Read Bakoko Yohánɛs 13 Bible Online

Yohánɛs 13 - Bakoko bible

Yohánɛs 13

¹Á nlááhɛ a ŋgand Páska nyí Elōg-Yúda, Yésus a ŋgí yí nɛ́ ŋgɛ́ŋ yɛ́ɛ̄ li ɓógo á nyú ŋkɔŋ-á-sí li kɛ á yóg Ɛsáŋɛ́ ya kɔlan. Kasig a diŋíí ndog yɛ́ɛ̄ ɛ lɛ á ŋkɔŋ-á-sí, ɔ dīŋ yɔ li loo lí ɔ́vega.

²Á eceg bí ŋgí dí, ǹsɔhɔ ɔ níŋgɛ́ Yúdas Iskáliot mɔɔ́n Símɔn, miɔ́ŋɔ miɓé á m̀mím nɛ́ a núŋú Yésus.

³Ndí Yésus a yíí nɛ́ Ɛsáŋɛ́ a tíéé nyɛ́ mam mísɛ, la nɛ́ a sɔ́léné á yóg Ɔlolómɛ̄, wóŋ ki nɛ́ a ŋga kɛ́ li timan.

⁴Váŋ nɛ́ a ɓógo á téɓeli ápah bí ŋgí dí, ɔ ɓógtɛ́ étun-ɛ́-lóō yɛ́ɛ́, ɔ nyɔ̄ŋ líɓato, ɔ tīŋɓán jɔ̄ á ŋkuɓá.

⁵Ámbúh náŋ, ɔ vá mindím á páan, ɔ ɓōtlé lí so lí míkoo mí ɓáyēge ɓɛ́ɛ́ la li tɔh lí mɔ la liɓato jé a tiŋɓáán á ŋkuɓá.

⁶Ɛnɛ́ eceg lí so lí Símɔn-Pétlos mikoo yá kɔlan, ɔ lága Yésus nɛ́: «Ɛtáŋɛ, wa nɛ́ ɔ ŋgɔ só ma míkoo é?»

⁷Yésus ɔ pélē nyɛ nɛ́: «Yé mi lɛ lí ɓɔŋ, ɔ ŋgɔ́ la ɓé yɔ li sɔ́ŋtánɛ nyí vɔ́ŋɔ́ɔ, ndí ámbúh puh eceg nɛ́ ɔ ŋgɔ kɛ́ yɔ́ li sɔ́ŋtánɛ.»

⁸Pétlos aá la nyɛ́ nɛ́: «M̀ɓá! Ɔ ŋgɔ́ so ɓé ma míkoo!» Yésus ɔ pélē nyɛ nɛ́: «Kíyáɓɛ́nɛ máh so ɓé ma wa míkoo, ɔ ŋgɔ ɓɛ́la ɓé yoóm yáma tɔ yá.»

⁹Símɔn-Pétlos aá la nyɛ́ nɛ́: «Ɛtáŋɛ, kíyáɓɛ́nɛ náŋ hɔ́, ah mikoo mɔ́-ntámɛ́ ɓé, ndí mɔ la m̀mú ki!»

¹⁰Yésus ɔ pélē nyɛ nɛ́: «Nyɔ́ la nyɔ́ a sóɓan ah byɛ́ɛ́ ɓé pɛ kóó la misoɓan, átɔm nɛ́ nyɛ́ asɛ̄ a lɛ mipúú. Ɓɛ́nɛ miní lɛ̄ mipúú, ndí ah ɓɛ́nɛ bísɛ ɓé.»

¹¹Á mbálɛ, Yésus a ŋgí yí nzáá a ŋga kɛ́ nyɛ́ lí nuŋu. Ányúū náŋ nɛ́ a yó nɛ: «Ah ɓɛ́nɛ bísɛ ɓé nɛ miní lɛ́ mipúú.»

¹²Ɛnɛ́ a manhɛ́ɛ ɓɔ́ lí so lí míkoo, ɔ jál sīg-pɛ etun-ɛ́-lóō yɛ́ɛ́. Ɔ tɔ́ɔ̄ á téɓeli, aá la ɓɔ́ nɛ́: «Ɓaá miníg sɔ́ŋtánɛ yé ma sɔ́lé ɓɛ́nɛ li ɓɔŋ é?

