Read Bakoko Misɔ́n mí Ɓáōmɓɛ 5 Bible Online

Misɔ́n mí Ɓáōmɓɛ 5 - Bakoko bible

Misɔ́n mí Ɓáōmɓɛ 5

¹Páam ya bí ŋgí yáŋa nɛ́ Ananías, á ŋ̀ámblānɛ́ la ŋ̀gáá wɛ́ɛ̄ Safíla, ɔ núŋū epah ɛ́ sí yɛ́ɛ́ yá.

²Ɔ ámblán la ŋ̀gáá wɛ́ɛ̄, nɛ bí yéglán joga já jé lí mɔní mí nyuŋgá sí, la nyɛ́ ɔ kɛ́la jéŋé joga litám ɔ ɓémbé jɔ á sí míkoo mí ɓáōmɓɛ.

³Váŋ nɛ́ Pétlos a lága nyɛ nɛ́: «Wɛɛ́kɛ́ɛ́! Á Ananías, ányúū yéé wa mwáhɛ Sátan ɔ níŋgí wa á m̀mím é? Wa yɛ́ɛ́ M̀búl Mpúán la wá wu yéglán joga lí mɔní já jé lí nyuŋgá sí.

⁴Ɔh mɓɛ́ ɓé nɛ ɔ náŋɛ́ sí yɔ́ɔ ɛ́h ɓɛ́ ɓé yɔ li nuŋu é? Tɔ nɛ́, kíyáɓɛ́nɛ wa núŋū yɔ, ɔ ɓɔ́ŋlé míŋ mɔní á kóó yɔ́ɔ é? Nyíŋ nyaa míɔ̄ŋɔ yá ɓɔŋ láá ndí yú níŋgí wa á m̀mím é? Ah ɓot-bí-bínam ɓé nɛ wa yɛ́ɛ, ndí Ɔlolómɛ̄.»

⁵Eceg Ananías a ámblé bíŋ biɓaŋgá, ɔ kū, ɔ níí mvɛɛɓan. Ɓáŋ bísɛ bí ámbléé nyíŋ pɔ́l bú nát la woŋ.

⁶Awándá wú sɔ́, wú ɓóŋgó m̀bim wɛ́ɛ́ la wɔ́ wú kɛ wɔ̄ li je.

⁷Ámbúh jam-kaa ŋgɛ́ŋ ɛ́ŋháa, ŋ̀gáá wɛ́ɛ̄ Safíla ɔ níŋgi ɛ́h ɓɛ́ ɓé nyɛ li yí lí yé yá loo.

⁸Pétlos ɔ yáŋá nyɛ, aá la nyɛ́ nɛ́: «Lagá sig ma, la mbálɛ nɛ́ á nyí ndam nɛ́ maná nuŋú sí é?» Nyɔ́ŋ ɔ pélē nyɛ nɛ́: «Ɔɔ, ndam yɛ́ɛ̄ nyíŋ!»

⁹Váŋ nɛ́ Pétlos a tímānɛ̄ nyɛ nɛ́: «Nɛ́-láá wa la nlóm wɔ́ɔ maná ámblán á lí ceglɛ lí M̀búl á Nyɔ́ŋ-Ɛsáŋɛ́ é? Ámblé sig, ɓot bí mɓɛ́ lí je lí nlóm wɔ́ɔ bí lɛ́ ɓɛɓɛ, yí hɔ́ nɛ wág bíg kɛ́la wa.»

¹⁰Á ékūyá-kúyá, ɔ kū á míkoo mí Pétlos la nyɛ́ ɔ níí mvɛɛɓan. Eceg nyú awándá wá níŋgi, wú kɔ́p nɛ a wú, la wɔ́ wú ɓɛ́gɛ̄ m̀bim wɛ́ɛ́, wú kɛ́ wɔ̄ li je á ŋgwáāg nlóm.

¹¹Ɓot bí Éɓasɛ la ɓáŋ bísɛ bí ámbléé nyɔ́ŋ m̀bugɛ-a-jam bú nát la woŋ.

