Read Bakoko Yohánɛs 18 Bible Online

Yohánɛs 18 - Bakoko bible

Yohánɛs 18

¹Ɛnɛ́ Yésus a mánɛ li kánɛ ányúū ɓayége ɓɛ́ɛ́, nyɛ́ la ɓayége ɓɛ́ɛ́ bú yáɓē ɔ́sósoa ví Sedélon la mikoo, bú níŋgí á ǹdíí á bíɓɛɓɛ́la á ɓɛ́ɛ́ váŋ.

²Ndí Yúdas, nyɔ́ a ŋgí nyɛɛ li nuŋu lí Yésus, a ŋgí yí nyɔ́ŋ voóm, átɔm nɛ́ Yésus la ɓayége ɓɛ́ɛ́ bí ŋgí yɔg li kɔtan váŋ.

³Yúdas a ɓɛ́ɛ́ á m̀mú á ntaandá á nlɔŋ á sónja la ɓatát ndáá-ēcɛ́ŋ-Ɔlolómɛ̄. Ɓáŋ ɓot, ɓakanʼyɛ ɓatíi-nsúlé la ɓot bí Falísái nɛ́ bí ómóó ɓɔ́. Bú níŋgí á ǹdíí á biɓɛɓɛ́la bí ɓɛ́gɛ ŋwaa, bitúlkáŋ la bidulé-bí-wélan.

⁴Kasig Yésus a ŋgí yí yé ɛ́sɛ ɛ́ ŋga kɛ nyɛ́ li pámléne, ɔ sīŋglé ɓɛɓɛ la ɓɔ́, ɔ bíhī ɓɔ́ nɛ́: «Nzáá miní ŋga sómo é?»

⁵Bú pélē nyɛ nɛ́: «Yésus nyɔ́ a Názalɛt.» La nyɛ́ ɔ lága ɓɔ nɛ́: «Ma nyɔ́!» Yúdas nyɔ́ a ŋgí nuŋu nyɛ́ a ɓɛ́ɛ́ á tɛ́ɛ́ élɔŋ la ɓɔ́.

⁶Ɛnɛ́ Yésus a yó ɓɔ nɛ́ ma nyɔ́, bú péndlán la mbúh, bú ku á sí.

⁷Yésus ɔ bíhī sīg-pɛ ɓɔ́ nɛ́: «Ɓaá, miníg somo nzáá é?» Bú pélē sīg-pɛ nyɛ́ nɛ́: «Yésus nyɔ́ á Názalɛt.»

⁸Yésus ɔ tímānɛ̄ ɓɔ nɛ́: «Ma lága ɓɛ́nɛ lɛn nɛ́, ma nyɔ́. Kíyáɓɛ́nɛ ma hɔ́ nɛ́ miní ŋga sómo, Mwahánɛ̄ ɓá, bí kɛnɛ́g!»

⁹Náŋ nɛ́ éɓaŋgá Yésus a lagléé ɓɔ́ ɛ́ ŋga yál. Yɔ́ nɛ́ ɛ́ lɛ́ nɛ́: «Máh jáŋɛ ɓé ma mut tɔ wa á ɓot wa tí ma.»

¹⁰Váŋ nɛ́ Símɔn-Pétlos, nyɔ́ a ɓɛ́ɛ́la mboná a sɔ́tɔ́ yɔ, ɔ lɔ́g m̀ɓɔŋle wa a ŋ̀kanʼyɛ ǹcɛ́ŋ a ɓatíi-nsúlé, ɔ sɛ́m nyɛ aɔ́ɔ́ á m̀ɓɛ́nlómɛ. Joó lí nyɔ́ŋ m̀ɓɔŋle lí ɓɛ́ɛ́ nɛ́ Málcus.

¹¹Ndí Yésus ɔ lága Pétlos nɛ́: «Timánɛ mboná yɔɔ á ŋkoɓá! Liɓondó lí ésɔghe Etāa a tí ma, ɓaá māh nyɛɛ ɓé jɔ li nyú é?»

¹²La nlɔŋ á sónja la ŋ̀kanʼyɛ waɓá, la ɓatát ɓákanʼyɛ bí Élōg-Yúda bú byeé Yésus, la ɓɔ́ bú kág nyɛ.

¹³Bú kɛ yágá la Yésus á mbóg Háne, ɛsáŋɛ́-a-ǹcii á Kaífa. Nyɛ́ Kaífa nɛ́ a ɓɛ́ɛ́ ŋ̀kanʼyɛ ǹcɛ́ŋ a ɓatíi-nsúlé nyúŋ m̀bú.

¹⁴Nyúŋ nlemlem á Kaífa nɛ́ á lagléé ɓákanʼyɛ bí Élōg-Yúda nɛ́: «ɛ́ lɛ nsɛ́ŋ nɛ mut wa nɛ́ a wú ányúū lilóm.»