¹³Miníg yáŋa ma nɛ́ Ŋ̀yéglɛ la Ɛtáŋɛ, miníg yí mā lí yáŋa náŋ, kɔɔ la mbálɛ, mi lɛ nyɛ́.

¹⁴Nyí vɔ́ŋɔ́ɔ, kíyáɓɛ́nɛ ma Ɛtáŋɛ la Ŋ̀yéglɛ waná ma só ɓɛ́nɛ mikoo, ɓɛ́nɛ la ɓɛ́nɛ maná nyɛ́ɛ lí soan lí míkoo máná.

¹⁵Ɔvega víŋ ma tí ɓɛ́nɛ, ɓɛ́nɛ ki, kɛnán miní ɓɔŋ nlemlem á jam.

¹⁶La mbálɛ-mbálɛ, mag laga ɓɛ́nɛ nɛ́, m̀ɓɔŋle a ŋgá loo ɓé ŋ̀kanʼyɛ wɛɛ́, tɔ ŋ̀ómɓɛ ki a ŋgá loo ɓé mut a óm nyɛ́.

¹⁷Ákaa maná yí náŋ, miníg kɛ li ɓɛ́ lí misɔ́tá kíyáɓɛ́nɛ maná yáhɛ́ náŋ.

¹⁸Mi ŋgá pɔ́t ɓé ma náŋ ányúū ɓɛ́nɛ bísɛ, mag yí ɓá ma pɔ́hɔ. Ndí ɛ́g somlɛ nɛ́ Licii-Lipúán lí yáal, jé lí ŋga lága nɛ́: ‹Mut ma la nyɛ́ ɓaá díélán ekɔgá, a yáan ǹlem wama›.

¹⁹Nyí vɔ́ŋɔ́ɔ, mag laga ɓɛ́nɛ míŋ mam sɔ́kágánɛ́ míg ɓɔŋɓɛ, á lí somo nɛ́ eceg náŋ a ŋga kɛ́ li ɓɔŋɓɛ, miní yéɓé nɛ́ Mi Lɛ.

²⁰La mbálɛ-mbálɛ, mag laga ɓɛ́nɛ nɛ́, tɔ nzáá a ŋga lɛ́gle nyɔ́ mi ŋga kɛ li óm, ɛnɛ mā-mɛn nɛ́ a lɛ́gle. Tɔ nzáá ki a lɛ́gle ma, ɛnɛ a lɛ́glé nyɔ́ a óm ma.»

²¹Ɛnɛ́ Yésus a mánɛ lí pɔ́t, m̀mím wɛ́ɛ́ wú tūŋglan, ɔ páhá nɛ: «La mbálɛ-mbálɛ, mag laga ɓɛ́nɛ nɛ́, mut wa á póla yaná ag kɛ ma lí nuŋu.»

²²Ɓayége bú léɓyán ɓɔ́ la ɓɔ́, bú ɓatán nɛ: «Ɓaá ag pɔ́tle nzáá é?»

²³Ŋ̀yége wa, nyɔ́ Yésus a ŋgí diŋ, a ɓɛ́ɛ́ á tɔɔ nyɛ́ á ŋgwáāg.

²⁴Símɔn-Pétlos ɔ nīg nyɛ nɛ́ a ɓāt Yésus nzáá a ŋga pɔ́tle.

²⁵Váŋ nɛ́ nyɔ́ŋ ŋ̀yége a ɛ́ŋʼyɛ́ m̀mú wɛ́ɛ́ á tól Yésus, ɔ sɔ̄glánɛ̄ nyɛ nɛ́: «Ɛtáŋɛ, nzáá nyɔ́ŋ é?»

²⁶Yésus ɔ pélē nyɛ nɛ́: «A lɛ mut mi ŋga kɛ́ li tíi lí puh ekɔgá mí ŋga yóo á ésōā.» La Yésus a nyɔ̄ŋ hɔ́ puh ekɔgá, ɔ yóo yɔ́ á ésōā, ɔ tí yɔ Yúdas Iskáliot, mɔɔ́n Símɔn.

