Read Bakoko Elōg-Lóma 12 Bible Online

Elōg-Lóma 12 - Bakoko bible

Elōg-Lóma 12

¹Á élōgyāŋ, kasig Ɔlolómɛ̄ a ŋga kɔnle ɓɛ́hɛ ŋgɔ́ɔ́, mag sɔ́hye hɔ́ ɓɛ́nɛ nɛ́: miní tí nyɛ́ ɓɛ́nɛ-mɛ̄n kaa byoóm bí nsúlé. Li ɓotle vɔ́ŋɔ́ɔ miníg ógle nyɛ́, miníg ɓɛ́ jā ɛ́ɓɛ̄ɛ̄ la li ɓɔŋ lí yé ɛ́ ŋga nyɛ́ɛle nyɛ́. Nyíŋ patí li ɓégɛ lí nyɛ nɛ ɛ kɔɔ́.

²Miníh oŋlégé ɓé míɓɔŋɔg mí ɓot bí nyú ŋkɔŋ-á-sí á lɛn, ndí Mwahánɛ̄ Ɔlolómɛ̄ a yáanɛ́ ɓɛ́nɛ la eyí péná a ŋga tíi ɓɛ́nɛ, nɛ́ ndí miní la lí yí lí nsom wɛ́ɛ́: Ag somo yé ɛ́ lɛ́ élɔ́ŋgɔ, yé ɛ́ lɛ́ líŋgɔ̄ŋɔ́ á miíh mɛ́ɛ́ la yé ɛ́ lɛ́ tɛ́ŋgɛ́n.

³Li oŋle la mikaale Ɔlolómɛ̄ a tí mā yɛ̄mɛ́, mag laga hɔ́ mut waná sig nɛ́, ah ɔ́ŋlág ɓé lí ɓɛ́ lí yé a sē ɓé, ɓɛ́án la miɔ́ŋɔ mí ŋkɔlɓanɛ́, mut sig a yí li nyɔŋ lí éceg la nsɔ́n Ɔ́lolómɛ̄ a tí nyɛ likɔlɓan la ɔvega ví ŋyéɓé a byɛ́ɛ̄ la Nyɔ́-a-Pɔ́hlɛ.

⁴La mbálɛ, nyúū ɛ lɛ́ ja ya, ndí ɛ byɛɛ́ bíjo ŋgandag, bíŋ bijo bísɛ ki bí ŋgá sál ɓé nlemlem á nsɔ́n.

⁵Tɔ náŋ ákaa bi lɛ ŋgándag, ɓɛ́hɛ bísɛ bi lɛ̄ jā pɔ̄m nyuú á ŋ̀atanɛ́ la Nyɔ́-a-Pɔ́hlɛ. La ɓɛ́hɛ bu átan ɓá la ɓáŋá kaa bijo bí nyúū, yá sig á étɛ̄l yɛ́ɛ́.

⁶Ɓaá kūh nyaa la nyaa míkaale li oŋle la ndómbo Ɔlolómɛ̄ a tí mut sig. Nyɔ́ á kúh líkaale lí lí lɛgɛ lí mínjɛn mí Ɔ́lolómɛ̄, a ɓɔ́ŋ náŋ li oŋle la ŋyéɓé nyú á ɓot bísɛ.

⁷Nyɔ́ ki a kūh líkaale lí lí ɛɛle, a ɛ́ɛ́lé. Nyɔ́ ntám ki a kūh jé lí lí yéglɛ, a yéglɛ́ɛ.

⁸Kíyáɓɛ́nɛ mut a kūh líkaale lí lí tíi lí míkūndá, a tí mikúndá. Nyɔ́ a ŋga káale ɓot, a ɓɔ̄ŋ náŋ ɛ́h ɓɛ́ ɓé lí légɓe lí mbúh. Nyɔ́ a lɛ̄ m̀wɛɛla, a ɓɛ́ m̀wɛɛla la akwáá. Nyɔ́ a ŋga kɔ́nan ŋgɔ́ɔ́ a ɓɔ̄ŋ náŋ la mivag.