¹²Ɓaómɓɛ bú ɓɔ̄ŋ ŋgandag ndembye-ɛ́-mam la binanaŋga bí mam átē á lílōm. Ɓɔ́ bísɛ la m̀mím wá, bí ŋgí tɛ́lɛ á sí liɓɛpɛ́ lí Salómo.

¹³Mut ntám tɔ wa a ŋgí yéɓe ɓé lí byáŋ lí elɔŋ la ɓɔ́, tɔ náŋ kaa lilóm lísɛ lí ŋgí séme ɓɔ́.

¹⁴Táŋga nyí ɓayéɓe Nyɔ́ŋ-Ɛsáŋɛ́, páam la ɓondígá ɛ ŋgí ɓét bí lí ɓét.

¹⁵Ɓot bí ŋgí pám la ɓakɔɔ́kɔ̄n á mílɔ̄ŋ, ɓá tɔ́ɔyɛ́ ɓɔ á sáŋkálɛ tɔ á bíbúŋga, la lipitá nɛ, Pétlos á míloo mɛ́ɛ́ váŋ, ndíndímɛ wɛɛ́ ag siiɓan tɔ mut wa múŋ á póla yaɓá.

¹⁶Ɔbul ví límut ví ŋgí sɔ́le á míkɔŋ mí lɛ́ á ŋgwáāg Yelúsalɛm, vɔ́g ví ŋgí digɓan li kɛla lí ɓákɔɔ́kɔ̄n la ɓot bí byɛ́ɛ̄ mímbūl míɓē. Ɓáŋ ɓakɔɔ́kɔ̄n bísɛ bí ŋgí tɔɔ mbólí.

¹⁷Á míŋ mam mísɛ, ŋ̀kanʼyɛ ǹcɛ́ŋ a ɓatíi-nsúlé la ɓot bí elɔŋ yɛ́ɛ́ ɛ́sɛ, ɓot bí ɔ́ku ví Sadúkái bú álá ŋgandag,

¹⁸la ɓɔ́ bú byelhánɛ́ ɓáōmɓɛ, bú vá ɓɔ̄ á ndáá-m̀ɓog á miíh mí ɓot bísɛ.

¹⁹Ndí, la díɓe, áŋgɛl nyí Nyɔ́ŋ-Ɛsáŋɛ́ yu légē míkooká mí ndáá-m̀ɓog, yu pámɛ́ ɓɔ̄ la yɔ yu lāgá ɓɔ nɛ́:

²⁰«Kɛnán, miní tɛ́lɛ́ á ndáá-ēcɛ́ŋ-Ɔlolómɛ̄, wóŋ, lɛglán lílōm bíŋ biɓaŋgá bí éniŋ bísɛ.»

²¹Ɓaómɓɛ bú óglé áŋgɛl. La miyɛ́ mí kítí, bú kɛ á ndáá-ēcɛ́ŋ-Ɔlolómɛ̄, li pám wóŋ, bu ɓōtlé lí yéglɛ. Ɛnɛ́ ŋ̀kanʼyɛ ǹcɛ́ŋ a ɓatíi-nsúlé la elɔŋ yɛ́ɛ́ ɓá sɔ́, bú tɔ́ɔyɛ́ ɔ́ku-vicɛ́ŋ-ví-bíkāāhɛ́nɛ́, ví ví lɛ́ étɔ yé ɓácɛ̄ŋ bí ɓɔ́ɔ̄n bí Íslāɛl, la ɓɔ́ bú óm nɛ bí nyɔ̄ŋ ɓaómɓɛ á ndáá-m̀ɓog bí sɔ́la ɓɔ́.

