Read Bakoko Yohánɛs 20 Bible Online

Yohánɛs 20 - Bakoko bible

Yohánɛs 20

¹La miyɛ́ mí kítí mí ɔlɔ́ ví ɔ́sū ví nzamɛ́, Malía Magdála ɔ púlé a sɔŋ, kí lívito lí ŋgí lɛ, ɔ kɔ́p nɛ ɓá ɓógtɛ́ ŋgɔg ɛ ŋgí leg yɔ́.

²Ɔ tímān m̀bíí, ɔ kɔ́p Símɔn-Pétlos la nyɔ́ŋɔ́ ŋ̀yége Yésus a ŋgí diŋɛ. A byɛ́la ɓɔ́ nɛ́: «Ɓá ɓógtɛ́ m̀bim á Nyɔ́ŋ-Ɛsáŋɛ́ á sɔŋ, ndí bi ŋgá yí ɓé ɓɛ́hɛ véé ɓá vá wɔ́.»

³Váŋ nɛ́ Símɔn-Pétlos la nyɔ́ŋɔ́ ŋ̀yége ɓá pám, la ɓɔ́ bú kɛ á sɔŋ.

⁴Ɓɔ́ bíɓáa bí ŋgí nāŋga m̀bíí elɔŋ, kaa nyɔ́ŋɔ́ ŋ̀yége a ŋgí vóó m̀bíí li loo lí Pétlos, ɔ dúgú lí pám á sɔŋ.

⁵La nyɛ́ ɔ ɛ́ŋɛ́ɛ, ɔ ɛ́n mbɔ́ŋ ɛ naŋɛ váŋ, ndí ah níŋglée ɓé átē a sɔŋ.

⁶Símɔn-Pétlos nyɔ́ a ŋgí oŋ nyɛ́, ɔ yíg sɔ́ á ɛ́yɛ̄ɛ̄ éceg. Ɔ níŋgí átē a sɔŋ, ɔ ɛ́n mbɔ́ŋ ɛ náŋɛ váŋ

⁷la jéŋé líɓato jé ɓá vúlké m̀mú a Yésus. Jéŋ liɓato líh ɓɛ́ɛ́ ɓé elɔŋ la mbɔ́ŋ, ndí lí ɓɛ́ɛ́ m̀vúlkége ɛwɛɛ́ voóm ntám.

⁸Váŋ hɔ́ nɛ, nyɔ́ŋɔ́ ŋ̀yége a dúgléé li pám á sɔŋ nyɛ́g a níŋgi. Ɛnɛ́ a ɛ́n, nyɛ́g ɔ yéɓe.

⁹Ákaa ɛ́sɛ, ɓayége bí ɓɛ́ɛ́ ŋgí lí sɔ́ŋtánɛ lí yé Licii-Lipúán lí ŋgí laga nɛ́, Yésus a nyɛ́ɛ lí pahye átē a ɓá ɓá wū.

¹⁰Ámbúh náŋ, ɓáŋ ɓayége bíɓáa bú sóō á yóg yaɓá.

¹¹Malía, nyɛ́ a tɔɓéé váŋ á ápūū ag lee ɓɛɓɛ la sɔŋ. Tɔ kaa a ŋgí lee, ɔ ɛ́ŋɛ́ á sɔŋ

¹²la nyɛ́ ɔ ɛ́n áŋgɛl ɛ́ɓáa ɛ́ jáhɛ bipúpúɛ bí mbɔ́tí, ɛ́ tɔ́ɔ̄ á nlemlem á voóm bí nāntɛ́ɛ m̀bim á Yésus. Ya ápah m̀mú á ɓɛ́ɛ́, nyíŋí ki á étun míkoo.

¹³Yú ɓāt nyɛ nɛ́: «Á mindígá, ɔg lee yéé é?» Ɔ pélē yɔ nɛ́: «Ɓá ɓógtɛ́ m̀bim á Ɛtáŋɛ, ndí, mi ŋgá yí ɓé ma á véé ɓá vá wɔ́.»

¹⁴Kasig a ɓɛ́ɛ́ a ŋgí pɔ́tɔg, ɔ yáan, la nyɛ́ ɔ ɛ́n Yésus a tɛ́ɛ váŋ, ndí, ah lem ɓé nyɛ.

¹⁵Yésus aá la nyɛ́ nɛ́: «Á míndīgá, ɔg lée yéé é? Ɔg somo nzáá é?» Ndí, kaa Malía a ŋgí ɔ́ŋɔ nɛ ǹtát ǹdíí á biɓɛɓɛ́la nyɔ́ŋ, a byɛ́la nyɛ́ nɛ́: «Etāa, kíyáɓɛ́nɛ wá nɛ́ wa ɓógtɛ́ m̀bim á Nyɔ́ŋ-Ɛsáŋɛ́, lagá ma voóm wa vá wɔ́, mag kɛ wɔ́ lí nyɔŋ.»

¹⁶Váŋ nɛ́ Yésus a yáŋá nyɛ nɛ́: «Á Mālía» la Malía ɔ yáan, ɔ yáŋá nyɛ́ la mpɔ́t a Elōg-Hébɛl nɛ́: «Lábúni», náŋ a lɛ nɛ́ ŋ̀yéglɛ.

