Read Bakoko Elōg-Lóma 11 Bible Online

Elōg-Lóma 11 - Bakoko bible

Elōg-Lóma 11

¹Mag ɓat hɔ́ nɛ: Ɓaá, Ɔlolómɛ̄ a cóó lílōm jɛ́ɛ́ é? La mbálɛ kɛ́m! Ányúū nɛ mā-mɛn mi lɛ́ mɔ́ɔ̄n á lílōm lí Íslāɛl, á mbota nyí Áblaháam, á lílōmɛ lí Bínyámin.

²Ɔlolómɛ̄ āh cóó ɓé lílōm jɛ́ɛ́, jé a dúgú lí pɔhɔ. Mi lɛ mbáki nɛ́ miníg yí m̀ɓɛɛŋ m̀ɓɛɛŋ yé Élīas a ŋgí yó á Lícii-Lipúán, eceg a ŋgí táŋglan ɔ́sū ví Ɔ́lolómɛ̄ ányúū lilóm lí Íslāɛl nɛ́:

³«Ɛtáŋɛ, ɓá ól ɓápɔ́tle-bí-Ɔ́lolómɛ̄ ɓɔ́ɔ, bú búg bítāga-bí-nsúlé byɔ́ɔ. Mā-ntámɛ́ nɛ ma yégle, la má asɛ̄ ki bíg somle mā nyɛmb!»

⁴Ndí, Ɔ́lolómɛ̄ ɔ peeléé nyɛ́ nɛ́: «Mi ŋgí byɛ́ɛ ákōō á páam nzambúwá nyú ma ɓáāg ányúū yáma mā-mɛn, nyú wáh úmle ɓé yé esát bí ŋga yáŋa nɛ́ Báal miɓɔ́ŋ á lí ɓégɛ lí yɔ.»

⁵Nlemlem á jam nɛ́ bi byɛɛ́ nyí lɛn: apuh á ɓot nɛ́ wá yégle, á ɓot Ɔlolómɛ̄ a pɔ́hɔ li oŋle la ediŋ a byɛ́ɛ́ la ɓɔ́.

⁶Ányúū nɛ Ɔlolómɛ̄ a pɔ́hɔ̄ ɓɔ li oŋle la ediŋ yɛ́ɛ́, ndí ah ányúū misɔ́n máɓá ɓé. Ki ɓɔ̄ŋ nɛ́ ɛ́h ɓɛ́ɛg ányúū misɔ́n, kí édiŋ yɛ́ɛ́ ɛ́ sē ɓé taŋ ediŋ.

⁷Náŋ ag somo li laga nɛ́ yéé é? Lílōm lí Íslāɛl lísɛ láh kuh ɓé jam lí ŋga sómo, amáh sig ɓá Ɔlolómɛ̄ a pɔ́hɔ. Ɓáŋá ɓátām, ɓá ɓen lí sɔ́ŋtánɛ,

⁸li oŋle kaa yá ciiɓɛ́ nɛ: «Ɔlolómɛ̄ a yáanɛ́ ɓɔ miéŋgi ɔ lēg ɓɔ miíh nɛ bíh ɛ́nɛ́g ɓé, ɔ lēg ɓɔ miɔ́ɔ́ nɛ bíh ámblégé ɓé. Náŋ nɛ́ ɛ́ ŋgí lɛ nɛ́-tɛ́ɛla nyí lɛn.»

⁹Káísa Dávid ki ag yó nɛ: «Midí máɓá mí yáan tɔ ɓɔ́-mɛ̄n ɔ́ām, mi yáan ɓɔ́-mɛ̄n epéha, jam lí ŋga ɓɛ́h ɓɔ, nɛ́ ndí bí kuh ekɔ́ghɛ yé ɛ́ kɔ́ɔ̄ la ɓɔ́.

