Read Bakoko Yohánɛs 5 Bible Online

Yohánɛs 5 - Bakoko bible

Yohánɛs 5

¹Ámbúh váŋ, Yésus ɔ ɓét á Yélūsalɛm á lí loɛ lí ŋgand nyí ɓɔɔ́n bí Élōg-Yúda ya.

²Eɓél-écɛ̄ŋ-mísoɓan yé ɛ́ ŋga yáŋlɛ la mpɔ́t á Élōg-Hébɛl nɛ́ Betsáta ɛ́ ɓɛ́ɛ́ múŋ á nyíŋ tísɔn, yé ɛ́ ɓɛ́ɛ́la miɓɛpɛ́ mítáan, ɓɛɓɛ la likooká lí mítōmbɛ́.

³Ɓakɔɔ́kɔ̄n bí nyaa la nyaa bí ɓɛ́ɛ́ á míŋ miɓɛpɛ́. Bí ɓɛ́ɛ́: ɓot-bí-ndím, ɓot ɓa lɛ́mɛ á míkoo, biɓóg-bí-ɓōt. [

⁴]

⁵Mut wa a ɓɛ́ɛ́ váŋ náŋ ag ɓɔŋ muúmíŋháa mí mímbú la mwaam nɛ́ a kuéé éɓōg.

⁶Ɛnɛ́ Yésus a ɛ́n nyɛ a náŋɛ, la ki nɛ́ a ámbléé nɛ́ a ɓēmlé múŋ á yéŋ eɓɛ́lé, ɔ ɓāt nyɛ nɛ́: «Ɔ byɛ́ɛ́ kóó lí tɔɔ lí mbólí é?»

⁷Eɓóg-mut yú pélē nyɛ nɛ́: «Ɛtáŋɛ, mih byɛ́ɛ́ ɓé ma mut a ŋga súhɛ ma á éɓēl-écɛ̄ŋ-mísoɓan eceg mindím mí ŋga póghan, la ki nɛ́, sɔ́kágánɛ́ mag suh á míndīm, kí mut ntám ɔ sūh ɔ́sū vama.»

⁸Váŋ nɛ́ Yésus a lága nyɛ nɛ́: «Tɛ́lɛ́, nyɔ̄ŋ sáŋkálɛ wɔɔ, wɛɛ́.»

⁹Á ékūyá-kúyá mut ɔ tɔ́ɔ̄ mbólí; ɔ nyɔ̄ŋ sáŋkálɛ wɛ́ɛ̄, ɔ wɛ́ɛ. Náŋ a ɓɔ̄ŋɓɛ́ɛ á ɔlɔ́ ví évɛɛɓan ví Élōg-Yúda.

¹⁰Váŋ nɛ́ ɓɔ́ɔ̄n bí Élōg-Yúda ɓá lagá nyɔ́ŋ mut a tɔ́ɔ̄ mbólí nɛ: «Lɛn a lɛ ɔlɔ́ váhá ví évɛɛɓan, ɔh byɛ́ɛ́ ɓé kundɛ li ɓɛgɛ lí ébúŋga yɔ́ɔ.»

¹¹Ndí nyɛ́ ɔ pélē ɓɔ nɛ́: «Mut a tɔ́ɔyɛ́ ma mbólí nɛ a lága ma nɛ́: ‹Nyɔ̄ŋ sáŋkálɛ wɔɔ, wɛɛ́›.»

¹²La ɓɔ́ bú ɓāt nyɛ nɛ́: «Nzáá mut a lága wa nɛ́: ‹Nyɔ̄ŋ sáŋkálɛ wɔɔ, ɔ wɛ́ɛ é›?»

¹³Ndí nyɔ́ mut a tɔɓéé mbólí āh yíi ɓé nzáá nyɔŋ, átɔm nɛ́ Yésus a nɛŋɓéé la limut lí ɓɛ́ɛ́ váŋ.

¹⁴Ámbúh eceg, ɛnɛ́ Yésus ɔ kɔ́p nyɔ́ŋ mut a ndáá-ēcɛ́ŋ-Ɔlolómɛ̄, ɔ lága nyɛ nɛ́: «Légɓé kaa wa tɔ́ɔ̄ mbólí, ɔh ɓɔŋɔ́g ɓé pɛ aɓé, ánsī nɛ ɔ táág kūh jam litám lí ŋga lōo jéŋ!»

¹⁵Nyɔ́ŋ mut ɔ kɛ lí máŋlɛ lí ɓɔ́ɔ̄n bí Élōg-Yúda nɛ́ Yésus nɛ́ a tɔɔyɛ́ɛ́ nyɛ́ mbólí.

¹⁶Váŋ nɛ́ Élōg-Yúda ɛ́ ɓōtléé lí vinan la Yésus ányúū nɛ a ɓɔŋɔ́ɔ́ náŋ á ɔlɔ́ váɓá ví évɛɛɓan.

