Read Bakoko Yohánɛs 6 Bible Online

Yohánɛs 6 - Bakoko bible

Yohánɛs 6

¹Ámbúh náŋ, Yésus ɔ ɓéhe á nyúŋú mií á ébúle yé Galiléa bí ŋga yáŋa ki nɛ́ ebúle yé Tibeliáda.

²Edila límut yú ōŋ nyɛ ányúū nɛ́ lí ŋgí ɛ́n bínanaŋga bí mam a ŋgí ɓɔŋle ɓakɔɔ́kɔ̄n.

³Ányúū náŋ nɛ́ Yésus a ɓétéé á lóō lí ɔ́kolá, ɔ tɔ́ɔ̄ wóŋ la ɓayége ɓɛ́ɛ́.

⁴Náŋ a ɓɔ̄ŋɓɛ́ɛ puh eceg sɔ́kágánɛ́ ŋgand Páska nyí Elōg-Yúda ɛg kɔlan.

⁵Ndí ɛnɛ́ Yésus a ɓéthɛ́ɛ miíh ɔ ɛ́n édila límut ɛ́g siŋgle nyɛ́ ɓɛɓɛ, ɔ bíhī Filípo nɛ́: «Á véé bi lɛ́ nɛ ɓa sóm lídī á lí díɛ́hɛ lí jé limut é?»

⁶A ŋgí pɔ́t náŋ á lí ceglɛ lí Filípo, ányúū nɛ́ nyɛ́-mɛ̄n Yésus a ŋgí yí yé a nyɛ́ɛ lí ɓɔŋ.

⁷Filípo ɔ pélē nyɛ nɛ́: «Tɔ lidí lí bíɓógo bí kápa bíɓáa[3] lí sē ɓé nɛ lá kɔlán nɛ̄ mut sig a kūh yoóm lí dī.»

⁸Ŋ̀yége á Yésus wa bí ŋga yáŋa nɛ́ Andeléas mɔɔ́nyāŋ á Símɔn-Pétlos ɔ lāgá nyɛ́ nɛ́:

⁹«Ɔwándá vá ví lɛ́ vá, ví byɛ́ɛ́ bikɔgá bí ŋga sáa bítáan la ɓɔɔ́n bí kɔh bíɓáa. Ndí, nyíŋ puh lidí ɛg la li ɓɔŋ lí jé limut lísɛ yéé é?»

¹⁰Yésus ɔ lāgá nɛ: «Tɔɔyánɛ ɓɔ́.» Nyɔ́ŋ voóm a ɓɛ́ɛ́la bikáá ŋgandag, la ɓot bú tɔ́ɔ̄, bí ɓɛ́ɛ́ jam-kaa akóó á páam átáan.

¹¹Váŋ nɛ́ Yésus a nyɔ̄ŋ bíŋ bikɔgá bítáan, ɔ tí Ɔ́lolómɛ̄ mítamlan la nyɛ́ ɔ tí byɔ ɓot bí ɓɛ́ɛ́ váŋ. Ɔ ɓɔ̄ŋ nlemlem la kɔh, ɔ tí ɓɔ̄, mut sig ɔ dí kaa kóó yɛ́ɛ̄.

¹²Eceg ɓot ɓá dí bú yál, Yésus ɔ lāgá ɓáyēge ɓɛ́ɛ́ nɛ́: «Miní kómánɛ bitun byá yégle á lí ɓɔŋ nɛ́ tɔ jam líh lɔɓyág ɓé.»

¹³Bú kómánɛ̄ byɔ, la ɓɔ́ bú yáhɛ́ jóom lí bísɛɛ la bíɓáa lí bitun bí bíkɔgá byá yégle á bí bikɔgá bí ŋga sáa bítáan eceg ɓot ɓá manɛ́ lí dí.

¹⁴Ɛnɛ́ ɓot ɓa ɛ́n énanaŋga ɛ́ jam yá loo, bú laga nɛ́: «Nyɔ́ mut a lɛ tihtih m̀pɔ́tle-a-Ɔlolómɛ̄ nyɔ́ a ŋga nyɛ́ɛ li sɔ́ á ŋkɔŋ-á-sí»

¹⁵Ndí kaa Yésus a ŋgí yí nɛ́ bíg sɔ́ nyɛ lí byee á li tɛ́ɛ́yɛ lí nyɛ káísa, ɔ tímān sīg-pɛ nyɛ́-ntámɛ́ á ɔkolá.