¹⁰Miíh mí kóm ɓɔ́ lívito puh la puh nɛ́-tɛ́ɛ bí ku ndím, ɓɔ̄ŋ nɛ́ mikag máɓá mí tíg mí vútɛ.»

¹¹Mag ɓat hɔ́ nɛ: ɓaá, kasig ɓɔ́ɔ̄n bí Élōg-Yúda ɓá ɓomtan bú ɓɛ́hán, jɔ́ nɛ́ ɓá tígle váŋ nɛ́ ɓam ɓam á m̀ɓɛg é? La mbálɛ, kɛ́m! Ndí li kele la ɔvuha váɓá, mílōm mí sē ɓé mí mí Élōg-Yúda má kūh lísuŋga, nyaa nyí ɛ lɛ nɛ́ lilóm lí Íslāɛl lú kēlé mɔ̄ nzoŋ.

¹²Kasig ɔvuha ví ɓɔ́ɔ̄n bí Élōg-Yúda vá byaŋɓɛ́ ŋkɔŋ-á-sí la mam mí m̀ɓɛɛŋ, kasig m̀ɓɛg wáɓá wá byaŋɓɛ́ ɓot bí sē ɓé ɓɔ́ɔ̄n bí Élōg-Yúda la mam mí m̀ɓɛɛŋ, eceg hɔ́ ɓɔ́ɔ̄n bí Élōg-Yúda bísɛ bí ŋga kɛ́ li kuh lí lísuŋga, mam mí m̀ɓɛɛŋ míg kɛ li kondye lí li bul li loo lí ɔ́vega.

¹³Nyí vɔ́ŋɔ́ɔ, mag yíhɛ ɓɛ́nɛ ɓá miní sē ɓé ɓɔ́ɔ̄n bí Élōg-Yúda nɛ́, mi lɛ̄ ŋ̀ómɓɛ ányúū ɓá bí sē ɓé ɓɔ́ɔ̄n bí Élōg-Yúda. Mag ditɛ nsɔ́n wáma,

¹⁴la lipitá nɛ mag ɓétɛ nzoŋ nyí ɓot bí lílōm jáma, á lí ɓɔŋ nɛ́ puh múŋ ɛ́ sūŋɓɛ̄.

¹⁵Ákaa ɛ́sɛ, eceg Ɔlolómɛ̄ a váá ɓɔ́ á ŋgwáāg, a kóm nsaŋ la ŋkɔŋ-á-sí. Yéé ɛ́ ŋga kɛ́ li ɓɔŋɓɛ eceg bí ŋga timan ɓɔ́ lí lɛ́gle é? Náŋ ag kɛ li ɓɛ́ kaa li ɓógo á nyɛmb li timan á éniŋ.

¹⁶Kasig epah ékɔgá ɔ́sū yá tíéɓɛ́ Ɔ́lolómɛ̄, ekɔgá ɛ́sɛ ɛ́ lɛ́ ɛ́yɛ̄ɛ̄. Kasig mikaŋ mí eéé ki má tíéɓɛ́ Ɔ́lolómɛ̄, mitom mɔ́g mí lɛ́ ɛ́mɛ̄ɛ̄.

¹⁷Lilóm lí Íslāɛl lí lɛ́ kaa eéé olíva yé yá ɓɛlɓɛ, la ɓɔ́ bú sɛ́m jogo lí mítom já. Wa nyɔ́ ɔ sē ɓé mɔ́ɔ̄n Élōg-Yúda, ɔ lɛ́ kaa ntom á eéé olíva lipan nyú ɓá átyɛ́ á míŋí mítom má yégle á tín olíva ɓá ɓɛl, á lí ɓɔŋ nɛ́ elɔŋ la míŋ mitom, wág ɔ tómbánɛ mindím mí ŋga sɔ́le á míkaŋ mí nyíŋ tín ɛ olíva.