¹⁵Símɔn-Pétlos la ŋ̀yége ntám wa, bí oŋóó Yésus. Kasig ŋ̀kanʼyɛ ǹcɛ́ŋ a ɓatíi-nsúlé a ŋgí yí nyɔ́ŋ ŋ̀yége, ɔ mwáhɛ́ nyɛ nɛ́ a níŋgí á ndáá élɔŋ la Yésus.

¹⁶Pétlos a ɓɛ́ɛ́ á tɛ́ɛ́ á ápūū ɓɛɓɛ la likooká. Nyɔ́ŋɔ́ ŋ̀yége a ŋgí yílɛ la ŋ̀kanʼyɛ ǹcɛ́ŋ a ɓatíi-nsúlé ɔ pám, ɔ kwɛ́lɛ̄ míndīgá a ŋgí tát á líkooká, la nyɔ́ŋ ɔ níŋgɛ́ Pétlos.

¹⁷Váŋ nɛ́ nyɔ́ŋ m̀ɓɔŋle a mindígá a ŋgí tát á líkooká a ɓāt Pétlos nɛ́: «Ɓaá wág, ɔ sē ɓé ŋ̀yége wa a nyɔ́ mut é?» Pétlos ɔ pélē nyɛ nɛ́: «Mi sē ɓé ma ŋ̀yége wɛɛ́!»

¹⁸Ákaa avɔ́l á ɓɛ́ɛ́, ɓaɓɔŋle la ɓatát bú koó nzáan, bú ɓōtlé yɔ́ li ɔ́hɔ. Kasig Pétlos a ɓɛ́ɛ́ élɔŋ la ɓɔ́ nyɛ́g ɔ tɔ́ɔ̄ lí ɔ́hɔ lí nzáan.

¹⁹Ŋ̀kanʼyɛ ǹcɛ́ŋ a ɓatíi-nsúlé ɔ ɓōtlé lí bihi lí Yésus likɔlɓan la ɓayége ɓɛ́ɛ́ la mam a ŋgí yéglɛ.

²⁰Yésus ɔ pélē nyɛ nɛ́: «Ma pɔ́t mam mísɛ á ntélélé, eceg sig mí ŋgí yéglɛ á ndáá-míɓomán la á ndáá-ēcɛ́ŋ-Ɔlolómɛ̄ ápah ɓɔɔ́n bí Élōg-Yúda bísɛ bí ŋgí kɔtan; máh laga ɓé ma jam tɔ já á lísɔl.

²¹Ányúū yéé ma nɛ́ ɔ ŋgɔ bíhī é? Yé ma lága, ɓāt yɔ́ ɓot ɓá ámble ma. Mam ma pɔ́t, bíg yí mɔ́ m̀ɓɛɛŋ m̀ɓɛɛŋ.»

²²Ɛnɛ́ a lága náŋ, ǹtát wa nyɔ́ a ɓɛ́ɛ́ nyɛ́ ɓɛɓɛ ɔ lɔ́g nyɛ liɓáá, aá la nyɛ́ nɛ́: «Náŋ nɛ́ ɔ ŋgɔ pélē ŋ̀kanʼyɛ ǹcɛ́ŋ a ɓatíi-nsúlé é?»

²³Yésus ɔ pélē nyɛ nɛ́: «Kíyáɓɛ́nɛ ma ɓéé lí pɔ́t, étɛ ma yé eɓé ma pɔ́t; ndí kíyáɓɛ́nɛ ma yí lí pɔ́t, ányúū yéé ɔ ŋgɔ lɔ́g ma é?»

²⁴Váŋ hɔ́ nɛ Háne a óm Yésus ŋkágag á yóg Kaífa, ŋ̀kanʼyɛ ǹcɛ́ŋ a ɓatíi-nsúlé.

²⁵Á yéŋ eceg kí Símɔn-Pétlos a lɛ̄ lí ɔ́hɔ lí nzáan. Bú bíhī nyɛ nɛ́: «Nɛ́ wág ɔ sē ɓé ŋ̀yége wɛɛ́ wa é?» Pétlos ɔ táŋ, aá la ɓɔ́ nɛ́: «Mi sē ɓé ma ŋ̀yége wɛɛ́!»

²⁶M̀ɓɔŋle wa nyɔ́ a ŋ̀kanʼyɛ ǹcɛ́ŋ a ɓatíi-nsúlé, á m̀biya á nyɔ́ mut Pétlos a sɛ́mɛ́ɛ́ áɔ̄ɔ̄ ɔ bíhī nyɛ nɛ́: «Ɓaá, wa ɓé nɛ ma ɛ́n élɔŋ la Yésus á ǹdíí á bíɓɛɓɛ́la é?»

²⁷Ndí Pétlos ɔ táŋ sīg-pɛ, á nlemlem á eceg, nlóm á kúú ɔ ɔ́ŋ.