¹⁷Ndí Yésus ɔ pélē ɓɔ nɛ́: «Tɛɛla vɔ́ŋɔ́ɔ, Etāa a lɛ á nsɔ́n kaa mág mi lɛ á nsɔ́n.»

¹⁸Li ɓotle la váŋ nɛ́ mikanʼyɛ mí Élōg-Yúda mí kondyéé lí somo lí nzen á lí ólhánɛ lí Yésus, ányúū nɛ́, amáh nɛ́ a ŋgí sáá ɔlɔ́ váɓá ví évɛɛɓan, ndí ag katɓan ki nɛ́ Ɔlolómɛ̄ a lɛ Ɛsáŋɛ́, á jéŋ lilaglag jɛ́ɛ́, a ŋgí somo li laga nɛ́ nyɛ́ la Ɔlolómɛ̄ bí kɔ́ɔ.

¹⁹Yésus ɔ nyɔ̄ŋ sīg-pɛ mpɔ́t aá la ɓɔ́ nɛ́: «La mbálɛ-mbálɛ, mag laga ɓɛ́nɛ nɛ́, Mɔɔ́n a ŋgá la ɓé li ɓɔŋ lí jam tɔ já la nyɛ́-mɛ̄n, ndí ag ɓɔŋ ja yé a ɛ́n Ɛsáŋɛ́ ag ɓɔŋ; átɔm nɛ́ yé Ɛsáŋɛ́ a ŋga ɓɔ̄ŋ, Mɔɔ́n nyɛ́g ag ɓɔŋ yɔ́ nlemlem.

²⁰Kasig Etāa a ŋga dīŋ Mɔɔ́n, jɔ́ nɛ a ŋga étɛ nyɛ́ byoóm bísɛ a ŋga ɓɔ̄ŋ. Ag kɛ sīg-pɛ nyɛ́ lí étɛ lí mísɔ̄n mícɛ̄ŋ mí ŋga lōo mí, á lí nyágɛ lí ɓɛ́nɛ.

²¹Kasig Etāa a ŋga pāhyɛ ɓá ɓá wū la li tíi li ɓɔ eniŋ, náŋ ki nɛ́ Mɔɔ́n nyɛ́g a ŋga tíi tɔ nzáá a ŋga díiŋ eniŋ.

²²Etāa a ŋga kááhɛ ɓé tɔ mut, a tí Mɔɔ́n kundɛ li kááhɛ lí ɓot bísɛ,

²³á lí ɓɔŋ nɛ́ ɓot bísɛ bí ditɛ́ Mɔɔ́n kaa bí ŋga dítɛ Ɛsáŋɛ́. Tɔ nzáá a ŋgá ditɛ ɓé Mɔɔ́n, a ŋgá ditɛ ɓé tɔ ki Ɛsáŋɛ́ nyɔ́ a óm nyɛ.

²⁴La mbálɛ-mbálɛ, mag laga ɓɛ́nɛ nɛ́, tɔ nzáá a ŋga ámble eɓaŋgá yáma la li yéɓe la nyɔ́ a óm ma, a byɛ́ɛ eniŋ éɓem, a ŋgá kɛ ɓé lí ku lí ŋkál, ndí a ɓógó á nyɛmb li timan á éniŋ.

²⁵La mbálɛ-mbálɛ, mag laga ɓɛ́nɛ nɛ́, ŋgɛ́ŋ ɛg sɔ́, ya nyɛ́g, ápah ɓá ɓá wū bí ŋga kɛ́ li ámble lí cíŋ Mɔɔ́n Ɔlolómɛ̄ la ki nɛ́ ɓá bísɛ bí ŋga ámble nyɛ́, bíg kɛ li niŋ.

²⁶Kasig Etāa a byɛ́ɛ̄ éniŋ la nyɛ́-mɛ̄n, náŋ ki nɛ́ a tí Mɔɔ́n lí ɓɛ́la lí éniŋ la nyɛ́-mɛ̄n.

²⁷A tí nyɛ kundɛ li kááhɛ ányúū nɛ a lɛ̄ Mɔ́ɔ̄n mut.

²⁸Bí byoóm bísɛ bíh nyágɛ́gɛ́ ɓé pɛ ɓɛ́nɛ! Ŋgɛ́ŋ ɛg sɔ́ nyí ɓá bísɛ bí lɛ́ á sɔŋ bí ŋga kɛ́ li ámble lí cíŋ yɛ́ɛ̄,

²⁹la ki nɛ́ ɓot ɓá ɓɔ̄ŋ m̀ɓɛɛŋ bíg kɛ li pahye á lí ɓɛ́la lí éniŋ. Ɓot ɓá ɓɔ̄ŋ áɓē bíg kɛ li pahye ányúū ŋkál.