¹⁸Ányúū náŋ, ɔh yátɓág ɓé ɔ́sū ví mítom má sɛ́mɓɛ. Kí yá ɓɛ́nɛ ɔg ɔ́ŋɔ li yáta, yí nɛ́, wa ɓé nɛ ɔ ɓɛ́gɛ̄ míkaŋ, ndí mikaŋ nɛ́ mí ɓɛ́gɛ̄ wa.

¹⁹Ɔg kɛ yágá ki li laga nɛ́: «Míŋ mitom má sɛ́mɓɛ́ á lí ɓɔŋ nɛ́ má bí átyɛ́ ma.»

²⁰Náŋ a lɛ mbálɛ, má sɛ́mɓɛ́ ányúū nɛ má yɛ́ɛ́ ŋyéɓé, ndí wa, ɔ átɛ váŋ ányúū nɛ ɔ byɛ́ɛ ŋyéɓé. Ɔh yátɓág ɓé, nyɔ̄ŋ jā lítāt!

²¹Ányúū nɛ, kasig Ɔlolómɛ̄ āh mwahɛ ɓé ɓɔ́ɔ̄n bí Élōg-Yúda ɓá bí lɛ́ kaa titih mítom mí yéŋ eéé ɓá ɓɛl, ɔ nyɔŋɔg lítāt, ah náŋ ɓé tɔ wág a ŋgá kɛ ɓé wā lí mwáhɛ́.

²²Légɓé hɔ́, Ɔlolómɛ̄ a lɛ élɔ́ŋgɔ ndí ag ɓéé ki ɔún. Ag ɓéé ɔ́ūn á ŋgwáāg ɓá ɓá ku, ɔ ɓɛ́ ki elɔ́ŋgɔ ányúū yɔ́ɔ, Ndí ɛ́g somlɛ nɛ́ ɔ kóndyé lí ɛ́gɓéne á líɓɛ́ɛg jɛ́ɛ́ lí élɔ́ŋgɔ, ah la náŋ ɓé, wág ɔg kɛ li sɛ́mɓɛ kaa míŋ ntom.

²³Á yé ɛ́ ŋga légɓe ɓɔɔ́n bí Élōg-Yúda, kí ɓá tímān á ŋyéɓé, bíg kɛ ɓɔ́ lí átyɛ sīg-pɛ ápah bí ɓɛ́ɛ́, ányúū nɛ Ɔlolómɛ̄ a byɛ́ɛ́ ŋguu nyí li timan lí lí átyɛ lí ɓɔ sīg-pɛ.

²⁴Ákaa ɛsɛ̄, wa nyɔ́ ɔ lɛ́ titih ntom á éēē ɛ́ olíva nyí lipan, nyú wá sɛ́mɓɛ, ndí bú átyɛ́ wɔ á éēē ɛ́ olíva yá ɓɛlɓɛ, yí náŋ ɓé nɛ̄ ɛ́ sɔ́ɔ́ á kwakwáŋɛ ányúū yɔ́ɔ. Ɓɔɔ́n bí Élōg-Yúda, ɓɔ́, bí ɓɛ́ɛ́ mítom mí éēē yá ɓɛlɓɛ. Ɔlolómɛ̄ ag kɛ hɔ́ ɓɔ lí átyɛ lí m̀ɓɔmblanɛ́ sīg-pɛ á yé eéé ɓá sɔ́léne!

²⁵Á élōgyāŋ, mag somo ɓɛ́nɛ li yíhɛ lí ŋ̀yɛ́ɛ́lāg á mbaŋ, á lí ɓɔŋ nɛ́ miníh nyɔŋɔ́g ɓé ɓɛ́nɛ-mɛ̄n kaa ɓot bí peg. Jogo lí ɓot bí lílōm lí Íslāɛl lá pún lí sɔ́ŋtánɛ, náŋ ag kɛ li ɓemle tɛɛ míŋí mílōm mísɛ má ōŋ nzen Ɔlolómɛ̄.

