Read Bakoko Elōg-Lóma 14 Bible Online

Elōg-Lóma 14 - Bakoko bible

Elōg-Lóma 14

¹Miní lɛ́glé nyɔ́ ŋyéɓé á ŋga ɓɔ̄t, ɛ́h ɓɛ́ ɓé lí sáá lí míɔ̄ŋɔ mɛ́ɛ́.

²Mut ŋyéɓé wá ólo, ŋyéɓé wɛ́ɛ́ ág yígle nyɛ́ lí dí lí byoóm bísɛ, ndí nyɔ́ ŋyéɓé á ŋga ɓɔ̄t ag dí jā bíkāā.

³Nyɔ́ la nyɔ́ a ŋga lá li dí lí byóōm bísɛ, ah pítlág ɓé nyɔ́ a ŋgá dí ɓé byɔ́ bísɛ. Nyɔ́ ki a ŋgá dí ɓé byóōm bísɛ ah kááhɛ́gɛ́ ɓé nyɔ́ a ŋga lá li dí lí byɔ́ bísɛ, átɔm nɛ́, Ɔlolómɛ̄ a mān nyɛ li lɛ́gle náŋ.

⁴Ɔ lɛ nzáá á lí kááhɛ lí ɛ́waŋgá m̀ɓɔŋle é? A byélɓán á nsɔ́n tɔ a jóŋo, náŋ ag légɓe ja ɛ́sāŋɛ́ wɛ́ɛ̄. Ag kɛ hɔ́ lí byelɓan á nsɔ́n wɛ́ɛ́, átɔm nɛ́ Nyɔ́ŋ-Ɛsáŋɛ́ a byɛ́ɛ́ ŋguu li nit lí nyɛ.

⁵Nyɔ́ wa ag ɛ́n nɛ́ alɔ́ ásɛ áh kɔ́ɔ́ ɓé, ntám ag ɛ́n wɔ́ nlemlem. Mut sig a ɓɛ́ mbáki m̀ɓɛɛŋ la yé a ŋga ɔ́ŋɔ nyɛ́-mɛ̄n.

⁶Nyɔ́ la nyɔ́ a ŋga ɛ́n alɔ́ mveŋghanɛ́, ag ɓɔŋ náŋ ányúū Nyɔ́ŋ-Ɛsáŋɛ́. Nyɔ́ a ŋga lá li dí lí byóōm bísɛ, ag ɓɔŋ náŋ ányúū Nyɔ́ŋ-Ɛsáŋɛ́, átɔm nɛ́ ag tíi Ɔlolómɛ̄ mítamlan. Nyɔ́ la nyɔ́ ki a ŋgá dí ɓé byóōm bísɛ ag ɓɔŋ náŋ ányúū Nyɔ́ŋ-Ɛsáŋɛ́, nyɛ́g ag tíi Ɔlolómɛ̄ mítamlan.

⁷Á mbálɛ, mut tɔ wa á ɓɛ́hɛ bísɛ a ŋgá niŋ ɓé ányúū yɛ́ɛ̄ nyɛ́-mɛ̄n, mut tɔ wa ki á a ŋgá wú ɓé ányúū yɛ́ɛ̄ nyɛ́-mɛ̄n.

⁸Átɔm nɛ́, kí biíg niŋ, biíg niŋ ányúū Nyɔ́ŋ-Ɛsáŋɛ́, kí biíg wú, biíg wú ányúū Nyɔ́ŋ-Ɛsáŋɛ́. Jɔ́ nɛ́, ɓa ɓɛ́ á éniŋ tɔ ɓā wú, bi lɛ ɓá bí Nyɔ́ŋ-Ɛsáŋɛ́.

⁹Ákaa ɛ́sɛ, Nyɔ́-a-Pɔ́hlɛ a wú, la nyɛ́ ɔ tímān á éniŋ ányúū li ɓɛ́ lí Nyɔ́ŋ-Ɛsáŋɛ́ a ɓá ɓá wū la ɓá bí lɛ́ á éniŋ.

¹⁰Ndí wa, ányúū yéé ɔ ŋgɔ kááhɛ mɔɔ́nɛ́sɔ̄ŋ é? Wág, ányúū yéé ɔ ŋgɔ píti mɔɔ́nɛ́sɔ̄ŋ é? Ákaa ɛ́sɛ, ɓɛ́hɛ bísɛ biíg kɛ li tɛ́lɛ á míkāl ɔ́sū ví Ɔ́lolómɛ̄.

¹¹Átɔm nɛ́, Nyɔ́ŋ-Ɛsáŋɛ́ ag laga á Lícii-Lipúán nɛ́: «Mā Nyɔ́ŋ-Ɛsáŋɛ́, kasig mi lɛ á éniŋ, mag laga nɛ́ mut sig ag kɛ li úm lí míɓɔ̄ŋ ɔ́sū vama, mut sig ag kɛ li tíi lí Ɔ́lolómɛ̄ lípēm.»

