Read Bakoko Elōg-Lóma 1 Bible Online

Elōg-Lóma 1 - Bakoko bible

Elōg-Lóma 1

¹Ma Póol, m̀ɓɔŋle a Yésus Kilístus, nyɔ́ Ɔlolómɛ̄ a yáŋá á lí ɓɛ́ lí ŋ̀ómɓɛ, a pɔ́hɔ̄ ma tóɓó-tóɓó á lí lɛgɛ lí Pɔ́l M̀ɓɛɛŋ yɛɛ́.

²Nyíŋ Pɔ́l M̀ɓɛɛŋ, a manáá yɔ li kakanɛ á Lícii-Lipúán li loole la ɓapɔ́tle-bí-Ɔ́lolómɛ̄.

³Nyíŋ Pɔ́l M̀ɓɛɛŋ ɛg légɓe ja Mɔ́ɔ̄n wɛ́ɛ̄ nyɔ́, á líɓɛ́ɛg lí mut-a-binam, a byááyéé á ŋkaŋ á m̀biya á Dávid,

⁴li loole la M̀búl Mpúán, Ɔ́lolómɛ̄ ɔ tɛ́ɛ́yɛ́ nyɛ́ Mɔ́ɔ̄n wɛ́ɛ̄, ɔ tí nyɛ ŋguu, eceg a pāhyɛ́ nyɛ̄ á póla ɓá ɓá wū. Nyɛ́ nɛ́ a lɛ Yésus Kilístus Ɛtáŋɛ wahá.

⁵La nyɛ́ nɛ́ ɓaá kuh líkaale á lí ɓɛ́ lí ɓáōmɓɛ á lípēm lí jóō jɛ́ɛ́, nɛ́ ndí bi ɓɔŋ nɛ́ yaa milóm ɛ yéɓé la nyɛ́, ɛ óglé ki nyɛ́.

⁶Ɓɛ́nɛ hɔ́ ɓá Yésus a yáŋá, ɓɛ́nɛ ki miní lɛ́ átē a míŋ milóm.

⁷Mag ciile ɓɛ́nɛ ɓot bí ŋyéɓé bí lɛ́ á tísɔn Lóma Ɔlolómɛ̄ a lóohán lí diŋɛ, á ɓɛ́nɛ ɓá Ɔlolómɛ̄ a yáŋá á lí ɓɛ́ lí ndog yɛɛ́, ndómbo la nsaŋ bí ŋga sɔ́le la Ɔlolómɛ̄ Etāa wahá la Ɛtáŋɛ wahá Yésus Kilístus bí ɓɛ́ la ɓɛ́nɛ.

⁸Ɔsú la ɔsú, mag tíi Lōó jáma mitamlan li loole la Yésus Kilístus ányúū yāná ɓɛ́nɛ bísɛ, ányúū nɛ ŋyéɓé wáná wá yílɛ́ la ŋkɔŋ-á-sí ásɛ.

⁹Nyɔ́ Ɔlolómɛ̄ mi ŋga ɓɔ̄ŋle la m̀mím wáma ásɛ eceg mi ŋga lɛ́gɛ Pɔ́l M̀ɓɛɛŋ nyí Mɔɔ́n wɛ́ɛ̄, a lɛ mbóŋ yáma nɛ́, mag símhánɛ ɓɛ́nɛ ɛ́h ɓɛ́ ɓé lí tɔmb,

¹⁰eceg la eceg sig mi ŋga kánɛ, nɛ́ ndí mí lɛ́ŋlé ɓɛ́nɛ li oŋle la nsom wɛ́ɛ́.

¹¹Ákaa ɛ́sɛ, kóó écɛ̄ŋ li ɛ́n lí ɓɛ́nɛ ɛ byɛ́ɛ́ ma, nɛ́ ndí li loole la ma, miní kuh puh míkaale mí M̀búl Mpúán á lí letɛ lí ɓɛ́nɛ,

¹²tɔ hɔ́ nɛ́ eceg mi ŋga kɛ́ li ɓɛ́ élɔŋ la ɓɛ́nɛ á yóg yāná, ŋyéɓé wáma á létɛ̄ ɓɛ́nɛ nyuú, ɛwáná wɔ́g á létɛ̄ mā nyuú.

¹³Á élōgyāŋ, mag somo ɓɛ́nɛ li yíhɛ nɛ́, mi ɓáág mag ɔ́ŋɔ li sɔ́ á yóg yāná, ndí nɛ́-tɛ́ɛla nyí vɔ́ŋɔ́ɔ māh la ɓé ma lí ɓɔŋ náŋ, nɛ́ ndí nsɔ́n wáma a úm mitám á yóg yāná ákaa wá úm mɔ̄ á yóg milóm mítām.