²⁶Váŋ hɔ́, lilóm lí Íslāɛl lísɛ lí ŋga kɛ́ li suŋɓɛ, ákaa Licii-Lipúán lí ŋga lága nɛ: «Ǹtɔ́hɔ ag kɛ li sɔ́le á tísɔn nyí Síon, ag kɛ li manɛ lí pamú átē a lílōmɛ lí Yákob ányúū Ɔlolómɛ̄.

²⁷Esaa-líat mi ŋga kɛ́ li ɓɔŋ la ɓɔ́ yɔ́ yéŋ, eceg mi ŋga kɛ́ li sáá lí áɓē wáɓá.»

²⁸Ákaa ɓá ɓēn Pɔ́l M̀ɓɛɛŋ, ɓá yaán hɔ́ ɓálem bí Ɔ́lolómɛ̄, náŋ a lɛ á nsɛ́ŋ wáná. Ndí, Ɔ́lolómɛ̄ a pɔ́hɔ̄ ɓɔ, a ŋgí diŋíg ɓɔ́ á jóō lí ɓasáŋɛ́ ɓáɓá bí kwaŋ.

²⁹La mbálɛ, Ɔlolómɛ̄ a ŋgá nyɔŋ ɓé pɛ yé a mān lí tíi, ndí tɔ li veŋe lí míɔ̄ŋɔ ányúū ɓá a mān lí yáŋa.

³⁰Á éceg ɛ́ kwaŋ, maná ndɔ́gɓéné Ɔ́lolómɛ̄, ndí nyí vɔ́ŋɔ́ɔ, maná yí ékɔnan-ŋgɔ́ɔ́ yɛ́ɛ́, ányúū nɛ ɓɔɔ́n bí Élōg-Yúda ɓá ndɔ́gɓéné nyɛ.

³¹Náŋ a lɛ nlemlem la ɓɔ́: nyí vɔ́ŋɔ́ɔ, ɓɔ́g ɓá ndɔ́gɓéné Ɔ́lolómɛ̄, á lí ɓɔŋ nɛ́ miní kuh ekɔnan-ŋgɔ́ɔ́ yɛ́ɛ́, nɛ́ ndí, ɓɔ́g bí kūh yɔ́ nyí vɔ́ŋɔ́ɔ.

³²Ányúū náŋ nɛ Ɔlolómɛ̄ a mwáhɛ nɛ ɓot bísɛ bí ndɔ́gɓéné nyɛ́, nɛ́ ndí a étɛ́ ɓɔ́ bísɛ ekɔnan-ŋgɔ́ɔ́ yɛ́ɛ́.

³³Ɔ́lolómɛ̄ a lóohán lí ɓɛ́ lí élɔ́ŋgɔ, peg yɛ́ɛ̄ la eyí yɛ́ɛ́ bíh byɛ́ɛ́ ɓé lísūg, mut tɔ wa a ŋgá la ɓé lí yí lí mísɛ́mɛg mɛ́ɛ́, mut tɔ wa a ŋgá la ɓé lí yí lí peg yɛ́ɛ́ a vúl!

³⁴Ákaa Licii-Lipúán lí ŋga lága nɛ́: «Nzáá a ŋga yí éɔ̄ŋɔ yé Ɔ́lolómɛ̄ é? Nzáá a ŋga lā nyɛ́ lí tíi lí ŋgéélé é?

³⁵Nzáá a dúgú lí tíi lí Ɔ́lolómɛ̄ jam, sɔ́kágánɛ́ nyɛ́g a sála nyɛ́ é?»

³⁶Kɔɔ la mbálɛ, byɔ́ bísɛ bíg sɔ́le la nyɛ́, ag naŋɛ byɔ́ bísɛ á éniŋ, byɔ́ bísɛ ki bíg timan la nyɛ́. Lipém lí ɓɛ́ la nyɛ́ á éɓem la á éɓem! Ɛ́ ɓɛ́ náŋ.