋtánɛ ki nɛ́ Etāa a lɛ até wama, mág mu ɓɛ́ até a Etāa.»

³⁹Váŋ hɔ́ nɛ, ɓá somo sīg-pɛ nyɛ́ lí byee, ndí Yésus ɔ pálán ɓɔ á mɔ.

⁴⁰La nyɛ́ ɔ yáɓē á nyúŋú mií á lɔm lí Yɔ́ldan, ɔ tɔɔ wóŋ ápah Yohánɛs a ɓōtlénéé lí tíi lí nzoɓan.

⁴¹Ɓot ŋgandag bú ōŋ nyɛ wóŋ bíg laga nɛ́: «Ɔɔ, Yohánɛs ah ɓɔŋ ɓé énanaŋga ɛ́ jam tɔ yá, ndí yé ɛ́sɛ a lága líkɔlɓan la nyɔ́ mut ɛ́ lɛ́ mbálɛ.»

⁴²Wóŋ á nyɔ́ŋ voóm, ɓot ŋgandag bú yéɓé la Yésus.