¹⁴Mi lɛ̄ ŋ̀yághānɛ́ lí ɓɔŋle lí ɓot bísɛ, ɛ́ ɓɛ́ ɓot bí peg, ɛ́ ɓɛ́ ɓá bí ŋgíla peg, ɛ́ ɓɛ́ ɓayí-jam tɔ ɓá bí ŋgíla eyí.

¹⁵Jɔ́ hɔ́ nɛ, kóó yáma ɛ lɛ ki nɛ́ mi lɛ́gɛ̄ ki ɓɛ́nɛ ɓot bí ŋyéɓé bí tísɔn Lóma Pɔ́l M̀ɓɛɛŋ.

¹⁶Mi ŋgá kɔn ɓé mā ɔ́sɔ̄n lí lɛgɛ lí Pɔ́l M̀ɓɛɛŋ, yɔ nɛ́ ɛ lɛ̄ ŋguu nyí Ɔlolómɛ̄ nyí ɛ ŋga sūŋ jóō nɛ mut a byɛ́ɛ̄ ŋyéɓé la nyɛ́, ɔ́sū la ɔsú ɓá bí lɛ̄ ɓɔ́ɔ̄n bí Élōg-Yúda, ámbúh, tɔ ɓá bí sē ɓé ɓɔ́ɔ̄n bí Élōg-Yúda ɓɔ́g bíg yíg oŋ.

¹⁷Ákaa ɛ́sɛ, múŋ á nyíŋ Pɔ́l M̀ɓɛɛŋ nɛ́ Ɔlolómɛ̄ a étɛ́ nɛ, ag lem nɛ́ ɓot bí lɛ́ sim kí bíg yéɓe la nyɛ́, nyúŋ ŋyéɓé wɔ́ ntámɛ́ á kɔ́ɔ. Ányúū náŋ nɛ́ Licii-Lipúán lí ŋga lága nɛ́: «Tɔ nzáá a tɛ́ɛ́ sim li oŋle la ŋyéɓé a byɛɛ́ la Ɔlolómɛ̄ ag kɛ li niŋ.»

¹⁸La mbálɛ, ɔún ví Ɔ́lolómɛ̄ víg ɛ́ni á lóō ányúū joó nɛ aɓé mut a ŋga ɓɔ̄ŋ la ányúū ŋgilíɓɛ́ɛg lí sim nyí ɓot-bí-bínam, ɓá la miɓɔŋɔg máɓá míɓē, bí ŋga céŋɛ mbálɛ li sál lí nsɔ́n wɛ́ɛ́.

¹⁹Átɔm nɛ́, yé ɛ́sɛ ɛ́ ŋga lá li yílɛ ányúū Ɔlolómɛ̄ ɓɔ́g bíg yí yɔ́, Ɔlolómɛ̄ nyɛ́-mɛ̄n a yíhɛ́ ɓɔ yɔ́ m̀ɓɛɛŋ m̀ɓɛɛŋ.

²⁰Ákaa ɛ́sɛ, li ɓotle káán Ɔ́lolómɛ̄ a vēg ŋkɔŋ-á-sí, li loole la mam a ɓɔ̄ŋ, bíg lem nɛ́ nyɛ́ nɛ́ a lɛ̄ Ɔ́lolómɛ̄, tɔ náŋ ákaa a ŋgá ɛ́ni ɓé la miíh, ŋguu yɛɛ́ nyí ɛ ŋgá man ɓé ɛg yílɛ. La náŋ hɔ́, m̀ɓá, mut tɔ wa a ŋgá lága ɓé nɛ a ŋgá yí ɓé nyɛ.

²¹Tɔ náŋ ákaa bí ŋga yí Ɔ́lolómɛ̄, ɓá pún nyɛ li tíi lí lípēm la mitamlan mí kɔ́ɔ̄ la nyɛ́. Ndí á mveŋghanɛ́, miɔ́ŋɔ máɓá mí ŋgíla eɓáha má jáŋɛ́ ɓɔ, ɔjɔ́h ví m̀mím wáɓá ki vá nīŋgɛ́ ɓɔ á lívito.

²²Kasig bí ŋga ɔ́ŋɔ li yí lí jam, ɓá yaán ɓot bí nzeg,

²³bú veŋghánɛ́ lípēm lí Ɔ́lolómɛ̄ nyɔ́ a ŋgá wú ɓé, ányúū li ɓégɛ lí bísāt bí bí lɛ́ á épunan yé mut-a-binam a ŋga wú, á épunan yé ánɔn, á épunan yé tít míkoo mínaa la á épunan yé tít ɛ́ ŋga ɔ́ŋgɔ mibum á sí.