¹⁷Yésus ɔ lága nyɛ nɛ́: «Ɔh siiɓágán ɓé ma! Átɔm nɛ́, mih mɓétég ɓé ma a yóg Etāa. Ndí wa, kɛɛ́n kɔ́p élōgyāŋ, ɔ lāgá yɔ́ nɛ́, ma kɛ́ á yóg Etāa nyɔ́ a lɛ ki Ɛsɔ́ŋɛ́ wāná; á yóg Loó jáma, jé lí lɛ́ ki Loo jáná.»

¹⁸Malía ɔ sóo hɔ́, ɔ lága ɓayége nɛ́: «Ma ɛ́n Nyɔ́ŋ-Ɛsáŋɛ́, a máŋlɛ́ ma mam.»

¹⁹Á ŋgōgó nyí víŋ ɔlɔ́ ví ɔ́sū ví nzamɛ́, kasig ɓayége bí ŋgí kɔn ɓakanʼyɛ bí Élōg-Yúda woŋ, bú kwɛ́hɛ̄ míkooká mísɛ ápah bí ɓɛ́ɛ́ bí kɔ̄tánɛ. Yésus ɔ pámlé ɓɔ, ɔ tɛ́lɛ́ á m̀mím wáɓá, aá la ɓɔ́ nɛ́: «Nsaŋ á ɓɛ́ la ɓɛ́nɛ!»

²⁰Ɛnɛ́ a pɔ́t náŋ, ɔ étɛ̄ ɓɔ́ mɔ mɛ́ɛ́ la mbaa yɛɛ́. Ɛnɛ́ ɓayége ɓá ɛ́n Nyɔ́ŋ-Ɛsáŋɛ́, bú kɔɔ́n mívag.

²¹Yésus ɔ lága sīg-pɛ ɓɔ́ nɛ́: «Nsaŋ á ɓɛ́ la ɓɛ́nɛ. Nlemlem kaa Etāa a óm ma, mág ma óm ɓɛ́nɛ.»

²²Ɛnɛ́ a pɔ́tɔ́ɔ́ náŋ, ɔ vúŋglé ɓɔ m̀búl, a byɛ́la ɓɔ́ nɛ́: «Lɛ́glán M̀búl Mpúán.

²³Tɔ nzáá miní ŋga kɛ li laakɛ lí míɓē, miɓé mɛ́ɛ́ míg kɛ li kuh lí élaakɛ, ndí tɔ nzáá miní ŋga kɛ́ li yuule lí míɓē, miɓé mɛ́ɛ́ míg kɛ li tíg la nyɛ́.»

²⁴Eceg Yésus a pámléé ɓayége ɓɛ́ɛ́, Tómas wa átē a Jóom la Bíɓáa, nyɔ́ ŋgól ɛ lɛ nɛ́ m̀byáh ah ɓɛ́ɛ́ ɓé la ɓɔ́.

²⁵Ɓáŋá ɓayége bú lagá nyɛ nɛ́: «Ɓa ɛ́n Nyɔ́ŋ-Ɛsáŋɛ́!» Ndí Tómas ɔ tímānɛ̄ ɓɔ nɛ́: «Kíyáɓɛ́nɛ mah ɛ́n ɓé ma bindóndó bí tɔna á mɔ mɛ́ɛ́, kíyáɓɛ́nɛ mah sɔm ɓé ɔnu-ví-wɔ átē, kíyáɓɛ́ ki nɛ́ mah sɔm ɓé wɔ wama á éndōndó yɛ́ɛ̄ mbaa, mí ŋgá yéɓe ɓé ma!»

²⁶Ámbúh alɔ́ mwaam, ɓayége bú kɔ̄tán sīg-pɛ á nlemlem á ndáá elɔŋ la Tómas. Yésus ɔ pámlé ɓɔ, mikooká mísɛ ŋkwɛɛ́hkɛ́gɛ, ɔ tɛ́lɛ́ á m̀mím wáɓá aá la ɓɔ́ nɛ́: «Nsaŋ á ɓɛ́ la ɓɛ́nɛ.»

²⁷Váŋ nɛ́ a lága Tómas nɛ́: «Sɔ́la ɔnu-ví-wɔ vɔ́ɔ vá, légɓé mɔ máma; sɔ́la wɔ wɔ́ɔ, sɔ̄m wɔ́ á mbaa yama; ɔh pendkágán ɓé pɛ, ndí yéɓé.»

²⁸Tómas ɔ pélē nyɛ nɛ́: «Ɛtáŋɛ la Lōó jáma.»

²⁹Yésus aá la nyɛ́ nɛ́: «Ányúū nɛ wa ɛ́n ma, wa yéɓe. Misɔ́tá la ɓá bísɛ bí ŋga yéɓe, ɛ́h ɓɛ́ ɓé ɓɔ li ɛ́n.»

³⁰Yésus a ɓɔŋɔ́ɔ́ ŋgandag bínanaŋga bí mam mitám ɔsú ví ɓáyēge ɓɛ́ɛ́, mí máh ciiɓɛ ɓé mú á nyí kálati.

³¹Ndí, mí mam má ciiɓɛ́ já á lí ɓɔŋ nɛ́ miní yéɓé nɛ́ Yésus a lɛ Nyɔ́-a-Pɔ́hlɛ, ɔ ɓɛ́ Mɔɔ́n Ɔlolómɛ̄, la nɛ́, kaa maná yéɓe, miní ɓɛ́la eniŋ éɓem a jóō jɛ́ɛ́.