Read Bakoko Yohánɛs 17 Bible Online

Yohánɛs 17 - Bakoko bible

Yohánɛs 17

¹Ɛnɛ́ Yésus a mánɛ li pɔ́t náŋ, ɔ ɓétɛ́ miíh á lóō, ɔ kánɛ́ nɛ: «Etāa, ŋgɛ́ŋ ya kɔlan, tí Mɔɔ́n wɔ́ɔ lipém, á lí ɓɔŋ nɛ́ Mɔɔ́n wɔ́ɔ nyɛ́g a tí wa lipém.

²Kasig wa tí nyɛ ŋguu á li ɓɛ́ á lóō lí ɓot bísɛ, nyɛ́g ag tíi ɓáŋ bísɛ wa tí nyɛ eniŋ éɓem.

³Á mbálɛ, eniŋ éɓem ɛ́ lɛ́ ja nɛ́ bí yí wa, wa Lōó lí mbálɛ, bí yí ki Yésus Kilístus nyɔ́ wa óm.

⁴Ma tí wa lipém á ŋkɔŋ-á-sí, ma súgɛ́ nsɔ́n wa tí ma.

⁵Nyí vɔ́ŋɔ́ɔ Etāa, ɓɔ̄ŋ nɛ́ mi kuh lipém á ŋgwáāg yɔ́ɔ, jé lipém mi ɓɛ́ɛ́la sɔ́kágánɛ́ ŋkɔŋ-á-sí ág vegɓɛ.

⁶Ma yíhɛ́ jóō jɔ́ɔ ɓot wa nyɔ̄ŋ á ŋkɔŋ-á-sí á lí tíi lí ma, bí ɓɛ́ɛ́ ɛ́ɓɔ́ɔ, wu tí ma ɓɔ́, lá ɓɔ́ bú óglé eɓaŋgá yɔ́ɔ.

⁷Bíg yí nyí vɔ́ŋɔ́ɔ nɛ́ yé ɛ́sɛ mi byɛ́ɛ̄ ɛ́g sɔ́le la wa.

⁸La ki nɛ́ biɓaŋgá ma lága ɓɔ, bí lɛ́ bí wa lága ma; ɓá lɛ́glé byɔ, bú yéɓé kɔɔ la mbálɛ nɛ́, ma pámléné á átē wɔ́ɔ, bú yéɓé ki nɛ́ wa nɛ́ wa óm ma.

⁹Mag kánɛ ányúū yaɓá, mi ŋgá kánɛ ɓé ma ányúū ɓot bí ŋkɔŋ-á-sí, ndí mag kánɛ ányúū ɓot wa tí ma, ányúū nɛ bí lɛ́ ɛ́ɓɔ́ɔ.

¹⁰Kasig yé ɛ́sɛ ɛ lɛ́ ɛ́yáma ɛ́ lɛ́ ɛ́yɔ́ɔ, náŋ ki nɛ́ yé ɛ́sɛ ɛ́ lɛ́ ɛ́yɔ́ɔ ɛ́ lɛ́ ɛ́yáma. Lipém jáma líg ɛ́nyéne á nyúū yāɓá.

¹¹Li ɓotle nyí vɔ́ŋɔ́ɔ, mi sē ɓé pɛ ma á ŋkɔŋ-á-sí, ndí, ɓɔ́ bíg yégle á ŋkɔŋ-á-sí, ányúū nɛ má mag timan á yóg yɔ́ɔ. Etāa nyɔ́ a lɛ Mpúán tát ɓɔ́ á jóō jɔ́ɔ, joó lí lɛ́ nɛ wa tí ma, á lí ɓɔŋ nɛ́ bí ɓɛ́ mut wa, ákaa ma la wa bi lɛ́ mut wa.

¹²Eceg mi ɓɛ́ɛ́ la ɓɔ́, mi ŋgí tát ɓɔ́ á jóō jɔ́ɔ, joó lí lɛ́ nɛ wa tí ma. Mi ŋgí kóóhanɛ ɓɔ́ nɛ́ tɔ wa ah jáŋág ɓé, amáh sig wa, ǹjáŋag-á-mɔ́ɔ̄n, á li ɓɔŋ nɛ́ Licii-Lipúán lí yāl.