²⁴Náŋ nɛ́ a yíglé Ɔ́lolómɛ̄ nɛ a mwáhɛ́ ɓɔ nɛ́ bí ɓɔ̄ŋɔ́g mam miɓé mí ŋga nyɛ́ɛle ɓɔ́, nɛ́ ndí ɓɔ́-mɛ̄n bí vínɛ́ nyuú yáɓá á nyaa ɛ ŋga kɔ̄nhan mbɔɔla.

²⁵Ɓáŋ ɓot ɓá veŋghánɛ́ mbálɛ Ɔlolómɛ̄ la minaa. Ɓá ɓégɛ́ byoóm Ɔ́lolómɛ̄ a vēg, bú ɓɔ̄ŋlé ki byɔ́, á m̀mú á lí ɓɔŋle lí nyɛ́-mɛ̄n M̀veg byɔ́, nyɛ́ mut a kɔɔ́ la eɓégɛ á éɓem la eɓem. Ɛ́ ɓɛ́ náŋ!

²⁶Náŋ ki nɛ́ a yíglé Ɔ́lolómɛ̄ nɛ a mwáhɛ́ ɓɔ́ nɛ́ bí ɓɔŋɔ́g yé ɛ́ lɛ́ ɓɔ́ kóó, míŋ mam míg kɔnɛ ɓɔ́ mbɔɔla. Ɓondígá ɓáɓá ɓá veŋghánɛ́ mam kaa pɛ́ɛ́ ɛ sɔ́ɔ́ nɛ́ mindígá ag tɔɔ la páam. Ndí ɓɔ́, ɓá yaanɛ́ nɛ ɓondígá bíg nante la ɓondígá.

²⁷Nlemlem á jam nɛ́ páam ɛ́ ŋga ɓɔ̄ŋ, páam yá pún lí tɔɔ la ɓondígá ákaa ɛ́ sɔ́ɔ́ á kwaŋ. Kóó bí byɛ́ɛ̄ nyí vɔ́ŋɔ́ɔ ɛ lɛ̄ nɛ́, páam ɛ́ nantégé la yíŋí páam etám, miɓɔŋɔg máɓá míg kɔnɛ ɓɔ́ mbɔɔla, jɔ́ nɛ́ bí ŋga kūh nsála á kɔ́ɔ̄ la mijáŋag mí ɓot.

²⁸Ákaa ɓáh ɛ́n ɓé nsɛ́ŋ á lí yí lí Ɔ́lolómɛ̄, Ɔlolómɛ̄ a cóó ɓɔ múŋ á éjōŋ yáɓá éyī, nɛ́ bí ɓɔ̄ŋɔ́g mam mí ɓáh nyɛɛ ɓé lí ɓɔŋ.

²⁹Ɓáŋ ɓot ɓá ɓɔ̄ŋ mam ŋgándag mí míh tɛ́ɛ́ ɓé, bú ɓɔ̄ŋ áɓē, bí byɛ́ɛ̄ eót-ɛ́-mɔ́nī, bí byɛ́ɛ m̀ɓé-a-m̀mím, bí yáhɛ la etáman, bí lɛ́ ɓot bí míólan, bí lɛ́ ɓot bí mómo, bí lɛ́ ɓot bí mícaŋg, bí lɛ́ ɓot ɓá yōm, bí lɛ́ ɓápɔ̄t-ɓot-aɓé,

³⁰bí lɛ́ ɓot bí mísɔgáan, bí lɛ́ ɓálem bí Ɔ́lolómɛ̄, bí lɛ́ ɓot bí nzáŋ, ɓot bí kúmba, ɓot bí líŋgagá, bí lɛ́ ɓásomo aɓé, bí lɛ́ ɓápamɓene ɓabyál ɓɔ́,

³¹bí lɛ́ ɓot bí ŋgíla eyí, ɓot bí ŋgá yáhɛ ɓé míkag máɓá, ɓot bíh byɛ́ɛ́ ɓé ékɔ̄ɔ̄, ndí tɔ ekɔnan-ŋgɔ́ɔ́.

³²Tɔ náŋ ákaa bí ŋga yí misɛ́mɛg mí Ɔ́lolómɛ̄ m̀ɓɛɛŋ, mí mí ŋga lága nɛ́: tɔ nzáá a ŋga ɓɔ̄ŋ yíŋ nyaa mām a kɔ́ɔ́ la nyɛmb, tɔ la náŋ asɛ̄, ɓɔ́ bí ŋgí ɓɔŋɔ́g míŋ mam la li séme lí ɓá bí ŋga ɓɔ̄ŋ mɔ́.