⁹Ediŋ yáná ɛ́ ɓɛ́ ediŋ ɛ́ mbálɛ. Miní vínān la aɓé, miní tiŋɓé á lí ɓɔŋ lí m̀ɓɛɛŋ.

¹⁰Ediŋ línyaŋ ɛ́ at ɓɛ́nɛ nɛ́ ndí miní diŋán ɓɛ́nɛ la ɓɛ́nɛ, mut sig a ɓɛ́ nyɔ́ ɔsú á lí ditɛ lí nyɔ́ŋɔ́.

¹¹Miní sálé Nyɔ́ŋ-Ɛsáŋɛ́ la akwáá, ɛ́h ɓɛ́ ɓé lí póŋo, la m̀mím wáná ásɛ.

¹²Kɔnán mívag ányúū lipitá miní byɛ́ɛ̄, miní ɓɛ́la eɔ́hánɛ átē a ndutu, miní nyɔ́hɓé á míkánɛ.

¹³Miní óŋgánɛ ndog-Ɔlolómɛ̄ nyí ya énde. Ɓacɛn bí ŋga sɔ́ á mbóg yāná, miní lɛ́glé ɓɔ́ á nyaa m̀ɓɛɛŋ.

¹⁴Ɓá bi ŋga váŋgɛ ɓɛ́nɛ la ndeeŋgɛ, miníh ɔ́ŋlégé ɓé ɓɔ aɓé, miní ɔ́ŋlé ɓot m̀ɓɛɛŋ ndí ah aɓé ɓé.

¹⁵Miní sōphɛ́ la ɓá bí lɛ́ átē a mivag, miní lée ki la ɓá bí ŋga lée.

¹⁶Miní ámblán m̀ɓɛɛŋ ɓɛ́nɛ la ɓɛ́nɛ, miníh ɓɛ́ɛ́g ɓé la evéhé yé lítaŋgá, ndí miní somó mam mí kɔ́ɔ̄ la ɓɛ́nɛ. Miníh nyɔŋɔ́g ɓé ɓɛ́nɛ-mɛ̄n kaa ɓot bí peg.

¹⁷Miníh timkágánɛ́ ɓé tɔ mut áɓē a ŋga ɓɔ̄ŋ ɓɛ́nɛ, somlán lí ɓɔŋ lí yé ɛ́ lɛ́ m̀ɓɛɛŋ á miíh mí ɓot bísɛ.

¹⁸Kíyáɓɛ́nɛ póla ɛ lɛ, li oŋle la ɔvega náŋ a ŋga yígle la ɓɛ́nɛ, miní nīŋ átē a nsaŋ la ɓot bísɛ.

¹⁹Á élōgyāŋ yé édiŋ, miníh punúg ɓé ɓɛ́nɛ-mɛ̄n, ndí mwahánɛ̄ ɔún ví Ɔ́lolómɛ̄ ví sál nsɔ́n wɛ́ɛ́, átɔm nɛ́ Nyɔ́ŋ-Ɛsáŋɛ́ ag laga á Lícii-Lipúán nɛ́: «Mipuná mí lɛ́ ɛ́máma, ma ki nɛ́ mi ŋga kɛ́ li tíi lí mut sig yé ɛ́ kɔ́ɔ̄ la nyɛ́.»

²⁰Ndí ag laga ki nɛ́: «Kíyáɓɛ́nɛ nzal ɛ byɛ́ɛ ǹlem wɔɔ, tí nyɛ́ lídī, kíyáɓɛ́nɛ evéhé ɛ́ byɛ́ɛ́ nyɛ́, tí nyɛ́ míndīm, átɔm nɛ́, eceg ɔ ŋgɔ ɓɔ̄ŋ náŋ, ɛ́ lɛ́ ɔ́ŋgɛn ɔg komanɛ mikálag mí nzáan á lōó jɛ́ɛ́ lí m̀mú.»

²¹Ɔh mwahkɛ́gɛ́ ɓé nɛ aɓé á dí wa cíŋ, ndí wa, dí áɓē cíŋ la m̀ɓɛɛŋ ɔ ŋgɔ ɓɔ̄ŋ.