²²Ndí, ɛnɛ́ ɓáɓɔŋle ɓá pám wóŋ, ɓáh kɔ́p ɓé ɓɔ á ndáá-m̀ɓog. Á mítiman máɓá, bú tí ndagle nɛ́:

²³«Ɓaá kɔ́p nɛ́ ndáá-m̀ɓog ɛ kwɛ́hɛ m̀ɓɛɛŋ, ɓatát ki bí tɛ́ɛ á ɔ́sū ví ányu-á-mɓɛ́l. Ndí, ɛnɛ́ ɓaá légē likooká, ɓáh kɔ́p ɓé ɓɛ́hɛ tɔ mut átē.»

²⁴Ɛnɛ́ ŋ̀kanʼyɛ ɓatát ndáá-ēcɛ́ŋ-Ɔlolómɛ̄ la ɓakanʼyɛ ɓatíi-nsúlé ɓá ámblé nyíŋ pɔ́l, náŋ ɔ nyágɛ́ ɓɔ ŋgandag la ɓɔ́ bú ɓātɓán yé yá loolé ɓáōmɓɛ.

²⁵Ndí, mut wa ɔ sɔ́ ɓɔ́ li lɛgɛ nɛ́: «Ɛ́nán sig nɛ́, ɓot maná vá á ndáá-m̀ɓog bí tɛ́ɛ́ á ndáá-ēcɛ́ŋ-Ɔlolómɛ̄ bíg yéglɛ lilómɛ.»

²⁶Váŋ nɛ̄ ŋ̀kanʼyɛ ɓatát ndáá-ēcɛ́ŋ-Ɔlolómɛ̄ a kɛ́ la ɓaɓɔŋle ɓɛ́ɛ́ á lí sɔ́la lí ɓáōmɓɛ ɛ́h ɓɛ́ ɓé éduŋgú ányúū nɛ̄ bí ŋgí kɔn woŋ nɛ́ lilómɛ ag waŋgɛ ɓɔ́ ŋgɔg.

²⁷Bú sɔ́la hɔ́ ɓáōmɓɛ, bú tɛ́ɛ́yɛ́ ɓɔ ɔ́sū ví ɔ́ku-vicɛ́ŋ-ví-bíkāāhɛ́nɛ́. Ŋ̀kanʼyɛ ǹcɛ́ŋ a ɓatíi-nsúlé ɔ bíhī ɓɔ nɛ́:

²⁸«Ɓaá, ɓāh suŋɛ ɓé ɓɛ́nɛ nɛ́ m̀ɓá-mɓá miníh yéglɛ́gɛ́ ɓé pɛ jéŋ jóō é? Ɛ́nán nɛ́ nyí vɔ́ŋɔ́ɔ, maná yáhɛ Yelúsalɛm la biyéglɛ́nɛ́ byáná. Miníg somo nɛ́ micii mí nyɔ́ŋ mut mí kómɓɛ́ á mímú máhá é?»

²⁹Ndí Pétlos la ɓaómɓɛ bú pélē ɓɔ nɛ́: «Ɛ́ lɛ́ nsɛ́ŋ li ógle lí Ɔ́lolómɛ̄ li loo lí ɓot-bí-bínam.

³⁰Ɔlolómɛ̄ nyɔ́ a ɓatáŋɛ a pāhyɛ́ Yésus nyɔ́ miní ólóó eceg miní panhɛ́ɛ́ nyɛ́ á mbásá.

³¹Nyɛ́ nɛ́ Ɔlolómɛ̄ a ɓétɛ́ á lóō la ŋguu yɛ́ɛ̄, ɔ tɛ́ɛ́yɛ́ nyɛ kaa Ŋ̀kanʼyɛ la Ǹsuŋ, á lí ɓɔŋ nɛ́ lilóm lí Íslāɛl lí vēŋé bilɛ́m la jɔ́ lí kuh elaakɛ-miɓé.

³²Ɓɛ́hɛ la M̀búl Mpúán nyú Ɔlolómɛ̄ a tí ɓá bí ŋgá ógle nyɛ́, bi lɛ mbóŋ míŋ mam mísɛ.»

