Read Bakoko Yohánɛs 21 Bible Online

Yohánɛs 21 - Bakoko bible

Yohánɛs 21

¹Ámbúh náŋ, Yésus ɔ pámlé sīg-pɛ ɓayége ɓɛ́ɛ́ á m̀byáŋ á ebúle yé Tibeliáda. Ná hɔ́ nɛ́ a pámléé ɓɔ́:

²Símɔn-Pétlos, Tómas nyɔ́ bí ŋga yáŋa nɛ́ m̀byáh, Natánáɛl nyɔ́ a Kána nyí Galiléa, ɓɔɔ́n bí Zebedéo la ɓayége bíɓáa ɓatám bí ɓɛ́ɛ́ élɔŋ.

³Váŋ nɛ́ Símɔn-Pétlos a lága ɓɔ nɛ́: «Ma kɛ́ á nsombó.» Ɓɔ́g bú pélē nyɛ nɛ́: «Bi kɛ́nɛ́g ɓɛ́hɛ bísɛ.» La ɓɔ́ bú ɓét á m̀ɓoŋgó, bú kɛ. Ndí jéŋ díɓe lísɛ, bíh óloo ɓé tɔ jam.

⁴Kasig kítí ɛ ŋgí kánda, ɓayége bú ɛ́n mut a tɛ́ɛ á m̀byáŋ á ebúle, ndí ɓáh yí ɓé nɛ Yésus nyɔ́ŋ.

⁵Ɔ lága ɓɔ nɛ́: «Á ɓɔ́ɔ̄n, maná ól puh kɔh wóŋ é?» Bú pélē nyɛ nɛ́: «Kɛ́m.»

⁶Aá la ɓɔ́ nɛ́: «Léán épéha á épah ɛ́ m̀ɓɛ́nlómɛ yé m̀ɓoŋgó, miníg ól.» Bú léé épéha, la yɔ́ yú yál la kɔh nyaa nyí ɛ lɛ nɛ́ bí ŋgí la ɓé pɛ yɔ́ lí ɓétɛ á m̀ɓoŋgó.

⁷Nyɔ́ ŋ̀yége Yésus a ŋgí diŋ ŋgandag, ɔ lága Pétlos nɛ́: «Nyɔ́ŋ-Ɛsáŋɛ́ pɔ́n nyɔŋ!» Ɛnɛ́ Símɔn-Pétlos a ámblé nɛ Nyɔ́ŋ-Ɛsáŋɛ́ nyɔ́ŋ, ɔ jál étun-ɛ́-lóō yɛ́ɛ́, ányúū nɛ a ɓɛ́ɛ́ nyuú nsɔ́, la nyɛ́ ɔ ɓɛ́hán á míndīm.

⁸Ɓáŋá ɓáyēge bú ɓōtlé lí timan la m̀ɓoŋgó á ŋgwáāg sí, bíg duutɛ epéha yé ɓɛ́ɛ́ ŋyálāg la kɔh. Bíh ɓɛ́ɛ́ ɓé énɛŋɛ́ la sí, bí ɓɛ́ɛ́ jam-kaa eɓógo méta la sí.

⁹Ɛnɛ́ ɓá ɓét á ŋkɔŋ, bú ɛ́n kɔh la ekɔgá bí káhɛ á míkálag mí nzáan.

¹⁰Yésus ɔ lága ɓɔ nɛ́: «Sɔ́án hɔ́ la yí kɔh maná sɔ́lé lí ól.»

¹¹Váŋ nɛ́ Símɔn-Pétlos a tímān á m̀ɓoŋgó, ɔ súhɛ épéha á sí, yé ɛ́ ɓɛ́ɛ́la eɓógo la muúmítáan la ɛ́ŋháa yé mítumb mí kɔh; ndí tɔ náŋ kaa kɔh ɛ́ ɓɛ́ɛ́ ŋgandag, epéha ɛ́h wáhyee ɓé.

¹²Yésus ɔ lága ɓɔ nɛ́: «Sɔ́án á li dí.» Ŋ̀yége tɔ wa ah la ɓé nyɛ li bihi nɛ́: «Wa nɛ́ ɔ lɛ nzáá é?» Átɔm nɛ́ bí ŋgí yí m̀ɓɛɛŋ m̀ɓɛɛŋ nɛ́ Nyɔ́ŋ-Ɛsáŋɛ́ nyɔŋ.

¹³Yésus ɔ sīŋgle, ɔ nyɔ̄ŋ ékɔgá, ɔ tí ɓɔ yɔ́, ɔ tí ki ɓɔ́ kɔh.

¹⁴Náŋ nɛ́ a ɓɛ́ɛ́ ŋgele ya yáhɛ́ ɛ́ŋháa nɛ́ Yésus a pámlé ɓáyēge ɓɛ́ɛ́ ámbúh lipahye jɛ́ɛ́ á póla ɓá ɓá wū.

¹⁵Ɛnɛ́ ɓá manɛ́ lí dí, Yésus ɔ bíhī Símɔn-Pétlos nɛ́: «Á Símɔn, mɔɔ́n Yohánɛs, ɓaá ɔg diŋ ma lí loo lí ɓá bísɛ é?» Nyɔ́ŋ ɔ pélē nyɛ nɛ́: «Ɔɔ, Ɛtáŋɛ, ɔg yí nɛ́ mag diŋɛ wa.» Yésus aá la nyɛ́ nɛ́: «Díɛ́hɛ́ ɓɔɔ́n ɓáma bí mítōmbɛ́.»