¹⁶Ɛnɛ́ ŋgōgó ya vínɛ, ɓayége bí Yésus bu suh nɛ́-tɛ́ɛla á ébúle.

¹⁷Bú ɓét á m̀ɓoŋgó, bú ɓēhé á nyúŋú mií á ébúle li kɛ á Kafalnáum. Livito lú kū, kí Yésus āh ŋkɔ́pɔ́g ɓé ɓɔ.

¹⁸Váŋ nɛ́ ŋgɔá ecɛ́ŋ ɛ ɓōtléé lí vuŋ, ebúle yú ɓéé.

¹⁹Ɓayége bú dúg jam-kaa kílométa ɛ́táan li kɛ lí ɛ́sáama, ɛnɛ́ ɓá ɛ́n Yésus ag wɛɛ á lóō lí míndīm li siŋgle ɓɛɓɛ la m̀ɓoŋgó wáɓá, bú kɔɔ́n woŋ.

²⁰Váŋ nɛ́ a laga ɓɔ́ nɛ́: «Ma nyɔ́ŋ miníh kɔnɔ́g ɓé woŋ!»

²¹Bú somó nyɛ́ li nyɔŋ á m̀ɓoŋgó wáɓá, ndí á ékūyá-kúyá m̀ɓoŋgó wú cág ápah bí ŋgí kɛ.

²²Ɔlɔ́ ví ŋgí oŋ víŋ, kasig limut jé lí yégléé á nyúŋú mií á ebúle lí sɔ́ŋtáánɛ nɛ́ m̀ɓoŋgó wa nɛ́ á ɓɛ́ɛ́ váŋ, la ki nɛ́ Yésus ah níŋglée ɓé elɔŋ la ɓayége ɓɛ́ɛ́ á m̀ɓoŋgó, ɓáŋ bí kɛ̄nɛ́ɛ́ ɓɔ́-ntámɛ́.

²³Ákaa ɛ́sɛ, miɓoŋgó mitám mí ɓɛ́ɛ́ váŋ mí mí sɔ́léé á Tibeliáda, mú cág á voóm Nyɔ́ŋ-Ɛsáŋɛ́ a nyɔŋɔ́ɔ́ ékɔgá, ɔ tí Ɔlolómɛ̄ mitamlan la ɓɔ́ bu dí yɔ.

²⁴Ɛnɛ́ ɓot ɓá sɔm nɛ́ Yésus tɔ ɓayége ɓɛ́ɛ́ bí sē ɓé pɛ váŋ, bú ɓét á míŋ míɓoŋgó, bú kɛ́ nyɛ́ lí somo á Kafalnáum.

²⁵Ɛnɛ́ ɓá kɔ́p nyɛ á nyúŋú mií á ebúle, bú ɓāt nyɛ nɛ́: «Lábi yɔɔ́yɔ́ɔ eceg wa pám mú é?»

²⁶Yésus ɔ pélē ɓɔ́ nɛ́: «La mbálɛ-mbálɛ, mag laga ɓɛ́nɛ nɛ́, miní ŋgá somo ɓé ma ányúū minɛ́ŋ maná ɛ́n, ndí ányúū bikɔgá maná dí, mut sig ɔ yál.

²⁷Jɔ́ nɛ́, miníh sálág ɓé ányúū lidí lí ŋga lɔ́ɓe, ndí sálán ányúū lidí lí ŋgá lɔɓe ɓé, jé lí ŋga tíi eniŋ éɓem, jé Mɔɔ́n Mut a ŋga kɛ ɓɛ́nɛ li tíi, átɔm nɛ́, nyɛ́ nɛ́ Ɛsáŋɛ́, nyɔ́ a lɛ Ɔlolómɛ̄ a vá ndembye ɛ ŋga étɛ nɛ́ nyɛ́ Ɔlolómɛ̄ a lɛ élɔŋ la nyɛ́.»