¹²La náŋ, mut wahá sig ag kɛ li tíi lí Ɔ́lolómɛ̄ ndagle ányúū yɛ́ɛ̄ nyɛ́-mɛ̄n.

¹³Bi mwáhɛ́ hɔ́ lí kááhan ɓɛ́hɛ la ɓɛ́hɛ. Ndí nyɔŋán jā bísúghɛ́nɛ́ nɛ miní ŋgá ɓɔŋ ɓé jam lí ŋga ɓɛ́ mɔɔ́nɛ́sɔ̄ŋ waná ɔ́ɓag ví ŋga yígle nyɛ́ lí ɓɔŋ lí áɓē, ndí tɔ li kuhʼanɛ lí nyɛ á míceglan.

¹⁴Mag yí náŋ, mi lɛ̄ ki mbáki nɛ́, li kele la Nyɔ́ŋ-Ɛsáŋɛ́ Yésus nɛ́, jam tɔ já láh sɔ́ ɓé nɛ lí lɛ́ jam lí líbūá. Ndí, kíyáɓɛ́nɛ mut a nyɔ̄ŋ jam nɛ́ lí lɛ́ jam lí líbūá, ɛnɛ li lɛ́ jam lí líbūá ányúū nyɔ́ŋ mut.

¹⁵Kíyáɓɛ́nɛ ɔg ályɛ mɔɔ́nɛ́sɔ̄ŋ ányúū jam ɔ ŋgɔ dí, ɛnɛ ɔ ŋgɔ́ niŋle ɓé pɛ á édiŋ. Ányúū lidí, ɔh ólhánɛ́gɛ́ ɓé mɔɔ́nɛ́sɔ̄ŋ nyɔ́ ɛ́ lɛ̄ nɛ Nyɔ́-a-Pɔ́hlɛ a wúēléne.

¹⁶Jam lí lɛ́ m̀ɓɛɛŋ ányúū yɔ́ɔ, ɓáŋá ɓáh nyɛɛ ɓé jɔ li ɛ́n lí áɓē á lí kuh lí póla li pɔ́tléne lí jɔ aɓé.

¹⁷Ákaa ɛ́sɛ, Likanʼyɛ lí Ɔ́lolómɛ̄ lí sē ɓé jam lí lídī tɔ jé lí bínyūnyú. Lí lɛ́ jā étɛ̄l-sim, nsaŋ la mivag bí ŋga sɔ́le la M̀búl Mpúán.

¹⁸Kí mut ag ɓɔ̄ŋ nsɔ́n á Nyɔ́-a-Pɔ́hlɛ nyíŋ patí, ag nyɛɛle Ɔlolómɛ̄, ɓot kí bíg séme nyɛ́.

¹⁹Jɔ́ nɛ́, bi sómó hɔ́ yé ɛ́ ŋga sɔ́la ɓɛ́hɛ nsaŋ la li ólɓɛ lí ɓɛ́hɛ bísɛ á ŋyéɓé.

²⁰Ɔh lɔɔ́g ɓé nsɔ́n Ɔ́lolómɛ̄ ányúū ŋkwɛl á lídī. Ɛ́ lɛ́ mbálɛ nɛ́ joó nɛ jam lí ŋga díéɓɛ lá sɔ́ líg púú, ndí ɛ́ sē ɓé m̀ɓɛɛŋ li dí jam lí ŋga óm ɓáŋá á áɓē.

²¹Yé ɛ́ lɛ́ m̀ɓɛɛŋ, ɛ́ lɛ́ lí ɓen lí lí ɓɔŋ lí jam jé lí ŋga lā li kuɛhɛ lí mɔ́ɔ̄nɛ́sāŋ á míceglan, kíyáɓɛ́nɛ lí dí lí tít, ɔh díág ɓé yɔ, kíyáɓɛ́nɛ li nyú lí mílɔg, ɔh nyúág ɓé mɔ̄.

²²Yé ɔ ŋgɔ ɔ́ŋɔ likɔlɓan la nyúŋ ŋkwɛl, náŋɛ̄ yɔ́ átē wɔ́ɔ ɔ́sū ví Ɔ́lolómɛ̄, ɓɛ́ mbáki la yé ŋyéɓé wɔ́ɔ á ŋga lága wa. Misɔ́tá la nyɔ́ a ŋgá kuɛhɛ ɓé nyɛ́-mɛ̄n ŋkál, ki ɔ súgɛ́ nɛ ag oŋle cíŋ-m̀mím yɛ́ɛ̄.

²³Ndí nyɔ́ la nyɔ́ a ŋga dí, ndí ag pendan, a kūh ékɔ́ghɛ, ányúū nɛ miɓɔŋɔg mɛ́ɛ́ mí ŋgá sɔ́le ɓé á njíɓa ŋyéɓé wɛ́ɛ́. La náŋ, yé ɛ́sɛ mut a ŋga ɓɔ̄ŋ ɛ́h ɓɛ́ nyɛ li ɓɛ́ lí mbáki la nyɛ́-mɛ̄n ɛ́ lɛ́ áɓē.