²⁷Eceg Yúdas a ŋgí nyɔŋ nyíŋ puh ekɔgá, Sátan ɔ níŋgí nyɛ á m̀mím; la Yésus ɔ lága nyɛ nɛ́: «Yé ɔ byɛ́ɛ́ á lí ɓɔŋ, ɓɔŋ yɔ́ ékūyá!»

²⁸Mut tɔ wa á ɓáŋ bí ɓɛ́ɛ́ váŋ, āh sɔ́ŋtánɛ ɓé ányúū yéé Yésus a lága nyɛ náŋ.

²⁹Kasig Yúdas nɛ́ a ɓɛ́ɛ́ ǹnaŋɛ-ŋkuh, jogo lí ɓáyēge lú ɔ́ŋɔ nɛ Yésus a óm nyɛ li sóm lí yé ɛ́ ŋga sōmlɛ ányúū ŋgand; tɔ nɛ́ lí tíi lí ɓáyɛ̄ɛ̄yɛ́ɛ byoóm.

³⁰Ɛnɛ́ Yúdas a dí ékɔgá ɔ pám ékūyá-kúyá. Náŋ a ɓɔ̄ŋɓɛ́ɛ la díɓe.

³¹Ɛnɛ́ Yúdas a pám, Yésus ɔ pɔ́t nɛ: «Nyí vɔ́ŋɔ́ɔ, Mɔɔ́n Mut a kūh lípēm, Ɔlolómɛ̄ ki a kūh jɔ li kele la nyɛ́.

³²Ɔlolómɛ̄ nyɛ́-mɛ̄n ag kɛ li étɛ lí lípēm lí Mɔɔ́n, ag kɛ jɔ́ lí étɛ puh eceg.

³³Á ɓɔ́ɔ̄n ɓáma, mi ŋgí tɔ́ɔ̄ jā la ɓɛ́nɛ ányúū puh eceg. Miníg kɛ ma lí somo, ndí kaa ma lága ɓɔ́ɔ̄n bí Élōg-Yúda, ápah mi ŋga kɛ̄, miní ŋgá la ɓé lí pám wóŋ; ɓɛ́nɛ ki mag laga ɓɛ́nɛ nlemlem á jam vɔ́ŋɔ́ɔ.

³⁴Mag tíi ɓɛ́nɛ litiŋ lí péná jé lí mbéndá: miní diŋán ɓɛ́nɛ la ɓɛ́nɛ; nlemlem kaa ma dīŋ ɓɛ́nɛ, ɓɛ́nɛ ki miní diŋán ɓɛ́nɛ la ɓɛ́nɛ.

³⁵Eceg ediŋ ɛ́ lɛ á póla yaná, ɓot bísɛ bíg kɛ li yí nɛ́ miní lɛ ɓáyēge ɓáma.»

³⁶Símɔn-Pétlos ɔ ɓāt nyɛ nɛ́: «Ɛtáŋɛ, ɔg kɛ véé é?» Yésus ɔ pélē nyɛ nɛ́: «Ápah mi ŋga kɛ́, ɔ ŋgɔ́ la ɓé ma lí oŋ nyí vɔ́ŋɔ́ɔ, ndí ámbúh eceg, ɔg kɛ ma lí oŋ.»

³⁷Pétlos ɔ ɓāt sīg-pɛ nyɛ́ nɛ́: «Ɛtáŋɛ, ányúū yéé mi ŋgá la ɓé wa lí oŋ nyí vɔ́ŋɔ́ɔ é? Mag la li tíi lí éniŋ yáma ányúū yɔ́ɔ!»

³⁸Yésus ɔ lága nyɛ nɛ́: «Ɓaá, ɔg la li tíi lí éniŋ yɔ́ɔ ányúū yama é? La mbálɛ-mbálɛ, mag laga wa nɛ́, sɔ́kágánɛ́ nlóm á kúú ag ɔ́ŋ, kí wu táŋɓán ma ŋgele ɛ́ŋháa.»