²⁸Bú ɓāt hɔ́ nyɛ́ nɛ́: «Yéé ɓa nyɛ́ɛ lí ɓɔŋ á li sál lí misɔ́n mí Ɔlolómɛ̄ é?»

²⁹Yésus ɔ pélē ɓɔ́ nɛ́: «Nsɔ́n á Ɔlolómɛ̄ a lɛ́ nɛ́ miní yéɓé la mut a óm.»

³⁰Bú ɓāt sīg-pɛ nyɛ́ nɛ́: «Ndí wa, mɔɔ́mɔ́ɔ minɛ́ŋ ɔ ŋgɔ kɛ́ li ɓɔŋ ɔsú váhá nɛ́ bi yéɓé la wa é? Ɓaá, yéé ɔ ŋgɔ kɛ́ li ɓɔŋ é?»

³¹Ɓatáŋɛ bí díéé Mána[4] á éyāŋ kaa yá ciiɓɛ́ nɛ́: «A tí ɓɔ́ ekɔgá ɛ́ ŋga sɔ́léne á lóō kaa lidí.»

³²Yésus ɔ laga ɓɔ́ nɛ: «La mbálɛ-mbálɛ mag laga ɓɛ́nɛ nɛ́, ah Móse ɓé nɛ a tí ɓɛ́nɛ ekɔgá yé yá sɔ́léné á lóō, ndí Etāa nɛ́ a tí ɓɛ́nɛ taŋ ekɔgá ɛ ŋga sɔ́léne á lóō.

³³Ányúū nɛ ekɔgá Ɔlolómɛ̄ a ŋga tíi, ɛ́ lɛ́ yé ɛ́ ŋga sɔ́léne á lóō ndí ɛ́g niŋɛ ɓot bí ŋkɔŋ-á-sí.»

³⁴Váŋ nɛ́ limut lí ŋgí oŋ Yésus lá lagá nyɛ nɛ́: «Ɛtáŋɛ, tí ɓɛ́hɛ yéŋ ekɔgá eceg ɛ́sɛ!»

³⁵La nyɛ́ ɔ pélē jɔ nɛ́: «Ma nɛ́ mi lɛ ékɔgá éniŋ. Tɔ nzáá a ŋga ōŋ ma, a ŋga kɛ ɓé lí tɔɔ lí nzal, nyɔ́ a ŋga yéɓe la ma, m̀ɓá-mɓá evéhé ɛ́ ŋgá byee ɓé pɛ nyɛ́.

³⁶Ndí ma lága hɔ́ ɓɛ́nɛ, maná ɛ́n tɔ la náŋ manáh yéɓe ɓé.

³⁷Ɓot bísɛ Etāa a ŋga tíi ma bíg kɛ ma lí oŋ, nyɔ́ la nyɔ́ a ŋga ōŋ ma, mi ŋgá kɛ ɓé ma nyɛ́ lí ɓen.

³⁸Átɔm nɛ́ ma sɔ́léné á lóō á lí ɓɔŋ lí nsom á mut a óm ma, ndí ah nsom wáma ɓé.

³⁹Á mbálɛ, nsom á mut a óm ma á lɛ nɛ́, míh jáŋhɛ́gɛ́ ɓé ma tɔ wa á ɓá bísɛ a tí ma, ndí mi pāhyɛ́ ɓɔ́ á ɔlɔ́ vá tiile.

⁴⁰Nsom á Etāa nyú nɛ́, Tɔ nzáá a ɛ́n Mɔɔ́n ndí a yéɓé la nyɛ́, ag kuh eniŋ éɓem. Mág, mag kɛ nyɛ́ li pahyɛ á ɔlɔ́ vá tiile.»

⁴¹Váŋ nɛ́ ɓɔ́ɔ̄n bí Élōg-Yúda ɓá ɓōtlé lí dumlan la Yésus ányúū nɛ a yó nɛ́: «Ma nɛ́ mi lɛ̄ ékɔgá yé yá sɔ́léné á lóō.»

⁴²La ɓɔ́ bú lága sīg-pɛ nɛ́: «Ah Yésus mɔɔ́n Yósɛp ɓé nyɔ́ é? Ɓaá, bi ŋgá yí ɓé ɛsáŋɛ́ la nyaŋɛ́ é? Nɛ́-láá a ŋga lá lí laga nyí vɔ́ŋɔ́ɔ nɛ́: ‹Ma sɔ́léné á lóō é›?»