³⁰Ma, mí ŋgá la ɓé ma lí ɓɔŋ lí jam tɔ já la mā-mɛ̄n. Mag kááhɛ li oŋle la yé mi ŋga ámble. Mbag-ŋkál yáma mi ŋga tíi ɛ tɛ́ɛ ányúū nɛ mi ŋgá somo ɓé ma li ɓɔŋ lí nsom wáma mā-mɛ̄n, ndí mag ɓɔŋ ja nsom á nyɔ́ a óm ma.»

³¹Yésus ɔ kɛ́la ŋkwɛl wɛ́ɛ́ la ɔsú a byɛ́ nɛ: «Kíyáɓɛ́nɛ ma tí mā-mɛn mbóŋ, nyíŋ mbóŋ yama ɛ̄h tɛ́ɛ́ ɓé.

³²Ndí kíyáɓɛ́nɛ mut ntám nɛ a tí mbóŋ yáma, mag yí nɛ nyíŋ mbóŋ ɛ lɛ mbálɛ.

³³Máná óm ɓot á yóg Yohánɛs Ǹtíi-nzoɓan, la nyɛ́ ɔ tí mbóŋ nyí mbálɛ.

³⁴Má, mih byɛ́ɛ́ ɓé ma kóó la mbóŋ nyí mut-a-binam, ndí mag pɔ́t náŋ a li ɓɔŋ nɛ́ miní sūŋɓɛ̄.

³⁵Yohánɛs Ǹtíi-nzoɓan a ɓɛ́ɛ́ etúlkáŋ bí ŋga kóo la yɔ́ yá páa, ndí ɓɛ́nɛ, munú somó ja li kɔn li mívag la mipúú mɛ́ɛ́ ányúū pupúhú eceg.

³⁶Ndí ma, mbóŋ ɛ ŋga tíéɓɛ ányúū yáma ɛg lōo nyí Yohánɛs, yɔ nɛ́ ɛ lɛ mísɔ̄n mí Etāa a tí ma nɛ́ mí ɓɔ̄ŋ. Mag ɓɔŋ mɔ́, mɔ́ nɛ́ mí ŋga tíi mbóŋ yama ɛ ŋga étɛ nɛ́ Etāa nɛ́ a óm ma.

³⁷Etāa nyɔ́ a óm ma nyɛ́-mɛ̄n a tí mbóŋ yama. Ndí, m̀ɓá-mɓá manáh ámble ɓé cíŋ yɛ́ɛ̄ tɔ li ɛ́n lí asú wɛ́ɛ́.

³⁸La ki nɛ́, miní ŋgá naŋɛ ɓé bíɓaŋgá byɛ́ɛ́, ányúū nɛ miní ŋgá yéɓe ɓé la nyɔ́ a óm ma.

³⁹Miníg nyɔŋ eceg á lí sɔ́ŋtánɛ lí Lícii-Lipúán, kasig miní ŋga ɔ́ŋɔ nɛ́ li kele la jɔ́, miníg kuh eniŋ éɓem, jɔ́ nɛ́ lí ŋga tíi mbóŋ yama.

⁴⁰Tɔ la náŋ asɛ̄, miní ŋgá somo ɓé lí sɔ́ la ma á lí kuh lí éniŋ éɓem.

⁴¹Lipém lí ŋgá sɔ́léne ɓé ma la ɓot-bí-bínam.

⁴²Ndí, mag yí ɓɛ́nɛ, miníh byɛ́ɛ́ ɓé édiŋ yé Ɔ́lolómɛ̄ até wāná.

⁴³Ma sɔ́ á jóō lí Etāa, ndí miníg pún ma lí lɛ́gle. Ndí kíyáɓɛ́nɛ mut ntám a sɔ́ á jóō jɛ́ɛ́ nyɛ́-mɛ̄n, nyɛ́, miníg lɛ́gle nyɛ́!

⁴⁴Nɛ́-láá hɔ́ miní ŋga lá li yéɓe, kíyáɓɛ́nɛ miníg tíélán lipém ɓɛ́nɛ la ɓɛ́nɛ ndí manáh somó ɓé lípēm lí ŋga sɔ́le la Ɔlolómɛ̄ nyɛ́-ntámɛ́ é?

⁴⁵Miníh ɔ́ŋlág ɓé nɛ ma nɛ́ mi ŋga kɛ́ ɓɛ́nɛ li sɔ́mánɛ ɔ́sū ví Etāa. Nyɔ́ Móse maná válé mípitá, nyɛ́ nɛ́ a ŋga kɛ́ ɓɛ́nɛ li sɔ́mánɛ.

⁴⁶Ákaa ɛ́sɛ, kíyáɓɛ́nɛ miníg yéɓé la Móse, ɛnɛ miníg kɛ ki li yéɓe la ma, átɔm nɛ́ ányúū yama nɛ́ Móse a cíi.

⁴⁷Kíyáɓɛ́nɛ manáh yéɓe ɓé yé a cíi, nɛ́-láá hɔ́ miní ŋga kɛ́ li yéɓe lí yé mi ŋga lága é?»