³³Ɛnɛ́ ɓot bí ɔ́ku-vicɛ́ŋ-ví-bíkāāhɛ́nɛ́ ɓá ámblé bíŋ biɓaŋgá, bú ála ŋgandag la ɓɔ́ bú sōmó li ólhánɛ lí ɓáōmɓɛ.

³⁴Váŋ nɛ́ mut wa á élɔŋ ɛ́ víŋ ɔ́ku bí ŋga yáŋa nɛ́ Gamáliɛl a tɛ́lɛ. A ɓɛ́ɛ́ mɔɔ́n Falísái, ŋ̀yí mbéndá nyɔ́ lilóm lísɛ lí ŋgí ditɛ. Ɔ kānʼyɛ́ nɛ́ bí pámɛ́ ɓaómɓɛ ányúū puh eceg.

³⁵Ámbúh náŋ ɔ lága nɛ: «Á ɓɔ́ɔ̄n bí Íslāɛl, nyɔŋán litát la yé miní ŋgá kɛ́ li ɓɔŋ la ɓá ɓot.

³⁶Yé epah éceg, ɓaá ɛ́n Tédas ɔ pám; a ŋgí yɛ́ɛ nɛ́ a lɛ tāŋ mut, la nyɛ́ ɔ lá lí kɔtanɛ lí jam-kaa biɓógo bínáa bí ɓot, tɔ la náŋ, bú ól nyɛ. Ɓot bísɛ bí óŋōō nyɛ́ bú cáman, tɔ mut ah yéglée ɓé.

³⁷Ámbúh náŋ, ɛnɛ́ eceg lí nyɔŋ lí nsɔŋgí á ɓot yá kɔlan, Yúdas, mɔɔ́n Galiléa ɔ nyɛ́g. Nyɛ́g limut lú ōŋ nyɛ́, ndí ɛnɛ́ ɓá ól nyɛ, ɓot bísɛ bí ŋgí oŋ nyɛ́ bú cáman.

³⁸Nyí vɔ́ŋɔ́ɔ hɔ́, mag laga ɓɛ́nɛ nɛ́ miníh nyɔŋɔ́g ɓé pɛ eceg la ɓá ɓot. Mwahánɛ̄ ɓɔ́ bí kɛ́nɛ́g, átɔm nɛ́, kíyáɓɛ́nɛ miɔ́ŋɔ la misɔ́n máɓá míg sɔ́le la ɓot-bí-bínam, míg kɛ li man la mɔ́-mɛ̄n.

³⁹Ndí kíyáɓɛ́nɛ míg sɔ́le la Ɔlolómɛ̄, miní ŋgá la ɓé mɔ̄ li ɓɔ́hɛ; miníh ceglɛ́gɛ́ ɓé tɔ ki li duhɛ lí Ɔ́lolómɛ̄!» Ɓot bí ɔ́ku-vicɛ́ŋ-ví-bíkāāhɛ́nɛ́ bú yéɓé yé Gamáliɛl a lága.

⁴⁰Bú yáŋá ɓáōmɓɛ, bú ɓōmhánɛ́ ɓɔ la aso, bú súŋɛ̄ ɓɔ nɛ́ bíh símhánɛ́gɛ́ ɓé pɛ joó lí Yésus, ámbúh náŋ, bú mwahɛ́ ɓɔ.

⁴¹Ɓaómɓɛ bú ɓógó la mivag ɔ́sū ví ɔ́ku-vicɛ́ŋ-ví-bíkāāhɛ́nɛ́, nɛ́ Ɔlolómɛ̄ a ɛ́n nsɛ́ŋ nɛ bí téeŋgɛ́ ɓɔ́ á jóō lí Yésus.

⁴²Ɔlɔ́ sig, ɛ́ ɓɛ́ á ndáá-ēcɛ́ŋ-Ɔlolómɛ̄ tɔ á mílɛ̄ɛ̄, bí ŋgí tɔmb ɓé li yéglɛ la li lɛgɛ lí Pɔ́l M̀ɓɛɛŋ nɛ́: «Yésus nɛ́ a lɛ Nyɔ́-a-Pɔ́hlɛ.»