²⁸Ámbúh váŋ, bú ɓógo la Yésus á mbóg Kaífa, bú kɛla nyɛ́ á ndáá gɔ́mna licɛ́ŋ. Náŋ a ɓɛ́ɛ́ miyɛ́ mí kítí. Ɓot bí kɛ̄nɛ́ɛ́ la nyɛ́ bíh níŋgléé ɓé á ndáá, ánsī nɛ́ bí ɓɛ́ mipúú ɔ́sū ví Ɔlolómɛ̄, ndí bí la li dí lí ŋgand Páska nyí Elōg-Yúda.

²⁹Váŋ nɛ́ Piláto, a sɔ́ɔ́ ɓɔ́ li kɔ́p á ápūū, ɔ bíhī ɓɔ nɛ́: «Yɔɔ́yɔ́ɔ sɔ́mɔn miní byɛ́ɛ̄ likɔlɓan la nyɔ́ mut é?»

³⁰Bú pélē nyɛ nɛ́: «Kí ɓɔŋ nɛ́ yé yoóm-mut ɛ́h ɓɔŋɔg ɓé áɓē, ɓaá, kí ɓaá sɔ́ la yɔ́ á yóg yɔɔ é?»

³¹Piláto ɔ lága hɔ́ ɓɔ nɛ́: «Kɛnán la nyɛ́, miní kááhɛ́ nyɛ́ ɓɛ́nɛ-mɛ̄n li oŋle la mbéndá yaná.» Ɓakanʼyɛ bí Élōg-Yúda bú laga nyɛ nɛ́: «Bih byɛ́ɛ́ ɓé ɓɛ́hɛ kundɛ li tíi lí mut ekɔ́ghɛ yé nyɛmb.»

³²Váŋ nɛ́ éɓaŋgá yé Yésus a éthɛ́nɛ́ patí nyɛmb a ŋgí nyɛɛ li wú yá yál.

³³La Piláto ɔ tímān á ndáá, ɔ óm lí yáŋá lí Yésus, aá la nyɛ́ nɛ́: «Ɓaá, wa nɛ́ ɔ lɛ káísa nyí Elōg-Yúda é?»

³⁴Yésus ɔ pélē nyɛ nɛ́: «Ɔg pɔ́t náŋ la wā-mɛ̄n tɔ nɛ́ ɓot ɓatám ɓá lagá wa náŋ ányúū yama é?»

³⁵Piláto ɔ pélē nyɛ nɛ́: «Ɓaá, mi lɛ mɔɔ́n Élōg-Yúda é? Lilóm jɔ́ɔ wā-mɛ̄n la ɓakanʼyɛ ɓatíi-nsúlé nɛ́ ɓá sɔ́la wa á yóg yáma. Wa ɓɔ̄ŋ hɔ́ yéé é?»

³⁶Yésus ɔ pélē nyɛ nɛ́: «Likanʼyɛ jáma lí sē ɓé mú á nyí sí. Ki ɓɔŋ nɛ́ likanʼyɛ jáma lí ɓɛ́ɛ́g mú á nyí sí, kí ɛ́ɓáma-ɓáma ɓá du nɛ́ mih nuŋlɛ́gɛ́ ɓé ma á yóg ɓakanʼyɛ bí Élōg-Yúda. Ndí likanʼyɛ jáma lí sē ɓé vá.»

³⁷Piláto ɔ lága nyɛ nɛ́: «Ɔ lɛ hɔ́ káísa é?» Yésus ɔ pélē nyɛ nɛ́: «Wa nɛ́ ɔ ŋgɔ yó nɛ́ mi lɛ káísa. Ma byáa, mu sɔ́ á ŋkɔŋ-á-sí á lí tíi lí mbóŋ ányúū mbálɛ. Tɔ nzáá a lɛ mut a mbálɛ ag ámble yé mi ŋga lága.»

³⁸Piláto aá la nyɛ nɛ́: «Yéé bí ŋga yáŋa nɛ́ mbálɛ é?» Múŋ á bíŋ biɓaŋgá, Piláto ɔ pám pɛ ápūū lí kɔ́p lí ɓákanʼyɛ bí Élōg-Yúda. Ɔ lága ɓɔ nɛ́: «Má, máh sɔm ɓé ma nyɛ́ la njɔm tɔ ya.

³⁹Ndí, miní byɛ́ɛ̄ elɛ́m nɛ́, á eceg yé ŋgand Páska nyí Elōg-Yúda sig, mag nyɛɛ ɓɛ́nɛ li pámɛ lí mut-a-miɓog wa. Ɓaá miníg somo hɔ́ nɛ mi mwáhlé ɓɛ́nɛ káísa nyí Elōg-Yúda é?»

⁴⁰Váŋ nɛ́ ɓá ɓōtlé li lón nɛ́: «Ah nyɛ́ ɓé, ndí Balábas!» Á mbálɛ, Balábas nyɛ́ a ɓɛ́ɛ́ ja ntɔnɓa.