⁴³Yésus ɔ nyɔ̄ŋ mpɔ́t aá la ɓɔ́ nɛ́: «Mwahánɛ̄ li dumlan!

⁴⁴Mut tɔ wa a ŋgá la ɓé lí ɓɛ́ elɔŋ la ma, kíyáɓɛ́nɛ Etāa nyɔ́ a óm ma ah duutɛ ɓé nyɛ́ á ŋgwáāg yama, mág ma kɛ nyɛ́ lí pahyɛ á ɔlɔ́ vá tiile.

⁴⁵Ɓapɔ́tle-bí-Ɔ́lolómɛ̄ ɓá cií nɛ: ‹Ɔlolómɛ̄ ag kɛ li yéglɛ lí ɓot bísɛ›. Nyɔ́ la nyɔ́ a ámblé miéélé mí Etāa ndí a náŋɛ́ yé a ŋga yéglɛ, ag sɔ́ la ma.

⁴⁶Náŋ a lɛ nɛ́, mut tɔ wa ah ɓáág ŋgí lí ɛ́n lí Etāa amáh sig nyɔ́ a sɔ́lé la Ɔlolómɛ̄, nyɛ́ a ɛ́n Ɔlolómɛ̄.

⁴⁷La mbálɛ-mbálɛ, mag laga ɓɛ́nɛ nɛ́, nyɔ́ la nyɔ́ a ŋga yéɓé, a byɛ́ɛ́ eniŋ éɓem.

⁴⁸Ma nɛ́ mi lɛ ékɔgá yé éniŋ.

⁴⁹Ɓasɔ́ŋɛ́ ɓáná bí díéé maná á éyāŋ, la ɓɔ́ bú wú.

⁵⁰Ndí, tɔ nzáá a ŋga kɛ́ li dí lí yé ekɔgá yá sɔ́léné á lóō, a ŋgá wú ɓé.»

⁵¹«Ma nɛ́ mi lɛ ékɔgá yé éniŋ yé yá sɔ́léné á lóō. Tɔ nzáá a ŋga kɛ́ yɔ́ li dí ag kɛ li ɓɛ́la lí éniŋ éɓem. Ekɔgá mi ŋga kɛ li tíi á lí niŋɛ lí ɓot bí ŋkɔŋ-á-sí ɛ́ lɛ́ nyuú yáma.»

⁵²Váŋ nɛ́ ɓɔ́ɔ̄n bí Élōg-Yúda bí ɓōtléé ŋguu míkālá ɓɔ́ la ɓɔ́, la li ɓatɓan nɛ́: «Nɛ́-láá nyɔ́ mut a lɛ́ nɛ a tí ɓɛ́hɛ nyuú yɛ́ɛ̄ kaa lidí é?»

⁵³Yésus ɔ laga hɔ́ ɓɔ́ nɛ́: «La mbálɛ-mbálɛ, mag laga ɓɛ́nɛ nɛ́, kíyáɓɛ́nɛ manáh dí ɓé nyuú Mɔɔ́n Mut tɔ li nyú lí mícii mɛ́ɛ́, miní ŋgá ɓɛ́la ɓé éniŋ a até wāná.

⁵⁴Tɔ nzáá a ŋga dí nyuú yáma, a nyú ki micii máma, a byɛ́ɛ́ eniŋ éɓem. Mág, mag kɛ nyɛ́ li pahyɛ á ɔlɔ́ vá tiile,

⁵⁵átɔm nɛ́, nyuú yáma ɛ lɛ́ taŋ lidí, micii máma ki mú ɓɛ́ taŋ bínyūnyú.

⁵⁶Tɔ nzáá a ŋga dí nyuú yáma, a nyú ki micii máma, ag ɓɛ́ á até wama, mág mi ɓɛ́ á até wɛ́ɛ̄.

⁵⁷Nlemlem kaa Etāa a óm ma a lɛ á éniŋ, ndí mág mú ɓɛ́ á éniŋ li kele la nyɛ́, jɔ nɛ́ tɔ nzáá a ŋga dí nyuú yáma ag kɛ li niŋ li kele la ma.