¹⁶Yésus ɔ bíhī nyɛ ŋgele ya yáhɛ ɛ́ɓáa nɛ́: «Á Símɔn, mɔɔ́n Yohánɛs, ɓaá ɔg diŋ ma é?» Nyɔ́ŋ ɔ pélē sīg-pɛ nyɛ́ nɛ́: «Ɔɔ, Ɛtáŋɛ, ɔg yí nɛ́ mag diŋɛ wa.» Yésus aá la nyɛ́ nɛ́: «Ɓɛ́ m̀wɛɛla mítōmbɛ́ máma.»

¹⁷Á ŋgele ya yáhɛ ɛ́ŋháa, Yésus ɔ bíhī sīg-pɛ nyɛ́ nɛ́: «Á Símɔn, mɔɔ́n Yohánɛs, ɓaá ɔg diŋ ma é?» Pétlos ɔ súnan ányúū nɛ Yésus a bíhī nyɛ ŋgele ya yáhɛ ɛ́ŋháa nɛ́: «Ɓaá ɔg diŋ ma é?» La nyɛ́ ɔ tímānɛ̄ Yésus nɛ́: «Ɛtáŋɛ, wá nyɔ́ ɔ ŋgɔ yí mam mísɛ, ɔg yí m̀ɓɛɛŋ m̀ɓɛɛŋ nɛ́ mag diŋɛ wa.» Yésus aá la nyɛ nɛ́: «Táthán la mítōmbɛ́ máma.

¹⁸La mbálɛ-mbálɛ, mag laga wa nɛ́, eceg ɔ ɓɛ́ɛ́ ɔ́wāndá, wā-mɛ̄n ɔ ŋgí tiŋ ŋgóli yɔɔ, ɔg kɛ́ ápah ɔ ŋgɔ sómo. Ndí eceg ɔ ŋgɔ́ kɛ́ li un, ɔg ɓɛ́ ja ɔg sámba mɔ ndí mut ntám á tiŋ wa ŋgóli, la nyɛ́ á kɛ́la wa ápah ɔ ŋgɔ́ sómo ɓé.»

¹⁹Yésus a pɔ́tɔ́ɔ́ náŋ á lí yɛ́ɛ́lene lí Pétlos yɔɔ́yɔ́ɔ patí nyɛmb a ŋga kɛ́ li wú, nyí ɛ ŋga tíi Ɔ́lolómɛ̄ lipém. Ámbúh náŋ aá la nyɛ́ nɛ́: «ōŋ ma.»

²⁰Ɛnɛ́ Pétlos a yáan, ɔ ɛ́n ŋ̀yége nyɔ́ Yésus a ŋgí diŋɛ, nyɔ́ a ɛ́ŋʼyɛ́ɛ m̀mú á tól yɛ́ɛ̄ eceg bí ŋgí dí, á li bíhī lí nyɛ nɛ́: «Ɛtáŋɛ, nzáá a ŋga kɛ́ wa lí nuŋu é?»

²¹Ɛnɛ́ Pétlos a ɛ́n nyɔ́ŋ ŋ̀yége, ɔ bíhī Yésus nɛ́: «Ɛtáŋɛ, ɛ́g kɛ láá li ɓɔŋɓɛ ányúū yɛ́ɛ̄ é?»

²²Yésus ɔ pélē nyɛ nɛ́: «Náŋ a byɛ́ɛ́ wa yéé é? Kíyáɓɛ́nɛ mag diŋ, ag tɔɔ á éniŋ nɛ́-tɛ́ɛla á mítiman máma, wá hɔ́, ōŋ ma.»

²³Bíŋ biɓaŋgá bí Yésus nɛ́ byá ɓɔŋ pɔ́l yu cáman á póla ɓayéɓe bísɛ nɛ́ nyɔ́ŋ ŋ̀yége a ŋgá kɛ ɓé lí wú. La mbálɛ, Yésus áh laglee ɓé Pétlos nɛ́ nyɔ́ŋ ŋ̀yége a ŋga kɛ ɓé lí wú, ndí nɛ: «Náŋ a byɛ́ɛ́ wa yéé é? Kíyáɓɛ́nɛ mag diŋ, ag tɔɔ á éniŋ nɛ́-tɛ́ɛla á mítiman máma.»

²⁴Nyɔ́ŋ ŋ̀yége nɛ́ a ŋga tíi mbóŋ míŋ mam, nyɛ́ ki nɛ́ a cíi mɔ́. Ɓɛ́hɛ ki, biíg yí nɛ́ mbóŋ yɛ́ɛ̄ ɛ lɛ mbálɛ.

²⁵Yésus a ɓɔ̄ŋ sīg-pɛ ŋgandag mam mitám, kí ɓá kɛ mɔ li cii jé á mbúh jéŋé, mag ɔ́ŋɔ nɛ́ ŋkɔŋ-á-sí ág kɛ li pag la yíŋ kálati.