Read Bakoko Yohánɛs 2 Bible Online

Yohánɛs 2 - Bakoko bible

Yohánɛs 2

¹Ŋgand aúg ɛ ɓɛ́ɛ́ á tísɔn nyí Kána á Galiléa á ɔlɔ́ vá yáhɛ́ áŋháa; Malía nyaŋɛ́ á Yésus, a ɓɛ́ɛ́ á nyíŋ ŋgand aúg.

²Yésus la ɓayége ɓɛ́ɛ́ ki bí yáŋlɛ́ɛ átē.

³Kasig milɔg mí manáá, nyaŋɛ́ á Yésus ɔ lága nyɛ nɛ́: «Ŋ̀gɛ̄n bíh byɛ́ɛ́ ɓé pɛ milɔg.»

⁴Ndí Yésus ɔ pélē nyɛ nɛ́: «Á míndīgá, yéé ɔ ŋgɔ sōmle ma é? Ŋgɛ́ŋ yáma ɛ lɛ́ ŋgí lí kɔlan.»

⁵Nyaŋɛ́ ɔ lága ɓáɛɛle á ŋgand nɛ́: «Ɓɔŋán yé ɛ́sɛ a ŋga lága ɓɛ́nɛ.»

⁶Bilógá bísáama, mvegéeg la ŋgɔg bí ɓɛ́ɛ́ váŋ ányúū esala-miɓé mí ɓɔ́ɔ̄n bí Élōg-Yúda. Yá sig ɛ́ ŋga lá li nyɔŋ lí jam-kaa eɓógo ɛ́ líta.

⁷Yésus ɔ lága ɓáɛɛle á ŋgand nɛ́: «Yááhánɛ mindím á bí bilógá»; la ɓaɛɛle bú yáhɛ́ míndīm á bílōgá tɛɛla á ányu.

⁸Yésus ɔ laga sīg-pɛ ɓɔ́ nɛ́: «Áán hɔ́ vɔ́ŋɔ́ɔ, miní tí m̀wɛɛhɛ ŋgand.» La ɓɔ́ bú áá, bú kɛ li tíi lí m̀wɛɛhɛ ŋgand.

⁹Nyɔ́ŋ ɔ cégē míndīm mí má yaán milɔg. M̀wɛɛhɛ ŋgand ah yíí ɓé véé míŋ milɔg mí sɔ́léé, Amáh ɓaɛɛle ɓá bí áá míŋ mindím nɛ bí ŋgí yí.

¹⁰Váŋ nɛ́ a lága mut a lɔ́mɓan nɛ́: «Joó nɛ́ mut ag dúgu yágá lí pámɛ lí bílɔ̄ŋgɔ bí mílɔg, eceg ɓayáŋlɛ á ŋgand ɓá péé, ndí ɓá pámɛ hɔ́ mí máh loohan ɓé lí ɓɛ́ lí m̀ɓɛɛŋ. Ndí wá, wa náŋɛ̄ bílɔ̄ŋgɔ bí mílɔg tɛɛla vɔ́ŋɔ́ɔ!»

¹¹Míŋ nɛ́ mí lɛ́ mínɛ́ŋ mí ɔsú Yésus a ɓɔŋ á tísɔn nyí Kána á Galiléa. A étɛ́ lipém jɛ́ɛ́, la ɓayége ɓɛ́ɛ́ bú yéɓé la nyɛ́.

¹²Ámbúh náŋ, ɔ suh á Kafalnáum elɔŋ la nyaŋɛ́, elōgnyāŋ la ɓayége ɓɛ́ɛ́ ápah bí tɔɓéé ja puh álɔ̄.

¹³Kasig ŋgand Páska nyí Elōg-Yúda ɛ́ ɓɛ́ɛ́ ɓɛɓɛ, Yésus ɔ ɓét á Yélūsalɛm.