⁵⁸La náŋ, taŋ ekɔgá yé yá sɔ́léné á lóō ɛ sē ɓé yé ɓasɔ́ŋɛ́ ɓáná bí díéé, la ɓɔ́ bú wú; ndí tɔ nzáá a ŋga kɛ́ li dí lí yé ekɔgá ag kɛ li niŋ á éɓem la á éɓem.»

⁵⁹Náŋ nɛ́ Yésus a ŋgí yéglɛ á ndáá-miɓomán nyí Kafalnáum.

⁶⁰Ɛnɛ́ ɓáyēge bí Yésus ɓá manɛ́ nyɛ́ li ámble, ŋgandag yu ɓōtlé lí laga nɛ́: «Nyú ŋkwɛl á lɛ́ ŋguu tɔláá, nzáá hɔ́ pɛ a ŋgí ámblégé nyɛ́ é?»

⁶¹Kasig Yésus a ŋgí yí nɛ ɓayége ɓɛ́ɛ́ bíg dumlan likɔlɓan la ŋkwɛl wɛ́ɛ́, ɔ bíhī ɓɔ nɛ́: «Ɓaá, bí biɓaŋgá bíg teeŋgɛ ɓɛ́nɛ é?

⁶²Ɓaá, eceg miní ŋga ɛ́n Mɔɔ́n Mut ag timan ápah a sɔ́léne, miníg kɛ láá li ɓɔŋ é?

⁶³M̀búl Mpúán nɛ́ a ŋga tíi eniŋ, nyuú ɛh byɛ́ɛ́ ɓé eɓáha tɔ yá. Biɓaŋgá mi ŋga lága ɓɛ́nɛ bí lɛ́ M̀búl, bú ɓɛ́ ki eniŋ.

⁶⁴Ndí ɓot bí lɛ́ á elɔŋ yáná bí ŋgá yéɓé ɓé.» Ákaa ɛ́sɛ, Yésus a ŋgí yí li ɓotle á bíɓotlé ɓot bí ŋgá yéɓé ɓé la nyɛ́ la nzáá a ŋga kɛ nyɛ́ lí nuŋu.

⁶⁵Ɔ kōndyé sīg-pɛ nɛ́: «Ányúū náŋ nɛ́ ma lága ɓɛ́nɛ nɛ́: ‹Mut tɔ wa a ŋgá la ɓé lí sɔ́ la ma, kíyáɓɛ́nɛ náŋ āh tíéɓɛ ɓé nyɛ la Etāa›.»

⁶⁶Li ɓotle váŋ á yéŋ eceg nɛ́ ŋgandag yɛ́ɛ́ ɓayége yá ɓáglan la nyɛ́, la ɓɔ́ bú mwahɛ́ nyɛ li oŋ.

⁶⁷Váŋ nɛ́ Yésus a bíhī Jóom jɛ́ɛ́ lí ɓáōmɓɛ la bíɓáa nɛ́: «Ɓɛ́nɛ ki miníg somo li kɛ é?»

⁶⁸Ndí Símɔn-Pétlos ɔ pélē nyɛ nɛ́: «Ɛtáŋɛ biíg kɛ á mbóg nzáá é? Wa nɛ́ ɔ byɛ́ɛ̄ bíɓaŋgá bí éniŋ éɓem.

⁶⁹Ɓɛ́hɛ ɓaá yéɓé, ɓaá yí nɛ́ ɔ lɛ Nyɔ́-mpúán a Ɔlolómɛ̄.»

⁷⁰Yésus ɔ pélē ɓɔ́ nɛ́: «Ɓaá, ah ma ɓé nɛ́ ma pɔ́hɔ̄ ɓɛ́nɛ jé jóom la bíɓáa é? Ndí wa á póla yaná a lɛ̄ ǹsɔhɔ.»

⁷¹A ŋgí pɔ́t likɔlɓan la Yúdas mɔɔ́n Símɔn Iskáliot, átɔm nɛ́ tɔ náŋ kaa Yúdas a ɓɛ́ɛ́ á elɔŋ yé Jóom lí ɓáōmɓɛ la bíɓáa, nyɛ́ nɛ́ a ŋgí kɛ nyɛ́ lí nuŋu.