¹³Etāa, nyí vɔ́ŋɔ́ɔ, mag timan á yóg yɔ́ɔ. Ma pɔ́t bíŋ biɓaŋgá ányúū ɓayége ɓáma bí lɛ́ á ŋkɔŋ-á-sí á lí ɓɔŋ nɛ́ ɓɔ́g bí ɓɛ́la mivag máma, mí ɓɛ́ micɛ́ŋɛ́ tɔláá.

¹⁴Ma yéglɛ ɓɔ eɓaŋgá yɔ́ɔ, ndí ɓot bí ŋkɔŋ-á-sí ɓá síŋgɛ́ ɓɔ ányúū nɛ́ bí sē ɓé ɓot bí ŋkɔŋ-á-sí, kaa mág mi sē ɓé ma mut a ŋkɔŋ-á-sí

¹⁵Mi ŋgá ɓat ɓé ma wa nɛ́ ɔ ɓógtɛ́ ɓɔ́ á ŋkɔŋ-á-sí, ndí ɔ tát ɓɔ́ nɛ́ bíh kuág ɓé á mɔ mí Ǹlem.

¹⁶Bí sē ɓé ɓot bí ŋkɔŋ-á-sí kaa mág mi sē ɓé ma mut a ŋkɔŋ-á-sí

¹⁷Ɓɔ̄ŋ nɛ́ mbálɛ ɛ púɛ́ ɓɔ́ ányúū nsɔ́n wɔ́ɔ, átɔm nɛ́ eɓaŋgá yɔ́ɔ ɛ́ lɛ́ mbálɛ.

¹⁸Nlemlem kaa wa óm ma á ŋkɔŋ-á-sí, náŋ nɛ́ mág ma óm ɓɔ́ á ŋkɔŋ-á-sí

¹⁹Ányúū yaɓá, ma púɛ́ mā-mɛ̄n ányúū nsɔ́n, nɛ́ ndí ɓɔ́g mbálɛ ɛ púɛ́ ɓɔ́ ányúū nsɔ́n.

²⁰Mi ŋga kánɛ ɓé já ma ányúū yaɓá ɓɔ́-ntámɛ́, ndí mag kánɛ ki ányúū ɓáŋ bísɛ bí ŋga kɛ́ li yéɓe la ma, li kele la biɓaŋgá byáɓá,

²¹nɛ́ ndí ɓɔ́ bísɛ bí ɓɛ́ mut wa kaa ma la wa Etāa, átɔm nɛ́ ɔ lɛ á até wama kaa mág mi lɛ á até wɔ́ɔ. Ɓɔ́g bí ɓɛ́ elɔŋ la ɓɛ́hɛ, á lí ɓɔŋ nɛ́ ɓot bí ŋkɔŋ-á-sí bí yéɓé nɛ́ wa nɛ́ wa óm ma.

²²Lipém wa tí ma, mág ma tí ɓɔ́ jɔ́, nɛ́ bí ɓɛ́ mut wa kaa ma la wa bi lɛ mut wa,

²³nɛ́ mi ɓɛ́ á átē wāɓá, kaa wág ɔ lɛ á átē wama, á lí ɓɔŋ nɛ́ bí ɓɛ́ jā mut wāhwa. Váŋ nɛ́ ɓot bí ŋkɔŋ-á-sí bí ŋga kɛ li yí nɛ́ wa nɛ́ wa óm ma, la ki nɛ́ wa díŋɛ́ ɓɔ kaa wa díŋɛ́ ma.

²⁴Etāa kóó yáma ɛ lɛ nɛ́, ápah mi lɛ, ɓot wa tí ma ɓɔ́g bí ɓɛ́ váŋ, nɛ́ bí mɛ̄mɛ́ lipém wa tí ma, ányúū nɛ́, wa dúgú ma lí diŋ, sɔ́kágánɛ́ ɔg veg ŋkɔŋ-á-sí

²⁵Etāa nyɔ́ á tɛ́ɛ́ sim, tɔ ákaa ɓot bí ŋkɔŋ-á-sí ɓáh lem ɓé wa, má ma yí wa, ɓɔ́g bú yí nɛ wa nɛ́ wa óm ma.

²⁶Ma yíhɛ́ ɓɔ joó jɔ́ɔ, mag kɛ sīg-pɛ ɓɔ́ jɔ́ lí yíhɛ, nɛ́ ndí bí ɓɛ́la ediŋ wa dīŋ ma, la nɛ́ mág mi ɓɛ́ la ɓɔ́.»