¹⁴Ɔ níŋgí á ndáá-ēcɛ́ŋ-Ɔlolómɛ̄, la nyɛ́ ɔ kɔ́p ɓánuŋu nyaga, ɓanuŋu mitómbɛ́ la aɓeŋ la ɓaveŋghanɛ-mɔní bí tɔ́ɔ̄ átē.

¹⁵Váŋ nɛ́ a óŋ ɔ́so la mikɔɔ, ɔ dúhú ɓɔ́ bísɛ á ndáá-ēcɛ́ŋ-Ɔlolómɛ̄, ɔ dúhú ki mitómbɛ́ la nyaga; ɔ lée mɔní mí ɓáveŋghanɛ-mɔní á sí, ɔ sógɛ́ ki téɓeli yáɓá á sí.

¹⁶La nyɛ́ ɔ lága ɓánuŋu aɓeŋ nɛ́: «Ɓógtánɛ bí byoóm bísɛ vá; miníh yaanɛ́gɛ́ ɓé ndáá Etāa, ndáá nyuŋgá.»

¹⁷Váŋ nɛ́, ɓáyēge ɓɛ́ɛ́ ɓá ɔ́ŋɔ nɛ́ yá ciiɓɛ́ nɛ: «Ekɔ́ɔ́ yé mi byɛ́ɛ̄ ányúū ndáá yɔ́ɔ á Ɔlolómɛ̄, yá nyɔ̄ŋ ma m̀mím.»

¹⁸La mikanʼyɛ mí Élōg-Yúda mú nyɔ̄ŋ mpɔ́t, mú bíhī nyɛ́ nɛ́: «Yɔɔ́yɔ́ɔ ndembye ɔ ŋgɔ étɛ ɓɛ́hɛ á li ɓɔŋ nɛ́ bi yí nɛ́ ɔ byɛ́ɛ́ kundɛ li ɓɔŋ náŋ é?»

¹⁹Yésus ɔ pélē mɔ nɛ́: «Búgán nyí ndáá-ēcɛ́ŋ-Ɔlolómɛ̄, li pám lí álɔ̄ áŋháa, mag kɛ yɔ li tɛ́ɛ́yɛ.»

²⁰Váŋ hɔ́ nɛ́ ɓáŋ ɓɔɔ́n bí Élōg-Yúda ɓá lagá nyɛ nɛ́: «Mióŋ mí nyí ndáá-ēcɛ́ŋ-Ɔlolómɛ̄ má nyɔŋ muúmínáa mí mímbú la mísáama, ndí wa ɔg tɛ́ɛ́yɛ yɔ li pám lí álɔ̄ áŋháa é?»

²¹Ndí ndáá-ēcɛ́ŋ-Ɔlolómɛ̄ Yésus a ŋgí pɔ́tle ɛ ɓɛ́ɛ́ ja nyuú yɛ́ɛ̄ nyɛ́-mɛ̄n.

²²Jɔ́ nɛ́, eceg a ŋga kɛ́ li pahye á póla ɓá bí wúēē, ɓayége ɓɛ́ɛ́ bíg kɛ li ɔ́ŋɔ nɛ́ a pɔ́tɔ́ɔ́ náŋ; la ɓɔ́ bí yéɓé Licii-Lipúán la eɓaŋgá a lagléé ɓɔ́.

²³Eceg Yésus a ɓɛ́ɛ́ á Yélūsalɛm á lí loɛ lí ŋgand Páska nyí Elōg-Yúda, ŋgandag ɓot yú yéɓé la nyɛ́ ányúū minɛ́ŋ a ŋgí ɓɔŋ.

²⁴Ndí Yésus á ɓɛ́ɛ́la ɓé lipitá la ɓɔ́ ánsī nɛ́, a ŋgí yí ɓɔ́ bísɛ.

²⁵Ah ɓɛ́ɛ́la ɓé kóó nɛ bí lagá nyɛ́ jam tɔ já likɔlɓan la mut-a-binam, átɔm nɛ́ a ŋgí yí nzáá a lɛ mut-a-binam.